Tag: ନରେନ୍ଦ୍ର ମୋଦୀ

ନୂଆଦିଲ୍ଲୀ: କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହ ନୂଆଦିଲ୍ଲୀରେ ୧୦,୦୦୦ ନବଗଠିତ ବହୁମୁଖୀ ପ୍ରାଥମିକ କୃଷି ଋଣ ସମିତି (ପ୍ୟାକ୍ସ), ଦୁଗ୍ଧ ଏବଂ ମତ୍ସ୍ୟ ଉତ୍ପାଦନ ସମବାୟ ସମିତିର ଉଦଘାଟନ କରିଛନ୍ତି। ଏହି ଅବସରରେ କେନ୍ଦ୍ର ମତ୍ସ୍ୟ, ପ୍ରାଣୀସମ୍ପଦ ଏବଂ ଦୁଗ୍ଧ ଓ ପଞ୍ଚାୟତିରାଜ ମନ୍ତ୍ରୀ ରାଜୀବ ରଞ୍ଜନ ସିଂ, କେନ୍ଦ୍ର ସମବାୟ ରାଷ୍ଟ୍ରମନ୍ତ୍ରୀ କୃଷ୍ଣପାଲ ଏବଂ ଶ୍ରୀମୁରଲୀଧର ମୋହୋଲ ଏବଂ ସମବାୟ ମନ୍ତ୍ରଣାଳୟର ସଚିବଙ୍କ ସମେତ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ।

ଅମିତ ଶାହ ଦେଶର ଦୁଇ ମହାପୁରୁଷ ପଣ୍ଡିତ ମଦନ ମୋହନ ମାଲବ୍ୟ ଏବଂ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଜୟନ୍ତୀ ଅବସରରେ ଶ୍ରଦ୍ଧାଞ୍ଜଳି ଅର୍ପଣ କରି ତାଙ୍କ ଅଭିଭାଷଣ ଆରମ୍ଭ କରିଥିଲେ। ସେ କହିଥିଲେ ଯେ ପଣ୍ଡିତ ମଦନ ମୋହନ ମାଲବ୍ୟ ଜୀ ଭାରତର ସ୍ୱାଧୀନତା ସଂଗ୍ରାମ ନାୟକମାନଙ୍କ ମଧ୍ୟରେ ଅଗ୍ରଣୀ ସ୍ଥାନ ଅଧିକାର କରିଛନ୍ତି ଏବଂ ସେ ଦେଶର ସ୍ୱାଧୀନତା, ଭାରତୀୟତା, ସଂସ୍କୃତି ଏବଂ ହିନ୍ଦୁ ଧର୍ମର ଚେତନା ଜାଗ୍ରତ କରିବା ପାଇଁ ଆଜୀବନ କାର୍ଯ୍ୟ କରିଥିଲେ। ଶ୍ରୀ ଶାହ କହିଥିଲେ, ପୂର୍ବତନ ପ୍ରଧାନମନ୍ତ୍ରୀ ଶ୍ରୀ ଅଟଳ ବିହାରୀ ବାଜପେୟୀ ଦେଶର ସଂସଦରେ ୫ ଦଶନ୍ଧି ଧରି ଭାରତ ଏବଂ ଏହାର ସଂସ୍କୃତି ପାଇଁ ସ୍ୱର ହୋଇ ସଂସଦକୁ ମାର୍ଗଦର୍ଶନ କରିଥିଲେ । ସେ କହିଥିଲେ ଯେ ପ୍ରଧାନମନ୍ତ୍ରୀ ଭାବରେ ଅଟଳଜୀ ଅନେକ ନୂଆ ପ୍ରୟାସ ଆରମ୍ଭ କରିଥିଲେ, ଯେଉଁ କାରଣରୁ ଭାରତ ଆଜି ଶୀର୍ଷ ସଫଳତା ହାସଲ କରିବାରେ ସକ୍ଷମ ହୋଇଛି । ଅଟଳଜୀ ଭାରତକୁ ପରମାଣୁ ଶକ୍ତି ସମ୍ପନ୍ନ କରିବା ଏବଂ କାର୍ଗିଲ ଯୁଦ୍ଧ ସମୟରେ ଦେଶର ଭୂମି ପାଇଁ ଲଢ଼ିବାର ସିଦ୍ଧାନ୍ତ ପ୍ରତିଷ୍ଠା କରିଥିଲେ। ଅଟଳଜୀ ଦେଶର ଆଦିବାସୀ ଭାଇ ଭଉଣୀଙ୍କ ପାଇଁ ଏକ ଅଲଗା ମନ୍ତ୍ରଣାଳୟ ଗଠନ କରିଥିଲେ ବୋଲି ସେ କହିଛନ୍ତି। ଅଟଳଜୀ ହିଁ ସ୍ୱର୍ଣ୍ଣ ଚତୁର୍ଭୁଜ ରାଜପଥ ଆରମ୍ଭ କରିଥିଲେ ଏବଂ ଦେଶର ସବୁ ଗାଁକୁ ରାଜ୍ୟ ରାଜପଥ ସହ ଯୋଡ଼ିବା ପାଇଁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାର ଶୁଭାରମ୍ଭ କରିଥିଲେ । ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ଆଜି ମହାନ ସ୍ୱାଧୀନତା ସଂଗ୍ରାମୀ ଶ୍ରୀ ଚକ୍ରବର୍ତ୍ତୀ ରାଜଗୋପାଳଚାରୀ ଜୀଙ୍କ ଶ୍ରାଦ୍ଧବାର୍ଷିକୀ, ଯିଏକି ଆମ ବେଦ, ଉପନିଷଦ ଏବଂ ପ୍ରାଚୀନ ସାହିତ୍ୟର ବିଦ୍ୱାନ ଥିଲେ ଏବଂ ସମ୍ବିଧାନ ପ୍ରଣୟନରେ ମଧ୍ୟ ତାଙ୍କର ବହୁତ ବଡ଼ ଅବଦାନ ଥିଲା ।

ଅଟଳଜୀଙ୍କ ଜନ୍ମଶତବାର୍ଷିକୀ ଅବସରରେ ଆଜି ୧୦,୦୦୦ ନୂତନ ବହୁମୁଖୀ ପ୍ରାଥମିକ କୃଷି ଋଣ ସମିତି (ପ୍ୟାକ୍ସ), ଦୁଗ୍ଧ ଓ ମତ୍ସ୍ୟ ଉତ୍ପାଦନ ସମବାୟ ସମିତି ଉଦଘାଟିତ ହୋଇଛି ବୋଲି କେନ୍ଦ୍ର ଗୃହ ଓ ସମବାୟ ମନ୍ତ୍ରୀ କହିଥିଲେ । ସେ କହିଥିଲେ ଯେ ଏହା କେବଳ ଏକ ସଂଯୋଗ ନୁହେଁ କାରଣ ସମ୍ବିଧାନର ୯୭ତମ ସଂଶୋଧନ ଅଟଳଜୀଙ୍କ ସମୟରେ ହୋଇଥିଲା ଏବଂ ଦୀର୍ଘ ଦିନ ଧରି ଅବହେଳିତ ହୋଇ ରହିଥିବା ସମବାୟ ସମିତିଗୁଡ଼ିକୁ ଅଟଳଜୀ ପୁଣିଥରେ ଗୁରୁତ୍ୱ ଦେଇଥିଲେ।

ଅମିତ ଶାହ କହିଥିଲେ ଯେ, ୧୯ ସେପ୍ଟେମ୍ବର ୨୦୨୪ରେ ଆମେ ଏହି ସ୍ଥାନରେ ଏକ ଏସଓପି ପ୍ରସ୍ତୁତ କରିଥିଲୁ ଏବଂ ଏହାର ୮୬ ଦିନ ମଧ୍ୟରେ ଆମେ ୧୦ ହଜାର ପ୍ୟାକ୍ସ ପଞ୍ଜୀକରଣ କାର୍ଯ୍ୟ ଶେଷ କରିଛୁ । ସେ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଯେତେବେଳେ ସମବାୟ ମନ୍ତ୍ରଣାଳୟ ପ୍ରତିଷ୍ଠା କରିଥିଲେ, ସେତେବେଳେ ସେ ‘ସହକାର ସେ ସମୃଦ୍ଧି’ (ସମବାୟରୁ ସମୃଦ୍ଧି) ପାଇଁ ଆହ୍ୱାନ ଦେଇଥିଲେ। ପ୍ରତି ପଞ୍ଚାୟତରେ ସମବାୟ ସମିତି ରହିବା ସହ ସେଠାରେ କୌଣସି ନା କୌଣସି ରୂପରେ କାର୍ଯ୍ୟ କଲେ ହିଁ ‘ସହକାର ସେ ସମୃଦ୍ଧି’ ସମ୍ଭବ ବୋଲି ଶ୍ରୀ ଶାହ କହିଥିଲେ। ପ୍ରାଥମିକ ସମବାୟ ସମିତି ଆମ ଦେଶର ତ୍ରିସ୍ତରୀୟ ସମବାୟ ଢାଞ୍ଚାକୁ ସର୍ବାଧିକ ଶକ୍ତି ଦେଇପାରିବ, ସେଥିପାଇଁ ମୋଦୀ ସରକାର ୨ ଲକ୍ଷ ନୂଆ ପ୍ୟାକ୍ସ ତିଆରି କରିବାକୁ ନିଷ୍ପତ୍ତି ନେଇଥିଲେ।

କେନ୍ଦ୍ର ସମବାୟ ମନ୍ତ୍ରୀ କହିଥିଲେ ଯେ, ୧୦,୦୦୦ ପ୍ରାଥମିକ ସମବାୟ ସମିତି ପଞ୍ଜୀକରଣରେ ନାବାର୍ଡ, ଏନଡିଡିବି ଏବଂ ଏନଏଫଡିବି ବହୁତ ବଡ ଭୂମିକା ଗ୍ରହଣ କରିଛନ୍ତି । ସେ କହିଥିଲେ ଯେ, ସମବାୟ ମନ୍ତ୍ରଣାଳୟ ପ୍ରତିଷ୍ଠା ହେବା ପରେ ସମସ୍ତ ପ୍ୟାକ୍ସର କମ୍ପ୍ୟୁଟରୀକରଣ କରିବା ପାଇଁ ସବୁଠାରୁ ବଡ଼ କାମ କରାଯାଇଥିଲା। କମ୍ପ୍ୟୁଟରୀକରଣ ଆଧାରରେ ପ୍ୟାକ୍ସଗୁଡ଼ିକୁ ୩୨ ପ୍ରକାର ନୂଆ କାର୍ଯ୍ୟକଳାପ ସହିତ ଯୋଡ଼ିବା ପାଇଁ ପଦକ୍ଷେପ ଗ୍ରହଣ କରାଯାଇଥିଲା। ‘‘ଆମେ ପ୍ୟାକ୍ସକୁ ବହୁମୁଖୀ କରିଥିଲୁ ଏବଂ ଏହାକୁ ଭଣ୍ଡାର, ଖତ, ଗ୍ୟାସ, ସାର ଏବଂ ଜଳ ବିତରଣ କାମ ସହିତ ଯୋଡ଼ିଥିଲୁ । ପ୍ରଶିକ୍ଷିତ ମାନବସମ୍ବଳ ଅଭାବ ରହିଲେ ଆମେ ଏସବୁ କରିପାରିବୁ ନାହିଁ ବୋଲି ଶ୍ରୀ ଶାହ କହିଛନ୍ତି। ଏଥିପାଇଁ ଆଜି ଏଠାରେ ଏକ ପ୍ରଶିକ୍ଷଣ ମଡ୍ୟୁଲର ଶୁଭାରମ୍ଭ କରାଯାଇଛି, ଯାହା ପ୍ୟାକ୍ସର ସଦସ୍ୟ ଓ କର୍ମଚାରୀଙ୍କୁ ସମ୍ପୂର୍ଣ୍ଣ ପ୍ରଶିକ୍ଷଣ ଦେବା ପାଇଁ କାର୍ଯ୍ୟ କରିବ। ଏହି ପ୍ରଶିକ୍ଷଣ ମଡ୍ୟୁଲ୍ ଗୁଡ଼ିକ ପ୍ରତ୍ୟେକ ଜିଲ୍ଲା ସମବାୟ ରେଜିଷ୍ଟ୍ରାରଙ୍କ ଦାୟିତ୍ୱ ହେବା ଉଚିତ ଏବଂ ପ୍ୟାକ୍ସର ସଚିବ ଏବଂ କାର୍ଯ୍ୟନିର୍ବାହୀ ସଦସ୍ୟଙ୍କ ଉତ୍ତମ ପ୍ରଶିକ୍ଷଣ ସୁନିଶ୍ଚିତ କରିବା ଉଚିତ ବୋଲି ସେ କହିଥିଲେ।

କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଥିଲେ ଯେ ଆଜି ଏଠାରେ ୧୦ଟି ସମବାୟ ସମିତିକୁ ରୂପେ କିଷାନ କ୍ରେଡିଟ୍‌ କାର୍ଡ, ମାଇକ୍ରୋ ଏଟିଏମ ବିତରଣ କରାଯାଇଛି। ସେ କହିଛନ୍ତି ଯେ ଏହି ଅଭିଯାନ ଅଧୀନରେ ଆଗାମୀ ଦିନରେ ପ୍ରତ୍ୟେକ ପ୍ରାଥମିକ ଦୁଗ୍ଧ ଉତ୍ପାଦନ ସଂସ୍ଥାକୁ ମାଇକ୍ରୋ ଏଟିଏମ ଦିଆଯିବ। ମାଇକ୍ରୋ ଏଟିଏମ୍ ଏବଂ ରୂପେ କିଷାନ କ୍ରେଡିଟ୍ କାର୍ଡ ପ୍ରତ୍ୟେକ ଚାଷୀଙ୍କୁ କମ୍ ମୂଲ୍ୟରେ ଋଣ ଦେବା ପାଇଁ ସହାୟକ ହେବ। ଶ୍ରୀ ଶାହ କହିଥିଲେ ଯେ, ମୋଦୀ ସରକାରଙ୍କ ଦ୍ୱାରା ପ୍ୟାକ୍ସଗୁଡ଼ିକର ସମ୍ପ୍ରସାରଣ ପାଇଁ ସେଗୁଡ଼ିକର କାର୍ଯ୍ୟକାରିତା, ପ୍ରାସଙ୍ଗିକତା, ସାଧନଯୋଗ୍ୟତା ଏବଂ ସକ୍ରିୟତା ପ୍ରତି ଧ୍ୟାନ ଦିଆଯାଇଛି। ପ୍ୟାକ୍ସରେ ୩୨ଟି କାର୍ଯ୍ୟ ଯୋଡ଼ି ଏହାକୁ ଦୃଶ୍ୟମାନ ଓ କାର୍ଯ୍ୟକ୍ଷମ କରାଯାଇଛି ବୋଲି ସେ କହିଥିଲେ। ଗାଁରେ ଥିବା ଜନ ସେବା କେନ୍ଦ୍ର (ସିଏସସି) ଯେତେବେଳେ ପ୍ୟାକ୍ସରେ ପରିଣତ ହୁଏ, ସେତେବେଳେ ଗାଁର ପ୍ରତ୍ୟେକ ନାଗରିକଙ୍କୁ କୌଣସି ନା କୌଣସି ରୂପରେ ପ୍ୟାକ୍ସ ଅଧୀନକୁ ଆସିବାକୁ ପଡ଼େ, ତେଣୁ ଆମେ ଏହାର ପ୍ରାସଙ୍ଗିକତା ମଧ୍ୟ ବୃଦ୍ଧି କରିଛୁ । ଶ୍ରୀ ଶାହ କହିଥିଲେ ଯେ ଯେତେବେଳେ ପ୍ୟାକ୍ସ ଗ୍ୟାସ ବିତରଣ, ପଣ୍ୟ ଭଣ୍ଡାରଣ, ପେଟ୍ରୋଲ ବଣ୍ଟନ ଇତ୍ୟାଦି କାର୍ଯ୍ୟ କରେ, ସେତେବେଳେ ସେଗୁଡ଼ିକର ସକ୍ରିୟତା ଆପେ ଆପେ ବୃଦ୍ଧି ପାଇଥାଏ ଏବଂ ବହୁମୁଖୀ ହୋଇଥିବା କାରଣରୁ ପ୍ୟାକ୍ସର ଜୀବନକାଳ ମଧ୍ୟ ଲମ୍ବା ହେବାର ସମ୍ଭାବନା ରହିଛି । ସେ କହିଥିଲେ, ଏହା ଏକ ବହୁମୁଖୀ କାର୍ଯ୍ୟକ୍ରମ, ଯାହା ମାଧ୍ୟମରେ କୃଷକ ଏବଂ ଗ୍ରାମୀଣ ଅର୍ଥବ୍ୟବସ୍ଥାକୁ ସଶକ୍ତ କରିବା ପାଇଁ ଏକ ଦୃଢ଼ ପ୍ରୟାସ କରାଯିବ।

ଅମିତ ଶାହ କହିଥିଲେ ଯେ କମ୍ପ୍ୟୁଟରୀକରଣ ଓ ପ୍ରଯୁକ୍ତି ବିଦ୍ୟାର ଉପଯୋଗ ପ୍ୟାକ୍ସରେ ସ୍ୱଚ୍ଛତା ଆଣିବା ସହିତ ତୃଣମୂଳ ସ୍ତରରେ ସମବାୟ ବ୍ୟବସ୍ଥା ସମ୍ପ୍ରସାରଣ କରିବ ଏବଂ ମହିଳା ଓ ଯୁବକମାନଙ୍କ ପାଇଁ ରୋଜଗାର ସୃଷ୍ଟି କରିବ । ସେ କହିଥିଲେ ଯେ ପ୍ୟାକ୍ସ କୃଷି ସମ୍ପଦର ସହଜ ଉପଲବ୍ଧତାକୁ ସୁନିଶ୍ଚିତ କରିବ । ତିନୋଟି ନୂଆ ଜାତୀୟ ସ୍ତରର ସମବାୟ ସଂସ୍ଥା ମାଧ୍ୟମରେ ପ୍ୟାକ୍ସ ଜୈବିକ ଉତ୍ପାଦ, ବିହନ ଓ ରପ୍ତାନି ସହିତ କୃଷକମାନଙ୍କ ସମୃଦ୍ଧିର ବାଟ ଖୋଲିବ । ଏହା ସାମାଜିକ ଏବଂ ଆର୍ଥିକ ସମାନତା ଆଣିବ କାରଣ ନୂଆ ମଡେଲ ଉପନିୟମ ମହିଳା, ଦଳିତ, ପଛୁଆ ବର୍ଗ ଏବଂ ଆଦିବାସୀଙ୍କ ଅଂଶଗ୍ରହଣକୁ ସୁନିଶ୍ଚିତ କରିଛି, ଯାହା ସାମାଜିକ ସୌହାର୍ଦ୍ଦ୍ୟ ମଧ୍ୟ ବୃଦ୍ଧି କରିବ ବୋଲି ସେ କହିଥିଲେ ।

କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ କହିଥିଲେ ଯେ, ମୋଦୀ ସରକାର ଆସନ୍ତା ପାଞ୍ଚ ବର୍ଷ ମଧ୍ୟରେ ୨ ଲକ୍ଷ ନୂଆ ପ୍ୟାକ୍ସ ଗଠନ ପାଇଁ ଲକ୍ଷ୍ୟ ଧାର୍ଯ୍ୟ କରିଛନ୍ତି । ପାଞ୍ଚ ବର୍ଷ ପୂର୍ବରୁ ହିଁ ଏହି ଲକ୍ଷ୍ୟ ହାସଲ କରାଯିବ ବୋଲି ଶ୍ରୀ ଶାହ ଦୃଢ଼ ବିଶ୍ୱାସ ପ୍ରକଟ କରିଥିଲେ । ପ୍ରଥମ ପର୍ଯ୍ୟାୟରେ ନାବାର୍ଡ ୨୨,୭୫୦ ପ୍ୟାକ୍ସ ଓ ଦ୍ୱିତୀୟ ପର୍ଯ୍ୟାୟରେ ୪୭,୨୫୦ ପ୍ୟାକ୍ସ ସୃଷ୍ଟି କରିବାକୁ ଲକ୍ଷ୍ୟ ରଖିଥିବା ବେଳେ ଏନଡିଡିବି ୫୬,୫୦୦ ନୂଆ ସମିତି ଗଠନ କରିବ ଏବଂ ୪୬,୫୦୦ ବର୍ତ୍ତମାନର ସମିତିକୁ ସୁଦୃଢ଼ କରିବ ବୋଲି ସେ ସୂଚନା ଦେଇଥିଲେ । ଏନ୍ଏଫଡିବି ୬,୦୦୦ ନୂତନ ମତ୍ସ୍ୟ ସମବାୟ ସମିତି ଗଠନ କରିବ ଏବଂ ୫,୫୦୦ ବର୍ତ୍ତମାନର ମତ୍ସ୍ୟ ସମବାୟ ସମିତିକୁ ସଶକ୍ତ କରିବ। ଏହାବ୍ୟତୀତ ରାଜ୍ୟଗୁଡ଼ିକର ସମବାୟ ବିଭାଗ ୨୫୦୦୦ ପ୍ୟାକ୍ ତିଆରି କରିବେ। ଶ୍ରୀ ଶାହ କହିଥିଲେ ଯେ ନୂଆ ମଡେଲ ଉପନିୟମ ସହିତ ବର୍ତ୍ତମାନ ସୁଦ୍ଧା ୧୧,୬୯୫ ଟି ନୂତନ ପ୍ରାଥମିକ ସମବାୟ ସମିତି ପଞ୍ଜୀକୃତ ହୋଇଛି, ଯାହା ଦେଶ ପାଇଁ ଏକ ବଡ଼ ଉପଲବ୍ଧି। ୨ ଲକ୍ଷ ନୂଆ ପ୍ୟାକ୍ସ ତିଆରି ହେବା ପରେ ଚାଷୀଙ୍କ ଉତ୍ପାଦିତ ଦ୍ରବ୍ୟକୁ ପରୱାର୍ଡ ଏବଂ ବ୍ୟାକୱାର୍ଡ ସଂଯୋଗ ମାଧ୍ୟମରେ ବିଶ୍ୱ ବଜାରକୁ ପହଞ୍ଚାଇବା ବହୁତ ସହଜ ହେବ ବୋଲି ସେ କହିଥିଲେ।

ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ୧୦୦ତମ ଜନ୍ମ ବାର୍ଷିକୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟପ୍ରଦେଶର ଖଜୁରାହୋଠାରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଛନ୍ତି । ଲୋକମାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ଭାରତ ଓ ସମଗ୍ର ବିଶ୍ବର ଖ୍ରୀଷ୍ଟିଆନମାନଙ୍କୁ ଖ୍ରୀଷ୍ଟମାସର ଅଭିନନ୍ଦନ ଜଣାଇଛନ୍ତି । ରାଜ୍ୟରେ ମୁଖ୍ୟମନ୍ତ୍ରୀ ଡ. ମୋହନ ଯାଦବଙ୍କ ନେତୃତ୍ବାଧୀନ ସରକାରର ଏକ ବର୍ଷ ପୂର୍ତ୍ତି ଉପଲକ୍ଷେ ସେ ମଧ୍ୟପ୍ରଦେଶର ଲୋକମାନଙ୍କୁ ଅଭିନନ୍ଦନ ଜଣାଇଥିଲେ । ସେ କହିଥିଲେ ଯେ ଗତ ଏକ ବର୍ଷ ମଧ୍ୟରେ ନୂଆ ନୂଆ ଭିତ୍ତିଭୂମି ପ୍ରକଳ୍ପ କାର୍ଯ୍ୟକାରୀ ହେବା ସହ ବିକାଶମୂଳକ କାର୍ଯ୍ୟ ତ୍ବରାନ୍ବିତ ହୋଇଛି । ପ୍ରଧାନମନ୍ତ୍ରୀ କହିଥିଲେ ଯେ ଆଜି ଐତିହାସିକ କେନ-ବେତଓ୍ବା ନଦୀ ସଂଯୋଗୀକରଣ ପ୍ରକଳ୍ପ, ଦୌଧନ ଡ୍ୟାମ ଓ ମଧ୍ୟପ୍ରଦେଶର ପ୍ରଥମ ଭାସମାନ ସୌର ପ୍ରକଳ୍ପ ଓମକାରେଶ୍ବର ଭାସମାନ ସୌର ପ୍ରକଳ୍ପର ଶିଳାନ୍ୟାସ କରାଯାଇଛି । ଏଥିପାଇଁ ସେ ମଧ୍ୟପ୍ରଦେଶ ଲୋକମାନଙ୍କୁ ଅଭିନନ୍ଦନ ଜଣାଇଥିଲେ ।

ଭାରତରତ୍ନ ଅଟଳ ବିହାରୀ ବାଜପେୟୀଙ୍କ ଜନ୍ମ ଶତବାର୍ଷିକୀ ଯୋଗୁଁ ଆଜିର ଦିନକୁ ଏକ ସ୍ମରଣୀୟ ଦିନ ବୋଲି ଅବିହିତ କରି ପ୍ରଧାନମନ୍ତ୍ରୀ କହିଥିଲେ ଯେ ଆଜିର ଦିନଟି ହେଉଛି ସୁଶାସନ ଓ ଉତ୍ତମ ସେବା ପ୍ରଦାନର ଉତ୍ସବ ଯାହାକି ଆମ ସମସ୍ତଙ୍କ ପାଇଁ ପ୍ରେରଣାଦାୟୀ। ଶ୍ରୀ ବାଜପେୟୀଙ୍କ ସ୍ମୃତିରେ ଡାକଟିକଟ ଓ ମୁଦ୍ରା ଉନ୍ମୋଚନ କରିବା ଅବସରରେ ତାଙ୍କୁ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ ଯେ ଶ୍ରୀ ବାଜପେୟୀ ବିଗତବର୍ଷମାନଙ୍କରେ ତାଙ୍କପରି ଅନେକ ସାଧାରଣ କର୍ମୀମାନଙ୍କୁ ଗଢିଥିଲେ। ଦେଶର ବିକାଶ ଦିଗରେ ଅଟଳଜୀଙ୍କ ସେବା ଆମ ସ୍ମୃତିରେ ସର୍ବଦା ଅବିସ୍ମରଣୀୟ ରହିବ ବୋଲି ପ୍ରଧାନମନ୍ତ୍ରୀ କହିଥିଲେ। ଆଜିଠାରୁ ୧୧୦୦ରୁ ଅଧିକ ଅଟଳ ଗ୍ରାମ ସୁଶାସନ ସଦନର କାମ ଚାଲିବ ଏବଂ ଏଥିପାଇଁ ପ୍ରଥମ କିସ୍ତି ଜାରି କରାଯାଇଛି ବୋଲି ଶ୍ରୀ ମୋଦୀ କହିଥିଲେ। ଅଟଳ ଗ୍ରାମ ସେବା ସଦନ ଗ୍ରାମର ବିକାଶକୁ ତ୍ୱରାନ୍ୱିତ କରିବ ବୋଲି ସେ ମନ୍ତବ୍ୟ ଦେଇଥିଲେ।

