Tag: ମା’ ଭାଗବତୀ

ସୀତାରାମ ଅଗ୍ରୱାଲ

ବାଣପୁର: ଶକ୍ତି କ୍ଷେତ୍ର ବାଣପୁରର ଆରାଧ୍ୟା ଦେବୀ ମା’ ଭାଗବତୀଙ୍କ ପୀଠରେ ଶ୍ରୀକ୍ଷେତ୍ରପରି ବାରମାସରେ ତେର ପର୍ବ ଲାଗି ରହିଥାଏ। ଧନୁ ମାସ ଶେଷ ପରେ ମକର ପର୍ବ। ମା’ଙ୍କ ପୀଠ ଚଳଚଞ୍ଚଳ। ଭଉଣୀ ପୂର୍ବଦିଗ ରକ୍ଷାକାରିଣୀ ମା’କାଳିଜାୟୀ ଓ ଦକ୍ଷିଣ ଦିଗରକ୍ଷାକାରିଣି ମା’ନାରାୟଣୀଙ୍କ ସହିତ ମା’ ଭଗବତୀଙ୍କ ପୀଠକୁ ନେଇ ରହିଛି ତ୍ରିଶକ୍ତିପୀଠ।

ମକର ପର୍ବରେ ଏହି ତିନିପୀଠର ତ୍ରିଶକ୍ତି ତିନି ମା’ଙ୍କ ଦର୍ଶନ ପାଇଁ ଓଡିଶାର କୋଣ ଅନୁକୋଣରୁ ଛୁଟି ଆସନ୍ତି ଅଗଣିତ ଶ୍ରଦ୍ଧାଳୁ। ପ୍ରତ୍ୟୁଷରୁ ମା’ଙ୍କ ଅଙ୍ଗରାଗ ମାଜଣା ମହାପ୍ରସାଦ ଅର୍ପଣ, ବେଶ ପରେ ବଲ୍ଲଭ ଆଳତି ହୋଇ ସର୍ବ ସାଧାରଣ ଦର୍ଶନ ବଢିଥିଲା। ମଧ୍ୟାହ୍ନରେ ଶଙ୍କୁଡ଼ି ଧୂପ ବଢି ପହୁଡ଼ ହୋଇଥିଲା। ସଂଧ୍ୟାରେ ମକର ଉତ୍ସବ।

ମନ୍ଦିର କାର୍ଯ୍ୟାଳୟ ତରଫରୁ ନୂଆ ଆଟିକାରେ ନୂଆ ଚାଉଳ ଚୁନା, ଗୁଡ଼ ଘିଅ ନଡ଼ିଆ, କ୍ଷୀର, ମହୁ, କର୍ପୁର, ଗୋଲମରିଚ, ଅଦା, ଗୁଜରାତି, କଦଳୀ, ସେଓ, ସକରକନ୍ଦ, ଆଖୁ ଇତ୍ୟାଦି ଫଳ ମୂଳ ଯୋଗାଇ ଦିଆଯାଇଥିଲା। ନିଯୋଗୀ ସୁପକାର କାଳିମହାପାତ୍ରଙ୍କ ସହିତ ନିଯୋଗୀ ପାଳିଆ ମାଳି ଶଙ୍କର ନାୟକ, ଗଣେଶ ନାୟକ, ପବିତ୍ର ନାୟକ ମିଶି ମା’ଙ୍କ ମକର ନୈବେଦ୍ୟ ସୁଦ୍ଧପୂତ ଭାବରେ ପ୍ରସ୍ତୁତ କରିବା ପରେ ଘଣ୍ଟା ଘଣ୍ଟ କାହାଳି ବାଦ୍ୟ ବାଜି ଉଠିଥିଲା। ମଶାଲତି, ଘଣ୍ଟୁଆ, କାହାଳିଆ ସେବକମାନଙ୍କ ସହିତ ସୁପକାର, ପାଳିଆ ମାଳି ସେବକମାନେ ମୁହରେ ତୁଣ୍ଡି ବାନ୍ଧି ମକର ଆଟିକାରେ ଫୁଲ ଧୁପନେଇ ଦକ୍ଷେଶ୍ଵର ମନ୍ଦିରଠାରୁ ଶୋଭାଯାତ୍ରାରେ ଆଣି ମା’ଙ୍କ ପିଣ୍ଡିରେଠା କରିବାପରେ ଧୁପ ବଢିଆଳତି ପରେ ମକର ବେଢା ହୋଇ ରଜାଙ୍କ ପ୍ରାସାଦକୁ ମକରପ୍ରସାଦ ପଠଯାଇ ନିଯୋଗୀ ସେବାୟତମାନେ ପାଇଥିଲେ।

