ବାଲୁଗାଁ: ବାଲୁଗାଁ ମହାବିଦ୍ୟାଳୟ ଦର୍ଶନ ବିଭାଗ ପକ୍ଷରୁ ଭାରତର ବିଶିଷ୍ଟ ଦାର୍ଶନିକ ତଥା ପୂର୍ବତନ ରାଷ୍ଟ୍ରପତି ଡକ୍ଟର ସର୍ବପଲ୍ଲୀ ରାଧାକୃଷ୍ଣନଙ୍କ ୧୩୬ ତମ ଜୟନ୍ତୀ ଅବସରରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ଦର୍ଶନ ବିଭାଗ ମୁଖ୍ୟ ଡକ୍ଟର କୈଳାସ ଚନ୍ଦ୍ର ମହାରଣାଙ୍କ ସଭାପତିତ୍ୱରେ ଆୟୋଜିତ ଉକ୍ତ ସମ୍ପାନରେ ମୁଖ୍ୟ ଅତିଥିଭାବେ ବିଜୟ କୁମାର ନନ୍ଦ ଯୋଗଦେଇ କହିଲେ ଯେ, ଶିକ୍ଷକ ମାନେ ହେଉଛନ୍ତି ସମାଜର ଦର୍ପଣ ଓ ଶିକ୍ଷାର୍ଥୀମାନଙ୍କର ଜୀବନ୍ତ ଦୃଷ୍ଟାନ୍ତ। ଚରିତ୍ର ଗଠନ ଠାରୁ ଆରମ୍ଭ କରି ରାଷ୍ଟ୍ରଗଠନ ପର୍ଯ୍ୟନ୍ତ ପ୍ରତ୍ୟକ କାର୍ଯ୍ୟରେ ସେମାନଙ୍କର ଜ୍ଞାନ, ଅଧ୍ୟବସାୟ,ଧୈର୍ଯ୍ୟ,ପ୍ରତିବଦ୍ଧତା ଓ ଦୂରଦର୍ଶିତା ସର୍ବଦା ଶିକ୍ଷାର୍ଥୀମାନଙ୍କୁ ଅନୁପ୍ରାଣିତ କରିଥାଏ।
ଅଧ୍ୟକ୍ଷ ଡକ୍ଟର ଲକ୍ଷ୍ମୀଧର ସୁବୁଦ୍ଧି ବୈଦିକ ପରମ୍ପରାରେ ଗୁରୁମାନଙ୍କର ସ୍ଥାନ ଓ ସମାଜ ଗଠନରେ ସେମାନଙ୍କର ଅଙ୍ଗିକାରବଦ୍ଧତା ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ। ଏହି ଅବସରରେ ପ୍ରତିବର୍ଷ ବିଭାଗ ପକ୍ଷରୁ ପ୍ରଦାନ କରାଯାଉଥିବା ଶ୍ରେଷ୍ଠ ଗୁରୁ ଗୌରବ ସମ୍ମାନ ଚଳିତ ବର୍ଷ ପ୍ରଫେସର ବିଜୟ କୁମାର ନନ୍ଦଙ୍କୁ ଅଧ୍ୟକ୍ଷ ଡକ୍ଟର ସୁବୁଦ୍ଧି ପ୍ରଦାନ କରିଥିଲେ।
ପଦାର୍ଥ ବିଜ୍ଞାନର ଜଣେ ଆଦର୍ଶ ଅଧ୍ୟାପକ ଓ ଗୋଦାବରୀଶ ମହାବିଦ୍ୟାଳୟର ପ୍ରାକ୍ତନ ଅଧ୍ୟକ୍ଷ ଭାବରେ ପ୍ରଫେସର ନନ୍ଦଙ୍କର ଶୈକ୍ଷିକ ଅବଦାନ, ବିଭିନ୍ନ ଜାତୀୟ ତଥା ସାମାଜିକ ସଂଗଠନରେ ସାମାଜିକ ସେବା ନେତୃତ୍ୱ ସମ୍ପର୍କରେ ଡକ୍ଟର ମହାରଣା ଆଲୋଚନା କରିଥିଲେ।
ସେମିନାର ସଂଯୋଜିକା ଅଧ୍ୟାପିକା ମନସ୍ବିନୀ ପଟ୍ଟନାୟକ କାହାଣୀ ଅବତାରଣା ମାଧ୍ୟମରେ ଗୁରୁଦିବସର ତାତ୍ପର୍ଯ୍ୟ ଉପସ୍ଥାପନା କରିଥିଲେ।
ଏହି ଅବସରରେ ଗତ ସ୍ନାତକ ପରୀକ୍ଷାରେ ସର୍ବୋଚ୍ଚ ମାର୍କ ରଖିଥିବା ଛାତ୍ରୀ ଜ୍ୟୋତି ବିଶ୍ୱାସ, ପ୍ରବନ୍ଧ ଓ କୁଇଜ ପରୀକ୍ଷାରେ କୃତିତ୍ୱ ଅର୍ଜନ କରିଥିବା ଛାତ୍ରୀ ସରସ୍ବତୀ ଘଟୁଆଳି, ଲକ୍ଷ୍ମୀପ୍ରିୟା ପ୍ରଧାନ, ସନ୍ଧ୍ୟାରାଣୀ ପାଇକରାୟ, ଯସ୍ମିନ ବଳିୟାରସିଂହ, ଲୋପା ସେନ, କ୍ରିଷ୍ଣା ସୁନ୍ଦରାୟ ଓ ସରସ୍ୱତୀ ଦାସଙ୍କୁ ମୁଖ୍ୟ ଅତିଥି ପୁରସ୍କୃତ କରିଥିଲେ। ଆଲୋଚନା ଚକ୍ରରେ ଛଅ ଜଣ ଛାତ୍ରୀ ଡକ୍ଟର ରାଧାକୃଷ୍ଣଙ୍କ ଦର୍ଶନ ସମ୍ପର୍କରେ ପ୍ରବନ୍ଧ ପାଠ କରିଥିଲେ।
କାର୍ଯ୍ୟକ୍ରମ ଟିକୁ ଛାତ୍ରୀ ଲକ୍ଷ୍ମୀପ୍ରିୟା ପ୍ରଧାନ ସଂଯୋଜନା କରିଥିବା ବେଳେ ସନ୍ଧ୍ୟାରାଣୀ ପାଇକରାୟ ଧନ୍ୟବାଦ ଅର୍ପଣ କରିଥିଲେ।