ସୁଶାସନ ଏକ ଗୋଟିଏ ଦିନକ ବ୍ୟାପାର ନୁହେଁ ବୋଲି ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ସୁଶାସନ ଆମ ସରକାରର ପରିଚୟ ରହିଆସିଛି । କେନ୍ଦ୍ରରେ କ୍ରମାଗତ ୩ୟ ଥର ପାଇଁ ଓ ମଧ୍ୟପ୍ରଦେଶର କ୍ରମାଗତଭାବେ ସେବା କରିବାର ସୁଯୋଗ ଦେଇଥିବାରୁ ସେ ଲୋକମାନଙ୍କୁ ଧନ୍ୟବାଦ ଦେଇ କହିଥିଲେ ଯେ ଏହା ପଛରେ ସବୁଠାରୁ ବଡ଼ କାରଣ ଥିଲା ସୁଶାସନ । ପ୍ରଧାନମନ୍ତ୍ରୀ ବୁଦ୍ଧିଜୀବୀ, ରାଜନୈତିକ ସମୀକ୍ଷକ ଏବଂ ଅନ୍ୟାନ୍ୟ ବିଶିଷ୍ଟ ଶିକ୍ଷାବିତମାନଙ୍କୁ ଅନୁରୋଧ କରିଥିଲେ ଯେ ସେମାନେ ସ୍ୱାଧୀନତାର ୭୫ ବର୍ଷ ପୂରଣ ଅବସରରେ ବିକାଶ, ଜନକଲ୍ୟାଣ ଏବଂ ସୁଶାସନ ମାନଦଣ୍ଡରେ ଦେଶର ମୂଲ୍ୟାଙ୍କନ କରନ୍ତୁ । ଯେତେବେଳେ କି ଲୋକମାନଙ୍କ ସେବା କରିବାର ସୁଯୋଗ ମିଳିଛି ତାଙ୍କ ସରକାରମାନେ ଜନକଲ୍ୟାଣ ଏବଂ ଉନ୍ନୟନମୂଳକ କାର୍ଯ୍ୟ କୁ ସୁନିଶ୍ଚିତ କରିବାରେ ସଫଳ ହୋଇଛନ୍ତି ବୋଲି ସେ ଉଲ୍ଲେଖ କରିଥିଲେ ।

ଶ୍ରୀ ମୋଦୀ କହିଥିଲେ, “ଆମକୁ ଯଦି କେତେକ ମାନଦଣ୍ଡରେ ମୂଲ୍ୟାଙ୍କନ କରାଯାଏ, ଦେଶ ଜାଣିପାରିବ ଯେ ଆମେ ସାଧାରଣ ଲୋକଙ୍କ ପାଇଁ ଆମେ କେତେ ଉତ୍ସର୍ଗୀକୃତ”। ସେ କହିଥିଲେ ଯେ ଦେଶ ପାଇଁ ନିଜର ଜୀବନକୁ ଉତ୍ସର୍ଗ କରିଥିବା ସ୍ବାଧୀନତା ସଂଗ୍ରାମୀମାନଙ୍କ ସ୍ବପ୍ନ ସାକାର କରିବାକୁ ସରକାର ନିରବଚ୍ଛିନ୍ନଭାବେ କାମ କରୁଛନ୍ତି । ସୁଶାସନ ପାଇଁ କେବଳ ଉତ୍ତମ ଯୋଜନା ନୁହେଁ ବରଂ ଏହାର ପ୍ରଭାବଶାଳୀ କାର୍ଯ୍ୟାନ୍ବୟନ ମଧ୍ୟ ଜରୁରୀ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ସୁଶାସନର ମାପକାଠି ହେଉଛି ସରକାରୀ ଯୋଜନାଗୁଡ଼ିକ ଲୋକଙ୍କୁ କେତେ ମାତ୍ରାରେ ଉପକୃତ କରୁଛନ୍ତି । ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ପୂର୍ବ ସରକାରମାନେ ଅନେକ ଘୋଷଣା କରିଥିଲେ, କିନ୍ତୁ ସେଗୁଡ଼ିକର ସୁଫଳ ଲୋକମାନଙ୍କ ପାଖରେ ପହଞ୍ଚିପାରିନଥିଲା କାରଣ ତାହା ପଛରେ ଉଚିତ ଉଦ୍ଦେଶ୍ୟ ଓ ଗମ୍ଭୀରତାର ଅଭାବ ଥିଲା ।

ପିଏମ କିଶାନ ସମ୍ମାନ ନିଧି ଭଳି ଯୋଜନା, ଯାହାମାଧ୍ୟମରେ ମଧ୍ୟପ୍ରଦେଶର କୃଷକମାନେ ୧୨,୦୦୦ ଟଙ୍କା ପାଉଛନ୍ତି, ସଂପର୍କରେ ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ଜନଧନ ବ୍ୟାଙ୍କ ଆକାଉଣ୍ଟ ଖୋଲିବା ଦ୍ୱାରା ଏହା ସମ୍ଭବ ହୋଇଛି । ପ୍ରଧାନମନ୍ତ୍ରୀ ମଧ୍ୟପ୍ରଦେଶର ଲାଡଲି ବେହନା ଯୋଜନା ଉପରେ ଆଲୋକପାତ କରି କହିଥିଲେ ଯେ ବ୍ୟାଙ୍କ ଆକାଉଣ୍ଟକୁ ଆଧାର ଏବଂ ମୋବାଇଲ ନମ୍ବର ସହ ସଂଯୋଗ କରିବା ବିନା ଏହା ସମ୍ଭବ ହୋଇନଥାନ୍ତା। ପୂର୍ବରୁ ବି ଶସ୍ତା ରାସନ ଯୋଜନା ଥିଲା, କିନ୍ତୁ ଗରିବଙ୍କୁ ରାସନ ପାଇବା ପାଇଁ ସଂଘର୍ଷ କରିବାକୁ ପଡୁଥିଲା, ମାତ୍ର ଆଜି ଗରିବଙ୍କୁ ସମ୍ପୂର୍ଣ୍ଣ ସ୍ୱଚ୍ଛତାର ସହ ମାଗଣା ରାସନ ମିଳୁଛି, ଯାହା ବାଟମାରଣାକୁ ଦୂର କରିବା ସହ ‘ଗୋଟିଏ ଦେଶ, ଗୋଟିଏ ରାସନ କାର୍ଡ’ ଯୋଗୁଁ ଦେଶବ୍ୟାପୀ ଏହି ସୁବିଧା ମିଳିପାରୁଛି ।

ଶ୍ରୀ ମୋଦୀ କହିଥିଲେ, ସୁଶାସନର ଅର୍ଥ ହେଉଛି ନାଗରିକମାନଙ୍କୁ ସରକାରଙ୍କ ନିକଟରେ ନିଜର ଅଧିକାର ମାଗିବାକୁ ପଡିବ ନାହିଁ କିମ୍ବା ସରକାରୀ ଅଫିସକୁ ଦୌଡ଼ିବାକୁ ପଡିବ ନାହିଁ । ତାଙ୍କ ନୀତି ହେଉଛି ଶତ ପ୍ରତିଶତ ହିତାଧିକାରୀଙ୍କ ନିକଟକୁ ଶତ ପ୍ରତିଶତ ଲାଭ ପହଞ୍ଚାଇବା, ଯାହାକି ତା୍ଙ୍କ ସରକାରକୁ ଅନ୍ୟମାନଙ୍କଠାରୁ ଅଲଗା କରୁଛି । ସମଗ୍ର ଦେଶ ଏହା ଦେଖୁଛି, ଏଥିପାଇଁ ଦେଶବାସୀ ତାଙ୍କୁ କ୍ରମାଗତଭାବେ ସେବା କରିବାର ସୁଯୋଗ ଦେଉଛନ୍ତି ବୋଲି ସେ କହିଥିଲେ ।

ସୁଶାସନ ଉଭୟ ବର୍ତ୍ତମାନ ଓ ଭବିଷ୍ୟତର ଆହ୍ବାନର ସମାଧାନ କରେ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଦୁର୍ଭାଗ୍ୟର କଥା ହେଉଛି ଯେ ପୂର୍ବବର୍ତ୍ତି ସରକାରମାନଙ୍କ କୁଶାସନ ଯୋଗୁଁ ବୁନ୍ଦେଲଖଣ୍ଡବାସୀଙ୍କୁ ଅନେକ କଷ୍ଟ ସହିବାକୁ ପଡ଼ିଥିଲା । ପୂର୍ବବର୍ତ୍ତି ସରକାରମାନଙ୍କ ପ୍ରଭାବୀ ଶାସନର ଅଭାବ ଓ ଜଳ ସଂକଟର ଏକ ସ୍ଥାୟୀ ସମାଧାନ ବାହାର କରିବା ପାଇଁ ଚିନ୍ତାର ଅଭାବ ଯୋଗୁଁ ବୁନ୍ଦେଲଖଣ୍ଡର ଚାଷୀ ଓ ମହିଳାମାନଙ୍କ ଅନେକ ପିଢି ଜଳର ପ୍ରତି ବୁନ୍ଦା ପାଇଁ ସଂଘର୍ଷ କରୁଥିଲେ।

ଡ. ବି.ଆର୍. ଡ. ଆମ୍ବେଦକର କିପରି ପ୍ରଥମେ ଭାରତ ପାଇଁ ନଦୀ ଜଳର ମହତ୍ତ୍ୱ ବୁଝିଥିଲେ ସେ ବିଷୟରେ ମନ୍ତବ୍ୟ ଦେଇ ଶ୍ରୀ ମୋଦୀ ଉଲ୍ଲେଖ କରିଥିଲେ ଯେ ଭାରତର ପ୍ରମୁଖ ନଦୀ ଉପତ୍ୟକା ପ୍ରକଳ୍ପ ଗୁଡ଼ିକ ଡ. ଆମ୍ବେଦକରଙ୍କ ଦୂରଦୃଷ୍ଟି ଉପରେ ଆଧାରିତ ଏବଂ କେନ୍ଦ୍ରୀୟ ଜଳ ଆୟୋଗ ଗଠନ ମଧ୍ୟ ତାଙ୍କ ପ୍ରୟାସ ଯୋଗୁଁ ହୋଇଥିଲା । ଜଳ ସଂରକ୍ଷଣ ଏବଂ ବୃହତ ବନ୍ଧ ପ୍ରକଳ୍ପରେ ଡକ୍ଟର ଆମ୍ବେଦକରଙ୍କ ଅବଦାନ ପାଇଁ ପୂର୍ବ ସରକାରମାନେ ତାଙ୍କୁ କେବେ ବି ଉପଯୁକ୍ତ ଶ୍ରେୟ ଦେଇନଥିଲେ ଏବଂ ସେ ଏହି ପ୍ରୟାସ ପ୍ରତି ସେମାନେ କେବେ ବି ଗମ୍ଭୀର ନଥିଲେ ବୋଲି ପ୍ରଧାନମନ୍ତ୍ରୀ ଦୁଃଖ ପ୍ରକାଶ କରିଥିଲେ । ସାତ ଦଶନ୍ଧି ପରେ ମଧ୍ୟ ଭାରତର ଅନେକ ରାଜ୍ୟରେ ଜଳ ବିବାଦ ଲାଗି ରହିଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ପୂର୍ବ ସରକାରମାନଙ୍କର ଉଦ୍ଦେଶ୍ୟର ଅଭାବ ଏବଂ କୁଶାସନ ଏ ଦିଗରେ କୌଣସି ଠୋସ ସମାଧାନ ଉଦ୍ୟମକୁ ବାଧା ଦେଇଥିଲା ।

ପ୍ରଧାନମନ୍ତ୍ରୀ ଆଲୋକପାତ କରିଥିଲେ ଯେ ଶ୍ରୀ ବାଜପେୟୀଙ୍କ ସରକାର ଜଳ ସମ୍ବନ୍ଧୀୟ ସମସ୍ୟାର ସମାଧାନ କରିବା ପାଇଁ ଗମ୍ଭୀରତାର ସହ କାର୍ଯ୍ୟ କରିବା ଆରମ୍ଭ କରିଥିଲେ, କିନ୍ତୁ ୨୦୦୪ ପରେ ସେଗୁଡ଼ିକୁ ପଛକୁ ଠେଲିଦିଆଯାଇଥିଲା । ସେ ଗୁରୁତ୍ୱାରୋପ କରିଥିଲେ ଯେ ତାଙ୍କ ସରକାର ବର୍ତ୍ତମାନ ସାରା ଦେଶର ନଦୀଗୁଡ଼ିକୁ ସଂଯୋଗ କରିବା ଅଭିଯାନକୁ ତ୍ୱରାନ୍ୱିତ କରୁଛନ୍ତି । ସେ କହିଛନ୍ତି ଯେ କେନ୍-ବେଟୱା ସଂଯୋଗୀକରଣ ପ୍ରକଳ୍ପ ବାସ୍ତବରୂପ ନେବାକୁ ଯାଉଛି, ଯାହା ବୁନ୍ଦେଲଖଣ୍ଡ ଅଞ୍ଚଳରେ ସମୃଦ୍ଧି ଏବଂ ଖୁସିର ନୂତନ ଦ୍ୱାର ଖୋଲିବ ।

କେନ-ବେଟଓ୍ବା ସଂଯୋଗୀକରଣ ପ୍ରକଳ୍ପ, ଯାହାକି ଛତରପୁର, ଟିକମଗଡ଼, ନିୱାରୀ, ପାନ୍ନା, ଦମୋହ ଏବଂ ସାଗର ସମେତ ମଧ୍ୟପ୍ରଦେଶର ୧୦ଟି ଜିଲ୍ଲାକୁ ଜଳସେଚନ ସୁବିଧା ଯୋଗାଇ ଦେବ, ତାହାର ଲାଭ ସଂପର୍କରେ ଉଲ୍ଲେଖ କରି ସେ କହିଥିଲେ ଯେ ଏହି ପ୍ରକଳ୍ପ ଉତ୍ତରପ୍ରଦେଶର ବୁନ୍ଦେଲଖଣ୍ଡ ଅଞ୍ଚଳକୁ ମଧ୍ୟ ଉପକୃତ କରିବ, ଯେଉଁଥିରେ ବାନ୍ଦା, ମହୋବା, ଲଳିତପୁର ଏବଂ ଝାନ୍ସୀ ଜିଲ୍ଲା ଅନ୍ତର୍ଭୁକ୍ତ । “ନଦୀ ସଂଯୋଗୀକରଣ ପରି ଏକ ବୃହତ ଅଭିଯାନ ଅଧିନରେ ଦୁଇଟି ପ୍ରକଳ୍ପ କାର୍ଯ୍ୟକାରୀ କରିବାରେ ମଧ୍ୟପ୍ରଦେଶ ପ୍ରଥମ ରାଜ୍ୟ ହୋଇଛି” ବୋଲ ସେ କହିଛନ୍ତି । ନିକଟରେ ରାଜସ୍ଥାନ ଗସ୍ତ ସମୟରେ ପାର୍ବତୀ-କାଲିସିନ୍ଧ-ଚମ୍ବଲ ଏବଂ କେନ୍-ବେଟଓ୍ଵା ସଂଯୋଗୀକରଣ ପ୍ରକଳ୍ପ ମାଧ୍ୟମରେ ଅନେକ ନଦୀକୁ ସଂଯୋଗ କରିବା ନିଶ୍ଚିତ ହୋଇଥିଲା। ପ୍ରଧାନମନ୍ତ୍ରୀ କହିଥିଲେ ଯେ ଏହି ବୁଝାମଣା ଦ୍ୱାରା ମଧ୍ୟପ୍ରଦେଶ ମଧ୍ୟ ବହୁତ ଉପକୃତ ହେବ ।

ଜଳ ନିରାପତ୍ତା ଏକବିଂଶ ଶତାବ୍ଦୀର ସବୁଠାରୁ ବଡ଼ ଆହ୍ୱାନ। କେବଳ ସେହି ଦେଶ ଏବଂ ଅଞ୍ଚଳ ଗୁଡ଼ିକ ହିଁ ପ୍ରଗତି କରିବେ ଯେଉଁଠାରେ ପର୍ଯ୍ୟାପ୍ତ ଜଳ ରହିଛି ଏବଂ ଜଳ ସମୃଦ୍ଧ କୃଷି ଏବଂ ସମୃଦ୍ଧ ଶିଳ୍ପ ପାଇଁ ଜରୁରୀ ବୋଲି ସେ ଗୁରୁତ୍ୱାରୋପ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଗୁଜରାଟରୁ ଆସିଥିବାରୁ, ଯେଉଁଠାରେ ବର୍ଷର ଅଧିକାଂଶ ସମୟ ମରୁଡ଼ି ପରିସ୍ଥିତିରେ ରହିଥାଏ, ସେ ଜଳର ଗୁରୁତ୍ୱ ବୁଝିଛନ୍ତି ଏବଂ କହିଥିଲେ ଯେ ମଧ୍ୟପ୍ରଦେଶରେ ନର୍ମଦା ନଦୀର ଆଶୀର୍ବାଦ ଗୁଜରାଟର ଭାଗ୍ୟ ବଦଳାଇ ଦେଇଛି । ମଧ୍ୟପ୍ରଦେଶର ମରୁଡ଼ି ପ୍ରଭାବିତ ଅଞ୍ଚଳକୁ ଜଳ ସଙ୍କଟରୁ ମୁକ୍ତ କରିବା ତାଙ୍କର ଦାୟିତ୍ୱ ବୋଲି ସେ କହିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ବୁନ୍ଦେଲଖଣ୍ଡର ଲୋକମାନଙ୍କ ପାଇଁ, ବିଶେଷକରି କୃଷକ ଏବଂ ମହିଳାମାନଙ୍କ ଅସୁବିଧା ଦୂର କରିବା ପାଇଁ ଆନ୍ତରିକତାର ସହ କାର୍ଯ୍ୟ କରିବାକୁ ସେ ପ୍ରତିଶ୍ରୁତି ଦେଇଛନ୍ତି । ଏହି ଭିଜନ ଅଧୀନରେ ବୁନ୍ଦେଲଖଣ୍ଡ ପାଇଁ ୪୫ ହଜାର କୋଟି ଟଙ୍କାର ଜଳ ସମ୍ବନ୍ଧୀୟ ଯୋଜନା ପ୍ରସ୍ତୁତ କରାଯାଇଥିବା ସେ ଆଲୋକପାତ କରିଥିଲେ। ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ମଧ୍ୟପ୍ରଦେଶ ଏବଂ ଉତ୍ତର ପ୍ରଦେଶରେ ତାଙ୍କ ସରକାରମାନଙ୍କୁ କ୍ରମାଗତ ଭାବରେ ପ୍ରୋତ୍ସାହିତ କରାଯାଉଥିଲା ଯାହାଫଳରେ କେନ୍-ବେଟୱା ସଂଯୋଗୀକରଣ ପ୍ରକଳ୍ପ ଅଧୀନରେ ଦୌଧନ ଡ୍ୟାମର ଶିଳାନ୍ୟାସ କରାଯାଇଥିଲା । ଏହି ଡ୍ୟାମ୍ ଶହ ଶହ କିଲୋମିଟର ଲମ୍ବର କେନାଲ ନିର୍ମାଣ କରିବ, ଯାହା ପ୍ରାୟ ୧୧ ଲକ୍ଷ ହେକ୍ଟର ଜମିକୁ ଜଳ ଯୋଗାଣ କରିବ ବୋଲି ସେ କହିଛନ୍ତି।

ଶ୍ରୀ ମୋଦୀ କହିଥିଲେ, “ଗତ ଦଶନ୍ଧି ଭାରତର ଇତିହାସରେ ଜଳ ସୁରକ୍ଷା ଏବଂ ଜଳ ସଂରକ୍ଷଣର ଏକ ଅଭୂତପୂର୍ବ ଦଶନ୍ଧି ଭାବରେ ସ୍ମରଣୀୟ ହୋଇ ରହିବ।“ ସେ କହିଛନ୍ତି ଯେ ପୂର୍ବବର୍ତ୍ତୀ ସରକାରମାନେ ଜଳ ସଂପର୍କିତ ଦାୟିତ୍ୱଗୁଡିକୁ ବିଭିନ୍ନ ବିଭାଗ ମଧ୍ୟରେ ବଣ୍ଟନ କରିଥିଲେ, କିନ୍ତୁ ତାଙ୍କ ସରକାର ଏହି ସମସ୍ୟାର ସମାଧାନ ପାଇଁ ଜଳ ଶକ୍ତି ମନ୍ତ୍ରଣାଳୟ ଗଠନ କରିଥିଲେ । ପ୍ରତ୍ୟେକ ଘରେ ଟ୍ୟାପ୍ ପାଣି ପହଞ୍ଚାଇବା ପାଇଁ ପ୍ରଥମ ଥର ପାଇଁ ଏକ ଜାତୀୟ ଅଭିଯାନ ଆରମ୍ଭ କରାଯାଇଛି ବୋଲି ଶ୍ରୀ ମୋଦୀ କହିଛନ୍ତି। ସ୍ୱାଧୀନତା ପରେ ସାତ ଦଶନ୍ଧି ମଧ୍ୟରେ ମାତ୍ର ୩ କୋଟି ଗ୍ରାମୀଣ ପରିବାରକୁ ଟ୍ୟାପ୍ ଜଳ ସଂଯୋଗ ଥିଲା ବୋଲି ଦର୍ଶାଇ ଶ୍ରୀ ମୋଦୀ କହିଥିଲେ ଯେ ଗତ ପାଞ୍ଚ ବର୍ଷ ମଧ୍ୟରେ ସେ ୧୨ କୋଟି ନୂତନ ପରିବାରକୁ ଟ୍ୟାପ୍ ଜଳ ଯୋଗାଇଛନ୍ତି ଏବଂ ଏହି ଯୋଜନାରେ ୩.୫ ଲକ୍ଷ କୋଟି ଟଙ୍କାରୁ ଅଧିକ ଖର୍ଚ୍ଚ ହୋଇଛି। ଜଳ ଜୀବନ ମିଶନର ଅନ୍ୟ ଏକ ଦିଗ ଜଳ ଗୁଣବତ୍ତା ପରୀକ୍ଷା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ସମଗ୍ର ଦେଶରେ ୨,୧୦୦ ଜଳ ଗୁଣବତ୍ତା ପରୀକ୍ଷାଗାର ପ୍ରତିଷ୍ଠା କରାଯାଇଛି ଏବଂ ୨୫ ଲକ୍ଷ ମହିଳାଙ୍କୁ ଗ୍ରାମରେ ପାନୀୟ ଜଳ ପରୀକ୍ଷା ପାଇଁ ତାଲିମ ଦିଆଯାଇଛି । ଏହି ପଦକ୍ଷେପ ହଜାର ହଜାର ଗ୍ରାମକୁ ଦୂଷିତ ପାଣି ପିଇବାର ବାଧ୍ୟବାଧକତାରୁ ମୁକ୍ତ କରିବା ସହ ଶିଶୁ ଓ ଲୋକମାନଙ୍କୁ ରୋଗ ଦାଉରୁ ରକ୍ଷା କରିଛି ବୋଲି ସେ କହିଥିଲେ।

୨୦୧୪ ପୂର୍ବରୁ ଦେଶରେ ପ୍ରାୟ ୧୦୦ଟି ବୃହତ୍ ଜଳସେଚନ ପ୍ରକଳ୍ପ ଥିଲା, ଯାହା ଦଶନ୍ଧି ଦଶନ୍ଧି ଧରି ଅସମ୍ପୂର୍ଣ୍ଣ ଥିଲା। ଏହି ପୁରୁଣା ଜଳସେଚନ ପ୍ରକଳ୍ପଗୁଡ଼ିକୁ ସମ୍ପୂର୍ଣ୍ଣ କରିବା ପାଇଁ ତାଙ୍କ ସରକାର ହଜାର ହଜାର କୋଟି ଟଙ୍କା ଖର୍ଚ୍ଚ କରିବା ସହ ଆଧୁନିକ ଜଳସେଚନ କୌଶଳର ବ୍ୟବହାର କରାଯାଇଛି ବୋଲି ଶ୍ରୀ ମୋଦୀ କହିଥିଲେ। ସେ କହିଥିଲେ ଯେ ଗତ ୧୦ ବର୍ଷ ମଧ୍ୟରେ କ୍ଷୁଦ୍ର ଜଳସେଚନ ସୁବିଧାରେ ପ୍ରାୟ ଏକ କୋଟି ହେକ୍ଟର ଜମି ଯୋଡାଯାଇଛି ଯାହାମଧ୍ୟରେ ରହିଛି ମଧ୍ୟପ୍ରଦେଶରେ ପାଖାପାଖି ୫ ଲକ୍ଷ ହେକ୍ଟର ଜମି ।

ପ୍ରତ୍ୟେକ ବୁନ୍ଦା ଜଳର ପ୍ରଭାବଶାଳୀ ଉପଯୋଗ ପାଇଁ ନିରନ୍ତର ପ୍ରୟାସ କରାଯାଉଛି ବୋଲି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଏବଂ ସ୍ୱାଧୀନତାର ୭୫ ବର୍ଷ ପୂର୍ତ୍ତି ଉପଲକ୍ଷେ ପ୍ରତ୍ୟେକ ଜିଲ୍ଲାରେ ୭୫ଟି ଅମୃତ ସରୋବର ନିର୍ମାଣ ଅଭିଯାନ ଉପରେ ଆଲୋକପାତ କରିଥିଲେ, ଯାହାଫଳରେ ସମଗ୍ର ଦେଶରେ ୬୦,୦୦୦ରୁ ଅଧିକ ଅମୃତ ସରୋବର ସୃଷ୍ଟି ହୋଇଛି । ଜଳଶକ୍ତି ଅଭିଯାନ ଏବଂ କ୍ୟାଚ୍ ଦି ରେନ୍ ଅଭିଯାନର ଶୁଭାରମ୍ଭ ବିଷୟରେ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ, ଯାହା ଅଧୀନରେ ସମଗ୍ର ଦେଶରେ ୩ ଲକ୍ଷରୁ ଅଧିକ ରିଚାର୍ଜ କୂପ ନିର୍ମାଣ କରାଯାଉଛି । ମଧ୍ୟପ୍ରଦେଶ ସମେତ ଭୂତଳ ଜଳସ୍ତର ସର୍ବନିମ୍ନ ଥିବା ରାଜ୍ୟରେ ଅଟଳ ଭୂଜଳ ଯୋଜନା କାର୍ଯ୍ୟକାରୀ କରାଯାଉଛି ବୋଲି ସେ ଉଲ୍ଲେଖ କରିଥିଲେ।