ପରେ ସର୍ବ ସାଧାରଣଙ୍କୁ ପ୍ରସାଦ ବଣ୍ଟନ କରାଯାଇଥିଲା। ସଂଧ୍ୟାରେ ମା’ଙ୍କ ପୀଠରେ ସରୋଜ ଶାସମଲ୍ଲ ଓ ସାଥିଙ୍କ ଦ୍ଵାରା ଭଜନ ସମାରୋହ ଅନୁଷ୍ଠିତ ହୋଇଥିଲା। ଅଗଣିତ ଶ୍ରଦ୍ଧାଳୁ ସକାଳୁ ସଂଧ୍ୟା ପର୍ଯ୍ୟନ୍ତ ମା’ଙ୍କ ମକରଚୌରାଶି ବେଶ ଦର୍ଶନ କରି ଥିଲେ। ଶୃଙ୍ଗଳା ରକ୍ଷା ପାଇଁ ମନ୍ଦିର ପ୍ରଶାସନ ତରଫରୁ ସମସ୍ଥ ପ୍ରକାର ବ୍ୟବସ୍ଥା କରାଯାଇଥିଲା।

ସୀତାରାମ ଅଗ୍ରୱାଲ
ବାଣପୁର: ଓଡ଼ିଶାର ଅନନ୍ୟ ଶକ୍ତିପୀଠ ମଧ୍ୟରୁ ଖୋର୍ଦ୍ଧା ଜିଲ୍ଲା ବାଣପୁର ମା’ ଭଗବତୀଙ୍କ ପୀଠ ଅନ୍ୟତମ। ମା’ ଭଗବତୀଙ୍କ ଷୋଡଶ ଦିନାତ୍ମକ ପୂଜା ଶେଷରେ ବିଜୟାଦଶମୀ ପାଳନ କରାଯାଏ। ଏହି ଦିନ ମାତୃଶକ୍ତିର ଜୟ ଜୟକାରରେ ଧରାପୃଷ୍ଟ ଝଙ୍କୃତ ହୁଏ। ଅସତ୳ ଉପରେ ସତ୍ୟର ବିଜୟ। ଅଧର୍ମ ଉପରେ ଧର୍ମର ବିଜୟ। ପାପ ଉପରେ ପୁଣ୍ୟର ବିଜୟ।ଅତ୍ୟାଚାର ଉପରେ ସଦାଚାରର ବିଜୟ ଏବଂ କ୍ରୋଧ ଉପରେ ଦୟା, କ୍ଷମାର ବିଜୟ।

ମା’ ଆସୁରୀକ ଶକ୍ତିକୁ ପରାହତ କରି ସଂସାରରେ ଦୈବୀଶକ୍ତିର ପ୍ରତିଷ୍ଠା କରନ୍ତି। ଏଥିପାଇଁ ଏହାକୁ ବିଜୟାଦଶମୀ କୁହାଯାଏ। ବହୁ ପ୍ରତୀକ୍ଷିତ ଏହି ବିଜୟାଦଶମୀରେ ଆଜି ରାଜ ରାଜେଶ୍ୱରୀ ମା’ ଭଗବତୀ ସିଂହବାହିନୀ ବେଶରେ ତାଙ୍କ ଭକ୍ତ ମାନଙ୍କୁ ଦର୍ଶନ ଦେଇଥାନ୍ତି। ଦଶହରା ଦିନ ଏହି ଦୁର୍ଲ୍ଲଭ ବେଶରେ ମା’ ଙ୍କର ଦର୍ଶନ ସୌଭାଗ୍ୟ ମିଳିଥିବାରୁ ଶ୍ରଦ୍ଧାଳୁମାନଙ୍କ ମନରେ ଅଶେଷ ଆନନ୍ଦ ଭରିଉଠିଛି।

ବାମ ପାଦ ସିଂହ ଉପରେ ଓ ଦକ୍ଷିଣ ପାଦ ମହିଷ ଉପରେ ମା’ ତ୍ରିଶୂଳ ଧାରଣ କରି, ମହିଷାସୁରକୁ ବଧ କରିବାର ଦୃଶ୍ୟ ଅତ୍ୟନ୍ତ ମନୋମୁଗ୍ଧକର ଓ ଆନନ୍ଦଦାୟକ। ଏହି ବେଶରେ ମା’ଙ୍କ ଦର୍ଶନ ଲାଭକଲେ ସକଳ ଦୁଃଖ ଖଣ୍ଡନ ହୁଏ ବୋଲି ଲୋକମତ ଓ ବିଶ୍ୱାସ ରହିଛି। ଆଜି ସକାଳ ୮ ଘଟିକା ଠାରୁ ସନ୍ଧ୍ୟା ୮ ଘଟିକା ପର୍ଯ୍ୟନ୍ତ ଏହି ବେଶରେ ମା’ ଭଗବତୀ ଦର୍ଶନ ଦେବେ ବୋଲି ଦେବୋତ୍ତର କାର୍ଯ୍ୟାଳୟ ତରଫରୁ ପ୍ରକାଶ।