ସୀତାରାମ ଅଗ୍ରୱାଲ
ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକରେ ବିଜେପିକୁ ଝଟକା୍ ଲାଗିଛି। ପଂଚାୟତ ନିର୍ଵାଚନ ପୂର୍ବରୁ ୯ ନଂ ଜିଲ୍ଲା ପରିଷଦ ସଭ୍ୟା ମମତା ଜେନା ବିଜେପି ଛାଡିଛନ୍ତି। ଜିଲ୍ଲା ପରିଷଦ ସଭ୍ୟାଙ୍କ ସହ ପୂର୍ବତନ ବଡ ପୋଖରିଆ ଗ୍ରାମ ପଂଚାୟତ ସରପଂଚ ଜ୍ୟୋସ୍ନାରାଣୀ ଜେନା, ଜୋନ୍ ସଭାପତି ରବିନ୍ଦ୍ର ବଳିୟାର ସିଂହ, ଦିନ ବନ୍ଧୁ ଚହଟରାୟ, ମାଧବ କୁମାର ମହାନ୍ତି ପ୍ରମୁଖ ବହୁ ପ୍ରମୁଖ କର୍ମୀଦଳ ଛାଡିଛନ୍ତି।
ଆଜି ଟାଙ୍ଗୀ ବ୍ଲକର ଶକ୍ତି ପୀଠ ମା’ ଉଗ୍ରତାର ଦେବୀଙ୍କ ପୀଠରେ ସାମ୍ବାଦିକ ସମ୍ମୀଳନୀରେ ଜିଲ୍ଲା ପରିଷଦ ସଭ୍ୟା ମମତା ଜେନା ଏନେଇ ଘୋଷଣା କରିଛନ୍ତି। ଗତ କିଛି ଦିନ ହେଲା ଦଳରେ ତାଙ୍କୁ ଗୁରୁତ୍ୱ ଦିଆ ଯାଉନଥିବା ସହ ବିଭିନ୍ନ ସଭା ସମିତିରେ ତାଙ୍କୁ ଉପେକ୍ଷା କରାଯାଉଥିଲା ବୋଲି ସେ ଅଭିଯୋଗ କରିଛନ୍ତି।
ଗତ ସାଧାରଣ ନିର୍ବାଚନ ସମୟରେ ଜିଲ୍ଲା ପରିଷଦ ସଭ୍ୟାଙ୍କ ଦେଢଶୁର ତଥା ପୂର୍ବତନ ମଣ୍ଡଳ ସଭାପତି ମଙ୍ଗୁଳି ଜେନାଙ୍କୁ ଖୋର୍ଦ୍ଧା ବିଜେପି କାର୍ଯ୍ୟାଳୟ ନିକଟରେ ଗୁଳି କରି ହତ୍ୟା କରାଯାଇଥିଲା। ତାଙ୍କ ହତ୍ୟାକାରୀ ଏପର୍ଯ୍ୟନ୍ତ ଗିରଫ କରାଯାଉନଥିବା ବେଳେ ବିଜେପି ଏହି ଘଟଣାରେ ନୀରବ ରହିବା ଘଟଣାକୁ ଶ୍ରୀମତୀ ଜେନା ସମାଲୋଚନା କରିଛନ୍ତି।
ତେବେ ନିକଟରେ କୌଣସି ଦଳରେ ଯୋଗ ଦେବା ପୂର୍ବରୁ ନିଜ ସମର୍ଥକଙ୍କ ସହ ଆଲୋଚନା କରି ନିଷ୍ପତ୍ତି ନେବେ ବୋଲି ସାମ୍ବାଦିକ ମାନଙ୍କୁ କହିଛନ୍ତି। ଗତ ପଂଚାୟତ ନିର୍ବାଚନରେ ମମତା ଜେନା ଏକ ମାତ୍ର ଜିଲ୍ଲା ପରିଷଦ ସଭ୍ୟା ଭାବେ ଟାଙ୍ଗୀ ବ୍ଲକରୁ ନିର୍ବାଚନ ଜିତି ବିଜେପିର ଖାତା ଖୋଲିଥିଲେ। ତାଙ୍କର ଏହି ଇସ୍ତଫା ଖୋର୍ଦ୍ଧା ନିର୍ବାଚନ ମଣ୍ଡଳୀରେ ବିଜେପିକୁ ଢେର କ୍ଷତି ପହଂଚାଇବ ବୋଲି ଆଲୋଚନା ହେଉଛି।