ଶ୍ରୀ ମୋଦୀ କହିଥିଲେ ଯେ ପର୍ଯ୍ୟଟନ କ୍ଷେତ୍ରରେ ମଧ୍ୟପ୍ରଦେଶ ସର୍ବଦା ଅଗ୍ରଣୀ ରହିଛି ଏବଂ ପର୍ଯ୍ୟଟନ ହେଉଛି ଏକ କ୍ଷେତ୍ର ଯାହା ଯୁବକମାନଙ୍କୁ ରୋଜଗାର ପ୍ରଦାନ କରେ ଏବଂ ଦେଶର ଅର୍ଥନୀତିକୁ ସୁଦୃଢ଼ କରେ । ଭାରତ ବିଶ୍ୱର ତୃତୀୟ ବୃହତ୍ତମ ଅର୍ଥନୈତିକ ଶକ୍ତିରେ ପରିଣତ ହେବାକୁ ଯାଉଛି ବୋଲି ଉଲ୍ଲେଖ କରି ସେ କହିଥିଲେ ଯେ ଭାରତକୁ ନେଇ ସମଗ୍ର ବିଶ୍ୱରେ ଉତ୍ସୁକତା ବୃଦ୍ଧି ପାଉଛି ଏବଂ ଭାରତକୁ ବିଶ୍ୱ ଜାଣିବାକୁ ଚାହୁଁଛି ଏବଂ ବୁଝିବାକୁ ଚାହୁଁଛି ଏବଂ ମଧ୍ୟପ୍ରଦେଶ ଏଥିରୁ ବହୁତ ଉପକୃତ ହେବ । ଏହି ଅବସରରେ ପ୍ରଧାନମନ୍ତ୍ରୀ ନିକଟରେ ଏକ ଆମେରିକୀୟ ଖବରକାଗଜରେ ପ୍ରକାଶିତ ଏକ ରିପୋର୍ଟକୁ ଉଲ୍ଲେଖ କରିଥିଲେ, ଯେଉଁଥିରେ ମଧ୍ୟପ୍ରଦେଶକୁ ବିଶ୍ୱର ଶ୍ରେଷ୍ଠ ଦଶଟି ଆକର୍ଷଣୀୟ ପର୍ଯ୍ୟଟନସ୍ଥଳୀ ମଧ୍ୟରେ ସ୍ଥାନିତ କରାଯାଇଥିଲା ।

ଘରୋଇ ଏବଂ ଅନ୍ତର୍ଜାତୀୟ ପର୍ଯ୍ୟଟକଙ୍କ ପାଇଁ ଯାତ୍ରାକୁ ସହଜ କରିବା ପାଇଁ ସୁବିଧା ବୃଦ୍ଧି କରିବା ପାଇଁ କେନ୍ଦ୍ର ସରକାର ନିରନ୍ତର କାର୍ଯ୍ୟ କରୁଛନ୍ତି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ବିଦେଶୀ ପର୍ଯ୍ୟଟକଙ୍କ ପାଇଁ ସରକାର ଇ-ଭିସା ଯୋଜନା ଆରମ୍ଭ କରିଛନ୍ତି ଏବଂ ଭାରତରେ ଐତିହ୍ୟ ଓ ବନ୍ୟପ୍ରାଣୀ ପର୍ଯ୍ୟଟନ ବୃଦ୍ଧି ପାଇଁ ମଧ୍ୟ ପଦକ୍ଷେପ ନେଇଛନ୍ତି। ମଧ୍ୟପ୍ରଦେଶର ଅସାଧାରଣ ପର୍ଯ୍ୟଟନ ସମ୍ଭାବନା ଉପରେ ଗୁରୁତ୍ବାରୋପ କରି ଶ୍ରୀ ମୋଦୀ କହିଥିଲେ ଯେ ଖଜୁରାହୋ ଅଞ୍ଚଳ ଐତିହାସିକ ଏବଂ ଆଧ୍ୟାତ୍ମିକ ଐତିହ୍ୟରେ ସମୃଦ୍ଧ ଯେଉଁଠାରେ କନ୍ଦାରିଆ ମହାଦେବ, ଲକ୍ଷ୍ମଣ ମନ୍ଦିର ଏବଂ ଚୌଷଠ୍ ଯୋଗିନୀ ମନ୍ଦିର ପରି ସ୍ଥାନ ରହିଛି । ଭାରତରେ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ଖଜୁରାହୋ ସମେତ ସମଗ୍ର ଦେଶରେ ଜି-୨୦ ବୈଠକ ଆୟୋଜନ କରାଯାଇଥିଲା, ଯେଉଁଥିପାଇଁ ଖଜୁରାହୋରେ ଏକ ଅତ୍ୟାଧୁନିକ ଅନ୍ତର୍ଜାତୀୟ ସମ୍ମିଳନୀ କେନ୍ଦ୍ର ନିର୍ମାଣ କରାଯାଇଥିଲା।

ପର୍ଯ୍ୟଟନ କ୍ଷେତ୍ର ଉପରେ ଅଧିକ ଆଲୋଚନା କରି ଶ୍ରୀ ମୋଦୀ କହିଥିଲେ ଯେ କେନ୍ଦ୍ର ସରକାରଙ୍କ ସ୍ୱଦେଶ ଦର୍ଶନ ଯୋଜନା ଅଧୀନରେ ମଧ୍ୟପ୍ରଦେଶକୁ ଇକୋ-ଟୁରିଜିମସ୍ଥଳୀ ଏବଂ ପର୍ଯ୍ୟଟକଙ୍କ ପାଇଁ ନୂତନ ସୁବିଧାର ବିକାଶ ପାଇଁ ଶହ ଶହ କୋଟି ଟଙ୍କା ଆବଣ୍ଟନ କରାଯାଇଥିଲା । ସାଞ୍ଚି ଓ ଅନ୍ୟ ବୌଦ୍ଧ ସ୍ଥଳୀକୁ ବୌଦ୍ଧ ସର୍କିଟ ମାଧ୍ୟମରେ ସଂଯୋଗ କରାଯାଉଥିବା ବେଳେ ଗାନ୍ଧୀ ସାଗର, ଓମକାରେଶ୍ବର ଡ୍ୟାମ, ଇନ୍ଦିରା ସାଗର ଡ୍ୟାମ, ଭେଡାଘାଟ ଓ ବାଣସାଗର ଡ୍ୟାମ ଇକୋ ସର୍କିଟର ଅଂଶ ବିଶେଷ ବୋଲି ସେ ଆଲୋକପାତ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଖଜୁରାହୋ, ଗ୍ୱାଲିୟର, ଓରଛା, ଚାନ୍ଦେରୀ ଏବଂ ମାଣ୍ଡୁ ଭଳି ସ୍ଥାନକୁ ଐତିହ୍ୟ ସର୍କିଟରେ ସାମିଲ କରାଯାଉଛି। ପ୍ରଧାନମନ୍ତ୍ରୀ କହିଥିଲେ ଯେ ପାନ୍ନା ଜାତୀୟ ଉଦ୍ୟାନ ମଧ୍ୟ ବନ୍ୟପ୍ରାଣୀ ସର୍କିଟରେ ଅନ୍ତର୍ଭୁକ୍ତ ଏବଂ ଗତବର୍ଷ ପାଖାପାଖି ୨.୫ ଲକ୍ଷ ପର୍ଯ୍ୟଟକ ପନ୍ନା ବ୍ୟାଘ୍ର ଅଭୟାରଣ୍ୟ ପରିଦର୍ଶନ କରିଥିଲେ । ନିର୍ମାଣ କରାଯାଉଥିବା ଲିଙ୍କ୍ କେନାଲ ପାନ୍ନା ବ୍ୟାଘ୍ର ଅଭୟାରଣ୍ୟର ବନ୍ୟଜନ୍ତୁଙ୍କୁ ନଜରରେ ରଖିବ ବୋଲି ସେ ଖୁସି ବ୍ୟକ୍ତ କରିଛନ୍ତି।

ପ୍ରଧାନମନ୍ତ୍ରୀ କହିଥିଲେ ଯେ ପର୍ଯ୍ୟଟନକୁ ପ୍ରୋତ୍ସାହନ ଦେବା ପାଇଁ କରାଯାଉଥିବା ପ୍ରୟାସ ସ୍ଥାନୀୟ ଅର୍ଥନୀତିକୁ ବହୁତ ପ୍ରୋତ୍ସାହିତ କରିବ । ପର୍ଯ୍ୟଟକମାନେ ସ୍ଥାନୀୟ ସାମଗ୍ରୀ କିଣିବେ, ଅଟୋ ଓ ଟ୍ୟାକ୍ସି ସେବା, ହୋଟେଲ, ଢାବା, ହୋମଷ୍ଟେ ଓ ଗେଷ୍ଟ ହାଉସ ଭଳି ସୁବିଧା ବ୍ୟବହାର କରିବେ। ଏହା ସହିତ କ୍ଷୀର, ଦହି, ଫଳ ଓ ପନିପରିବା ଭଳି ଉତ୍ପାଦିତ ଦ୍ରବ୍ୟର ଉତ୍ତମ ମୂଲ୍ୟ ମିଳିବାରୁ କୃଷକମାନେ ମଧ୍ୟ ଉପକୃତ ହେବେ ବୋଲି ସେ କହିଥିଲେ।

ଗତ ଦୁଇ ଦଶନ୍ଧି ମଧ୍ୟରେ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି କରିଥିବାରୁ ମଧ୍ୟପ୍ରଦେଶକୁ ପ୍ରଶଂସା କରି ଶ୍ରୀ ମୋଦୀ କହିଥିଲେ ଯେ ଆଗାମୀ ଦଶନ୍ଧିରେ ମଧ୍ୟପ୍ରଦେଶ ଦେଶର ଶୀର୍ଷ ଅର୍ଥନୀତି ମଧ୍ୟରୁ ଅନ୍ୟତମ ହେବ, ଯେଉଁଥିରେ ବୁନ୍ଦେଲଖଣ୍ଡ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ । ଏକ ବିକଶିତ ଭାରତ ପାଇଁ ମଧ୍ୟପ୍ରଦେଶକୁ ଏକ ବିକଶିତ ରାଜ୍ୟ ରେ ପରିଣତ କରିବା ଦିଗରେ କେନ୍ଦ୍ର ଓ ରାଜ୍ୟ ସରକାର ଆନ୍ତରିକତାର ସହ କାର୍ଯ୍ୟ ଜାରି ରଖିବେ ବୋଲି ଶ୍ରୀ ମୋଦୀ ତାଙ୍କ ଅଭିଭାଷଣ ଶେଷରେ ପ୍ରତିଶ୍ରୁତି ଦେଇଥିଲେ ।

ଏହି ଅବସରରେ ମଧ୍ୟପ୍ରଦେଶ ରାଜ୍ୟପାଳ ଶ୍ରୀ ମଙ୍ଗୁଭାଇ ସି. ପଟେଲ, ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଡ. ମୋହନ ଯାଦବ, କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ଶ୍ରୀ ଶିବରାଜ ସିଂ ଚୌହାନ, ସାମାଜିକ ନ୍ୟାୟ ଓ ସଶକ୍ତୀକରଣ ମନ୍ତ୍ରୀ ଶ୍ରୀ ବୀରେନ୍ଦ୍ର କୁମାର, କେନ୍ଦ୍ର ଜଳଶକ୍ତି ମନ୍ତ୍ରୀ, ଶ୍ରୀ ସି.ଆର.ପାଟିଲ ପ୍ରମୁଖ ଉପସ୍ଥିତ ଥିଲେ ।

ପୃଷ୍ଠଭୂମି

ପ୍ରଧାନମନ୍ତ୍ରୀ କେନ୍-ବେଟୱା ନଦୀ ସଂଯୋଗୀକରଣ ଜାତୀୟ ପ୍ରକଳ୍ପର ଶିଳାନ୍ୟାସ କରିଛନ୍ତି ଯାହାକି ଜାତୀୟ ପରିପ୍ରେକ୍ଷୀ ଯୋଜନା ଅଧୀନରେ ଦେଶର ପ୍ରଥମ ନଦୀ ସଂଯୋଗୀକରଣ ପ୍ରକଳ୍ପ । ଏହି ପ୍ରକଳ୍ପ ଦ୍ୱାରା ମଧ୍ୟପ୍ରଦେଶ ଓ ଉତ୍ତରପ୍ରଦେଶର ବିଭିନ୍ନ ଜିଲ୍ଲାକୁ ଜଳସେଚନ ସୁବିଧା ମିଳିବ ଏବଂ ଲକ୍ଷ ଲକ୍ଷ କୃଷକ ପରିବାର ଉପକୃତ ହେବେ । ଏହି ପ୍ରକଳ୍ପ ଦ୍ୱାରା ଅଞ୍ଚଳବାସୀଙ୍କୁ ପାନୀୟ ଜଳ ସୁବିଧା ମଧ୍ୟ ଯୋଗାଇ ଦିଆଯିବ। ଏହା ସହିତ ଜଳବିଦ୍ୟୁତ ପ୍ରକଳ୍ପରୁ ୧୦୦ ମେଗାୱାଟରୁ ଅଧିକ ସବୁଜ ବିଦ୍ୟୁତ ଶକ୍ତି ଉତ୍ପାଦନ ହେବ । ଏହି ପ୍ରକଳ୍ପ ଅନେକ ନିଯୁକ୍ତି ସୁଯୋଗ ସୃଷ୍ଟି କରିବ ଏବଂ ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବ ।
ପ୍ରଧାନମନ୍ତ୍ରୀ ୧୧୫୩ଟି ଅଟଳ ଗ୍ରାମ ସୁଶାସନ ସଦନର ଶିଳାନ୍ୟାସ କରିଛନ୍ତି । ଗ୍ରାମ ପଞ୍ଚାୟତଗୁଡ଼ିକର କାର୍ଯ୍ୟ ଓ ଦାୟିତ୍ୱର ବ୍ୟବହାରିକ ପରିଚାଳନାରେ ଏହି ସଦନଗୁଡ଼ିକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରି ସ୍ଥାନୀୟ ସ୍ତରରେ ସୁଶାସନ ଆଣିବେ।

ଶକ୍ତି ଆତ୍ମନିର୍ଭରଶୀଳତା ଏବଂ ସବୁଜ ଶକ୍ତିକୁ ପ୍ରୋତ୍ସାହିତ କରିବା ପାଇଁ ତାଙ୍କର ପ୍ରତିବଦ୍ଧତା ଅନୁଯାୟୀ ପ୍ରଧାନମନ୍ତ୍ରୀ ମଧ୍ୟପ୍ରଦେଶର ଖଣ୍ଡୱା ଜିଲ୍ଲାର ଓମକାରେଶ୍ୱରଠାରେ ସ୍ଥାପିତ ଓମକାରେଶ୍ୱର ଭାସମାନ ସୌର ପ୍ରକଳ୍ପର ଉଦଘାଟନ କରିଥିଲେ । ଏହି ପ୍ରକଳ୍ପ କାର୍ବନ ନିର୍ଗମନକୁ ହ୍ରାସ କରିବ ଏବଂ ୨୦୭୦ ସୁଦ୍ଧା ନିଟ୍ ଶୂନ୍ୟ କାର୍ବନ ନିର୍ଗମନ ଅଭିଯାନରେ ଯୋଗଦାନ କରିବ । ଏହା ଜଳ ବାଷ୍ପୀକରଣକୁ ହ୍ରାସ କରି ଜଳ ସଂରକ୍ଷଣରେ ମଧ୍ୟ ସହାୟକ ହେବ ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୀତି ଆୟୋଗରେ ୨୦୨୫-୨୬ କେନ୍ଦ୍ର ବଜେଟ୍ ପ୍ରସ୍ତୁତି ନେଇ ବିଶିଷ୍ଟ ଅର୍ଥନୀତିଜ୍ଞଙ୍କ ସହ ଆଲୋଚନା କରିଛନ୍ତି।

ବିଶ୍ୱ ଅନିଶ୍ଚିତତା ସମୟରେ ଭାରତର ଅଭିବୃଦ୍ଧି ଧାରା ବଜାୟ ରଖିବା ଶୀର୍ଷକରେ ଏହି ବୈଠକ ଅନୁଷ୍ଠିତ ହୋଇଥିଲା।

ପ୍ରଧାନମନ୍ତ୍ରୀ ତାଙ୍କ ବକ୍ତବ୍ୟରେ ବକ୍ତାମାନଙ୍କୁ ସେମାନଙ୍କ ଗୁରୁତ୍ବପୂର୍ଣ୍ଣ ମତାମତ ପାଇଁ ଧନ୍ୟବାଦ ଅର୍ପଣ କରିଥିଲେ। ୨୦୪୭ ସୁଦ୍ଧା ଭାରତକୁ ବିକଶିତ କରିବା ଦିଗରେ ଉଦ୍ଦିଷ୍ଟ ମାନସିକତାରେ ମୌଳିକ ପରିବର୍ତ୍ତନ ମାଧ୍ୟମରେ ବିକଶିତ ଭାରତ ହାସଲ କରାଯାଇପାରିବ ବୋଲି ସେ ଗୁରୁତ୍ୱାରୋପ କରିଥିଲେ।

ବୈଶ୍ୱିକ ଅର୍ଥନୈତିକ ଅନିଶ୍ଚିତତା ଏବଂ ଭୂ-ରାଜନୈତିକ ଉତ୍ତେଜନା ଦ୍ୱାରା ସୃଷ୍ଟି ହୋଇଥିବା ଆହ୍ୱାନର ମୁକାବିଲା, ବିଶେଷ କରି ଯୁବବର୍ଗଙ୍କ ମଧ୍ୟରେ ନିଯୁକ୍ତି ବୃଦ୍ଧି ଏବଂ ବିଭିନ୍ନ କ୍ଷେତ୍ରରେ ସ୍ଥାୟୀ ନିଯୁକ୍ତି ସୁଯୋଗ ସୃଷ୍ଟି ପାଇଁ ରଣନୀତି, ନିଯୁକ୍ତି ବଜାରର ବିକଶିତ ଆବଶ୍ୟକତା ସହିତ ଶିକ୍ଷା ଏବଂ ପ୍ରଶିକ୍ଷଣ କାର୍ଯ୍ୟକ୍ରମଗୁଡ଼ିକୁ ଯୋଡ଼ିବା ପାଇଁ ରଣନୀତି, କୃଷି ଉତ୍ପାଦକତା ବୃଦ୍ଧି ଏବଂ ସ୍ଥାୟୀ ଗ୍ରାମୀଣ ନିଯୁକ୍ତି ସୁଯୋଗ ସୃଷ୍ଟି କରିବା, ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ଏବଂ ନିଯୁକ୍ତି ସୃଷ୍ଟି କରିବା ଏବଂ ଆର୍ଥିକ ଅନ୍ତର୍ଭୁକ୍ତୀକରଣକୁ ପ୍ରୋତ୍ସାହିତ କରିବା, ରପ୍ତାନିକୁ ପ୍ରୋତ୍ସାହିତ କରିବା ଏବଂ ବିଦେଶୀ ପୁଞ୍ଜିନିବେଶ ଆକର୍ଷଣ କରିବା ପାଇଁ ଭିତ୍ତିଭୂମି ପ୍ରକଳ୍ପ ଗୁଡିକ ପାଇଁ ସରକାରୀ ପାଣ୍ଠି ସଂଗ୍ରହ କରିବା ସମେତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଅଂଶଗ୍ରହଣକାରୀମାନେ ସେମାନଙ୍କର ମତ ବ୍ୟକ୍ତ କରିଥିଲେ। ।

ଏହି ଆଲୋଚନାଚକ୍ରରେ ଡ. ସୁରଜିତ ଏସ୍ ଭଲ୍ଲା, ଡ. ଅଶୋକ ଗୁଲାଟି, ଡ. ସୁଦୀପ୍ତ ମୁଣ୍ଡଲେ, ଧର୍ମକୀର୍ତ୍ତି ଯୋଶୀ, ଜନ୍ମେଜୟ ସିହ୍ନା, ମଦନ ସବନାଭିସ୍, ପ୍ରଫେସର ଅମିତା ବାତ୍ରା, ରିଦ୍ଧମ ଦେଶାଇ, ପ୍ରଫେସର ଚେତନ ଘଟେ, ପ୍ରଫେସର ଭାରତ ରାମାସ୍ୱାମୀ, ଡ. ସୌମ୍ୟ କାନ୍ତି ଘୋଷ, ସିଦ୍ଧାର୍ଥ ସାନ୍ୟାଲ, ଡ. ଲବୀଶ ଭଣ୍ଡାରୀ, ରଜନୀ ସିହ୍ନା, ପ୍ରଫେସର କେଶବ ଦାସ, ଡ. ପ୍ରୀତମ ବାନାର୍ଜୀ, ଶ୍ରୀ ରାହୁଲ ବାଜୋରିଆ, ଶ୍ରୀ ନିଖିଲ ଗୁପ୍ତା ଓ ପ୍ରଫେସର ଶାଶ୍ବତ ଆଲୋକ ପ୍ରମୁଖ ଯୋଗ ଦେଇଥିଲେ। ।

ନୂଆଦିଲ୍ଲୀ: କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହା ଆଜି ନୂଆଦିଲ୍ଲୀ ପୁସାସ୍ଥିତ ଆଇସିଏଆର କନଭେନସନ୍ ସେଣ୍ଟରରେ ଆୟୋଜିତ ଏକ ଜାତୀୟ ସମ୍ମିଳନୀରେ ନବଗଠିତ ବହୁମୁଖୀ ପ୍ରାଥମିକ କୃଷି ସମବାୟ ସମିତି (ଏମ୍-ପ୍ୟାକ୍ସ), ଦୁଗ୍ଧ ଓ ମତ୍ସ୍ୟ ସମିତିଗୁଡ଼ିକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ। ଅମିତ ଶାହା ନବଗଠିତ ସମବାୟ ସମିତିଗୁଡ଼ିକୁ ପଞ୍ଜୀକରଣ ପ୍ରମାଣପତ୍ର, ରୂପେ କିଷାନ କ୍ରେଡିଟ୍ କାର୍ଡ (କେସିସି) ଏବଂ ମାଇକ୍ରୋ ଏଟିଏମ୍ ବଣ୍ଟନ କରିବେ। ଏହି ଆର୍ଥିକ ଉପକରଣଗୁଡ଼ିକ ପଞ୍ଚାୟତସ୍ତରରେ ସହଜରେ ଋଣ ସେବା ଉପଲବ୍ଧ କରାଇବା ଏବଂ ଆର୍ଥିକ ଅନ୍ତର୍ଭୁକ୍ତୀକରଣକୁ ପ୍ରୋତ୍ସାହିତ କରିବା ପାଇଁ ଡିଜାଇନ୍ କରାଯାଇଛି, ଯାହାଦ୍ୱାରା ଗ୍ରାମୀଣ ଜନସାଧାରଣ ଯୋଜନାର ଲାଭ ଉଠାଇପାରିବେ ଏବଂ ଦେଶର ଅର୍ଥନୈତିକ ପ୍ରଗତିରେ ଅଂଶଗ୍ରହଣ କରିପାରିବେ । ଏହି ଅବସରରେ କେନ୍ଦ୍ର ମତ୍ସ୍ୟ, ପଶୁପାଳନ ଓ ଦୁଗ୍ଧ ଓ ପଞ୍ଚାୟତିରାଜ ରାଷ୍ଟ୍ରମନ୍ତ୍ରୀ ରାଜୀବ ରଞ୍ଜନ ସିଂହ ଓରଫ ଲଲନ ସିଂହ, ବହୁ ବରିଷ୍ଠ ଅଧିକାରୀ ଓ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ରହିବେ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏବଂ କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଶ୍ରୀ ଅମିତ ଶାହାଙ୍କ ମାର୍ଗଦର୍ଶନରେ ସମବାୟ ମନ୍ତ୍ରଣାଳୟ ପ୍ରତ୍ୟେକ ପଞ୍ଚାୟତରେ ସମବାୟ ସମିତିମାନ ପ୍ରତିଷ୍ଠା ସୁନିଶ୍ଚିତ କରିବାକୁ ପ୍ରତିଶ୍ରୁତିବଦ୍ଧ ଯାହା ଦ୍ୱାରା ସ୍ଥାନୀୟ ସ୍ତରରେ ବିକାଶ ଏବଂ ଆତ୍ମନିର୍ଭରଶୀଳତାର ସୁଯୋଗ ଉପଲବ୍ଧ ହେବ । ନୂତନ ଏମ-ପ୍ୟାକ୍ସ ଗଠନ ଦ୍ୱାରା ଗ୍ରାମାଞ୍ଚଳରେ ସମବାୟ ସଂସ୍ଥାଗୁଡ଼ିକର ବିକାଶକୁ ପ୍ରୋତ୍ସାହନ ମିଳିବ । ନବଗଠିତ ବହୁମୁଖୀ ପ୍ୟାକ୍ସ ମଧ୍ୟରେ ଋଣ ଆବଣ୍ଟନ ସୋସାଇଟି, ଦୁଗ୍ଧ ସମବାୟ ସମିତି ଏବଂ ମତ୍ସ୍ୟ ସମବାୟ ସମିତି ଅନ୍ତର୍ଭୁକ୍ତ ।

ସମବାୟ ମନ୍ତ୍ରୀ ଅମିତ ଶାହା  ସମବାୟ ସମିତି ମାଧ୍ୟମରେ ସ୍ଥାନୀୟ ସମ୍ପ୍ରଦାୟ, ବିଶେଷକରି ମହିଳା ନେତୃତ୍ୱାଧୀନ ପଞ୍ଚାୟତଗୁଡ଼ିକୁ ସଶକ୍ତ କରିବା ଉପରେ ଗୁରୁତ୍ୱାରୋପ କରିଛନ୍ତି । ନବଗଠିତ ବହୁମୁଖୀ ପ୍ରାଥମିକ କୃଷି ସମବାୟ ସମିତି (ଏମ୍-ପ୍ୟାକ୍ସ)ଗୁଡ଼ିକ ଗ୍ରାମାଞ୍ଚଳରେ ଆତ୍ମନିର୍ଭରଶୀଳତା ଏବଂ ଅର୍ଥନୈତିକ ସଶକ୍ତୀକରଣକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ଆଶା କରାଯାଉଛି। ଏହି ସୋସାଇଟିଗୁଡ଼ିକ କେବଳ ଆର୍ଥିକ ସେବା ପ୍ରଦାନ କରିବେ ନାହିଁ ବରଂ ଗ୍ରାମୀଣ ସମୁଦାୟମାନଙ୍କୁ ଏକାଠି ହେବା ଏବଂ ସହଯୋଗୀ ଭାବରେ କାର୍ଯ୍ୟ କରିବା ପାଇଁ ଏକ ପ୍ଲାଟଫର୍ମ ମଧ୍ୟ ପ୍ରଦାନ କରିବ ।

