ଭୁବନେଶ୍ୱର: ଲୋକପ୍ରିୟ ଓଡିଶୀ ନୃତ୍ୟ ଅନୁଷ୍ଠାନ, ଶ୍ରୀଜନ (ଗୁରୁ କେଳୁଚରଣ ମହାପାତ୍ର ଓଡିଶୀ ନୃତ୍ୟବାସ) ପକ୍ଷରୁ ଭୁବନେଶ୍ୱରର ରବିନ୍ଦ୍ର ମଣ୍ଡପଠାରେ ଉପସରଣମ୍ର ୪ର୍ଥ ସଂସ୍କରଣ ଆୟୋଜନ କରାଯାଇଛି। ଯେଉଁଥିରେ ୫୭ ଜଣ ଯୁବ ନୃତ୍ୟଶିଳ୍ପୀଙ୍କ ଚମତ୍କାର ପ୍ରଦର୍ଶନ ଦେଖିବାକୁ ମିଳିଥିଲା।
ଏହି କାର୍ଯ୍ୟକ୍ରମ ଗୁରୁ ରତିକାନ୍ତ ମହାପାତ୍ରଙ୍କ ଦ୍ୱାରା କୋରିଓଗ୍ରାଫ୍ ହୋଇଥିବା ବିଷ୍ଣୁ ବନ୍ଦନା ସହିତ ଆରମ୍ଭ ହୋଇଥିଲା ଏବଂ ଏହାକୁ ଐଶ୍ୱର୍ଯ୍ୟା ସିଂହଦେବଙ୍କ ଦ୍ୱାରା ଏକ ସମୂହ ସଂରଚନାରେ ଉପସ୍ଥାପନ କରାଯାଇଥିଲା । ନୃତ୍ୟଶିଳ୍ପୀମାନେ ଲୋକପ୍ର୍ରିୟ ଶ୍ଳୋକ ‘ଶାନ୍ତାକାରମ୍ ଭୁଜଗଶୟନମ୍’ ସହିତ ନିଜ କଳାର ପ୍ରଦର୍ଶନ କରିଥିଲେ ।
ଗୁରୁ ବନ୍ଦନାକୁ ମଧ୍ୟ ଗୁରୁ ରତିକାନ୍ତ ମହାପାତ୍ର ନିର୍ଦ୍ଦେଶନା ଦେଇଥିଲେ ଯାହାକୁ ଜି ସଞ୍ଜଙ୍କ ତତ୍ୱାବଧାନରେ ଶ୍ରୀଜନର ଯୁବ ନୃତ୍ୟଶିଳ୍ପୀମାନେ ପରିବେଷଣ କରିଥିଲେ । ନୃତ୍ୟଶିଳ୍ପୀମାନେ ସୁନ୍ଦର ସମୂହ ସଂଗଠନର ଚିତ୍ରଣ କରିଥିଲେ ଯାହା ସେମାନଙ୍କର ସମର୍ପଣଭାବ ଓ ପ୍ରତିଭାକୁ ଆଲୋକିତ କରୁଥିଲା ।
ଏକ ପ୍ରତିଭାଶାଳୀ ନୃତ୍ୟଶିଳ୍ପୀ ସମୂହ ଦ୍ୱାରା ବାଟୁର ଉପସ୍ଥାପନା କରାଯାଇଥିଲା ଯେଉଁଥିରେ ଚିନ୍ମୟୀ, ଅର୍ଚିସା, ସାନ୍ଭି, ଦୀପର୍ଣ୍ଣିତା, ପ୍ରତ୍ୟାଶା, ତ୍ରିଷ୍ଣା, ଶୁଭଲକ୍ଷ୍ମୀ, ଗାୟତ୍ରୀ, ପ୍ରୀତିଶ୍ରୀ, ସତାକ୍ଷୀ, ଦୀପିକା, ରୋଶ୍ନି ଓ ସାଇ ପ୍ରସାଦ ଆଦି ସାମିଲ ଥିଲେ । ଗୁରୁ କେଳୁଚରଣ ମହାପାତ୍ରଙ୍କ ଅଣନାତୁଣୀ ପ୍ରୀତିଶା ମହାପାତ୍ରଙ୍କ ମାର୍ଗଦର୍ଶନରେ ଏହି ସମୂହ ମୂର୍ତି ଭଳି ଅଙ୍ଗଭଙ୍ଗୀ ଓ ମଂଚରେ ଚମତ୍କାର ବିରଚନ ସହିତ ପ୍ରଶଂସନୀୟ ପ୍ରଦର୍ଶନ ପ୍ରଦାନ କରିଛନ୍ତି ।
ଗୁରୁ କେଳୁଚରଣ ମହାପାତ୍ରଙ୍କ ଏକ କାଳଜୟୀ ସଂରଚନା ଆରଭି ପଲ୍ଲବୀକୁ ସୁଜାତା ପ୍ରଧାନଙ୍କ ଦ୍ୱାରା ଗଠିତ ଏକ ପ୍ରତିଷ୍ଠିତ ସମୂହରେ ଉପସ୍ଥାପନ କରାଯାଇଥିଲା । ନୃତ୍ୟଶିଳ୍ପୀମାନେ ବିଭିନ୍ନ ଅଙ୍ଗଭଙ୍ଗୀ ଓ ଦ୍ରୁତ ପାଦଚାଳନା ମାଧ୍ୟମରେ ଓଡିଶୀ ନୃତ୍ୟର ଅନୁଗ୍ରହକୁ ପ୍ରଦର୍ଶିତ କରିଥିଲେ ।
ଏହି କାର୍ଯ୍ୟକ୍ରମରେ ଗୁରୁ ମୀରା ଦାସ, ବରିଷ୍ଠ ଓଡିଶୀ ବ୍ୟାଖ୍ୟାକାର ଓ ଗୁରୁ ଡଃ ସଙ୍ଗୀତା ଗୋସାଇଁ, ଗୁରୁ କେଳୁଚରଣ ମହାପାତ୍ର ଓଡିଶୀ ରିସର୍ଚ୍ଚ ସେଂଟର୍ (ଜିକେସିଏମ୍ ଓଆର୍ସି)ର ପୂର୍ବତନ ମୁଖ୍ୟ କାର୍ଯ୍ୟକାରୀ ଅଧିକାରୀ ଓ ପ୍ରଖ୍ୟାତ ଗାୟକ ଗୁରୁ ଧନେଶ୍ୱର ସ୍ୱାଇଁ, ପ୍ରତିଷ୍ଠିତ ବରିଷ୍ଠ ମାର୍ଦଳା ବ୍ୟାଖ୍ୟାକାର ଓ ଓଡିଶା ଭାଷା ସାହିତ୍ୟ ଓ ସଂସ୍କୃତି (ଓଏଲ୍ଏଲ୍ସି)ର ଯୁଗ୍ମ ନିର୍ଦ୍ଦେଶକ , ଓଏଏସ୍ (ଏସ୍), ଶ୍ରୀ ସୁବୋଧ ଚନ୍ଦ୍ର ଆଚାର୍ଯ୍ୟ ପ୍ରମୁଖ ଉପସ୍ଥିତ ଥିଲେ ।
ଏହି କାର୍ଯ୍ୟକ୍ରମ ଅତିଥିଙ୍କ ଦ୍ୱାରା ପ୍ରଦୀପ ପ୍ରଜ୍ଜ୍ୱଳନ ସହିତ ଆରମ୍ଭ ହୋଇଥିଲା ଏବଂ ପରେ ଗୁରୁ ରତିକାନ୍ତ ମହାପାତ୍ର ସ୍ୱାଗତ ଅଭିଭାଷଣ ପ୍ରଦାନ କରିଥିଲେ ।
