ଭୁବନେଶ୍ବର: ସଂଗୀତ ନିର୍ଦ୍ଦେଶକ ପ୍ରେମ ଆନନ୍ଦ ବିଭିନ୍ନ ସମୟରେ ଭିନ୍ନ ଭିନ୍ନ ପ୍ରସଂଗକୁ ନେଇ ଚର୍ଚ୍ଚାରେ ରହିଥାନ୍ତି। କେତେବେଳେ ରାଜ୍ୟପାଳଙ୍କୁ ନେଇ କିମ୍ବା କେତେବେଳେ ଓଡିଶାର ସବୁ କଣ୍ଠଶିଳ୍ପୀଙ୍କୁ ନେଇ ସଂଗୀତ କରିବା ହେଉ। ଏସବୁକୁ ନେଇ ସେ ଚର୍ଚ୍ଚାରେ ରହିଆସିଛନ୍ତି। ସେମିତି ସେ ହିନ୍ଦି ଚଳଚିତ୍ରରେ ସଂଗୀତ ନିର୍ଦ୍ଦେଶନା ଦେବା ନେଇ ମଧ୍ୟ ଚର୍ଚ୍ଚାରେ ଥିଲେ।
ଏବେ ସେହି ଭିତରେ ଆଉ ଏକ ଚର୍ଚ୍ଚା ଯୋଡି ହୋଇଯାଇଛି। ତାହା ହେଲା ବଲିଉଡର ପ୍ରଖ୍ୟାତ ଗୀତିକାର ନୀତିନ ରାୟକରଙ୍କ ସହିତ ଏକ ଫଟୋକୁ ନେଇ। ନିକଟରେ ଏକ ଫଟୋ ପ୍ରକାଶ ପାଇଛି ଯେଉଁଥିରେ ପ୍ରେମ ଆନନ୍ଦ ଏବଂ ନୀତିନ ରାୟକର ଅଛନ୍ତି। ଏଥିରୁ ଅନୁମାନ କରି ହେଉଛି ଯେ, ପ୍ରେମ ଆନନ୍ଦ ବଲିଉଡରେ କିଛି କରିବାକୁ ଯାଉଛନ୍ତି।
ବଲିଉଡର ଜଣେ ପ୍ରଖ୍ୟାତ ଗୀତିକାର ହେଉଛନ୍ତି ନୀତିନ ରାୟକର। ସେ ପ୍ରାୟ 200ରୁ ଉର୍ଦ୍ଧ ହିନ୍ଦି ଚଳଚିତ୍ର ପାଇଁ ଗୀତ ଲେଖିଛନ୍ତି। ତାଙ୍କ ଲୋକପ୍ରିୟ ଗୀତ ମଧ୍ୟରେ ରହିଛି ଅମୀର ଖାନ, ରାଣୀ ମୁଖାର୍ଜିଙ୍କ ଅଭିନିତ ଗୁଲାମ ଚଳଚିତ୍ରର ଆତି ହେ.. ଖଣ୍ଡାଲା…, ଜଙ୍ଗ୍ ଚଳଚିତ୍ରର ଆଇଲା ରେ ଲଡକି……, ସେହିପରି ଯୋଷ୍ ଚଳଚିତ୍ରର ଆପୁନ ବୋଲା…। ଏଥିରେ ଶାହାରୁକ ଖାନ ଏବଂ ଐଶ୍ବର୍ଯ୍ୟା ରାୟ ଅଭିନୟ କରିଛନ୍ତି।
ନୀତିନଙ୍କ ଚଳଚିତ୍ର ମଧ୍ୟରେ ରହିଛି ସୂର୍ଯ୍ୟବଂଶୀ, ଡି-କଂପାନୀ, ସତ୍ୟ-2, ତୋବା ତୋବା, ବ୍ୟାଡ ବଏ, ପ୍ୟାର ତୁନେ କ୍ୟାୟା କିୟା, ମସ୍ତ, ଘର ୱାଲି ବାହାର ୱାଲି, ଲୋଫର ପ୍ରଭୃତି। ତାଙ୍କର ଗୀତଗୁଡିକ ବଲିଉଡରେ ବେଶ୍ ଲୋକପ୍ରିୟତା ହାସଲ କରିବା ସହିତ ଚର୍ଚ୍ଚାରେ ମଧ୍ୟ ରହିଛି। ମୁଖ୍ୟତଃ ରାମଗୋପାଳ ବର୍ମାଙ୍କ ଚଳଚିତ୍ରରେ ନୀତିନ ହେଉଛନ୍ତି ପ୍ରମୁଖ ଗୀତିକାର।
ଏହିପରି ଜଣେ ପ୍ରତିଷ୍ଠିତ ଗୀତିକାରକୁ ନେଇ ମୁମ୍ବାଇରେ ପ୍ରେମ ଆନନ୍ଦ କିଛି କରିବାକୁ ଯାଉଥିବାର ଜଣାପଡିଛି। ତେବେ ଏ ସଂପର୍କରେ ‘ସମୀକ୍ଷା’ ତରଫରୁ ତାଙ୍କ ସହିତ ଯୋଗାଯୋଗ କରାଯାଇଥିଲେ ମଧ୍ୟ ସେ କିଛି କହିବାକୁ ମନା କରିଥିଲେ। ତେବେ ସେ ବର୍ତ୍ତମାନ ମୁମ୍ବାଇରେ ଅଛନ୍ତି ବୋଲି ସ୍ବୀକାର କରିଛନ୍ତି। ଖୁବ ଶିଘ୍ର ସେ ତାଙ୍କର ନୂଆ ପ୍ରୋଜେକ୍ଟ ବାବଦରେ ଘୋଷଣା କରିବେ ବୋଲି ଅନୁମାନ କରାଯାଉଛି।