ନିକଟରେ କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହା ତାଙ୍କ ତ୍ରିପୁରା ଗସ୍ତ ସମୟରେ କହିଥିଲେ ଯେ ଉତ୍ତର-ପୂର୍ବାଞ୍ଚଳ ସମେତ ସମଗ୍ର ଦେଶରେ ସମବାୟ ସଂସ୍ଥାଗୁଡ଼ିକୁ ସୁଦୃଢ଼ କରିବା ଉପରେ ଅଧିକ ଗୁରୁତ୍ୱ ଦିଆଯାଉଛି । ଶ୍ରୀ ଶାହା ବିଶ୍ୱାସ କରନ୍ତି ଯେ ସମବାୟ କ୍ଷେତ୍ର ହେଉଛି ଭାରତୀୟ ଗ୍ରାମୀଣ ଅର୍ଥନୀତିର ମେରୁଦଣ୍ଡ ଏବଂ ଏହା ଗ୍ରାମାଞ୍ଚଳର ଲୋକଙ୍କ ଆର୍ଥିକ ଅନ୍ତର୍ଭୁକ୍ତୀକରଣ, ଗ୍ରାମୀଣ କୃଷି ଏବଂ କୁଟୀର ଶିଳ୍ପର ବିକାଶ, ନିଯୁକ୍ତି ସୃଷ୍ଟି ଏବଂ ମହିଳା ଏବଂ ସାମାଜିକ ସଶକ୍ତୀକରଣର ମୁଖ୍ୟ ମାଧ୍ୟମ ଭାବେ କାର୍ଯ୍ୟ କରିଥାଏ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଏବଂ କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହାଙ୍କ ମାର୍ଗଦର୍ଶନରେ ଜୁଲାଇ ୨୦୨୧ରେ କେନ୍ଦ୍ର ସମବାୟ ମନ୍ତ୍ରଣାଳୟ ଗଠନ କରାଯାଇଥିଲା, ଯାହା ସମବାୟ କ୍ଷେତ୍ରର ମୌଳିକ ଅନୁଷ୍ଠାନ ପ୍ରାଥମିକ କୃଷି ଋଣ ସୋସାଇଟି (ପ୍ୟାକ୍ସ)ର ପୁନରୁଦ୍ଧାର ପାଇଁ କରାଯାଇଛି । ଏଥିପାଇଁ ପ୍ୟାକ୍ସଗୁଡ଼ିକୁ ଆର୍ଥିକ ସହାୟତା ଯୋଗାଇଦେବା ପାଇଁ ନୂଆ ମଡେଲ ନିୟମାବଳୀ ପ୍ରସ୍ତୁତ କରାଯାଇଛି ଓ ପ୍ୟାକ୍ସର କାର୍ଯ୍ୟକଳାପକୁ ଆହୁରି ବିସ୍ତାରିତ କରାଯାଇଛି, ଯାହାଦ୍ୱାରା ସେମାନେ ଲାଭଜନକ ଓ ସ୍ଥାୟୀ ହୋଇପାରିବେ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସ୍ବପ୍ନ ‘ସମବାୟରୁ ସମୃଦ୍ଧି’କୁ ସାକାର କରିବା ପାଇଁ ଗୃହ ଓ ସମବାୟ ମନ୍ତ୍ରୀ ଶ୍ରୀ ଅମିତ ଶାହା ଆଗାମୀ ପାଞ୍ଚ ବର୍ଷ ମଧ୍ୟରେ ଦେଶର ପ୍ରତ୍ୟେକ ପଞ୍ଚାୟତରେ ଏକ ସମବାୟ ଅନୁଷ୍ଠାନ ସ୍ଥାପନ କରିବାକୁ ଲକ୍ଷ୍ୟ ରଖିଛନ୍ତି ।

ଏହି ଲକ୍ଷ୍ୟ ହାସଲ କରିବା ପାଇଁ ୨୦୨୪ ସେପ୍ଟେମ୍ବରରେ ବହୁମୁଖୀ ପ୍ୟାକ୍ସ ଗଠନ ପାଇଁ ଏକ ମାର୍ଗଦର୍ଶିକା ଜାରି କରାଯାଇଥିଲା, ଯାହା ଦେଶରେ ସୃଷ୍ଟି ହେବାକୁ ଥିବା ଦୁଇ ଲକ୍ଷ ନୂତନ ବହୁମୁଖୀ ପ୍ୟାକ୍ସ ର ପ୍ରଭାବଶାଳୀ କାର୍ଯ୍ୟକାରିତା ପାଇଁ ସହାୟକ ସାବ୍ୟସ୍ତ ହେବ। ବର୍ତ୍ତମାନ ସୁଦ୍ଧା ନବନିର୍ମିତ ୧୦,୪୯୬ଟି ବହୁମୁଖୀ ପ୍ୟାକ୍ସ, ଦୁଗ୍ଧ ଓ ମତ୍ସ୍ୟ ସମବାୟ ସମିତି ମଧ୍ୟରୁ ୩୫୨୩ଟି ଏମ୍-ପ୍ୟାକ୍ସ ଓ ୬୨୮୮ଟି ଦୁଗ୍ଧ ସମବାୟ ସମିତି ପଞ୍ଜୀକୃତ ହୋଇଛି। ଏହାବ୍ୟତୀତ ୬୮୫ଟି ନୂଆ ମତ୍ସ୍ୟ ସମବାୟ ସମିତି ମଧ୍ୟ ପଞ୍ଜୀକୃତ ହୋଇଛି।

ଏହି ଜାତୀୟ ସମ୍ମିଳନୀରେ ଦେଶର ବିଭିନ୍ନ ସ୍ଥାନରୁ ଏମ୍-ପ୍ୟାକ୍ସ, ଦୁଗ୍ଧ ଓ ମତ୍ସ୍ୟ ସମବାୟ ସମିତିର ପ୍ରତିନିଧିଙ୍କ ସମେତ ପ୍ରାୟ ୧୨୦୦ ଜଣ ପ୍ରତିନିଧି ଅଂଶଗ୍ରହଣ କରିବେ। ଏଥିରେ ଏମ୍-ପ୍ୟାକ୍ସର ୪୦୦ ପ୍ରତିନିଧି, ସମବାୟ ଦୁଗ୍ଧର ୭୦୦ ପ୍ରତିନିଧି ଏବଂ ମତ୍ସ୍ୟ ସମବାୟ ସମିତିର ୧୦୦ ପ୍ରତିନିଧି ଏବଂ ରାଜ୍ୟ ସରକାର, ସମବାୟ ମନ୍ତ୍ରଣାଳୟ ଏବଂ ବିଭିନ୍ନ ଆନୁଷଙ୍ଗିକ ସଂଗଠନର ଅଧିକାରୀ ରହିବେ। ଏହି ସମ୍ମିଳନୀରେ କୃଷକ ଏବଂ ଗ୍ରାମୀଣ ସମୁଦାୟର ଜୀବିକାକୁ ସ୍ଥାୟୀ କରିବା, ସେମାନଙ୍କୁ ଅତିରିକ୍ତ ଆୟର ଉତ୍ସ ପ୍ରଦାନ କରିବା ଏବଂ ସ୍ଥାୟୀ କୃଷି ପଦ୍ଧତିକୁ ପ୍ରୋତ୍ସାହିତ କରିବାର ସୁଯୋଗ ଉପରେ ମଧ୍ୟ ଆଲୋଚନା କରାଯିବ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀର ସିବିସିଆଇ କେନ୍ଦ୍ର ପରିସରରେ କାଥୋଲିକ୍ ବିଶପ୍ସ କନ୍‌ଫରେନ୍ସ ଅଫ୍ ଇଣ୍ଡିଆ (ସିବିସିଆଇ) ଦ୍ୱାରା ଆୟୋଜିତ ଖ୍ରୀଷ୍ଟମାସ ଉତ୍ସବରେ ଅଂଶଗ୍ରହଣ କରିଥିଲେ। ପ୍ରଥମ ଥର ପାଇଁ କୌଣସି ପ୍ରଧାନମନ୍ତ୍ରୀ ଭାରତର କ୍ୟାଥଲିକ ଚର୍ଚ୍ଚ ମୁଖ୍ୟାଳୟରେ ଏଭଳି କାର୍ଯ୍ୟକ୍ରମରେ ଯୋଗ ଦେଇଛନ୍ତି। କାର୍ଡିନାଲ, ବିଶପ ଏବଂ ଚର୍ଚ୍ଚର ପ୍ରମୁଖ  ନେତାଙ୍କ ସମେତ ଖ୍ରୀଷ୍ଟିଆନ ସମ୍ପ୍ରଦାୟର ପ୍ରମୁଖ ନେତାଙ୍କ ସହ ମଧ୍ୟ ପ୍ରଧାନମନ୍ତ୍ରୀ ଆଲୋଚନା କରିଥିଲେ।

ଦେଶର ନାଗରିକ ଏବଂ ବିଶ୍ୱବ୍ୟାପୀ ଖ୍ରୀଷ୍ଟିଆନ ସମ୍ପ୍ରଦାୟକୁ ଖ୍ରୀଷ୍ଟମାସର ଶୁଭେଚ୍ଛା ଜଣାଇ ପ୍ରଧାନମନ୍ତ୍ରୀ କହିଥିଲେ ଯେ କିଛି ଦିନ ତଳେ ସେ କେନ୍ଦ୍ର ମନ୍ତ୍ରୀ ଜର୍ଜ କୁରିଆନଙ୍କ ବାସଭବନରେ ଖ୍ରୀଷ୍ଟମାସ ଉତ୍ସବରେ  ଯୋଗ ଦେଇଥିଲେ ଏବଂ ଆଜି କ୍ୟାଥୋଲିକ ବିଶପ୍ସ କନଫରେନ୍ସ ଅଫ୍ ଇଣ୍ଡିଆ (ସିବିସିଆଇ) ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମରେ ଯୋଗ ଦେଇ ସେ ସମ୍ମାନିତ ହୋଇଛନ୍ତି। ସିବିସିଆଇର ୮୦ତମ ବାର୍ଷିକୀ ପାଳନ ହେଉଥିବାରୁ ଏହି ଅବସର ବିଶେଷ। ଏହି ଉଲ୍ଲେଖନୀୟ ମାଇଲଖୁଣ୍ଟ ପାଇଁ ଶ୍ରୀ ମୋଦୀ ସିବିସିଆଇ ଏବଂ ଏହା ସହିତ ଜଡ଼ିତ ସମସ୍ତଙ୍କୁ ଅଭିନନ୍ଦନ ଜଣାଇଥିଲେ।

ପ୍ରଧାନମନ୍ତ୍ରୀ ସ୍ମରଣ କରିଥିଲେ ଯେ ଶେଷ ଥର ପାଇଁ ସେ ପ୍ରଧାନମନ୍ତ୍ରୀଙ୍କ ବାସଭବନରେ ସିବିସିଆଇ ସହିତ ଖ୍ରୀଷ୍ଟମାସ ପାଳନ କରିଥିଲେ  ଏବଂ ଆଜି ସମସ୍ତେ ସିବିସିଆଇ କ୍ୟାମ୍ପସରେ ଏକାଠି ହୋଇଛନ୍ତି। “ମୁଁ ଇଷ୍ଟର ସମୟରେ ସାକ୍ରେଡ୍ ହାର୍ଟ କ୍ୟାଥେଡ୍ରାଲ ଚର୍ଚ୍ଚ ମଧ୍ୟ ପରିଦର୍ଶନ କରିଛି ଏବଂ ମୁଁ ଆପଣ ସମସ୍ତଙ୍କଠାରୁ ପାଇଥିବା ଶ୍ରଦ୍ଧା ପାଇଁ କୃତଜ୍ଞ। ମୁଁ ପୋପ୍ ଫ୍ରାନ୍ସିସଙ୍କ ଠାରୁ ସମାନ ସ୍ନେହ ଅନୁଭବ କରୁଛି, ଯାହାଙ୍କୁ ମୁଁ ଚଳିତ ବର୍ଷ ପ୍ରାରମ୍ଭରେ ଇଟାଲୀରେ ଜି-୭ ଶିଖର ସମ୍ମିଳନୀ ସମୟରେ ଭେଟିଥିଲି – ତିନି ବର୍ଷ ମଧ୍ୟରେ ଏହା ଆମର ଦ୍ୱିତୀୟ ସାକ୍ଷାତ। ମୁଁ ତାଙ୍କୁ ଭାରତ ଗସ୍ତ ପାଇଁ ନିମନ୍ତ୍ରଣ କରିଥିଲି”, ବୋଲି ଶ୍ରୀ ମୋଦୀ କହିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ସେପ୍ଟେମ୍ବରରେ ତାଙ୍କ ନ୍ୟୁୟର୍କ ଗସ୍ତ ସମୟରେ ସେ କାର୍ଡିନାଲ ପିଏଟ୍ରୋ ପାରୋଲିନଙ୍କୁ ଭେଟିଥିଲେ। ଏହି ଆଧ୍ୟାତ୍ମିକ ସାକ୍ଷାତ ସେବା ପ୍ରତି ପ୍ରତିବଦ୍ଧତାକୁ ପ୍ରେରଣା ଓ ସୁଦୃଢ଼ କରିଥାଏ।

ନିକଟରେ ପୋପ୍ ଫ୍ରାନ୍ସିସଙ୍କ ଦ୍ୱାରା କାର୍ଡିନାଲ ଉପାଧିରେ ସମ୍ମାନିତ କାର୍ଡିନାଲ ଜର୍ଜ କୁଭାକଡଙ୍କ ସହ  ତାଙ୍କର ସାକ୍ଷାତକୁ ପ୍ରଧାନମନ୍ତ୍ରୀ  ସ୍ମରଣ କରିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ କେନ୍ଦ୍ର ମନ୍ତ୍ରୀ ଜର୍ଜ କୁରିଆନଙ୍କ ନେତୃତ୍ୱରେ ଭାରତ ସରକାର ଏହି କାର୍ଯ୍ୟକ୍ରମକୁ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ପଠାଇଛନ୍ତି। ଯେତେବେଳେ ଜଣେ ଭାରତୀୟ ଏଭଳି ସଫଳତା ହାସଲ କରନ୍ତି, ସେତେବେଳେ ସମଗ୍ର ଦେଶ ଗର୍ବ ଅନୁଭବ କରିଥାଏ। ଏହି ଉଲ୍ଲେଖନୀୟ ସଫଳତା ପାଇଁ ମୁଁ ପୁଣି ଥରେ କାର୍ଡିନାଲ ଜର୍ଜ କୁଭାକଡଙ୍କୁ ଅଭିନନ୍ଦନ ଜଣାଉଛି ବୋଲି ଶ୍ରୀ ମୋଦୀ କହିଛନ୍ତି।

ପ୍ରଧାନମନ୍ତ୍ରୀ ଅନେକ ସ୍ମୃତିକୁ ମଧ୍ୟ ମନେ ପକାଇଥିଲେ, ବିଶେଷକରି ଏକ  ଦଶନ୍ଧି ପୂର୍ବେ ଯୁଦ୍ଧଗ୍ରସ୍ତ ଆଫଗାନିସ୍ତାନରୁ ଫାଦର ଆଲେକ୍ସିସ୍ ପ୍ରେମ କୁମାରଙ୍କୁ ଉଦ୍ଧାର କରାଯାଇଥିବା ସମୟର ସଫଳ ମୁହୂର୍ତ୍ତ। ଶ୍ରୀ ମୋଦୀ ଆଲୋକପାତ କରିଥିଲେ ଯେ ଫାଦର ଆଲେକ୍ସିସ୍ ପ୍ରେମ କୁମାର ୮ ମାସ ଧରି ବନ୍ଧକ ଥିଲେ ଏବଂ କଠିନ ପରିସ୍ଥିତି ସତ୍ତ୍ୱେ ସରକାର ତାଙ୍କୁ ସୁରକ୍ଷିତ ଭାବେ ସ୍ୱଦେଶ ଫେରାଇ ଆଣିବା ପାଇଁ ଯଥାସମ୍ଭବ ପ୍ରୟାସ କରିଥିଲେ।

ଯେତେବେଳେ ଆମେ ସଫଳ ହୋଇଥିଲୁ ସେତେବେଳେ ତାଙ୍କ ପରିବାରର ସ୍ୱରରେ ଥିବା ଖୁସିକୁ ମୁଁ କେବେ ବି ଭୁଲିପାରିବି ନାହିଁ। ସେହିଭଳି, ଯେତେବେଳେ ୟେମେନରେ ଫାଦର ଟମଙ୍କୁ ବନ୍ଧକ କରାଯାଇଥିଲା, ଆମେ ମଧ୍ୟ ତାଙ୍କୁ ଫେରାଇ ଆଣିବା ପାଇଁ ଅକ୍ଳାନ୍ତ ପରିଶ୍ରମ କରିଥିଲୁ ଏବଂ ମୁଁ ତାଙ୍କୁ ମୋ ଘରକୁ ନିମନ୍ତ୍ରଣ କରିବାର ଗୌରବ ପାଇଥିଲି। ଉପସାଗରୀୟ ଅଞ୍ଚଳରେ ସଙ୍କଟରେ ଥିବା ନର୍ସ ଭଉଣୀମାନଙ୍କୁ ଉଦ୍ଧାର କରିବା ପାଇଁ ଆମର ପ୍ରୟାସ ସମାନ ଭାବରେ ନିରବଚ୍ଛିନ୍ନ ଏବଂ ସଫଳ ଥିଲା” ବୋଲି ପ୍ରଧାନମନ୍ତ୍ରୀ କହିଥିଲେ। ଶ୍ରୀ ମୋଦୀ ଦୋହରାଇଥିଲେ ଯେ, ଏହି ପ୍ରୟାସ କେବଳ କୂଟନୈତିକ ମିଶନ ନୁହେଁ ବରଂ ପରିବାର ସଦସ୍ୟଙ୍କୁ ଫେରାଇ ଆଣିବା ପାଇଁ ଭାବନାତ୍ମକ ପ୍ରତିବଦ୍ଧତା ଥିଲା। ଆଜିର ଭାରତ ଯେକୌଣସି ସ୍ଥାନରେ ଥାଉ ନା କାହିଁକି, ସଙ୍କଟ ସମୟରେ ସେମାନଙ୍କୁ ଉଦ୍ଧାର କରିବା ନିଜ କର୍ତ୍ତବ୍ୟ ବୋଲି ବିବେଚନା କରୁଛି।

କୋଭିଡ୍-୧୯ ମହାମାରୀ ସମୟରେ ଭାରତର ବୈଦେଶିକ ନୀତି ଜାତୀୟ ସ୍ୱାର୍ଥ ସହିତ ମାନବିକ ସ୍ୱାର୍ଥକୁ ପ୍ରାଥମିକତା ଦେଉଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ଅନେକ ଦେଶ ନିଜ ସ୍ୱାର୍ଥ ଉପରେ ଧ୍ୟାନ ଦେଉଥିବା ବେଳେ ଭାରତ ନିଃସ୍ୱାର୍ଥପର ଭାବେ ୧୫୦ରୁ ଅଧିକ ଦେଶକୁ ଔଷଧ ଓ ଟିକା ପଠାଇ ସାହାଯ୍ୟ କରିଥିଲା। ଏହାର ସକାରାତ୍ମକ ବୈଶ୍ୱିକ ପ୍ରଭାବ ପଡ଼ିଥିଲା ଏବଂ ଗାୟାନାଙ୍କ ଭଳି ରାଷ୍ଟ୍ର ଗଭୀର କୃତଜ୍ଞତା ଜ୍ଞାପନ କରିଥିଲେ। ଅନେକ ଦ୍ୱୀପ ରାଷ୍ଟ୍ର, ପ୍ରଶାନ୍ତ ମହାସାଗରୀୟ ରାଷ୍ଟ୍ର ଏବଂ କ୍ୟାରିବିଆନ୍ ଦେଶ ମଧ୍ୟ ଭାରତର ମାନବୀୟ ପ୍ରୟାସକୁ ପ୍ରଶଂସା କରିଛନ୍ତି। ଏକବିଂଶ ଶତାବ୍ଦୀରେ ଭାରତର ମାନବ କେନ୍ଦ୍ରୀତ ଆଭିମୁଖ୍ୟ ବିଶ୍ୱକୁ ଉନ୍ନତ କରିବାକୁ ଯାଉଛି।

ଭଗବାନ ଖ୍ରୀଷ୍ଟଙ୍କ ଶିକ୍ଷା ପ୍ରେମ, ସୌହାର୍ଦ୍ଦ୍ୟ ଏବଂ ଭାଇଚାରା ଉପରେ ଗୁରୁତ୍ୱାରୋପ କରେ ବୋଲି ପ୍ରଧାନମନ୍ତ୍ରୀ କହିଛନ୍ତି ଏବଂ ଏହା ତାଙ୍କୁ ଦୁଃଖିତ କରେ ଯେତେବେଳେ ସମାଜରେ ହିଂସା ଏବଂ ବିଶୃଙ୍ଖଳା ବ୍ୟାପିଥାଏ, ଯାହା ନିକଟରେ ଜର୍ମାନୀର ଏକ ଖ୍ରୀଷ୍ଟମାସ ବଜାରରେ ଏବଂ ୨୦୧୯ ରେ ଶ୍ରୀଲଙ୍କାରେ ଇଷ୍ଟର ବୋମା ବିସ୍ଫୋରଣ ସମୟରେ ଦେଖିବାକୁ ମିଳିଥିଲା, ଯେଉଁଠାରେ ସେ ପୀଡ଼ିତମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

ଶ୍ରୀ ମୋଦୀ କହିଛନ୍ତି ଯେ, ଏହି ଖ୍ରୀଷ୍ଟମାସ ଅଧିକ ସ୍ୱତନ୍ତ୍ର କାରଣ ଏହା ଜୟନ୍ତୀ ବର୍ଷର ଶୁଭାରମ୍ଭ, ଆଶା ଉପରେ କେନ୍ଦ୍ରିତ। “ପବିତ୍ର ବାଇବେଲ ଆଶାକୁ ଶକ୍ତି ଏବଂ ଶାନ୍ତିର ଉତ୍ସ ଭାବରେ ଦେଖେ। ଆମେ ମଧ୍ୟ ଆଶା ଏବଂ ସକାରାତ୍ମକତା ଦ୍ୱାରା ପରିଚାଳିତ। ମାନବିକତା ପାଇଁ ଆଶା କରୁଛି ଉନ୍ନତ ବିଶ୍ୱ ପାଇଁ ଆଶା ଏବଂ ଶାନ୍ତି, ପ୍ରଗତି ତଥା ସମୃଦ୍ଧି ପାଇଁ ଆଶା କରୁଛି ବୋଲି ଶ୍ରୀ ମୋଦୀ କହିଛନ୍ତି।

ଗତ ୧୦ ବର୍ଷ ମଧ୍ୟରେ ଭାରତରେ ୨୫୦ ନିୟୁତ ଲୋକ ଦାରିଦ୍ର୍ୟକୁ ଦୂର କରିପାରିଛନ୍ତି ବୋଲି ପ୍ରଧାନମନ୍ତ୍ରୀ ଆଲୋକପାତ କରିଥିଲେ ଏବଂ ଦାରିଦ୍ର୍ୟ ଉପରେ ବିଜୟ ସମ୍ଭବ ବୋଲି ଆଶା ବ୍ୟକ୍ତ କରିଥିଲେ। ଭାରତ ମଧ୍ୟ ଦଶମରୁ ପଞ୍ଚମ ବୃହତ୍ତମ ଅର୍ଥନୀତିକୁ ଉନ୍ନୀତ ହୋଇଛି, ଯାହା ଆମର ଆତ୍ମବିଶ୍ୱାସ ଓ ନିଷ୍ଠାର ପ୍ରମାଣ। ବିକାଶର ଏହି ସମୟ ଭବିଷ୍ୟତ ପାଇଁ ନୂଆ ଆଶା ଆଣିଛି ଏବଂ ଷ୍ଟାର୍ଟଅପ୍, ବିଜ୍ଞାନ, କ୍ରୀଡ଼ା ଏବଂ ଉଦ୍ୟୋଗ ଭଳି ବିଭିନ୍ନ କ୍ଷେତ୍ରରେ ଯୁବବର୍ଗଙ୍କ ପାଇଁ ସୁଯୋଗ ଆଣିଛି। ଭାରତର ଆତ୍ମବିଶ୍ୱାସୀ ଯୁବକମାନେ ଦେଶକୁ ପ୍ରଗତି ଆଡକୁ ନେଉଛନ୍ତି, ଯାହା ଆମକୁ ଏକ ବିକଶିତ ଭାରତର ସ୍ୱପ୍ନ ସାକାର ହେବ ବୋଲି ଆଶା ଦେଉଛି ବୋଲି ପ୍ରଧାନମନ୍ତ୍ରୀ କହିଛନ୍ତି।

ଗତ ୧୦ ବର୍ଷ ମଧ୍ୟରେ ଭାରତରେ ମହିଳାମାନେ ଉଦ୍ୟୋଗ, ଡ୍ରୋନ, ବିମାନ ଚଳାଚଳ ଏବଂ ସଶସ୍ତ୍ର ବାହିନୀ ଭଳି କ୍ଷେତ୍ରରେ ଉଲ୍ଲେଖନୀୟ ସଶକ୍ତୀକରଣ ହାସଲ କରିଛନ୍ତି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ମହିଳା ସଶକ୍ତୀକରଣ ବିନା କୌଣସି ଦେଶ ଅଗ୍ରଗତି କରିପାରିବ ନାହିଁ ବୋଲି ସେମାନଙ୍କ ପ୍ରଗତି ଦର୍ଶାଉଛି। ଶ୍ରୀ ମୋଦୀ କହିଥିଲେ ଯେ ଯେହେତୁ ଅଧିକରୁ ଅଧିକ ମହିଳା କର୍ମକ୍ଷେତ୍ର ଏବଂ ବୃତ୍ତିଗତ ଶ୍ରମ ଶକ୍ତିରେ ଯୋଗ ଦେଉଛନ୍ତି, ଏହା ଭାରତର ଭବିଷ୍ୟତ ପାଇଁ ନୂତନ ଆଶା ଆଣିଛି।

ପ୍ରଧାନମନ୍ତ୍ରୀ ଜୋର ଦେଇ କହିଥିଲେ ଯେ ଗତ ୧୦ ବର୍ଷ ମଧ୍ୟରେ ଭାରତ ମୋବାଇଲ୍ ଏବଂ ସେମିକଣ୍ଡକ୍ଟର ଉତ୍ପାଦନ ଭଳି କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି କରିଛି ଏବଂ ନିଜକୁ ଏକ ବୈଶ୍ୱିକ ବୈଷୟିକ କେନ୍ଦ୍ର ଭାବରେ ଅବସ୍ଥାପିତ କରିଛି। ନୂତନ ଏକ୍ସପ୍ରେସ୍ ୱେ, ଗ୍ରାମୀଣ ସଡ଼କ ସଂଯୋଗ ଏବଂ ମେଟ୍ରୋ ମାର୍ଗ ସହିତ ଅଭୂତପୂର୍ବ ଗତିରେ ଭିତ୍ତିଭୂମି ନିର୍ମାଣ କରିବା ସହିତ ପ୍ରଯୁକ୍ତି ବିଦ୍ୟା ଏବଂ ଫିନଟେକ୍ ମାଧ୍ୟମରେ ଦେଶ ଗରିବମାନଙ୍କୁ ସଶକ୍ତ କରୁଛି ବୋଲି ସେ କହିଥିଲେ। ଏହି ଉପଲବ୍ଧି ଗୁଡ଼ିକ ଭାରତର ଭବିଷ୍ୟତ ପାଇଁ ଆଶା ଓ ସକାରାତ୍ମକ ଭାବନା ଜାଗ୍ରତ କରୁଛି ଏବଂ ବିଶ୍ୱ ଏବେ ଭାରତକୁ ଏହାର ଦ୍ରୁତ ଅଭିବୃଦ୍ଧି ଏବଂ ସାମର୍ଥ୍ୟ ଉପରେ ସମାନ ଆତ୍ମବିଶ୍ୱାସର ସହ ଦେଖୁଛି।

