ଭୁବନେଶ୍ବର: ସଂଗୀତ ମହାବିଦ୍ୟାଳୟ ର ମାସିକ ନାଟ୍ୟାୟନ କାର୍ଯ୍ୟକ୍ରମରେ ଗିରୀଶ କନ୍ନଡ଼ ଙ୍କ ନାଟକ,’ଅଗ୍ନି ଓ ବର୍ଷା’ ନାଟକ ବିଭାଗ ଦ୍ବାରା ସଫଳ ମଞ୍ଚାୟନ ହୋଇଛି। ନାଟ୍ୟ ଉତ୍ସବରେ ମହାବିଦ୍ୟାଳୟ ର ଅଧ୍ୟକ୍ଷ ଶ୍ରୀ ବିଜୟ ଜେନା ଙ୍କ ସହିତ ଉପସ୍ଥିତ ଥିଲେ। ସେହିପରି ଭାଷା ସାହିତ୍ୟ ଓ ସଂସ୍କୃତି ବିଭାଗ ର ପ୍ରମୁଖ ଶାସନ ଶଚିବ ଶ୍ରୀ ବିଷ୍ଣୁପଦ ସେଠୀ ମଧ୍ୟ ଯୋଗ ଦେଇଥିଲେ।
ସେହିପରି କେନ୍ଦ୍ର ସଂଗୀତ ନାଟକ ଏକାଡେମୀ ପୁରସ୍କାର ପ୍ରାପ୍ତ ଶ୍ରୀ ମନୋଜ ପଟ୍ଟନାୟକ ଏବଂ ସଂଗୀତ ନାଟକ ଏକାଡେମୀ ସଚିବ ପ୍ରବୋଧ ରଥ ଉପସ୍ଥିତ ଥିଲେ। ନାଟକକୁ ଓଡ଼ିଆରେ ଅନୁବାଦ କରିଛନ୍ତି ପ୍ରତାପ ରାଉତ ଏବଂ ସଂଗୀତ, ପରିକଳ୍ପନା ଓ ନିର୍ଦ୍ଦେଶନା ଦେଇଛନ୍ତି ରାଜ୍ୟ ନାଟ୍ୟ ଜଗତର ବିଶିଷ୍ଟ ନାଟ୍ୟ ନିର୍ଦ୍ଦେଶକ, ନାଟ୍ୟ ଅଧ୍ୟାପକ ଦେବାନନ୍ଦ ନାୟକ ସୋନୀ।
ଅଗ୍ନି ଓ ବର୍ଷା ନାଟକ ଟି ମହାଭାରତର ବିଷୟବସ୍ତୁ ରୁ ଆସିଛି। ଏକଦା ଏକ ରାଜ୍ୟ ରେ ଅନାବୃଷ୍ଟି ହେତୁ ସାତ ବର୍ଷ ଧରି ଏକ ଯଜ୍ଞର ଆୟୋଜନ କରାଯାଇଥିଲା। ତେବେ, କାମ ବାସନା, ଲମ୍ଫଟତା ଓ ପ୍ରତାରଣା ପାଇଁ ସବୁ ଆଶା ଧୋଇ ଯାଇଥିବା ବେଳେ, ଜଣେ ସାଧାରଣ ଝିଅର ମନୁଷ୍ୟତା ଏବଂ ଜଣେ ନଟ ଲୀଳା କରୁଥିବା କଳାକାରର ବିଚାର ବୁଦ୍ଧି ଆଉ ବିବେକ ପାଇଁ ରାଜ୍ୟରେ ବର୍ଷା ଆସିଛି। ନାଟକ ଟି ଜାତୀୟ ତଥା ଆନ୍ତର୍ଜାତୀୟ ସ୍ତରରେ ଖ୍ୟାତି ଅର୍ଜ୍ଜନ କରିଥିବା ଏକ ବହୁ ଚର୍ଚ୍ଚିତ ଶାସ୍ତ୍ରୀୟ ନାଟକ।
ନାଟକଟିର ମଞ୍ଚ ସଜ୍ଜା, ଅମୀୟ ମହାରଣା, ପ୍ରଜ୍ଞାଦତ୍ତ ସାହୁ କରିଥିବା ବେଳେ, ଆଲୋକ ସମ୍ପାଦନା କରିଥିଲେ ରାକେଶ, ପୋଷାକ ଓ ରୂପସଜ୍ଜା କରିଥିଲେ, ମାମା, ପିଙ୍କି ଏବଂ ଲକି। ମହାବିଦ୍ୟାଳୟର ହିନ୍ଦୁସ୍ଥାନୀ କଣ୍ଠ ସଙ୍ଗୀତ ବିଭାଗ, ତବଲା ବିଭାଗ, ଛୋଉ ନୃତ୍ୟ ବିଭାଗ ଏବଂ ବଂଶୀ ବିଭାଗ ସହାୟତା କରିଥିବାରୁ ନାଟକର ନିର୍ଦ୍ଦେଶକ କୃତଜ୍ଞତା ଜ୍ଞାପନ କରିଥିଲେ। ସୂଚନା ଯୋଗ୍ୟ ନାଟକଟି ପୁନଃ ରବିନ୍ଦ୍ର ମଣ୍ଡପରେ ଚଳିତ ମାସ ୨୩ ତାରିଖରେ ମଞ୍ଚସ୍ଥ ହେବ।