ପାଟନା: କେନ୍ଦ୍ର ସରକାର ଉପସ୍ଥାପନ କରିଥିବା ବଜେଟକୁ ନିରାଶାଜନକ ବୋଲି ବର୍ଣ୍ଣନା କରି ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ବୁଧବାର କହିଛନ୍ତି ଯେ, ଏଥିରେ ଦୂରଦୃଷ୍ଟିର ଅଭାବ ରହିଛି। ନୀତୀଶ କହିଛନ୍ତି ଯେ, ପ୍ରତିବର୍ଷ ବଜେଟର ପ୍ରାଥମିକତା ବଦଳାଯାଏ, ଯାହା ଫୋକସର ଅଭାବ ଏବଂ ଅର୍ଥର ଅଭାବ ହେତୁ ସଂପୂର୍ଣ୍ଣ ହୋଇନାହିଁ।
ସେ କହିଛନ୍ତି ଯେ ବିହାର ଏହି ବଜେଟକୁ ନେଇ ନିରାଶ ହୋଇଛି ଏବଂ ପୁଣି ଥରେ ସ୍ୱତନ୍ତ୍ର ମାନ୍ୟତା ପାଇଁ ଚାହିଦାକୁ ଅଣଦେଖା କରାଯାଇଛି। ସେ କହିଛନ୍ତି ଯେ ବିହାର ଭଳି ରାଜ୍ୟକୁ ଆଗକୁ ନ ନେଇ ସମାବେଶୀ ବିକାଶର ସ୍ୱପ୍ନ ସମ୍ଭବ ନୁହେଁ।
ମୁଖ୍ୟମନ୍ତ୍ରୀ କହିଛନ୍ତି ଯେ, ସମାବେଶୀ ବିକାଶ ଅଧୀନରେ ବିହାର ସରକାର ଅର୍ଥମନ୍ତ୍ରୀଙ୍କ ବବୈଠକରେ କେନ୍ଦ୍ର ବଜେଟରେ ୨୦ ହଜାର କୋଟି ଟଙ୍କାର ଏକ ସ୍ୱତନ୍ତ୍ର ପ୍ୟାକେଜ୍ ଦାବି କରିଛନ୍ତି, ଯାହା ବଜେଟରେ ଦିଆଯାଇ ନାହିଁ। ସେ କହିଛନ୍ତି ଯେ, ଯୁବକମାନଙ୍କ ପାଇଁ ରୋଜଗାର ସୃଷ୍ଟି ସମ୍ବନ୍ଧରେ ବଜେଟରେ କୌଣସି ବ୍ଲୁ ପ୍ରିଣ୍ଟ ଦୃଶ୍ୟମାନ ହେଉନାହିଁ।
ମୁଖ୍ୟମନ୍ତ୍ରୀ କହିଛନ୍ତି ଯେ, ରାଜ୍ୟଗୁଡିକର ଆର୍ଥିକ ସ୍ଥିତିକୁ ଅଣଦେଖା କରାଯାଇଛି ଏବଂ ୨୦୨୩-୨୪ ବର୍ଷରେ ରାଜ୍ୟ ସରକାରଙ୍କ ଋଣ ସୀମାରେ କୌଣସି ଆଶ୍ଵସ୍ତି ପ୍ରଦାନ କରାଯାଇ ନାହିଁ। ସେ କହିଛନ୍ତି ଯେ ବିହାର ସରକାର ଏହାର ସ୍ମାରକପତ୍ରରେ ଏହାକୁ ୪.୫ ପ୍ରତିଶତ ରଖିବାକୁ ଅନୁରୋଧ କରିଥିଲେ, ଯାହା ପଛୁଆ ରାଜ୍ୟର ବିକାଶ ତଥା ନୂତନ ନିଯୁକ୍ତି ସୃଷ୍ଟିରେ ଲାଭଦାୟକ ହେବ।
ମୁଖ୍ୟମନ୍ତ୍ରୀ କହିଛନ୍ତି ଯେ, କେନ୍ଦ୍ର ବଜେଟରେ ଭାରତ ସରକାର ସାତଟି ପ୍ରାଥମିକତା ସ୍ଥିର କରିଛନ୍ତି ଏବଂ ଏହା କେବଳ କେନ୍ଦ୍ର ସରକାରଙ୍କ ପୂର୍ବରୁ ଚାଲିଥିବା ଯୋଜନାର ଏକ “ପୁନଃ ପ୍ୟାକେଜିଂ” ଅଟେ।
ଏହାପୂର୍ବରୁ ବିହାର ଉପମୁଖ୍ୟମନ୍ତ୍ରୀ ତଥା ରାଷ୍ଟ୍ରୀୟ ଜନତା ଦଳ (ଆରଜେଡି) ନେତା ତେଜସ୍ୱୀ ଯାଦବ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ବୁଧବାର ଦିନ ବଜେଟ୍ ଘୋଷଣାକୁ ନେଇ ନିରାଶ ହୋଇଥିବା ଦର୍ଶାଇଛନ୍ତି। ଏବଂ କେନ୍ଦ୍ରରେ ଶାସକ ଭାରତୀୟ ଜନତା ପାର୍ଟି ପୁଣି ଥରେ ବିହାରର ଲୋକଙ୍କୁ ପ୍ରତାରଣା କରିଛନ୍ତି ବୋଲି ସେ କହିଛନ୍ତି।