ପ୍ରଧାନମନ୍ତ୍ରୀ କହିଥିଲେ ଯେ ବାଇବେଲ ଆମକୁ ପରସ୍ପରର ବୋଝ ବହନ କରିବାକୁ ଶିଖାଏ, ପରସ୍ପରର ଯତ୍ନ ନେବାକୁ ଉତ୍ସାହିତ କରେ ଏବଂ ପରସ୍ପରର ମଙ୍ଗଳ ପାଇଁ ଦାୟିତ୍ୱ ନେବାକୁ ଉତ୍ସାହିତ କରେ। ଏହି ମାନସିକତା ସହିତ ନୂତନ ବିଦ୍ୟାଳୟ ପ୍ରତିଷ୍ଠା, ଶିକ୍ଷା ମାଧ୍ୟମରେ ସମ୍ପ୍ରଦାୟର ଉନ୍ନତି କିମ୍ବା ଜନସାଧାରଣଙ୍କ ସେବା ପାଇଁ ସ୍ୱାସ୍ଥ୍ୟ ପଦକ୍ଷେପ କାର୍ଯ୍ୟକାରୀ କରିବା ମାଧ୍ୟମରେ ସମାଜ ସେବାରେ ଅନୁଷ୍ଠାନ ଏବଂ ସଂଗଠନ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାନ୍ତି । ସେ କହିଛନ୍ତି ଯେ ଏହିସବୁ ପ୍ରୟାସକୁ ସାମୂହିକ ଦାୟିତ୍ୱ ଭାବରେ ଦେଖାଯାଏ।

ପ୍ରଧାନମନ୍ତ୍ରୀ ଦୋହରାଇଥିଲେ ଯେ ଯୀଶୁ ଖ୍ରୀଷ୍ଟ ବିଶ୍ୱକୁ କରୁଣା ଏବଂ ନିଃସ୍ୱାର୍ଥପର ସେବାର ମାର୍ଗ ଦେଖାଇଥିଲେ। ଆମେ ଖ୍ରୀଷ୍ଟମାସ ପାଳନ କରୁ ଏବଂ ଯୀଶୁଙ୍କୁ ସ୍ମରଣ କରୁ ଯାହା ଦ୍ୱାରା ଆମେ ଏହି ମୂଲ୍ୟବୋଧଗୁଡ଼ିକୁ ଆମ ଜୀବନରେ ଅନ୍ତର୍ଭୁକ୍ତ କରିପାରିବା ଏବଂ ସର୍ବଦା ଆମର କର୍ତ୍ତବ୍ୟକୁ ପ୍ରାଥମିକତା ଦେଇପାରିବା। ଏହା କେବଳ ଆମର ବ୍ୟକ୍ତିଗତ ଦାୟିତ୍ୱ ନୁହେଁ ବରଂ ଏହା ଏକ ସାମାଜିକ କର୍ତ୍ତବ୍ୟ। ଆଜି ‘ସବକା ସାଥ, ସବକା ବିକାଶ, ସବ୍ କା ପ୍ରୟାସ’ର ସଂକଳ୍ପ ମାଧ୍ୟମରେ ଦେଶ ଏହି ଭାବନା ସହିତ ଆଗକୁ ବଢ଼ୁଛି। ଏମିତି ଅନେକ ବିଷୟ ଥିଲା ଯାହା ବିଷୟରେ ପୂର୍ବରୁ କେବେ ଚିନ୍ତା କରାଯାଇ ନଥିଲା, କିନ୍ତୁ ମାନବିକ ଦୃଷ୍ଟିକୋଣରୁ ସେଗୁଡ଼ିକ ସବୁଠାରୁ ଜରୁରୀ ଥିଲା। ଆମେ ସେମାନଙ୍କୁ ଆମର ପ୍ରାଥମିକତା ଦେଇଥିଲୁ। ଆମେ ସରକାରଙ୍କୁ କଠୋର ନିୟମ ଏବଂ ଔପଚାରିକତାରୁ ବାହାର କରିଥିଲୁ।

ଆମେ ସମ୍ବେଦନଶୀଳତାକୁ ଏକ ପାରାମିଟର ଭାବରେ ସେଟ୍ କରୁ। ପ୍ରତ୍ୟେକ ଗରିବଙ୍କୁ ସ୍ଥାୟୀ ଘର ମିଳିବା, ପ୍ରତ୍ୟେକ ଗାଁକୁ ବିଜୁଳି ମିଳିବା, ଲୋକଙ୍କ ଜୀବନରୁ ଅନ୍ଧକାର ଦୂର କରିବା, ବିଶୁଦ୍ଧ ପାନୀୟ ଜଳ ଯୋଗାଇବା, ଅର୍ଥ ଅଭାବରୁ କେହି ଯେପରି ଚିକିତ୍ସାରୁ ବଞ୍ଚିତ ନ ହୁଅନ୍ତି ସେଥିପ୍ରତି ଧ୍ୟାନ ପ୍ରଦାନ କରାଯାଇଛି। ଆମେ ଏକ ସମ୍ବେଦନଶୀଳ ବ୍ୟବସ୍ଥା ସୃଷ୍ଟି କରିଛୁ ଯାହା ଏଭଳି ସେବା ଏବଂ ଏଭଳି ଶାସନର ଗ୍ୟାରେଣ୍ଟି ଦେଇପାରିବ ବୋଲି ଶ୍ରୀ ମୋଦୀ କହିଛନ୍ତି।

ସରକାରଙ୍କ ଏହି ପଦକ୍ଷେପ ବିଭିନ୍ନ ସମ୍ପ୍ରଦାୟର ଯଥେଷ୍ଟ ଉନ୍ନତି କରିଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ପିଏମ ଆବାସ ଯୋଜନାରେ ଯେତେବେଳେ ମହିଳାଙ୍କ ନାମରେ ଘର ନିର୍ମାଣ କରାଯାଏ, ତାହା ସେମାନଙ୍କୁ ସଶକ୍ତ କରିଥାଏ। ନାରୀ ଶକ୍ତି ବନ୍ଦନ ଆଇନ ସଂସଦରେ ମହିଳାଙ୍କ ଅଂଶଗ୍ରହଣ ବୃଦ୍ଧି କରିଛି। ଶ୍ରୀ ମୋଦୀ କହିଥିଲେ ଯେ ଏକଦା ଅବହେଳିତ ଥିବା ଭିନ୍ନକ୍ଷମ ସମ୍ପ୍ରଦାୟ ଏବେ ସର୍ବସାଧାରଣ ଭିତ୍ତିଭୂମିଠାରୁ ଆରମ୍ଭ କରି ରୋଜଗାର ପର୍ଯ୍ୟନ୍ତ ସବୁ କ୍ଷେତ୍ରରେ ପ୍ରାଥମିକତା ଦେଉଛନ୍ତି। ଅର୍ଥନୈତିକ ଅଭିବୃଦ୍ଧି ପାଇଁ ପ୍ରଶାସନରେ ସମ୍ବେଦନଶୀଳତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ସେ କହିଥିଲେ, ଏକ ପୃଥକ ମତ୍ସ୍ୟ ମନ୍ତ୍ରଣାଳୟ ଗଠନ ଏବଂ କିଷାନ କ୍ରେଡିଟ୍ କାର୍ଡ ତଥା ମତ୍ସ୍ୟ ସମ୍ପଦ ଯୋଜନା ଭଳି କାର୍ଯ୍ୟକ୍ରମ ଦ୍ୱାରା ଲକ୍ଷ ଲକ୍ଷ ମତ୍ସ୍ୟଜୀବୀଙ୍କ ଜୀବନରେ ଉନ୍ନତି ଘଟିଛି ଏବଂ ଅର୍ଥନୀତିକୁ ସୁଦୃଢ଼ କରାଯାଇଛି।

ପ୍ରଧାନମନ୍ତ୍ରୀ କହିଥିଲେ, “ଲାଲ୍ କିଲ୍ଲାପ୍ରାଚୀରରୁ ମୁଁ “ସବକା ପ୍ରୟାସ” ବା ସାମୂହିକ ପ୍ରୟାସ ବିଷୟରେ କହିଥିଲି, ଯେଉଁଥିରେ ଦେଶର ଭବିଷ୍ୟତ ଗଠନରେ ପ୍ରତ୍ୟେକ ବ୍ୟକ୍ତିଙ୍କ ଭୂମିକା ଉପରେ ଆଲୋକପାତ କରାଯାଇଥିଲା। ସାମାଜିକ ସଚେତନ ଭାରତୀୟମାନେ ସ୍ୱଚ୍ଛ ଭାରତ ଭଳି ଗୁରୁତ୍ୱପୂର୍ଣ୍ଣ ଆନ୍ଦୋଳନ ଚଳାଇଛନ୍ତି, ଯାହା ମହିଳା ଏବଂ ଶିଶୁମାନଙ୍କ ପାଇଁ ସ୍ୱଚ୍ଛତା ଏବଂ ସ୍ୱାସ୍ଥ୍ୟ ଫଳାଫଳରେ ଉନ୍ନତି ଆଣିଛି। ବାଜରା (ଶ୍ରୀ ଅନ୍ନ)କୁ ପ୍ରୋତ୍ସାହିତ କରିବା, ସ୍ଥାନୀୟ କାରିଗରମାନଙ୍କୁ ସହାୟତା କରିବା ଏବଂ ଉଭୟ ପ୍ରକୃତି ମାତା ଏବଂ ଆମ ମା’ଙ୍କୁ ସମ୍ମାନିତ କରୁଥିବା “ଏକ ପେଡ୍ ମା କେ ନାମ” ଅଭିଯାନ ଭଳି ପଦକ୍ଷେପ ତ୍ୱରାନ୍ୱିତ ହେଉଛି। ଖ୍ରୀଷ୍ଟିଆନ ସମ୍ପ୍ରଦାୟର ଅନେକ ଲୋକ ମଧ୍ୟ ଏହି ପ୍ରୟାସରେ ସକ୍ରିୟ ଅଛନ୍ତି। ଏକ ବିକଶିତ ଭାରତ ଗଠନ ପାଇଁ ଏହି ସାମୂହିକ କାର୍ଯ୍ୟ ଅପରିହାର୍ଯ୍ୟ।

ସାମୂହିକ ପ୍ରୟାସ ଦେଶକୁ ନିଶ୍ଚିତ ଆଗକୁ ବଢ଼ାଇବ ବୋଲି ବୋଲି ପ୍ରଧାନମନ୍ତ୍ରୀ କହିଛନ୍ତି। ବିକଶିତ ଭାରତ ଆମର ମିଳିତ ଲକ୍ଷ୍ୟ ଏବଂ ମିଳିମିଶି ଆମେ ଏହାକୁ ହାସଲ କରିବୁ। ଭବିଷ୍ୟତ ପିଢ଼ି ପାଇଁ ଉଜ୍ଜ୍ୱଳ ଭାରତ ଗଢ଼ିବା ଆମର ଦାୟିତ୍ୱ। ପୁଣି ଥରେ ମୁଁ ଆପଣ ସମସ୍ତଙ୍କୁ ଖ୍ରୀଷ୍ଟମାସ ପାଇଁ ହାର୍ଦ୍ଦିକ ଶୁଭେଚ୍ଛା ଜଣାଉଛି ବୋଲି ଶ୍ରୀ ମୋଦୀ କହିଛନ୍ତି।

ନୂଆଦିଲ୍ଲୀ: କୁଏତ ଗସ୍ତର ପ୍ରଥମ କାର୍ଯ୍ୟକ୍ରମ ଭାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୁଏତର ମୀନା ଅବଦୁଲ୍ଲା ଅଞ୍ଚଳରେ ଏକ ଶ୍ରମ ଶିବିର ପରିଦର୍ଶନ କରିଛନ୍ତି ଯେଉଁଥିରେ ପାଖାପାଖି ୧୫୦୦ ଭାରତୀୟ ନାଗରିକ କାମ କରୁଛନ୍ତି। ପ୍ରଧାନମନ୍ତ୍ରୀ ଭାରତର ବିଭିନ୍ନ ରାଜ୍ୟରୁ ଆସିଥିବା ଭାରତୀୟ ଶ୍ରମିକଙ୍କ ସହ ଆଲୋଚନା କରିବା ସହ ସେମାନଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିଥିଲେ।

ଏହି ଶ୍ରମ ଶିବିର ଗସ୍ତ ବିଦେଶରେ ଥିବା ଭାରତୀୟ ଶ୍ରମିକଙ୍କ କଲ୍ୟାଣ ପାଇଁ ପ୍ରଧାନମନ୍ତ୍ରୀଙ୍କ ପ୍ରାଥମିକତାକୁ ଦର୍ଶାଉଛି। ଗତ କିଛିବର୍ଷ ମଧ୍ୟରେ ସରକାର ବିଦେଶରେ ଥିବା ଭାରତୀୟ ଶ୍ରମିକଙ୍କ କଲ୍ୟାଣ ପାଇଁ ଇ-ମାଇଗ୍ରେଟ୍ ପୋର୍ଟାଲ, ମଦଦ୍‌ ପୋର୍ଟାଲ ଏବଂ ଉନ୍ନତ ପ୍ରବାସୀ ଭାରତୀୟ ବୀମା ଯୋଜନା ଭଳି ଅନେକ ଜ୍ଞାନକୌଶଳ ଭିତ୍ତିକ ପଦକ୍ଷେପ ଗ୍ରହଣ କରିଛନ୍ତି।

ନୂଆଦିଲ୍ଲୀ: କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଅମିତ ଶାହ ତ୍ରିପୁରାର ଅଗରତାଲାଠାରେ ଉତ୍ତର-ପୂର୍ବ ପରିଷଦ (ଏନଇସି)ର ୭୨ତମ ପ୍ଲେନାରୀ ଅଧିବେଶନରେ ଉଦବୋଧନ ଦେଇଛନ୍ତି। ଏହି ଅବସରରେ କେନ୍ଦ୍ରମନ୍ତ୍ରୀ ଜ୍ୟୋତିରାଦିତ୍ୟ ଏମ ସିନ୍ଧିଆ, ତ୍ରିପୁରାର ରାଜ୍ୟପାଳ ଇନ୍ଦ୍ରସେନା ରେଡ୍ଡୀ ନାଲ୍ଲୁ, ତ୍ରିପୁରା ମୁଖ୍ୟମନ୍ତ୍ରୀ ପ୍ରଫେସର (ଡ. ) ମାଣିକ ସାହା ଏବଂ କେନ୍ଦ୍ର ଗୃହ ସଚିବ ଗୋବିନ୍ଦ ମୋହନ ଉପସ୍ଥିତ ଥିଲେ। ଏହି ବୈଠକରେ ଅରୁଣାଚଳ ପ୍ରଦେଶ, ଆସାମ, ମଣିପୁର, ମେଘାଳୟ, ମିଜୋରାମ, ନାଗାଲାଣ୍ଡ ଏବଂ ସିକ୍କିମର ରାଜ୍ୟପାଳଙ୍କ ସମେତ ଅରୁଣାଚଳ ପ୍ରଦେଶ, ଆସାମ, ମଣିପୁର, ମିଜୋରାମ, ନାଗାଲାଣ୍ଡ ଏବଂ ସିକ୍କିମ ମୁଖ୍ୟମନ୍ତ୍ରୀଙ୍କ ସମେତ ମେଘାଳୟର ଗୋଷ୍ଠୀ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ଏବଂ ଅନ୍ୟ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।

ନିଜ ଅଭିଭାଷଣରେ କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗତ ୧୦ ବର୍ଷ ଉତ୍ତର-ପୂର୍ବାଞ୍ଚଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା । ସେ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ଯେଉଁଭଳି ଭାବରେ ଏହି ଅଞ୍ଚଳ ପ୍ରତି ବିଶ୍ୱର ଦୃଷ୍ଟି ଆକର୍ଷଣ କରିଛନ୍ତି ତାହା ସମଗ୍ର ଉତ୍ତର-ପୂର୍ବ ପାଇଁ ପରିବର୍ତନକାରୀ । ଶ୍ରୀ ଶାହ କହିଛନ୍ତି ଯେ ଦୀର୍ଘ ଦିନ ଧରି ଏହି ଅଞ୍ଚଳ ଦିଲ୍ଲୀ ପାଇଁ କେବଳ ଭାଷଣର ପ୍ରସଙ୍ଗ ଥିଲା, କିନ୍ତୁ ପ୍ରଧାନମନ୍ତ୍ରୀ ମୋଦୀ ତାଙ୍କ ଦୂରଦୃଷ୍ଟି ଏବଂ ସମ୍ବେଦନଶୀଳତା ବଳରେ ଏହି କ୍ଷେତ୍ରକୁ ବିକାଶର କେନ୍ଦ୍ରକୁ ଆଣିଛନ୍ତି। ସେ କହିଛନ୍ତି ଯେ ଗତ ୧୦ ବର୍ଷ ମଧ୍ୟରେ ଉତ୍ତର-ପୂର୍ବାଞ୍ଚଳରେ ଭିତ୍ତିଭୂମିର ଅଭୂତପୂର୍ବ ବିକାଶ ଯୋଗୁଁ କେବଳ ଭୌତିକ ଦୂରତା ହ୍ରାସ ପାଇନାହିଁ, ବରଂ ପ୍ରଧାନମନ୍ତ୍ରୀ ମୋଦୀ ଏହି ଅଞ୍ଚଳ ଏବଂ ଦିଲ୍ଲୀ ମଧ୍ୟରେ ହୃଦୟର ଦୂରତାକୁ ଦୂର କରିବା ପାଇଁ ମଧ୍ୟ କାର୍ଯ୍ୟ କରିଛନ୍ତି।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଯେତେବେଳେ ପ୍ରଧାନମନ୍ତ୍ରୀ ମୋଦୀ ନିଜେ ଉତ୍ତର-ପୂର୍ବକୁ ପ୍ରାଥମିକତା ଦେଇଥିଲେ, ଏହା ସ୍ୱାଭାବିକ ଭାବେ ସମଗ୍ର କେନ୍ଦ୍ର ସରକାରଙ୍କ ପାଇଁ ପ୍ରାଥମିକତା ପାଲଟିଥିଲା। ବହୁ ବିବିଧତା ସତ୍ତ୍ୱେ ଆଜି ଆମ ଉତ୍ତର-ପୂର୍ବାଞ୍ଚଳ ବିକାଶ ପଥରେ ଗତି କରୁଛି ବୋଲି ସେ କହିଥିଲେ। ୧୦ ବର୍ଷ ତଳେ ୨୦୦ରୁ ଅଧିକ ଆଦିବାସୀ ଗୋଷ୍ଠୀ ଏବଂ ଏହି ଅଞ୍ଚଳର ୧୯୫ରୁ ଅଧିକ ଉପଭାଷା ଓ ଭାଷା ଏକ ପ୍ରକାରରେ ଆମର ଦୁର୍ବଳତା ପାଲଟିଥିଲା, ଯାହା ବିଭିନ୍ନ ପ୍ରକାର ସଂଘର୍ଷ ସୃଷ୍ଟି କରିଥିଲା। ଶ୍ରୀ ଶାହା କହିଛନ୍ତି ଯେ ଆଜି ଯେତେବେଳେ ଆମେ ପଛକୁ ଚାହିଁବୁ, ପ୍ରଧାନମନ୍ତ୍ରୀ ଶ୍ରୀ ମୋଦୀ ଜୀ ହିଁ ସେହି ଦୁର୍ବଳତାକୁ ମଜବୁତ ଓ ଶକ୍ତିରେ ପରିଣତ କରିବାର କାର୍ଯ୍ୟ କରିଛନ୍ତି। ସେ କହିଥିଲେ ଯେ ଆଜି ୨୦୦ରୁ ଅଧିକ ଆଦିବାସୀ ଗୋଷ୍ଠୀ ସେମାନଙ୍କର ସାଂସ୍କୃତିକ ବିବିଧତା କାରଣରୁ ସମଗ୍ର ବିଶ୍ୱ ପାଇଁ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛନ୍ତି ଏବଂ ୧୯୫ରୁ ଅଧିକ ଉପଭାଷା ଏବଂ ଭାଷା ଉତ୍ତର-ପୂର୍ବାଞ୍ଚଳକୁ ବିଶ୍ୱର ୩୬ଟି ଜୈବ ବିବିଧତା ହଟସ୍ପଟ୍ ମଧ୍ୟରୁ ଅନ୍ୟତମ କରିବାରେ ଯୋଗଦାନ ଦେଇଛନ୍ତି ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ କେବଳ ଉତ୍ତର-ପୂର୍ବାଞ୍ଚଳରେ ବିଭିନ୍ନ ପ୍ରକାର ବନ୍ୟଜନ୍ତୁ ଓ ଜଳସମ୍ପଦ ସହିତ ୭୫୦୦ରୁ ଅଧିକ ପ୍ରଜାତିର ଫୁଲ ରହିଛି। ଏହି ପ୍ରାକୃତିକ ବିବିଧତାକୁ ସଂରକ୍ଷଣ କରିବା ଏବଂ ଏହି ଅଞ୍ଚଳକୁ ଏକ ପସନ୍ଦର ପର୍ଯ୍ୟଟନ ସ୍ଥଳୀରେ ପରିଣତ କରିବା ପାଇଁ ମୋଦୀ ସରକାର ଗତ ୧୦ ବର୍ଷ ଧରି ଗୁରୁତ୍ୱପୂର୍ଣ୍ଣ ପ୍ରୟାସ କରିଛନ୍ତି।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ଉତ୍ତର-ପୂର୍ବରେ ଶାନ୍ତି ପ୍ରତିଷ୍ଠା ପାଇଁ ମୋଦୀ ସରକାର ସବୁଠାରୁ ଗୁରୁତ୍ୱପୂର୍ଣ୍ଣ କାର୍ଯ୍ୟ ସମ୍ପନ୍ନ କରିଛନ୍ତି। ଗତ ୧୦ ବର୍ଷ ମଧ୍ୟରେ ଅନେକ ଶାନ୍ତି ଚୁକ୍ତି ସ୍ୱାକ୍ଷରିତ ହୋଇଛି ଏବଂ ପ୍ରାୟ ୧୦୫୭୪ ସଶସ୍ତ୍ର ଯୁବକ ଆତ୍ମସମର୍ପଣ କରି ମୁଖ୍ୟସ୍ରୋତରେ ସାମିଲ ହୋଇଛନ୍ତି, ଉତ୍ତର-ପୂର୍ବାଞ୍ଚଳରେ ଶାନ୍ତି ଆଣିଛନ୍ତି ଏବଂ ବିକାଶର ମୂଳଦୁଆ ପକାଇଛନ୍ତି। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ସମଗ୍ର ଦେଶ ଏବଂ ବିଶ୍ୱ ଏବେ ମୋଦିଙ୍କ ‘ଅଷ୍ଟଲକ୍ଷ୍ମୀ’ର ଧାରଣାକୁ ଗ୍ରହଣ କରୁଛି ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଆଜି ସମଗ୍ର ଦେଶ ପ୍ରତ୍ୟେକ ବ୍ୟକ୍ତି ଏବଂ ଉତ୍ତର-ପୂର୍ବର ରାଜ୍ୟମାନଙ୍କ ପାଇଁ ସମୃଦ୍ଧି ଚାହୁଁଛି ଯାହା ଦ୍ୱାରା ଉତ୍ତର-ପୂର୍ବ ଦେଶର ବିକାଶରେ ଯୋଗଦାନ ଜାରି ରଖିବ । ମୋଦୀ ସରକାରଙ୍କ ୧୦ ବର୍ଷରେ ଏଭଳି ବିବିଧତା ସହ ବିକାଶ ପଥରେ ଆଗକୁ ବଢିବା ପାଇଁ ସବୁ ପ୍ରକାର ଭିତ୍ତିଭୂମି ନିର୍ମାଣ ପାଇଁ ପ୍ରୟାସ କରାଯାଇଛି ବୋଲି ସେ କହିଛନ୍ତି । କେନ୍ଦ୍ର ଗୃହମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ବର୍ତ୍ତମାନ ଏହି ଭିତ୍ତିରେ ବିକାଶର ଏକ ମଜଭୁତ, ଉଚ୍ଚ ଏବଂ ସାମଗ୍ରିକ ଢାଞ୍ଚା ନିର୍ମାଣ କରିବାର ସମୟ ଆସିଛି । ସେ କହିଛନ୍ତି ଯେ ସରକାର ସର୍ବଦା ଉତ୍ତର-ପୂର୍ବାଞ୍ଚଳକୁ ପ୍ରାଥମିକତା ଦେଇ ଆସୁଛନ୍ତି ଏବଂ ମୋଦୀ ସରକାରଙ୍କ ଲକ୍ଷ୍ୟ ହେଉଛି ଏହି ଅଞ୍ଚଳର ବିକାଶର ଗତିକୁ ତ୍ୱରାନ୍ୱିତ କରି  ଅବିଶିଷ୍ଟ ଭାରତ ସହିତ ସମକକ୍ଷ କରିବା । ଶ୍ରୀ ଶାହ ଉଲ୍ଲେଖ କରିଥିଲେ ଯେ ପୂର୍ବତନ ପ୍ରଧାନମନ୍ତ୍ରୀ ଶ୍ରୀ ଅଟଳ ବିହାରୀ ବାଜପେୟୀଙ୍କ ସରକାର ସମୟରେ ଡିଓଏନଇଆର (ଉତ୍ତର-ପୂର୍ବାଞ୍ଚଳ ବିକାଶ) ମନ୍ତ୍ରଣାଳୟ ପ୍ରତିଷ୍ଠା କରାଯାଇଥିଲା । ମୋଦି ଜୀ ସମଗ୍ର କ୍ୟାବିନେଟକୁ ଉତ୍ତର-ପୂର୍ବ ଗସ୍ତ କରାଇ ସେଠାରେ ରାତ୍ରିଯାପନ କରିବାକୁ ଅନୁରୋଧ କରିଥିଲେ, ଯାହାଫଳରେ କେନ୍ଦ୍ର ମନ୍ତ୍ରୀମାନେ ଏହି ଅଞ୍ଚଳରେ ୭୦୦ ରାତିରୁ ଅଧିକ ସମୟ ବିତାଇଥିଲେ । ସେ ଆହୁରି ମଧ୍ୟ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ନିଜେ ୬୫ ଥର ଉତ୍ତର-ପୂର୍ବ ଗସ୍ତ କରିଛନ୍ତି ଏବଂ ପ୍ରତ୍ୟେକ ଗସ୍ତ ସମୟରେ ସେ ଏହି ଅଞ୍ଚଳ ପାଇଁ ବିକାଶମୂଳକ ଉପହାର ଆଣିଛନ୍ତି।

