ଭୁବନେଶ୍ବର: ଶେଷରେ ବେଦାନ୍ତର ମନମୁଖୀ ପାଉଁଶ ପରିବହନକୁ ନେଇ ବିଧାନସଭାରେ ଉଠିଛି ପ୍ରଶ୍ନ। ବେଦାନ୍ତ କଂପାନୀ ବେଆଇନି ଭାବେ ପାଉଁଶ ଫିଙ୍ଗିଥିବା ବେଳେ ସରକାର କାହିଁକି ଆଖିବୁଜି ବସିଛନ୍ତି ବୋଲି କଂଗ୍ରେସ ପ୍ରଶ୍ନ କରିଛି। ଏପରିକି ସରକାରଙ୍କ ବେଦାନ୍ତ ପ୍ରତି ଏପରି ଦୟା କାହିଁକି ବୋଲି କଂଗ୍ରେସ ଗୃହରେ ପ୍ରକାଶ କରିଛି।
ଓଡିଶା ବିଧାନସଭାର ଶୀତକାଳିନ ଅଧିବେସନର ସପ୍ତମ ଦିନରେ ଏହି ପ୍ରଶ୍ନ ଉଠାଇଛନ୍ତି କଂଗ୍ରେସ ବିଧାୟକ ସି ଏସ ରାଜନ ଏକ୍କା। ସେ କହିଛନ୍ତି ଯେ, ବେଦାନ୍ତର ଝାରସୁଗୁଡା କଂପାନୀ ମନଇଚ୍ଛା ପାଉଁଶ ବିଭିନ୍ନ ଚଳପ୍ରଚଳ ସ୍ଥାନରେ ପକାଉଛି। ଏପରିକି ଝାରସୁଗୁଡା ଜଙ୍ଗଲ ଭିତରେ ପାଉଁଶର ପାହଡ ସୃଷ୍ଟି କରିଛି। ଏ କଥା ସରକାର ଜାଣିଥିଲେ ମଧ୍ୟ କାହିଁକି ଚୁପ ରହିଛନ୍ତି ବୋଲି ସେ ପ୍ରଶ୍ନ କରିଛନ୍ତି।
ସେ ଆହୁରି କହିଛନ୍ତି ଯେ, ବେଦାନ୍ତର ଏପରି ପାଉଁଶ ପରିଚାଳନା ନେଇ ପ୍ରଦୂଷଣ ବୋର୍ଡ ତାଙ୍କୁ ଜରିମାନା ମଧ୍ୟ କରିଛି। ହେଲେ କଂପାନୀ ସେହି ଜରିମାନା ପଇସା ଏପର୍ଯ୍ୟନ୍ତ ପ୍ରଦାନ କରୁ ନାହିଁ କି ତା ବିରୋଧରେ କୌଣସି କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯାଉ ନାହିଁ। ଝାରସୁଗୁଡା ସମ୍ବଲପୁର ଏବଂ ସୁନ୍ଦରଗଡ ଅଞ୍ଚଳରେ ପରିବେଶ ପ୍ରଦୂଷଣ କରୁଛି ବୋଲି ଜରିମାନା କରାଯାଇଛି। ହେଲେ ବେଦାନ୍ତ କଂପାନୀ କିଛି ପଇସା ଦେଇ ଏବେ ଚୁପ ବସିଛି।
ବେଦାନ୍ତ କଂପାନୀର ପାଉଁଶ ପରିବହନ ନେଇ ପୂର୍ବରୁ ବାରମ୍ବାର ବିରୋଧ କରାଯାଇ ଆସୁଛି। ହେଲେ କଂପାନୀ ବିରୋଧରେ ସରକାର କିଛି ପଦକ୍ଷେପ ଗ୍ରହଣ କରୁ ନାହାଁନ୍ତି। ବେଦାନ୍ତ ଝାରସୁଗୁଡା କଂପାନୀରୁ ଯେଉଁ ପରିମାଣର ପାଉଁଶ ଉତ୍ପନ ହେଉଛି ତାହାକୁ କଂପାନୀ ନିୟମ ଅନୁସାରେ ଯେପରି ପରିବହନ କରିବା କଥା ତାହା କରୁ ନାହିଁ। ଫଳରେ କଂପାନୀ ବିରୋଧରେ ସେଠାରେ ଜନ ଅସନ୍ତୋଷ ବଢିବାରେ ଲାଗିଛି।
ଏପରିକି ବେଦାନ୍ତ କଂପାନୀର ଫର୍ନେସରୁ ଯେଉଁ ଧୂଆଁ ନିର୍ଗତ ହେଉଛି ତାହା ମଧ୍ୟ ସ୍ଥାନୀୟ ଅଞ୍ଚଳରେ ପ୍ରଦୂଷଣ ସୃଷ୍ଟି କରିବାରେ ଲାଗିଛି। ସେହି ପାଉଁଶ ଉଡି କିଛି କିଲୋମିଟର ପର୍ଯ୍ୟନ୍ତ ପରିବେଶ ପ୍ରଦୂଷଣ କରିବାରେ ଲାଗିଛି। ଘର ଏବଂ ଗଛପତ୍ରରେ ପାଉଁଶ ଲାଗିରହୁଛି। ଏହା ପରିବେଶ ପ୍ରତି ବଡ ବିପଦ ହୋଇଥିଲେ ମଧ୍ୟ ସରକାର କୌଣସି ପଦକ୍ଷେପ ଗ୍ରହଣ କରୁ ନାହାଁନ୍ତି।
ତେବେ ବେଦାନ୍ତ କଂପାନୀର ଏପରି ବେଫିକର ନିତିକୁ ନେଇ ରାଜନୈତିକ ମହଲରେ ପ୍ରବଳ ଅସନ୍ତୋଷ ମଧ୍ୟ ସୃଷ୍ଟି ହୋଇଛି। ଏପରିକି ସରକାରୀ ଦଳର ଅନେକ ବିଧାୟକ ଓ ସାଂସଦ ବେଦାନ୍ତର ଏପରି କାର୍ଯ୍ୟକୁ ବିରୋଧ କରିବାରେ ଲାଗିଛନ୍ତି। ସେମାନେ କେନ୍ଦ୍ର ସରକାରଙ୍କ ଚିଠି ମଧ୍ୟ ଲେଖିଛନ୍ତି। ବେଦାନ୍ତ କଂପାନୀର ଏପରି ଜବିରୋଧୀ କାର୍ଯ୍ୟକୁ ନେଇ ଆଗାମୀ ଦିନରେ ଏକ ବଡ ଆନ୍ଦୋଳନ ସୃଷ୍ଟି ହେବାର ସମ୍ଭାବନା ଦେଖାଦେଲାଣି।