ଗ୍ରାଣ୍ଡ ଫିନାଲେ କାର୍ଯ୍ୟକ୍ରମରେ ଶ୍ରୀଜନର ଯୁବ ଓ ନୂଆ ନୃତ୍ୟଶିଳ୍ପୀମାନେ ଗୁରୁ ରତିକାନ୍ତ ମହାପାତ୍ରଙ୍କ ଦ୍ୱାରା ନିର୍ଦ୍ଦେଶିତ ଏକ ନୂତନ-ଶାସ୍ତ୍ରୀୟ ଓଡିଶୀ ନୃତ୍ୟ ସାମକଳାର ପ୍ରଦର୍ଶନ କରିଥିଲେ । ନୃତ୍ୟଶିଳ୍ପୀ ପ୍ରାଚୀ, ଶୃତି ଜ୍ୟୋତ୍ସ୍ନା, ନିଶିତା, ଅଭିଶିକ୍ତା, ଦୀପ୍ରନ୍ୱିତା, ଆଞ୍ଜେଲିନା , ଅମ୍ରିତା ଓ ପ୍ରୀତି ପ୍ରଜ୍ଞା ଆତ୍ମବିଶ୍ୱାସ ଓ ଉତ୍ସାହ ସହିତ ସୁନ୍ଦର ଗତିବିଧି ଓ ରିଦିମିକ୍ ଶୈଳୀର ପରିବେଷଣ କରିଥିଲେ । ଶ୍ରୀଜନର ମୁଖ୍ୟ ଅଧ୍ୟାପିକା ଓ ଲୋକପ୍ରିୟ ଓଡିଶୀ ନୃତ୍ୟଶିଳ୍ପୀ ଶ୍ରୀମତି ରାଜଶ୍ରୀ ପ୍ରହରାଜଙ୍କ ମାର୍ଗଦର୍ଶନରେ ସେମାନଙ୍କର ପ୍ରଶିକ୍ଷଣ ଏହି ପ୍ରଦର୍ଶନରେ ଦେଖିବାକୁ ମିଳିଥିଲା ।
ଶ୍ରୀଜନର ଇନ୍ଷ୍ଟ୍ରୁମେଂଟାଲ ପ୍ରୋଗ୍ରାମ ଏଗ୍ଜିକ୍ୟୁଟିଭ୍ ଓ ଲାଇଟ୍ ଡିଜାଇନର୍ ଶ୍ରୀ ଦେବୀପ୍ରସାଦ ମିଶ୍ରଙ୍କ ଦ୍ୱାରା ଡିଜାଇନ୍ କରାଯାଇଥିବା ଚମତ୍କାର ଲାଇଟ୍ ପ୍ରଦର୍ଶନଗୁଡିକୁ ଆହୁରି ଆକର୍ଷଣୀୟ କରିଥିଲା । ଶନିବାର ସନ୍ଧ୍ୟାର କାର୍ଯ୍ୟକ୍ରମ ଥିଲା ଉପସରଣମ୍, ଓଡିଶୀ ନୃତ୍ୟ କ୍ଷେତ୍ରରେ ଯୁବ ପ୍ରତିଭାମାନଙ୍କର ଏକ ବାର୍ଷିକ ପ୍ରଦର୍ଶନ ଯାହାକୁ ଶ୍ରୀଜନର ନିର୍ଦ୍ଦେଶକ ଏବଂ ଶ୍ରୀ ଶ୍ରୀ ୟୁନିଭର୍ସିଟିରେ ଫ୍ୟାକ୍ଲ୍ଟି ଅଫ୍ ଆର୍ଟସ୍ କମ୍ୟୁନିକେଶନ୍ସ ଆଣ୍ଡ ଇଣ୍ଡିକ୍ ଷ୍ଟଡିଜ୍ର ଡିନ୍ ଗୁରୁ ରତିକାନ୍ତ ମହାପାତ୍ରଙ୍କ ଦ୍ୱାରା ପରିକଳ୍ପନା କରାଯାଇଥିଲା ।