ଅମିତ ଶାହ କହିଛନ୍ତି ଯେ ଉତ୍ତର-ପୂର୍ବର ସଂସ୍କୃତିକୁ ବଜାୟ ରଖିବାରେ ମୋଦୀ ସରକାର କୌଣସି ସୁଯୋଗ ଛାଡ଼ି ନାହାନ୍ତି। ସମ୍ବିଧାନର ଅଷ୍ଟମ ଅନୁସୂଚୀରେ ଉତ୍ତର-ପୂର୍ବର ସବୁଠାରୁ ଅଧିକ ଭାଷାକୁ ଅନ୍ତର୍ଭୁକ୍ତ କରିବା ପାଇଁ ମୋଦୀ ସରକାର କାର୍ଯ୍ୟ କରିଥିଲେ ବୋଲି ସେ ଉଲ୍ଲେଖ କରିଥିଲେ । ଶ୍ରୀ ଶାହ କହିଛନ୍ତି ଯେ ବିଭିନ୍ନ ଶାନ୍ତି ଚୁକ୍ତିରେ କେନ୍ଦ୍ର ସରକାର କେବଳ ଉତ୍ତର-ପୂର୍ବର ବିଭିନ୍ନ ଉପଭାଷାକୁ ସଶକ୍ତ ଏବଂ ସଂରକ୍ଷିତ କରିନାହାଁନ୍ତି ବରଂ ଏହି ଅଞ୍ଚଳର ସ୍ଥାନୀୟ ଭାଷାରେ ପ୍ରାଥମିକ ଶିକ୍ଷା ପ୍ରଦାନ କରିବାକୁ ମଧ୍ୟ ସମର୍ଥନ କରିଛନ୍ତି । ଏହା ଦ୍ୱାରା ଆମ ସାଂସ୍କୃତିକ ଐତିହ୍ୟର ସଂରକ୍ଷଣ ବହୁ ମାତ୍ରାରେ ଉପକୃତ ହୋଇଛି। ଏବେ ଉତ୍ତର-ପୂର୍ବାଞ୍ଚଳର ବିକାଶ ମାଧ୍ୟମରେ ଦେଶର ୫ ଟ୍ରିଲିୟନ ଡଲାର ଅର୍ଥନୀତି ରେ ପରିଣତ ହେବାର ପ୍ରୟାସକୁ ଏକ ବଡ଼ ପ୍ରୋତ୍ସାହନ ଦେବାର ସମୟ ଆସିଛି ବୋଲି ସେ ଉଲ୍ଲେଖ କରିଛନ୍ତି। ଏଥିପାଇଁ ଡିଓଏନଆର ମନ୍ତ୍ରଣାଳୟ ଏବଂ ଉତ୍ତର-ପୂର୍ବ ପରିଷଦ (ଏନଇସି) “ଆକ୍ଟ ଇଷ୍ଟ, ଆକ୍ଟ ଫାଷ୍ଟ ଏବଂ ଆକ୍ଟ ଫାଷ୍ଟ” ମନ୍ତ୍ରକୁ କାର୍ଯ୍ୟକାରୀ କରିବା ପାଇଁ କାର୍ଯ୍ୟ କରୁଛନ୍ତି ବୋଲି ସେ ଉଲ୍ଲେଖ କରିଛନ୍ତି।

କେନ୍ଦ୍ର ଗୃହମନ୍ତ୍ରୀ କହିଲେ ଯେ ଗତ ୫୦ ବର୍ଷ ମଧ୍ୟରେ ଏନଇସି ଆହ୍ୱାନର ଆକାଂକ୍ଷା, ଆବଶ୍ୟକତା ଏବଂ ସମ୍ଭାବ୍ୟ ସମାଧାନ ଉପରେ ଆଲୋଚନା କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ପ୍ଲାଟଫର୍ମ ଭାବରେ କାର୍ଯ୍ୟ କରିଛି ଏବଂ ଉତ୍ତର-ପୂର୍ବର ବିକାଶ ପାଇଁ ବ୍ଲୁପ୍ରିଣ୍ଟ ପାଲଟିବା ପାଇଁ କାର୍ଯ୍ୟ କରିଛି | ସେ କହିଲେ ଯେ ଭାରତ ସରକାର ଏବଂ ଉତ୍ତର-ପୂର୍ବାଞ୍ଚଳର ରାଜ୍ୟମାନଙ୍କ ନୀତିକୁ ସମନ୍ୱିତ କରିବାରେ ଏନଇସି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ତୃଣମୂଳ ସ୍ତରରେ ବିକାଶ ଯେପରି ପହଞ୍ଚିବ ତାହା ସୁନିଶ୍ଚିତ କରିବା। ସେ ଆହୁରି ମଧ୍ୟ କହିଛନ୍ତି ଯେ ବିକାଶ ଯୋଜନା ପ୍ରସ୍ତୁତ କରିବା, ବିଭିନ୍ନ ଆଦିବାସୀ ଗୋଷ୍ଠୀକୁ ବିକାଶ ସହିତ ଯୋଡ଼ିବା ଏବଂ ସମଗ୍ର ଅଞ୍ଚଳକୁ ଏକ ନିଆରା ଦୃଷ୍ଟିକୋଣରୁ ଦେଖି ଉତ୍ତର-ପୂର୍ବାଞ୍ଚଳର ବିକାଶକୁ ରୂପରେଖ ଦେବା ପାଇଁ ଏନଇସି ଦାୟୀ।

ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀ ଏକ ସକାରାତ୍ମକ ଇକୋସିଷ୍ଟମ ସୃଷ୍ଟି କରିଛନ୍ତି ଏବଂ ଏହା ଆଧାରରେ ରାଜ୍ୟ ଏବଂ ଡିଓଏନଆର ମନ୍ତ୍ରଣାଳୟ ନିବେଶ ବ୍ୟବସ୍ଥାରେ ଉନ୍ନତି ଆଣିବା ଆବଶ୍ୟକ । ସେ କହିଛନ୍ତି ଯେ ଏହି ଅଞ୍ଚଳରୁ ଯୋଗାଯୋଗ ଆଉ ସମସ୍ୟା ହୋଇ ରହିବ ନାହିଁ ଏବଂ କିଛି ଦିନ ମଧ୍ୟରେ ବିଶ୍ୱ ସହିତ ଯୋଗାଯୋଗ ମଧ୍ୟ ଆଉ ପ୍ରସଙ୍ଗ ହେବ ନାହିଁ । ସେ କହିଛନ୍ତି ଯେ ବାଂଲାଦେଶ ଏନକ୍ଲେଭସ୍ ଏକ୍ସଚେଞ୍ଜ ପରେ ଉତ୍ତର-ପୂର୍ବାଞ୍ଚଳକୁ ବିଶ୍ୱ ସହ ଯୋଡ଼ିବାର ଆମର ଲକ୍ଷ୍ୟ ଖୁବ୍ ଶୀଘ୍ର ହାସଲ ହେବ। ଏହା ଉତ୍ତର-ପୂର୍ବାଞ୍ଚଳର ଶିଳ୍ପ ଇକୋସିଷ୍ଟମକୁ ସୁଦୃଢ଼ କରିବ ଏବଂ ଏଠାରେ ନିବେଶ କରୁଥିବା ଲୋକଙ୍କ ପାଇଁ ବିଶ୍ୱ ବଜାରକୁ ମଧ୍ୟ ଖୋଲିବ ବୋଲି ସେ ଉଲ୍ଲେଖ କରିଛନ୍ତି। ଏଥିପାଇଁ ପ୍ରତ୍ୟେକ ରାଜ୍ୟ ନିଜ ନିଜ ପ୍ରୟାସକୁ ସୁଦୃଢ଼ କରିବା ଦରକାର ବୋଲି ଶ୍ରୀ ଶାହ ଗୁରୁତ୍ୱାରୋପ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଭାରତ ସରକାର ସମସ୍ତ ନିବେଶକଙ୍କୁ ଉତ୍ତର-ପୂର୍ବରେ ନିବେଶ କରିବାକୁ ପ୍ରୋତ୍ସାହିତ କରୁଛନ୍ତି ।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ନିକଟରେ କେନ୍ଦ୍ର କ୍ୟାବିନେଟ୍ ସେମିକଣ୍ଡକ୍ଟର ଏବଂ ଡିସପ୍ଲେ ଉତ୍ପାଦନ ଇକୋସିଷ୍ଟମର ବିକାଶ ପାଇଁ ଉତ୍ତର-ପୂର୍ବାଞ୍ଚଳରେ ତିନୋଟି ସେମିକଣ୍ଡକ୍ଟର ୟୁନିଟ୍ ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଛି। ସେଥିମଧ୍ୟରୁ ଟାଟା ସେମିକଣ୍ଡକ୍ଟର ଆସେମ୍ବଲି ଏବଂ ଟେଷ୍ଟ ପ୍ରାଇଭେଟ୍ ଲିମିଟେଡ୍ ନାମକ ଏକ ୟୁନିଟ୍ ଆସାମରେ ପାଖାପାଖି ୨୭,୦୦୦ କୋଟି ଟଙ୍କା ବିନିଯୋଗରେ ପ୍ରତିଷ୍ଠା ହେବ, ଯାହା କି ଏପର୍ଯ୍ୟନ୍ତ ସବୁଠାରୁ ବଡ଼ ପୁଞ୍ଜିନିବେଶ ହେବ। ଏହାଦ୍ୱାରା ୨୦,୦୦୦ ପ୍ରତ୍ୟକ୍ଷ ନିଯୁକ୍ତି ଓ ୬୦,୦୦୦ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ। ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ ଏହି ଭବିଷ୍ୟତର ସମ୍ଭାବନାକୁ ଦୃଷ୍ଟିରେ ରଖି ଭାରତ ସରକାରଙ୍କ ଶିକ୍ଷା ମନ୍ତ୍ରଣାଳୟ ଯୁବପିଢ଼ିଙ୍କୁ ପ୍ରାସଙ୍ଗିକ ଶିକ୍ଷା ଓ ଜ୍ଞାନରେ ସଶକ୍ତ କରିବା ପାଇଁ ଉତ୍ତର-ପୂର୍ବାଞ୍ଚଳର ବିଶ୍ୱବିଦ୍ୟାଳୟମାନଙ୍କ ସହଯୋଗରେ ପାଠ୍ୟକ୍ରମ ପ୍ରସ୍ତୁତ କରୁଛି। ଏହା ଦ୍ୱାରା ଉତ୍ତର-ପୂର୍ବର ସମସ୍ତ ୮ଟି ରାଜ୍ୟରେ ଯୁବବର୍ଗଙ୍କ ପାଇଁ ବହୁ ସଂଖ୍ୟକ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ସେ ଗୁରୁତ୍ୱାରୋପ କରିଥିଲେ।

ଅମିତ ଶାହ କହିଥିଲେ ଯେ ଉତ୍ତର-ପୂର୍ବାଞ୍ଚଳ ପାଇଁ ଶିଳ୍ପ ପୁଞ୍ଜିନିବେଶ ଆକୃଷ୍ଟ କରିବା ଗୁରୁତ୍ୱପୂର୍ଣ୍ଣ ଏବଂ ଏହାକୁ ତ୍ୱରାନ୍ୱିତ କରିବା ପାଇଁ ପ୍ରୟାସକୁ ଗତି ଦେବାର ଆବଶ୍ୟକତା ରହିଛି । ସେ ଉଲ୍ଲେଖ କରିଥିଲେ ଯେ କେବଳ ଏହି ଅଞ୍ଚଳ ଏବଂ ରାଜ୍ୟଗୁଡ଼ିକର ବିକାଶ ଦ୍ୱାରା ଉତ୍ତର-ପୂର୍ବ ଶାନ୍ତିପୂର୍ଣ୍ଣ ରହିପାରିବ ନାହିଁ; ବ୍ୟକ୍ତି, ଗ୍ରାମ ଓ ରାଜ୍ୟର ବିକାଶରେ ସନ୍ତୁଳନ ରହିବା ଆବଶ୍ୟକ। ବ୍ୟକ୍ତିବିଶେଷଙ୍କ ବିକାଶ ପାଇଁ ଗାଁର ବିକାଶ ସୁନିଶ୍ଚିତ ହେବା ଆବଶ୍ୟକ ଏବଂ ଏହାକୁ ହାସଲ କରିବା ପାଇଁ ଶିଳ୍ପ ବିକାଶ ସହିତ ଏହି ଅଞ୍ଚଳକୁ ଦୁଗ୍ଧ, ପନିପରିବା, ଅଣ୍ଡା, ମାଛ ଓ ମାଂସ ଉତ୍ପାଦନରେ ଆତ୍ମନିର୍ଭରଶୀଳ ହେବାକୁ ପଡ଼ିବ ବୋଲି ସେ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ ଜୈବିକ ଉତ୍ପାଦ, କ୍ଷୀର, ପନିପରିବା, ଅଣ୍ଡା ଏବଂ ଏହିପରି ଜିନିଷ ହିଁ ଏହି ଅଞ୍ଚଳରେ ବ୍ୟକ୍ତିଗତ ବିକାଶକୁ ପ୍ରୋତ୍ସାହିତ କରିପାରିବ ଏବଂ ଯେପର୍ଯ୍ୟନ୍ତ ପ୍ରତ୍ୟେକ ବ୍ୟକ୍ତି ସମୃଦ୍ଧ ନ ହୋଇଛନ୍ତି, ସେ ପର୍ଯ୍ୟନ୍ତ ଏକ ସମୃଦ୍ଧ ଉତ୍ତର-ପୂର୍ବର ସ୍ୱପ୍ନ ସାକାର ହୋଇପାରିବ ନାହିଁ ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ସମଗ୍ର ଉତ୍ତର-ପୂର୍ବରେ ପ୍ରାକୃତିକ ଭାବେ ଜୈବିକ ଚାଷ ହୋଇଥାଏ। ବୈଠକରେ ଉପସ୍ଥିତ ଥିବା ସମସ୍ତ ରାଜ୍ୟପାଳ, ମୁଖ୍ୟମନ୍ତ୍ରୀ ଏବଂ ମୁଖ୍ୟ ଶାସନ ସଚିବମାନଙ୍କୁ ଭାରତ ସରକାରଙ୍କ ଦ୍ୱାରା ସ୍ଥାପିତ ଜାତୀୟ ସମବାୟ ଜୈବିକ ଲିମିଟେଡ୍ (ଏନସିଓଏଲ୍ )ରେ ଯୋଗ ଦେବାକୁ ସେ ଅନୁରୋଧ କରିଥିଲେ। ସମବାୟ ଜୈବିକ କୃଷିରେ ନିୟୋଜିତ ସମସ୍ତ କୃଷକଙ୍କୁ ଯୋଡ଼ିବା ଏବଂ ପ୍ୟାକେଜିଂ, ମାର୍କେଟିଂ ଏବଂ ରପ୍ତାନି ପାଇଁ ଭିତ୍ତିଭୂମି ନିର୍ମାଣ କରିବା ଏନସିଓଏଲର ଉଦ୍ଦେଶ୍ୟ। ସେ ଗୁରୁତ୍ୱାରୋପ କରିଥିଲେ ଯେ ସମସ୍ତ ରାଜ୍ୟ ଏନସିଓଏଲ ସହିତ ଚୁକ୍ତି କରିବା ଉଚିତ ଏବଂ ସେମାନଙ୍କ କୃଷକମାନଙ୍କୁ ଏଥିରେ ଯୋଡ଼ିବା ଉଚିତ, ଯାହାଦ୍ୱାରା ସେମାନଙ୍କର ଜୈବିକ ଉତ୍ପାଦ ବିଶ୍ୱ ବଜାରରେ ପହଞ୍ଚିପାରିବ । ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ ମୋଦୀ ସରକାର ଉତ୍ତର-ପୂର୍ବର ପ୍ରତ୍ୟେକ ରାଜ୍ୟ ଏବଂ ଆସାମ ଭଳି ବୃହତ ରାଜ୍ୟରେ ଗୋଟିଏ ଲେଖାଏଁ ଜୈବିକ ସାର୍ଟିଫିକେସନ୍ ଲ୍ୟାବ୍ ପ୍ରତିଷ୍ଠା କରିବାକୁ ନିଷ୍ପତ୍ତି ନେଇଛନ୍ତି। ଏହା ଦ୍ୱାରା ଉଭୟ ମୃତ୍ତିକା ଓ କୃଷି ଜାତ ଦ୍ରବ୍ୟପାଇଁ ନିର୍ଭରଯୋଗ୍ୟ ଜୈବିକ ପ୍ରମାଣପତ୍ର ସୁନିଶ୍ଚିତ ହେବ। ଅମୁଲ ଓ ଭାରତ ଭଳି ବ୍ରାଣ୍ଡ ଜରିଆରେ ଆମର ଉତ୍ପାଦ ବିଶ୍ୱ ବଜାରରେ ପହଞ୍ଚିପାରିବ ବୋଲି ସେ କହିଛନ୍ତି।

ଅମିତ ଶାହ କହିଛନ୍ତି ଯେ ଉତ୍ତର-ପୂର୍ବାଞ୍ଚଳରେ ପ୍ରତ୍ୟେକ ପ୍ରକାର ସଂଯୋଗ ମୋଦୀ ସରକାରଙ୍କ ପ୍ରାଥମିକତା। ସେ ଉଲ୍ଲେଖ କରିଥିଲେ ଯେ ମିଶନ ପାମ୍ ଅଏଲ ଉତ୍ତର-ପୂର୍ବର ସମସ୍ତ ରାଜ୍ୟର ବିକାଶ ପାଇଁ ଏକ ଗୁରୁତ୍ୱପୂର୍ଣ୍ଣ ମାର୍ଗ ରେ ପରିଣତ ହେବାର ସମ୍ଭାବନା ରହିଛି । ଦେଶରେ ତୈଳବୀଜ ଉତ୍ପାଦନ କମ୍ ଏବଂ ଆମେ ଏବେ ବି ଖାଇବା ତେଲ କ୍ଷେତ୍ରରେ ଆତ୍ମନିର୍ଭରଶୀଳ ନୁହଁ, କିନ୍ତୁ ମିଶନ ପାମ୍ ଅଏଲ ଆମକୁ ଏହି କ୍ଷେତ୍ରରେ ଆତ୍ମନିର୍ଭରଶୀଳ କରିପାରିବ ବୋଲି ସେ ଆଲୋକପାତ କରିଥିଲେ । ଶ୍ରୀ ଶାହା ଆହୁରି ମଧ୍ୟ କହିଛନ୍ତି ଯେ ବର୍ତ୍ତମାନ ସୁଦ୍ଧା ଉତ୍ତର-ପୂର୍ବରେ ୧୦ଟି ନୂତନ ତେଲ କଳ ବିକଶିତ କରିବାକୁ ପ୍ରସ୍ତାବ ରହିଛି।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ମୋଦୀ ସରକାର ସୁରକ୍ଷା କ୍ଷେତ୍ରରେ ଏକ ବହୁମୁଖୀ ଆଭିମୁଖ୍ୟ ଗ୍ରହଣ କରିଛନ୍ତି ଏବଂ ପ୍ରତ୍ୟେକ ରାଜ୍ୟ ପାଇଁ ଏକ ନିର୍ଦ୍ଦିଷ୍ଟ ରଣନୀତି ପ୍ରସ୍ତୁତ କରି ଆମେ ଗତ ୧୦ ବର୍ଷ ମଧ୍ୟରେ ଅଗ୍ରଗତି କରିଛୁ। ଏହି ରଣନୀତିର ଫଳସ୍ୱରୂପ ପୋଲିସ, ସେନା, ଆସାମ ରାଇଫଲ୍ସ ଏବଂ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ (ସିଏପିଏଫ) ଉତ୍ତର ପୂର୍ବରେ ଏକ ବହୁତ ଭଲ ବ୍ୟବସ୍ଥାକୁ ସଫଳତାର ସହ ପ୍ରତିଷ୍ଠା କରିପାରିଛନ୍ତି ବୋଲି ସେ ଉଲ୍ଲେଖ କରିଥିଲେ । ଶ୍ରୀ ଶାହ କହିଥିଲେ ଯେ ଗତ ୧୦ ବର୍ଷ ମଧ୍ୟରେ ଉତ୍ତର-ପୂର୍ବାଞ୍ଚଳରେ ହିଂସାତ୍ମକ ଘଟଣା ୭୧% ହ୍ରାସ ପାଇଛି ଏବଂ ସାଧାରଣ ନାଗରିକଙ୍କ ମୃତ୍ୟୁ ୮୬% ହ୍ରାସ ପାଇଛି। ପାଖାପାଖି ୧୦,୫୭୪ ବିଦ୍ରୋହୀ ଆତ୍ମସମର୍ପଣ କରିଛନ୍ତି ଏବଂ ଅନେକ ଶାନ୍ତି ଚୁକ୍ତି ଯୋଗୁଁ ଭାରତ ସରକାର ସମଗ୍ର ଉତ୍ତର-ପୂର୍ବରେ ଶାନ୍ତି ପ୍ରତିଷ୍ଠା କରିବାରେ ସଫଳ ହୋଇଛନ୍ତି।

ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ମୋଦୀ ନିଶାମୁକ୍ତ ଭାରତ ପାଇଁ ଏକ ଅଭିଯାନ ଆରମ୍ଭ କରିଛନ୍ତି, ଯେଉଁଥିରେ ଉତ୍ତର-ପୂର୍ବର ଏକ ସ୍ୱତନ୍ତ୍ର ଦାୟିତ୍ୱ ରହିଛି, କାରଣ ଭାରତରେ ପ୍ରବେଶ କରୁଥିବା ନିଶାଦ୍ରବ୍ୟର ଏକ ପ୍ରମୁଖ ମାର୍ଗ ଉତ୍ତର-ପୂର୍ବର ରାଜ୍ୟ ଦେଇ ଯାଇଥାଏ । ଗତ ୬ ବର୍ଷ ମଧ୍ୟରେ ଏ ଦିଗରେ ଉଲ୍ଲେଖନୀୟ କାର୍ଯ୍ୟ ହୋଇଛି, କିନ୍ତୁ ଆମର ଗତି ଏପର୍ଯ୍ୟନ୍ତ ଯଥେଷ୍ଟ ନୁହେଁ ବୋଲି ସେ ଉଲ୍ଲେଖ କରିଛନ୍ତି। ବୈଠକରେ ଉପସ୍ଥିତ ଥିବା ସମସ୍ତ ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କୁ ଜିଲ୍ଲା ମନିଟରିଂ କମିଟିର ଜିଲ୍ଲାସ୍ତରୀୟ ବୈଠକ ଆୟୋଜନ ଉପରେ ଗୁରୁତ୍ୱ ଦେବା ସହ ଏହାର ପ୍ରଭାବଶାଳୀ ତଦାରଖ ସୁନିଶ୍ଚିତ କରିବାକୁ ଗୃହମନ୍ତ୍ରୀ ଅନୁରୋଧ କରିଥିଲେ। ସେ କହିଥିଲେ ଯେ ନିଶା ଭବିଷ୍ୟତ ପିଢ଼ିକୁ ନଷ୍ଟ କରିଦିଏ ଏବଂ ଭାରତକୁ ସମ୍ପୂର୍ଣ୍ଣ ନିଶାମୁକ୍ତ କରିବା ଆମର ଲକ୍ଷ୍ୟ, ଏହି ଅଭିଯାନରେ ଉତ୍ତର-ପୂର୍ବ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି ।

କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ଉତ୍ତର-ପୂର୍ବର ସମସ୍ତ ରାଜ୍ୟରେ ତିନୋଟି ନୂତନ ଅପରାଧିକ ଆଇନକୁ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ କରିବା ପାଇଁ ପ୍ରସ୍ତୁତି ଚାଲିଛି। ଏହି ଆଇନଗୁଡ଼ିକ ସମ୍ପୂର୍ଣ୍ଣ କାର୍ଯ୍ୟକାରୀ ହେବା ପରେ ସୁପ୍ରିମ୍ କୋର୍ଟରେ ପହଞ୍ଚୁଥିବା ସବୁଠାରୁ ଜଟିଳ ମାମଲାରେ ମଧ୍ୟ ତିନି ବର୍ଷ ମଧ୍ୟରେ ନ୍ୟାୟ ପ୍ରଦାନ କରାଯିବ ବୋଲି ସେ ଉଲ୍ଲେଖ କରିଛନ୍ତି। ସେ ଦର୍ଶାଇଛନ୍ତି ଯେ ବର୍ଷ ବର୍ଷ ଧରି ସବୁ ରାଜ୍ୟରେ ପୋଲିସର ଫୋକସ କେବଳ ବିଦ୍ରୋହ ଓ ହିଂସାର ମୁକାବିଲା ଉପରେ ରହିଥିଲା । କିନ୍ତୁ ଏବେ ଉତ୍ତର-ପୂର୍ବାଞ୍ଚଳରେ ହିଂସା ପ୍ରାୟ ବନ୍ଦ ହୋଇଯାଇଥିବାରୁ ଏହି ଅଞ୍ଚଳର ପ୍ରତ୍ୟେକ ନାଗରିକଙ୍କୁ ସମ୍ପତ୍ତି, ସମ୍ମାନ ଓ ପାରିବାରିକ ସୁରକ୍ଷା ର ସାମ୍ବିଧାନିକ ଅଧିକାର ପ୍ରଦାନ କରିବାର ସମୟ ଆସିଛି, ଯାହା କି ଏହି ତିନୋଟି ଆଇନରେ ଅନ୍ତର୍ଭୁକ୍ତ।

ଉତ୍ତର-ପୂର୍ବ ପୁଲିସର ଆଭିମୁଖ୍ୟ ଓ ଦିଗ ବଦଳାଇବାର ସମୟ ଆସିଛି ବୋଲି ଗୃହମନ୍ତ୍ରୀ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ ଏହି ଅଞ୍ଚଳରେ ଶାନ୍ତି ବଜାୟ ରହିଥିବାରୁ ନାଗରିକମାନଙ୍କୁ ସେମାନଙ୍କର ନ୍ୟାର୍ଯ୍ୟ ଅଧିକାର ସୁନିଶ୍ଚିତ କରିବା ଉପରେ ଧ୍ୟାନ ଦିଆଯିବା ଉଚିତ୍ । ଏଥିପାଇଁ ଉତ୍ତର-ପୂର୍ବାଞ୍ଚଳର ପ୍ରତ୍ୟେକ ରାଜ୍ୟରେ ପୁଲିସର ଆଭିମୁଖ୍ୟ, ପ୍ରଶିକ୍ଷଣ ଓ ମନୋଭାବରେ ପରିବର୍ତ୍ତନ ର ଆବଶ୍ୟକତା ରହିଛି। ସେ ଉଲ୍ଲେଖ କରିଛନ୍ତି ଯେ ଏହି ପରିବର୍ତ୍ତନ ହାସଲ କରିବାର ପ୍ରାଥମିକତା ହେଉଛି ଏହି ଅଞ୍ଚଳର ସମସ୍ତ ରାଜ୍ୟରେ ଏହି ତିନୋଟି ନୂତନ ଆଇନର ସମ୍ପୂର୍ଣ୍ଣ ରୂପାୟନ ।

