ଭୁବନେଶ୍ଵର: ମହାପ୍ରଭୁଙ୍କ ବିଶ୍ବ ପ୍ରସିଦ୍ଧ ରଥଯାତ୍ରା ପାଇଁ ଆଜି ରଥକାଠ ଅନୁକୂଳ ପୂଜାର୍ଚ୍ଚନା ଅନୁଷ୍ଠିତ ହେବ। ନୟାଗଡ଼ ଜ଼ିଲ୍ଲା ଗଣିଆ ବ୍ଲକ ବଡମୂଳ ଗ୍ରାମରେ ଥିବା ମା ବଡରାଉଳଙ୍କ ପୀଠରେ ଏହି ପୂଜାର୍ଚ୍ଚନା କରାଯିବ। ଏଥିପାଇଁ ଏକ ପ୍ରତିନିଧି ମଣ୍ଡଳୀ ପୁରୀରୁ ମହାପ୍ରଭୁଙ୍କ ଲାଗି ମାଳ ମହାର୍ଦ୍ଧ, ଖଣ୍ଡୁଆ, ଧୂପ, ଦୀପ, ନଡ଼ିଆ ଆଦି ଧରି ଆଜି ରାତିରେ ନୟାଗଡ଼ରେ ପହଞ୍ଚିଛନ୍ତି। ଏହି ପ୍ରତିନିଧି ମଣ୍ଡଳୀରେ ବରିଷ୍ଠ ରଥ ତତ୍ତ୍ବାବଧାରକ ସୁଦର୍ଶନ ମେକାପ, ରଥ ଅମିନ ଲକ୍ଷ୍ମଣ ମହାପାତ୍ର, ଭୋଇ ସର୍ଦ୍ଦାର ରବି ଭୋଇ ପ୍ରମୁଖ ଉପସ୍ଥିତ ଅଛନ୍ତିIନୟାଗଡ଼ ଡିଏଫ୍ଓ କ୍ଷମା ଷଡ଼ଙ୍ଗୀ ସେମାନଙ୍କୁ ଭବ୍ୟ ସ୍ବାଗତ ସମ୍ବଦ୍ଧନା ଜ୍ଞାପନ କରିବା ପରେ ସେମାନଙ୍କ ଠାରୁ ଆଜ୍ଞାମାଳ ଗ୍ରହଣ କରିଛନ୍ତି।
ଆଜି ପୂର୍ବାହ୍ନରେ ବଡମୂଳ ଗ୍ରାମରେ ଥିବା ମା ବଡରାଉଳଙ୍କ ପୀଠରେ ରଥକାଠ ଅନୁକୂଳ ପୂଜାର୍ଚ୍ଚନା କରାଯିବ। ତେବେ ଆସନ୍ତା କାଲି ବଡରାଉଳ ଠାକୁରାଣୀଙ୍କ ନିକଟରେ ପୂଜାର୍ଚ୍ଚନା କରାଯିବା ପରେ ତିନି ରଥ ପାଇଁ ତିନୋଟି କାଠ ଚିହ୍ନଟ କରାଯିବ।ଏହା ପରେ ପରମ୍ପରା ଅନୁସାରେ ଚି଼ହ୍ନଟ ହୋଇଥିବା ରଥକାଠ କଟାଯିବା ସହ କାଠକୁ ଶ୍ରୀପଞ୍ଚମୀ ପୂର୍ବରୁ ଶ୍ରୀକ୍ଷେତ୍ର କୁ ପଠାଯିବ।ପରେ ଵିଧି ଅନୁସାରେ ଶ୍ରୀ ପଞ୍ଚମୀ ଦିନ ରଥ କାଠ ପୂଜା ଅନୁଷ୍ଠିତ ହେବ। ତିନି ରଥ ନିର୍ମାଣରେ ଫାସୀ, ଅସନ, ଧଉରା ଆଦି କାଠ ବ୍ୟବହାରର ନଜରରେ ରଖି ରଥ କାଠ ପ୍ରତିବର୍ଷ ସଂଗ୍ରହ କରାଯାଇଥାଏ।
ତେବେ ଗତବର୍ଷ ଆସିଥିବା ରଥ କାଠ ମଧ୍ୟରୁ ୫୧ ଖଣ୍ଡ ବଳକା କାଠ ମହଜୁଦ ରହିଥିବା ବେଳେ ଆଗାମୀ ବର୍ଷ ରଥନିର୍ମାଣ ପାଇଁ ୮୧୪ ଖଣ୍ଡ କାଠର ଆବଶ୍ୟକତା ରହିଅଛି।
