ନୂଆଦିଲ୍ଲୀ: ଆସନ୍ତା ବର୍ଷ ଭାରତରେ ହେବାକୁ ଥିବା ଲୋକସଭା ନିର୍ବାଚନ ସମ୍ପର୍କରେ ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ ଏକ ବଡ଼ ବିବୃତ୍ତି ଦେଇଛନ୍ତି। ପୁଟିନ କହିଛନ୍ତି ଯେ, ସେ ତାଙ୍କ ବନ୍ଧୁଙ୍କ ପାଇଁ ସମସ୍ତ ସଫଳତା କାମନା କରୁଛନ୍ତି। ରାଜନୈତିକ ସହଯୋଗକୁ ଖାତିର ନକରି ନୂଆଦିଲ୍ଲୀ ଏବଂ ମସ୍କୋ ମଧ୍ୟରେ “ପାରମ୍ପାରିକ ବନ୍ଧୁତ୍ୱପୂର୍ଣ୍ଣ ସମ୍ପର୍କ” ରହିବ ବୋଲି ସେ କହିଛନ୍ତି। ଋଷର ରାଷ୍ଟ୍ରପତି ପୁଟିନ ମସ୍କୋରେ ବୈଦେଶିକ ବ୍ୟାପାର ମନ୍ତ୍ରୀ ଡା ଏସ ଜୟଶଙ୍କରଙ୍କ ସହ ସାକ୍ଷାତ ସମୟରେ ଲୋକସଭା ନିର୍ବାଚନକୁ ନେଇ ବୟାନ ଦେଇଛନ୍ତି।
ଏହା ସହିତ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଋଷ ଗସ୍ତ କରିବାକୁ ନିମନ୍ତ୍ରଣ କରିଛନ୍ତି। ପୁଟିନ ଏହା ମଧ୍ୟ କହିଛନ୍ତି ଯେ, ସେ ୟୁକ୍ରେନର ଘଟଣାକ୍ରମ ସମ୍ପର୍କରେ ପ୍ରଧାନମନ୍ତ୍ରୀଙ୍କ ସହ କଥା ହୋଇଛନ୍ତି। ସେ କହିଛନ୍ତି ଯେ, “ଅନେକ ଥର ମୁଁ ତାଙ୍କୁ ପରାମର୍ଶ ଦେଇଥିଲି ଯେ ସେଠାରେ କିପରି କାର୍ଯ୍ୟ ଚାଲିଛି ଏବଂ ମୁଁ ଜାଣେ ଯେ ପ୍ରଧାନମନ୍ତ୍ରୀ ମୋଦୀ ଯଥାସମ୍ଭବ ଚେଷ୍ଟା କରିବାକୁ ପ୍ରସ୍ତୁତ ଅଛନ୍ତି ଯାହା ଦ୍ଵାରା ଶାନ୍ତିପୂର୍ଣ୍ଣ ଉପାୟରେ ଏହି ସମସ୍ୟାର ସମାଧାନ ହୋଇପାରିବ।”
ଋଷର ରାଷ୍ଟ୍ରପତି କହିଛନ୍ତି ଯେ, ମସ୍କୋ ଏହା ଦେଖି ବହୁତ ଖୁସି ଯେ ସାରା ବିଶ୍ୱରେ ଅଶାନ୍ତି ଦେଖାଦେଇଥିଲେ ମଧ୍ୟ ଏସିଆର ପ୍ରକୃତ ବନ୍ଧୁ ଭାରତ ସହ ସମ୍ପର୍କ ସ୍ଥିର ପ୍ରଗତିରେ ଅଛି। ତାଙ୍କ ବନ୍ଧୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଋଷ ଗସ୍ତରେ ଆସିଲେ ସେ ବହୁତ ଖୁସି ହେବେ ବୋଲି ପୁଟିନ କହିଛନ୍ତି। ଏହି ସମୟ ମଧ୍ୟରେ ଉଭୟ ନେତା ଋଷ ଏବଂ ଭାରତୀୟ ସମ୍ପର୍କର ସମସ୍ତ ପ୍ରାସଙ୍ଗିକ, ସାମ୍ପ୍ରତିକ ପ୍ରସଙ୍ଗ ଏବଂ ଭବିଷ୍ୟତ ବିଷୟରେ ଆଲୋଚନା କରିବାକୁ ସମର୍ଥ ହେବେ।
ବନ୍ଧୁଙ୍କୁ ସଫଳତା ପାଇଁ ଶୁଭେଚ୍ଛା- ପୁଟିନ୍:
ଡା ଜୟଶଙ୍କରଙ୍କ ଜରିଆରେ ପ୍ରଧାନମନ୍ତ୍ରୀଙ୍କୁ ଶୁଭେଚ୍ଛା ଜଣାଇବାକୁ ଋଷର ରାଷ୍ଟ୍ରପତି ପୁଟିନ କହିଛନ୍ତି। ଏହା ସହିତ ପୁଟିନ କହିଛନ୍ତି ଯେ, ସେ ପିଏମ ମୋଦୀଙ୍କୁ ଭେଟିବାକୁ ଚାହୁଁଛନ୍ତି। ତେବେ ଆସନ୍ତା ବର୍ଷ ଭାରତ ରାଜନୈତିକ କାର୍ଯ୍ୟକ୍ରମରେ ବ୍ୟସ୍ତ ରହିବ ବୋଲି ପୁଟିନ କହିଛନ୍ତି। ଆସନ୍ତା ବର୍ଷ ଦେଶରେ ସାଧାରଣ ନିର୍ବାଚନ ଅନୁଷ୍ଠିତ ହେବ। ଏଭଳି ପରିସ୍ଥିତିରେ ସେ ନିଜ ବନ୍ଧୁଙ୍କୁ ସଫଳତା କାମନା କରୁଛନ୍ତି।