ଅମିତ ଶାହ ବୈଠକରେ ଉପସ୍ଥିତ ଥିବା ସମସ୍ତ ରାଜ୍ୟପାଳଙ୍କୁ ବ୍ୟକ୍ତିଗତ ଭାବେ ଏହି ପ୍ରକ୍ରିୟା ଉପରେ ନଜର ରଖିବାକୁ ଅନୁରୋଧ କରିଥିଲେ, କାରଣ ଏଫଆଇଆର ଦାଖଲ କରି ନାଗରିକମାନେ ନ୍ୟାୟ ପାଇପାରିବେ ବୋଲି ଉତ୍ତର-ପୂର୍ବାଞ୍ଚଳରେ ବିଶ୍ୱାସ ସ୍ଥାପନ କରିବା ଗୁରୁତ୍ୱପୂର୍ଣ୍ଣ । ସେ କହିଛନ୍ତି ଯେ ଚାରି ଦଶନ୍ଧି ଧରି ଉତ୍ତର-ପୂର୍ବର ସମସ୍ତ ରାଜ୍ୟରେ ପୋଲିସ ବାହିନୀ ସମ୍ପୂର୍ଣ୍ଣ ଭାବରେ ବିଦ୍ରୋହର ମୁକାବିଲା ଉପରେ ଧ୍ୟାନ ଦେଉଥିଲା ଏବଂ ବର୍ତ୍ତମାନ ଯେହେତୁ ବିଦ୍ରୋହ ଆଉ ଏକ ପ୍ରମୁଖ ପ୍ରସଙ୍ଗ ନୁହେଁ, ତେଣୁ ନାଗରିକମାନଙ୍କୁ ସେମାନଙ୍କ ଅଧିକାର ପ୍ରଦାନ ଉପରେ ଧ୍ୟାନ ଦେବା ଉଚିତ୍ । ଯଦି ଏହା ହାସଲ ହୁଏ, ତେବେ ଦେଶର ନାଗରିକମାନଙ୍କୁ ଦିଆଯାଇଥିବା ସାମ୍ବିଧାନିକ ଅଧିକାର ମଧ୍ୟ ଉତ୍ତର ପୂର୍ବାଞ୍ଚଳର ନାଗରିକମାନଙ୍କୁ ପ୍ରଦାନ କରାଯିବ ବୋଲି ସେ କହିଛନ୍ତି।

ଅମିତ ଶାହ କହିଛନ୍ତି ଯେ ପିଏମ-ଡିଭାଇନ୍‍ ଯୋଜନା ପାଇଁ ଆବଣ୍ଟନ ପ୍ରାୟ ୬୬୦୦ କୋଟି ଟଙ୍କା ଥିଲା, କିନ୍ତୁ ଖୁବଶୀଘ୍ର ଏହାକୁ ୯୦୦୦ କୋଟି ଟଙ୍କାକୁ ବୃଦ୍ଧି କରାଯିବ । ଉତ୍ତର-ପୂର୍ବାଞ୍ଚଳର ବିକାଶ ପାଇଁ ସଡ଼କ, ବିଦ୍ୟୁତ, ଶିକ୍ଷା, ସ୍ୱାସ୍ଥ୍ୟସେବା, କ୍ରୀଡ଼ା ଭିତ୍ତିଭୂମି ଓ ପର୍ଯ୍ୟଟନ ପ୍ରକଳ୍ପ ସମେତ ୧୧୧ରୁ ଅଧିକ ପ୍ରକଳ୍ପ ରହିଛି। ସେ ଆହୁରି ମଧ୍ୟ କହିଛନ୍ତି ଯେ ୨୦୧୪-୧୫ ରୁ ଉତ୍ତର-ପୂର୍ବ ପାଇଁ ବଜେଟ୍ ୧୫୩% ବୃଦ୍ଧି ପାଇଛି ଏବଂ ବାଉଁଶ ମିଶନ ମାଧ୍ୟମରେ ସରକାର ସମଗ୍ର ଉତ୍ତର-ପୂର୍ବାଞ୍ଚଳକୁ ସମୃଦ୍ଧ କରିବା ପାଇଁ ଏକ ମହତ୍ୱାକାଂକ୍ଷୀ ଲକ୍ଷ୍ୟ ଧାର୍ଯ୍ୟ କରିଛନ୍ତି। ଉତ୍ତର-ପୂର୍ବାଞ୍ଚଳର ପ୍ରତ୍ୟେକ ପ୍ରକାର ଯୋଗାଯୋଗ ପାଇଁ ମୋଦୀ ସରକାର ସମସ୍ତ ପ୍ରକାର ସହାୟତା ଯୋଗାଇ ଦେବେ ଏବଂ ଏଥିପାଇଁ ବଜେଟ୍ ର ଅଭାବ ରହିବ ନାହିଁ ବୋଲି ଶ୍ରୀ ଶାହା ଗୁରୁତ୍ୱାରୋପ କରିଥିଲେ।

କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ କହିଛନ୍ତି ଯେ ରେଳ ସଂଯୋଗ ପାଇଁ ୮୧,୦୦୦ କୋଟି ଏବଂ ସଡ଼କ ଯୋଗାଯୋଗ ପାଇଁ ୪୧,୦୦୦ କୋଟି ଟଙ୍କାର ଯୋଜନା କରାଯାଇଛି। ୬୪ଟି ନୂଆ ବିମାନ ମାର୍ଗ ଆରମ୍ଭ କରାଯାଇଛି ଏବଂ ଅବଶିଷ୍ଟ କାର୍ଯ୍ୟ ଆସନ୍ତା ୩ ବର୍ଷ ମଧ୍ୟରେ ଶେଷ ହେବ ବୋଲି ସେ ଉଲ୍ଲେଖ କରିଛନ୍ତି। ଶ୍ରୀ ଶାହ ଗୁରୁତ୍ୱାରୋପ କରିଥିଲେ ଯେ ଉତ୍ତର-ପୂର୍ବର ରାଜ୍ୟଗୁଡ଼ିକ ଏନଇଏସଏସି (ନର୍ଥ ଇଷ୍ଟର୍ଣ୍ଣ ସ୍ପେସ୍ ଆପ୍ଲିକେସନ୍ ସେଣ୍ଟର)ର ସର୍ବାଧିକ ବ୍ୟବହାର କରିବା ଉଚିତ୍ । ଚ୍ୟାଲେଞ୍ଜିଂ ଭୌଗୋଳିକ ସ୍ଥିତି ଥିବା ଉତ୍ତର-ପୂର୍ବର ୮ଟି ରାଜ୍ୟର ବିକାଶ ପାଇଁ ଜ୍ଞାନକୌଶଳର ଉପଯୋଗ ନହେବା ପର୍ଯ୍ୟନ୍ତ ବିକାଶ ଉପରେ ଗୁରୁତ୍ୱ ଦିଆଯାଇ ପାରିବ ନାହିଁ ବୋଲି ସେ କହିଛନ୍ତି।

ଉତ୍ତର-ପୂର୍ବ ରାଜ୍ୟଗୁଡ଼ିକରେ ବନ୍ୟା ସମସ୍ୟା ସମ୍ପର୍କରେ ଗୃହମନ୍ତ୍ରୀ କହିଛନ୍ତି ଯେ ପ୍ରାକୃତିକ ଗତିପଥରେ ରାସ୍ତା ନିର୍ମାଣ ପାଇଁ ଜ୍ଞାନକୌଶଳର ବ୍ୟବହାର ଦ୍ୱାରା ରାସ୍ତା ନିର୍ମାଣ ପାଇଁ ବଜେଟ୍ ଅତି କମରେ ୩୦% ହ୍ରାସ କରାଯାଇପାରିବ। ବନ୍ୟା ଜଳକୁ ଅନ୍ୟତ୍ର ସ୍ଥାନାନ୍ତର କରି ବଡ଼ ବଡ଼ ଜଳାଶୟ ସୃଷ୍ଟି କରି ବନ୍ୟା ନିବାରଣ, କୃଷି ଓ ପର୍ଯ୍ୟଟନ ଆଦି ତିନୋଟି ଲକ୍ଷ୍ୟ ହାସଲ କରାଯାଇପାରିବ ବୋଲି ସେ କହିଛନ୍ତି। ସେ ଉଲ୍ଲେଖ କରିଛନ୍ତି ଯେ ଆସାମ ପରୀକ୍ଷାମୂଳକ ଭାବରେ ୧୫ଟି ବୃହତ ଜଳାଶୟ ସୃଷ୍ଟି କରାଯାଇଛି ଏବଂ ବନ୍ୟା ରିଲିଫ ଏବଂ ଜଳ ସଂରକ୍ଷଣ ପାଇଁ ସମସ୍ତ ରାଜ୍ୟ ଏହି ପଦ୍ଧତି ବ୍ୟବହାର କରିବା ଉଚିତ୍ । ଶ୍ରୀ ଶାହ ଆହୁରି ମଧ୍ୟ କହିଛନ୍ତି ଯେ ଜ୍ଞାନକୌଶଳର ବ୍ୟବହାର ଦୁର୍ନୀତିକୁ ହ୍ରାସ କରିବା ସହ ପ୍ରତ୍ୟକ୍ଷ ଲାଭ ସ୍ଥାନାନ୍ତର (ଡିବିଟି)କୁ ଆଗେଇ ନେବାରେ ସହାୟକ ହୋଇଥାଏ।

ଅମିତ ଶାହ କହିଛନ୍ତି ଯେ କେବଳ ଏକ ଶାନ୍ତିପୂର୍ଣ୍ଣ ଏବଂ ସମୃଦ୍ଧ ଉତ୍ତର-ପୂର୍ବାଞ୍ଚଳ ଯଥେଷ୍ଟ ନୁହେଁ। ଉତ୍ତର-ପୂର୍ବାଞ୍ଚଳର ସାଂସ୍କୃତିକ ବିବିଧତା, କଳା, ସାହିତ୍ୟ ଓ ଭାଷାର ସଂରକ୍ଷଣ ଏବଂ ସେମାନଙ୍କ ଅସ୍ତିତ୍ୱ ସୁନିଶ୍ଚିତ କରିବା କେବଳ ଉତ୍ତର-ପୂର୍ବାଞ୍ଚଳ ପାଇଁ ନୁହେଁ ବରଂ ସମଗ୍ର ଦେଶ ପାଇଁ ଗୁରୁତ୍ୱପୂର୍ଣ୍ଣ ବୋଲି ସେ ଗୁରୁତ୍ୱାରୋପ କରିଥିଲେ। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର ଉତ୍ତର-ପୂର୍ବାଞ୍ଚଳର ରାଜ୍ୟଗୁଡ଼ିକ ସମ୍ମୁଖୀନ ହେଉଥିବା ପ୍ରତ୍ୟେକ ସମସ୍ୟାର ସମାଧାନ ପାଇଁ ସେମାନଙ୍କ ସହିତ ଛିଡ଼ା ହୋଇଛନ୍ତି ବୋଲି ସେ ଉଲ୍ଲେଖ କରିଥିଲେ। ୨୦୪୭ ସୁଦ୍ଧା ଭାରତ ସମ୍ପୂର୍ଣ୍ଣ ବିକଶିତ ହେବା ବେଳକୁ ଉତ୍ତର-ପୂର୍ବାଞ୍ଚଳ ଦେଶର ସବୁଠାରୁ ସମୃଦ୍ଧ ଅଞ୍ଚଳ ରେ ପରିଣତ ହେବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ଆବାସ ଓ ସହରାଞ୍ଚଳ ବ୍ୟାପାର ମନ୍ତ୍ରଣାଳୟ ବିକଶିତ ଭାରତ ଲକ୍ଷ୍ୟ ହାସଲ ନିମନ୍ତେ ସହରାଞ୍ଚଳ ଭିତ୍ତିଭୂମି ଓ ସେବା କ୍ଷେତ୍ରରେ ପ୍ରୟାସକୁ ତ୍ୱରାନ୍ୱିତ କରିଛି। ବିଶେଷ କରି ସହରୀ ଜୀବନଧାରଣ ମାନରେ ସୁଧାର ଆଣିବା ପାଇଁ ପୁଞ୍ଜି ନିବେଶ ୧୬ ଗୁଣରୁ ଅଧିକ ବୃଦ୍ଧି ପାଇଛି। ସ୍ମାର୍ଟ ସିଟି, ସ୍ୱଚ୍ଛ ଭାରତ ମିଶନ, ଅମୃତ, ସହରାଞ୍ଚଳ ପ୍ରଧାନମନ୍ତ୍ରୀ ଆବାସ, ସହରାଞ୍ଚଳ ଜୀବିକା ମିଶନ ଭଳି ଯୋଜନା ଜନସାଧାରଣଙ୍କ ଜୀବନଧାରଣ ମାନରେ ଯଥେଷ୍ଟ ସୁଧାର ଆଣିପାରିଛି। ୨୦୪୭ ସୁଦ୍ଧା ବିକଶିତ ଭାରତ ଲକ୍ଷ୍ୟ ନେଇ ମନ୍ତ୍ରଣାଳୟ ପକ୍ଷରୁ ସଂଖ୍ୟାଧିକ ସହରୀ ବିକାଶ ପ୍ରକଳ୍ପ କାର୍ଯ୍ୟକାରୀ କରାଯାଇଛି।

୧୦୦ଟି ସ୍ମାର୍ଟ ସିଟି ମିଶନ (ଏସସିଏମ୍) ଅଧୀନରେ ୧୫.୧୧.୨୦୨୪ ସୁଦ୍ଧା ୧,୬୪,୬୬୯ କୋଟି ଟଙ୍କାର ୮,୦୬୬ଟି ପ୍ରକଳ୍ପରେ କାର୍ଯ୍ୟାଦେଶ ଜାରି କରାଯାଇଛି, ଯେଉଁଥିରୁ ୧,୪୭,୩୬୬ କୋଟି ଟଙ୍କାର ୭,୩୫୨ଟି ପ୍ରକଳ୍ପ (ଅର୍ଥାତ୍ ମୋଟ ପ୍ରକଳ୍ପର ୯୧%) କାମ ସମ୍ପୂର୍ଣ୍ଣ ହୋଇଛି। ସହରାଞ୍ଚଳ ଜୀବନଧାରଣ ମାନ, ନିରାପତ୍ତା ଏବଂ ଜନସେବାରେ ଉନ୍ନତି ଆଣିବାରେ ଏସସିଏମର କେତେକ ପ୍ରମୁଖ ସଫଳତା ମଧ୍ୟରେ ରହିଛି ସମସ୍ତ ୧୦୦ ସ୍ମାର୍ଟ ସିଟିରେ ଇଣ୍ଟିଗ୍ରେଟେଡ୍‌ କମାଣ୍ଡ୍ ଆଣ୍ଡ୍ କଣ୍ଟ୍ରୋଲ୍ ସେଣ୍ଟର (ଆଇସିସିସି) ପ୍ରତିଷ୍ଠା, ୮୪,୦୦୦ ସିସିଟିଭି ସର୍ଭିଲାନ୍ସ କ୍ୟାମେରା ସଂଯୋଗ, ୧,୮୮୪ ଜରୁରୀକାଳୀନ କଲ୍ ବକ୍ସ, ୩,୦୦୦ରୁ ଅଧିକ ପବ୍ଲିକ୍ ଆଡ୍ରେସ୍ ସିଷ୍ଟମ୍, ୧,୭୪୦ କିଲୋମିଟରରୁ ଅଧିକ ସ୍ମାର୍ଟ ରୋଡ୍, ୭୧୩ କିଲୋମିଟର ସାଇକେଲ୍ ଟ୍ରାକ୍ ନିର୍ମାଣ ଆଦି। ସେହିପରି ସୁପରଭାଇଜରୀ କଣ୍ଟ୍ରୋଲ ଆଣ୍ଡ ଡାଟା ଆକ୍ୱିଜିସନ୍ (ସ୍କାଡା) ବ୍ୟବସ୍ଥା ମାଧ୍ୟମରେ ୧୭,୦୨୬ କିଲୋମିଟର ଜଳ ଯୋଗାଣ ବ୍ୟବସ୍ଥା ଉପରେ ନଜର ରଖାଯାଉଛି। ୬୬ରୁ ଅଧିକ ସହର ପ୍ରଯୁକ୍ତିର ବର୍ଦ୍ଧିତ ବ୍ୟବହାର କରି କଠିନ ବର୍ଜ୍ୟବସ୍ତୁ ପରିଚାଳନା କରୁଛନ୍ତି। ପ୍ରାୟ ୯,୧୯୪ ଟି ଯାନ ସ୍ୱୟଂଚାଳିତ ଯାନ ଅବସ୍ଥାନ (ଏଭିଏଲ୍) ପାଇଁ ରେଡିଓ ଫ୍ରିକ୍ୱେନ୍ସି ଆଇଡେଣ୍ଟିଫିକେସନ୍ (ଆର୍ଏଫ୍ଆଇଡି), ୯,୪୩୩ରୁ ଅଧିକ ସ୍ମାର୍ଟ କ୍ଲାସରୁମ୍ ଏବଂ ୪୧ଟି ଡିଜିଟାଲ ଲାଇବ୍ରେରୀ ବିକଶିତ କରାଯାଇଛି। ୧୭୨ଟି ଇ-ସ୍ୱାସ୍ଥ୍ୟ କେନ୍ଦ୍ର ଓ କ୍ଲିନିକ୍ ବିକଶିତ ହୋଇଥିବା ବେଳେ ୧୫୨ଟି ସ୍ୱାସ୍ଥ୍ୟ ଏଟିଏମ୍ ଲଗାଯାଇଛି।

ସେହିପରି ସ୍ୱଚ୍ଛ ଭାରତ ମିଶନ ସହରାଞ୍ଚଳ ଅଧୀନରେ ଅନେକ ପଦକ୍ଷେପ ଗ୍ରହଣ କରାଯାଇଛି। କଠିନ ବର୍ଜ୍ୟବସ୍ତୁ ଏବଂ ବ୍ୟବହୃତ ଜଳ ପରିଚାଳନା, ଆଇଇସି ଏବଂ ଦକ୍ଷତା ବିକାଶ ପ୍ରକଳ୍ପ ପାଇଁ ସରକାର ୯ଟି ରାଜ୍ୟ ଯଥା ଆସାମ, ବିହାର, ଦିଲ୍ଲୀ, ଗୁଜରାଟ, ମଧ୍ୟପ୍ରଦେଶ, ମିଜୋରାମ, ତାମିଲନାଡୁ, ଉତ୍ତରପ୍ରଦେଶ ଏବଂ ପଶ୍ଚିମବଙ୍ଗରେ ପ୍ରକଳ୍ପ ପାଇଁ ୧,୧୨୩ କୋଟି ରୁ ଅଧିକ ଟଙ୍କା ପ୍ରଦାନ କରିଛନ୍ତି। ଗୁଜରାଟର ଅହମ୍ମଦାବାଦସ୍ଥିତ ପିପଲାଜଠାରେ ୩୭୫ କୋଟି ଟଙ୍କା ମୂଲ୍ୟର ୧୫ ମେଗାଓ୍ଵାଟ୍ କ୍ଷମତା ବିଶିଷ୍ଟ ୧୦୦୦ ମେଟ୍ରିକ୍ ଟନର ବର୍ଜ୍ୟବସ୍ତୁରୁ ଶକ୍ତି ପ୍ଲାଣ୍ଟ୍ ର ଶୁଭାରମ୍ଭ କରାଯାଇଛି।

ଅହମ୍ମଦାବାଦ ଏବଂ ହାଇଦ୍ରାବାଦର ଦୁଇଟି ପ୍ରମୁଖ ଅଳିଆ ଗଦାକୁ ସମ୍ପୂର୍ଣ୍ଣ ରୂପେ ପୁନରୁଦ୍ଧାର କରାଯାଇଛି, ଯାହାଦ୍ୱାରା ପ୍ରାୟ ୨.୫ ଲକ୍ଷ ମେଟ୍ରିକ୍ ଟନ୍ ବର୍ଜ୍ୟବସ୍ତୁର ପ୍ରକ୍ରିୟାକରଣ କରିବାରେ ସଫଳତା ମିଳିଛି। ଏଡିବି ଓ ବିଶ୍ବବ୍ୟାଙ୍କ ସହିତ ମିଶି କଠିନ ବର୍ଜ୍ୟବସ୍ତୁ ପରିଚାଳନା ପାଇଁ ବ୍ୟାଙ୍କେବଲ୍ ପ୍ରକଳ୍ପ ପାଇଁ ୧୦୦ଟି ସହର କାର୍ଯ୍ୟକ୍ରମ ଚାଲିଛି। ସ୍ୱାଭିମାନ ସ୍ୱଚ୍ଛତା ସଂସ୍କାର ସ୍ୱଚ୍ଛତା (ଫୋର୍‌-ଏସ) ୨୦୨୪ ଅଭିଯାନ ଅଧୀନରେ  ସ୍ୱଚ୍ଛ ଭାରତ ପାଇଁ ଜନସାଧାରଣଙ୍କ ଅଂଶଗ୍ରହଣ, ସଚେତନତା ଏବଂ ସମର୍ଥନ କାର୍ଯ୍ୟକ୍ରମ ହାତକୁ ନିଆଯାଇଛି। କଠିନ ବର୍ଜ୍ୟ ଏବଂ ଅପରିଷ୍କାର ସ୍ଥାନ (ସ୍ୱଚ୍ଛତା ଲକ୍ଷ୍ୟ ୟୁନିଟ୍)କୁ ଲକ୍ଷ୍ୟ କରି ମେଗା ସଫେଇ ଅଭିଯାନ ଆୟୋଜନ କରାଯାଇଛି। ସଫେଇ କର୍ମଚାରୀଙ୍କ କଲ୍ୟାଣ ଓ ସ୍ୱାସ୍ଥ୍ୟ ପାଇଁ ସିଙ୍ଗଲ ୱିଣ୍ଡୋ ସେବା, ନିରାପତ୍ତା ଏବଂ ମାନ୍ୟତା ଶିବିର।

ସହରାଞ୍ଚଳ ପୁନରୁଦ୍ଧାର ଏବଂ ରୂପାନ୍ତରଣ ପାଇଁ ଅଟଳ ମିଶନ୍‌ ବା ଅମୃତ ଓ ଅମୃତ ୨.୦ ଅଭିଯାନ ଅଧୀନରେ ୪୬୪୯ ଜଳ ପରିଚାଳନା ଏବଂ ୪୪୨୯ଟି ବର୍ଜ୍ୟ ଜଳ ପରିଚାଳନା ପ୍ରକଳ୍ପ ନିର୍ମାଣ କରାଯାଇଛି।

ସହରାଞ୍ଚଳ ପରିବହନରେ ସୁଧାର ପାଇଁ କେନ୍ଦ୍ର ସରକାର ଅନେକ  ପଦକ୍ଷେପ ନେଇଛନ୍ତି। ୨୦୧୯ରେ ଦିଲ୍ଲୀ ଓ ମିରଟ ମଧ୍ୟରେ ପ୍ରଥମ ଆଞ୍ଚଳିକ ରାପିଡ୍ ଟ୍ରାନଜିଟ୍ ସିଷ୍ଟମ୍ (ଆରଆରଟିଏସ୍)କୁ ମଞ୍ଜୁରୀ ମିଳିଥିଲା। ଅକ୍ଟୋବର ୨୦୨୩ରୁ ଏହି ରାସ୍ତାର ୪୨ କିଲୋମିଟର କାର୍ଯ୍ୟକ୍ଷମ ହୋଇଛି। ୨୦୨୫ ଜୁନ୍ ସୁଦ୍ଧା ଅବଶିଷ୍ଟ ଅଂଶ ମଧ୍ୟ କାର୍ଯ୍ୟକ୍ଷମ ହେବ। ପ୍ରଦୂଷଣ ହ୍ରାସ କରିବା ଏବଂ ପରିବେଶ ଜନିତ ସମସ୍ୟାର ସମାଧାନ ପାଇଁ ସହରଗୁଡ଼ିକରେ ଇ-ମୋବିଲିଟି ଏବଂ ଚାଲିବା ଯୋଗ୍ୟ ରାସ୍ତାକୁ ପ୍ରୋତ୍ସାହିତ କରାଯାଇଛି।

୨୦୧୪ ମେ ମାସ ସୁଦ୍ଧା ଦେଶରେ ପ୍ରାୟ ୨୪୮ କିଲୋମିଟର ମେଟ୍ରୋ ରେଳ ଲାଇନ୍ କାର୍ଯ୍ୟକ୍ଷମ ଥିଲା। ବର୍ତ୍ତମାନ ସୁଦ୍ଧା ଏହା ୭୪୫ କିଲୋମିଟର ବୃଦ୍ଧି ପାଇଛି ଏବଂ ବର୍ତ୍ତମାନ ପ୍ରାୟ ୯୯୩ କିଲୋମିଟର ମେଟ୍ରୋ ରେଳ ଲାଇନର କାର୍ଯ୍ୟକ୍ଷମ ରହିଛି । ଏହାବ୍ୟତୀତ ଦେଶର ବିଭିନ୍ନ ସହର ଯଥା ଦିଲ୍ଲୀ, ବେଙ୍ଗାଲୁରୁ, କୋଲକାତା, ଚେନ୍ନାଇ, କୋଚି, ମୁମ୍ବାଇ, ନାଗପୁର, ଅହମ୍ମଦାବାଦ, ଗାନ୍ଧୀନଗର, ପୁଣେ, କାନପୁର, ଆଗ୍ରା, ଭୋପାଳ, ଇନ୍ଦୋର, ପାଟନା, ସୁରଟ ଏବଂ ମିରଟରେ ପ୍ରାୟ ୯୯୮ କିଲୋମିଟର ମେଟ୍ରୋ ରେଳ ପ୍ରକଳ୍ପ (ଦିଲ୍ଲୀ-ମେରଠ ଆରଆରଟିଏସର ଅବଶିଷ୍ଟ ଅଂଶ କୁ ମିଶାଇ) ନିର୍ମାଣାଧୀନ ରହିଛି। ୨୦୧୩-୧୪ରେ ଦୈନିକ ହାରାହାରି ଯାତ୍ରୀ ସଂଖ୍ୟା ପ୍ରାୟ ୨୮ ଲକ୍ଷ ଥିଲା। ମେଟ୍ରୋ ରେଳ ନେଟୱର୍କର ଦ୍ରୁତ ସଂପ୍ରସାରଣ ସହିତ ହାରାହାରି ଦୈନିକ ଯାତ୍ରୀ ସଂଖ୍ୟା ଏବେ ୧ କୋଟି ଅତିକ୍ରମ କରିଛି। ୧୬ ଅଗଷ୍ଟ ୨୦୨୩ରେ ଆରମ୍ଭ ହୋଇଥିବା ‘‘ପିଏମ-ଇ-ବସ ସେବା’’ର ଲକ୍ଷ୍ୟ ହେଉଛି ଜିସିସି ମଡେଲ ଅଧୀନରେ ୧୦,୦୦୦ ସମ୍ପୂର୍ଣ୍ଣ ଶୀତତାପ ନିୟନ୍ତ୍ରିତ ଇଲେକ୍ଟ୍ରିକ୍ ବସ୍ ନିୟୋଜିତ କରିବା ପାଇଁ ୨୦,୦୦୦ କୋଟି ଟଙ୍କାର କେନ୍ଦ୍ରୀୟ ସହାୟତା (ସିଏ) ସହ  ସହରାଞ୍ଚଳ ବସ୍ ଚଳାଚଳରେ ଉନ୍ନତି ଆଣିବା।

ପ୍ରଧାନମନ୍ତ୍ରୀ ଆବାସ ଯୋଜନା (ପିଏମଏୱାଇ) ୨.୦ ଅଧୀନରେ ଏକ ନୂତନ ରେଣ୍ଟାଲ ହାଉସିଂ ଭର୍ଟିକାଲ୍ ଆରମ୍ଭ କରାଯାଇଛି, ଯାହା ପ୍ରବାସୀ ଜନସଂଖ୍ୟା/ କର୍ମଜୀବୀ ମହିଳା / ଶିଳ୍ପ ଶ୍ରମିକ / ବାସହୀନ / ଛାତ୍ର ଏବଂ ଅନ୍ୟାନ୍ୟ ହିତାଧିକାରୀମାନଙ୍କୁ ଉପକୃତ କରିବ। ବର୍ତ୍ତମାନର ସରକାରୀ ଅନୁଦାନପ୍ରାପ୍ତ ଖାଲି ଥିବା ଘରଗୁଡ଼ିକୁ ପିପିପି ମୋଡ୍ ମାଧ୍ୟମରେ କିମ୍ବା ସାର୍ବଜନୀନ ଏଜେନ୍ସିଗୁଡିକ ଦ୍ୱାରା ଏଆରଏଚରେ ପରିଣତ କରିବାକୁ ପଦକ୍ଷେପ ନିଆଯାଇଛି। ପିଏମଏୱାଇ-ୟୁ ୨.୦ ଅଧୀନରେ ୬ ଲକ୍ଷରୁ ଅଧିକ ଘର ପାଇଁ ନୀତିଗତ ଅନୁମୋଦନ ଦିଆଯାଇଛି ଯାହା ଏହି ଯୋଜନାର କାର୍ଯ୍ୟକାରିତାରେ ଏକ ଗୁରୁତ୍ୱପୂର୍ଣ୍ଣ ସଫଳତା।

ଶିଳ୍ପ କେନ୍ଦ୍ର ଓ ପ୍ରବାସୀ କେନ୍ଦ୍ର ସମେତ ୨୫ଟି ସହରରେ ବର୍ତ୍ତମାନ ଚାଲିଥିବା ଏକ ପାଇଲଟ୍ ପ୍ରକଳ୍ପର ଫଳାଫଳରୁ ମିଳିଥିବା ସୂଚନା ଅନୁଯାୟୀ ଖୁବଶୀଘ୍ର ଏକ ନୂତନ ଜାତୀୟ ସହରାଞ୍ଚଳ ଜୀବିକା ମିଶନ (ଏନୟୁଏଲଏମ୍) ଆରମ୍ଭ କରାଯିବ। ଏହି ମିଶନରେ ପ୍ରାୟ ୨.୫ କୋଟି ସହରାଞ୍ଚଳ ଗରିବ ପରିବାରକୁ ସାମାଜିକ-ଆର୍ଥିକ ଉନ୍ନତି ପାଇଁ ଅନ୍ତର୍ଭୁକ୍ତ କରିବାକୁ ଲକ୍ଷ୍ୟ ରଖାଯାଇଛି।

ଦୀନଦୟାଲ ଅନ୍ତ୍ୟୋଦୟ ଯୋଜନା ଜାତୀୟ ସହରାଞ୍ଚଳ ଜୀବିକା ମିଶନ ଅଧୀନରେ ୩୦ ସେପ୍ଟେମ୍ବର ୨୦୨୪ ସୁଦ୍ଧା ହୋଇଥିବା ଅଗ୍ରଗତି ଅନୁଯାୟୀ, ୧ କୋଟିରୁ ଅଧିକ ସହରାଞ୍ଚଳ ଗରିବ ମହିଳାଙ୍କୁ ୯.୯୬ ଲକ୍ଷରୁ ଅଧିକ ସ୍ୱୟଂ ସହାୟକ ଗୋଷ୍ଠୀ (ଏସ୍ଏଚଜି) ଏବଂ ସେମାନଙ୍କ ସଂଘ ଯଥା ଏରିଆ ଲେଭେଲ ଫେଡେରେସନ୍ (ଏଏଲ୍ଏଫ୍) ଏବଂ ସିଟି ଲେଭେଲ ଫେଡେରେସନ୍ (ସିଏଲ୍ଏଫ୍)ରେ ସାମିଲ କରାଯାଇଛି। ଦକ୍ଷତା ପ୍ରଶିକ୍ଷଣ ଓ ନିଯୁକ୍ତି, ବ୍ୟକ୍ତିଗତ ଏବଂ ଗୋଷ୍ଠୀକୁ ସବସିଡି ଋଣ ପ୍ରଦାନ, କ୍ଷୁଦ୍ର ଉଦ୍ୟୋଗ ପ୍ରତିଷ୍ଠା ଏବଂ ସ୍ୱୟଂ ସହାୟକ ଗୋଷ୍ଠୀଗୁଡ଼ିକ ସହିତ କର୍ପସ ଭିତ୍ତିକ ବ୍ୟାଙ୍କ ସଂଯୋଗ ସଞ୍ଚୟ ମାଧ୍ୟମରେ ୩୯.୩୯ ଲକ୍ଷରୁ ଅଧିକ ଜୀବିକା ସୁଯୋଗ ସୃଷ୍ଟି ହୋଇଛି। ୧.୪୧ ଲକ୍ଷ ସହରାଞ୍ଚଳ ବାସହୀନଙ୍କ ପାଇଁ ୧୯୯୪ଟି ସ୍ଥାୟୀ ଆଶ୍ରୟସ୍ଥଳୀ ନିର୍ମାଣ କରାଯାଇଛି। ୩୪୭୧ଟି ସହରରେ ସର୍ଭେ ମାଧ୍ୟମରେ ପ୍ରାୟ ୭୧.୬୫ ଲକ୍ଷ ଉଠାଦୋକାନୀଙ୍କୁ ଚିହ୍ନଟ କରାଯାଇଛି ସେମାନଙ୍କ ମଧ୍ୟରୁ ୩୮.୮୭ ଲକ୍ଷରୁ ଅଧିକଙ୍କୁ ଷ୍ଟ୍ରିଟ୍ ଭେଣ୍ଡର ସାର୍ଟିଫିକେଟ୍ ଅଫ୍ ଭେଣ୍ଡିଂ (ସିଓଭି) ଏବଂ ୩୨.୫୯ ଲକ୍ଷରୁ ଅଧିକ ପରିଚୟପତ୍ର ପ୍ରଦାନ କରାଯାଇଛି । ଡିଏୱାଇ-ଏନୟୁଏଲଏମ୍ ଅଧୀନରେ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ କେନ୍ଦ୍ରୀୟ ସହାୟତା ବାବଦରେ ୫,୭୩୩.୧୦ କୋଟି ଟଙ୍କା ପ୍ରଦାନ କରାଯାଇଛି।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାରଙ୍କ ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ଅନୁସୂଚିତ ଜାତି, ଜନଜାତି, ପଛୁଆ ବର୍ଗ, ଯାଯାବର, ସଫେଇ କର୍ମଚାରୀ, ତୃତୀୟ ଲିଙ୍ଗୀଙ୍କ ଭଳି ସମାଜର ଅବହେଳିତ ବର୍ଗଙ୍କ କଲ୍ୟାଣ ପାଇଁ ଅନେକ ଯୋଜନା କାର୍ଯ୍ୟକାରୀ କରିଛି। ଏସବୁ ପଦକ୍ଷେପ ସବକା ସାଥ୍‌ ସବକା ବିକାଶ ମନ୍ତ୍ରକୁ ସାକାର କରିଛି ଏବଂ ଦେଶବାସୀଙ୍କ ସାମଗ୍ରିକ ବିକାଶ ପାଇଁ କେନ୍ଦ୍ର ସରକାରଙ୍କ ପ୍ରତିବଦ୍ଧତାକୁ ବ୍ୟକ୍ତ କରିଛି।

ମନ୍ତ୍ରଣାଳୟ ଦ୍ୱାରା ଦୁଇଟି କେନ୍ଦ୍ର ପ୍ରାୟୋଜିତ ଯୋଜନା – ମାଟ୍ରିକ୍‌ ପୂର୍ବବର୍ତ୍ତୀ ବୃତ୍ତି ଏବଂ ମାଟ୍ରିକ ପରବର୍ତ୍ତୀ ବୃତ୍ତି ସହାୟତା- ଅନୁସୂଚିତ ଜାତି(ଏସସି) ଓ ଅନ୍ୟ ଅବହେଳିତ ବର୍ଗର ଛାତ୍ରଛାତ୍ରୀଙ୍କ ଶିକ୍ଷାଗତ ସଶକ୍ତିକରଣ ମହତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛି । ରାଜ୍ୟ ସରକାର ଏବଂ କେନ୍ଦ୍ର ଶାସିତ ଅଞ୍ଚଳ ପ୍ରଶାସନ ଜରିଆରେ ଏହି ବୃତ୍ତି ଯୋଜନା କାର୍ଯ୍ୟକାରୀ କରାଯାଉଛି । ଚଳିତ ବର୍ଷ ଅକ୍ଟୋବର ୩୧ ତାରିଖ ସୁଦ୍ଧା ୪୧ ଲକ୍ଷ ୩୨ ହଜାର ଏସ୍‌ସି ଛାତ୍ରଛାତ୍ରୀଙ୍କୁ ୪୯୬୫ କୋଟି ୪୫ ଲକ୍ଷରୁ ଅଧିକ ଟଙ୍କାର ମାଟ୍ରିକ ପରବର୍ତ୍ତୀ ବୃତ୍ତି ଯୋଗାଇ ଦିଆଯାଇଛି। ସେହିପରି ୩୧ ଅକ୍ଟୋବର ୨୦୨୪ ସୁଦ୍ଧା ୧୮ ଲକ୍ଷ ୭୨ ହଜାର ଏସସି ଛାତ୍ରଛାତ୍ରୀଙ୍କୁ ୪୩୭ କୋଟି ୮ ଲକ୍ଷ ଟଙ୍କାର ମାଟ୍ରିକ ପୂର୍ବ ବୃତ୍ତି ପ୍ରଦାନ କରାଯାଇଛି ।

ଏସସି ବର୍ଗର ଯୁବ ପ୍ରତିଭାଙ୍କ ପାଇଁ ଉଚ୍ଚ ଶିକ୍ଷା ଲାଗି ବୃତ୍ତି ଯୋଜନା – ଶ୍ରେୟସ ଜରିଆରେ ଦ୍ୱାଦଶ ଶ୍ରେଣୀ ଠାରୁ ଆଗକୁ ପଢ଼ୁଥିବା ଛାତ୍ରଛାତ୍ରୀଙ୍କୁ ଦେଶର ୨୬୬ଟି ଶୀର୍ଷସ୍ତରୀୟ ଶିକ୍ଷାନୁଷ୍ଠାନରେ ଅଧ୍ୟୟନ ପାଇଁ ସହାୟତା ଯୋଗାଇ ଦିଆଯାଉଛି । ଏହି ଯୋଜନାରେ ୩୫% ଆସନ ଯୋଗ୍ୟ ଏସସି ବର୍ଗର ଛାତ୍ରୀଙ୍କ ପାଇଁ ସଂରକ୍ଷିତ ରଖାଯାଉଛି । ଶ୍ରେୟସ୍‌-ଏସସି ଯୋଜନା ଅଧୀନରେ ୪ଟି ଉପଯୋଜନା ଯଥା: ଏସସି ଏବଂ ଓବିସିଙ୍କ ପାଇଁ ମାଗଣା କୋଚିଂ ଯୋଜନା, ଏସସିଙ୍କ ପାଇଁ ଉଚ୍ଚ ମାନର ଶିକ୍ଷା, ଏସସିଙ୍କ ପାଇଁ ଜାତୀୟ ବିଦେଶ ଛାତ୍ରବୃତ୍ତି ଯୋଜନା ଇତ୍ୟାଦି ଏବଂ ଏସସି ଛାତ୍ରଛାତ୍ରୀଙ୍କ ପାଇଁ ଜାତୀୟ ଫେଲୋସିପ୍ କାର୍ଯ୍ୟକାରୀ କରାଯାଉଛି । ଚଳିତ ବର୍ଷ ଏହି ଯୋଜନାରେ ୪୫୬୩ ଏସି ହିତାଧିକାରୀଙ୍କୁ ୯୩ କୋଟି ୭୭ ଲକ୍ଷ ଟଙ୍କା ଯୋଗାଇ ଦିଆଯାଇଛି। ଏସସି ଏବଂ ଓବିସିଙ୍କ ପାଇଁ ମାଗଣା କୋଚିଂ ଯୋଜନାରେ ୧୪୩୭ ଜଣ ଏସି ହିତାଧିକାରୀଙ୍କୁ ୧୩ କୋଟି ୭୧ ଲକ୍ଷ ଟଙ୍କାର ସହାୟତା ମିଳିଛି । ଏସସିଙ୍କ ପାଇଁ ଜାତୀୟ ବିଦେଶ ଛାତ୍ରବୃତ୍ତି ଯୋଜନାରେ ୮୦ ଜଣ ଏସସି ହିତାଧିକାରୀ ୫୬ କୋଟି ୨୯ ଲକ୍ଷ ଟଙ୍କାର  ବୃତ୍ତି ପାଇଛନ୍ତି । ଏସସି ଛାତ୍ରଛାତ୍ରୀଙ୍କ ପାଇଁ ଜାତୀୟ ଫେଲୋସିପ୍ ଯୋଜନାରେ ୪୧୩୨ଜଣ ହିତାଧିକାରୀ ୧୯୭ କୋଟି ୬୧ ଲକ୍ଷ ଟଙ୍କାର ବୃତ୍ତି ପାଇଛନ୍ତି ।

ଏହାବ୍ୟତୀତ ମନ୍ତ୍ରଣାଳୟ ଦ୍ୱାରା ଲକ୍ଷ୍ୟ ଆଧାରିତ ସ୍ଥାନରେ ଉଚ୍ଚ ବିଦ୍ୟାଳୟର ଛାତ୍ରଛାତ୍ରୀଙ୍କ ପାଇଁ ଆବାସିକ ଶିକ୍ଷା ଯୋଜନା (ଶ୍ରେଷ୍ଟା)ର ପ୍ରଥମ ପର୍ଯ୍ୟାୟରେ ୨୦୨୪-୨୫ ଶିକ୍ଷା ବର୍ଷରେ ୨୯୬୧ ଛାତ୍ରଛାତ୍ରୀଙ୍କୁ ସିବିଏସଇ ଏବଂ ରାଜ୍ୟ ବୋର୍ଡ ଅନୁମୋଦିତ ୧୪୨ଟି ଘରୋଇ ଆବାସିକ ବିଦ୍ୟାଳୟରେ ପଢ଼ିବା ଲାଗି ୬୪ ଲକ୍ଷ ଟଙ୍କାର ସହାୟତା ଯୋଗାଇ ଦିଆଯାଇଛି । ଏହି ଯୋଜନାର ଦ୍ୱିତୀୟ ପର୍ଯ୍ୟାୟରେ ୨୪୮ ଛାତ୍ରଛାତ୍ରୀଙ୍କୁ ୧୦ ଲକ୍ଷରୁ ଅଧିକ ଟଙ୍କାର ସହାୟତା ମିଳିଛି ।

ଅନ୍ୟାନ୍ୟ ପଛୁଆ ବର୍ଗଙ୍କ ଶିକ୍ଷାଗତ ସଶକ୍ତିକରଣ ପାଇଁ କେନ୍ଦ୍ର ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ପିଏମ-ଯଶଶ୍ୱୀ ଏବଂ ଶ୍ରେୟସ ଯୋଜନା କାର୍ଯ୍ୟକାରୀ କରୁଛି । ଏହି ଦୁଇଟି ପ୍ରମୁଖ ଯୋଜନା ଅଧୀନରେ, ଓବିସି, ଆର୍ଥିକ ପଛୁଆ (ଇବିସି) ଓ ଯାଯାବର (ଡିଏନଟି) ଛାତ୍ରଛାତ୍ରୀଙ୍କ ପାଇଁ ମାଟ୍ରିକ ପୂର୍ବ ବୃତ୍ତି ଅଧୀନରେ ୦୧.୦୧.୨୦୨୪ରୁ ୦୯.୧୨.୨୦୨୪ ପର୍ଯ୍ୟନ୍ତ ୨୧,୮୫୭ ଲକ୍ଷ ଟଙ୍କା ପ୍ରଦାନ କରାଯାଇଛି। ସେହିପରି ଓବିସି, ଇବିସି ଓ ଡିଏନଟି ଛାତ୍ରଛାତ୍ରୀଙ୍କ ପାଇଁ ମାଟ୍ରିକ ପରବର୍ତ୍ତୀ ବୃତ୍ତି ଅଧୀନରେ ୦୧.୦୧.୨୦୨୪ରୁ ୦୯.୧୨.୨୦୨୪ ପର୍ଯ୍ୟନ୍ତ ୯୯,୨୮୭ ଲକ୍ଷ ଟଙ୍କା ପ୍ରଦାନ କରାଯାଇଛି। ଓବିସି ବାଳକ ଓ ବାଳିକାଙ୍କ ପାଇଁ ଛାତ୍ରାବାସ ନିର୍ମାଣ ଅଧୀନରେ ୦୧.୦୧.୨୦୨୪ରୁ ୦୯.୧୨.୨୦୨୪ ପର୍ଯ୍ୟନ୍ତ ୪୦୦ ସିଟ୍ ପାଇଁ ୮୫୯ ଲକ୍ଷ ଟଙ୍କା ପ୍ରଦାନ କରାଯାଇଛି। ଓବିସି, ଇବିସି ଓ ଡିଏନଟି ଛାତ୍ରଛାତ୍ରୀଙ୍କ ପାଇଁ ବିଦ୍ୟାଳୟରେ ଉଚ୍ଚ ମାନର ଶିକ୍ଷା ପାଇଁ କେନ୍ଦ୍ରୀୟ ଯୋଜନା ଅଧୀନରେ ୨୦୨୩-୨୪ ରେ ୬୬୧ ଲକ୍ଷ ଟଙ୍କା ପ୍ରଦାନ କରାଯାଇଛି, ଯେଉଁଥିରେ ୩୧୭୭ ଜଣ ଛାତ୍ରଛାତ୍ରୀ ଉପକୃତ ହୋଇଛନ୍ତି। ଓବିସି, ଇବିସି ଏବଂ ଡିଏନଟି ଛାତ୍ରଛାତ୍ରୀଙ୍କ ପାଇଁ କଲେଜରେ ଉଚ୍ଚ ଶିକ୍ଷା ନିମନ୍ତେ କେନ୍ଦ୍ରୀୟ କ୍ଷେତ୍ର ଯୋଜନା ଅଧୀନରେ ୨୦୨୩-୨୪ ରେ ୧୨,୪୦୫ ଲକ୍ଷ ଟଙ୍କା ପ୍ରଦାନ କରାଯାଇଛି ଯେଉଁଥିରେ ୫୭୮୧ ଜଣ ଛାତ୍ରଛାତ୍ରୀ ଉପକୃତ ହୋଇଛନ୍ତି । ଓବିସି/ଇବିସି ଛାତ୍ରଛାତ୍ରୀଙ୍କ ବିଦେଶରେ ଅଧ୍ୟୟନ ପାଇଁ ଡକ୍ଟର ଆମ୍ବେଦକର ଯୋଜନା ଅଧୀନରେ ୨୦୨୩-୨୪ରେ ୨୭୫୨ ଜଣ ଛାତ୍ରଛାତ୍ରୀଙ୍କ ପାଇଁ ୩,୭୪୮ ଲକ୍ଷ ଟଙ୍କା ପ୍ରଦାନ କରାଯାଇଛି। ଓବିସି ଛାତ୍ରଛାତ୍ରୀଙ୍କ ପାଇଁ ନ୍ୟାସନାଲ ଫେଲୋସିପ୍ ଅଧୀନରେ ୨୦୦୯ ଜଣ ହିତାଧିକାରୀଙ୍କ ପାଇଁ (ଡିସେମ୍ବର ୨୦୨୪ ସୁଦ୍ଧା) ୯,୩୦୨ ଲକ୍ଷ ଟଙ୍କା ପ୍ରଦାନ କରାଯାଇଛି।

ଓବିସିଙ୍କ ପାଇଁ ଜାତୀୟ ଫେଲୋଶିପ୍‌ ଯୋଜନାରେ ୨୨୮୮ ଜଣ ଗବେଷକଙ୍କୁ ୯୩.୨୧ କୋଟି ଟଙ୍କାର ପାଣ୍ଠି ସହାୟତା ଯୋଗାଇ ଦିଆଯାଇଛି । ଏହି ଯୋଜନାରେ ପ୍ରତିବର୍ଷ ୧୦୦୦ରୁ ଅଧିକ ଗବେଷଣା ଛାତ୍ରଛାତ୍ରୀଙ୍କୁ ଜେଆରଏଫ ସ୍ତର ପାଇଁ ମାସିକ ୩୭ ହଜାର ଟଙ୍କା ଏବଂ ଏସଆରଏଫ ସ୍ତର ପାଇଁ  ୪୨ ହଜାରରୁ ଅଧିକ ଟଙ୍କାର ଷ୍ଟାଇପେଣ୍ଡ ଯୋଗାଇ ଦିଆଯାଉଛି । ସେହିପରି ପିଏମ ଦକ୍ଷ ଯୋଜନାରେ ୩୬୬ କୋଟିରୁ ଅଧିକ ଟଙ୍କା ଖର୍ଚ୍ଚ କରାଯାଇ ପଛୁଆ ବର୍ଗର ୨ ଲକ୍ଷ ୮ ହଜାର ୯୦୩ ଜଣ ପ୍ରଶିକ୍ଷାର୍ଥୀଙ୍କୁ ଦକ୍ଷତା ତାଲିମ ଦିଆଯାଇଛି । ଏହି ଯୋଜନାରେ ଏସସି, ଓବିସି, ଡିଏନଟି, ସଫେଇ କର୍ମଚାରୀଙ୍କ ପିଲାମାନେ ଉପକୃତ ହୋଇଛନ୍ତି । ପିଏମ ଦକ୍ଷ ଯୋଜନାରେ ୨୦୨୩-୨୪ ବର୍ଷରେ ମୋଟ୍‌ ୮୦ ହଜାର ୧୮୫ରୁ ଅଧିକ ପ୍ରଶିକ୍ଷାର୍ଥୀଙ୍କୁ ୧୧୨ଟି ପଞ୍ଜିକୃତ ସଂସ୍ଥା ଜରିଆରେ ତାଲିମ ଦିଆଯାଇଛି। ପଛୁଆ ବର୍ଗଙ୍କ ପାଇଁ ଭେଞ୍ଚର କ୍ୟାପିଟାଲ ପାଣ୍ଠି ଯୋଜନାରେ ଉଦ୍ୟୋଗ ପ୍ରତିଷ୍ଠା ପାଇଁ ଆର୍ଥିକ ପ୍ରୋତ୍ସାହନ ଯୋଗାଇ ଦିଆଯାଉଛି। ଏହି ଯୋଜନାରେ ୨୫୬ଟି କମ୍ପାନୀକୁ ୬୮୩ କୋଟି ୯୫ ଲକ୍ଷ ଟଙ୍କାର ସହାୟତା ଫଳରେ ୪୫୦୦ ପ୍ରତ୍ୟକ୍ଷ ନିଯୁକ୍ତି ସୃଷ୍ଟି ହୋଇଛି ଏବଂ ଏହାଦ୍ୱାରା ୭୭୮ କୋଟି ଟଙ୍କା ମୂଲ୍ୟର ସମ୍ପତ୍ତି ସୃଷ୍ଟି ହୋଇପାରିଛି।

ଯାଯାବର ବର୍ଗଙ୍କ କଲ୍ୟାଣ ପାଇଁ ମଧ୍ୟ ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ଅନେକ ପଦକ୍ଷେପ ନେଇଛି। ୮ଟି ରାଜ୍ୟରେ ମନ୍ତ୍ରଣାଳୟ ପକ୍ଷରୁ ଯୋଗାଇ ଦିଆଯାଇଥିବା ଜୀବିକା ସହାୟତାରେ ୧୩ ହଜାରରୁ ଅଧିକ ହିତାଧିକାରୀ ଉପକୃତ ହୋଇଛନ୍ତି । ସେହିପରି ଏହି ବର୍ଗର ଛାତ୍ରଛାତ୍ରୀଙ୍କୁ ମାଗଣା କୋଚିଂ ସହାୟତା ଯୋଗାଇ ଦିଆଯାଉଛି ଯେଉଁଥିରେ ପ୍ରାୟ ୩୫୦ ଛାତ୍ରଛାତ୍ରୀ ତାଲିକାଭୁକ୍ତ ହୋଇଛନ୍ତି।

ସେହିପରି ମନ୍ତ୍ରଣାଳୟ ପକ୍ଷରୁ ଡକ୍ଟର ଆମ୍ବେଦକର ପାଣ୍ଠି ଜରିଆର ଅବହେଳିତ ଲୋକମାନଙ୍କୁ ଆର୍ଥିକ ସହାୟତା, ମହାନ ସନ୍ଥଙ୍କ ଜନ୍ମବାର୍ଷିକୀ ପାଳନ, ମାଧ୍ୟମିକ ସ୍କୁଲ ପରୀକ୍ଷାରେ ଉଚ୍ଚକୋଟୀର ପ୍ରଦର୍ଶନ ପାଇଁ ଛାତ୍ରଛାତ୍ରୀଙ୍କୁ ଆର୍ଥିକ ସହାୟତା, ଆନ୍ତଃଜାତି ବିବାହ ଏବଂ ଅତ୍ୟାଚାରର ଶିକାର ହୋଇଥିବା ପୀଡ଼ିତଙ୍କୁ ଆର୍ଥିକ ସହଯୋଗ ଯୋଗାଇ ଦିଆଯାଇଛି।