ଭୁବନେଶ୍ବର: ମୃତ ପ୍ରମାଣ ପତ୍ର ଦେବା ପାଇଁ ଲାଞ୍ଚ ନେଉଥିବା ବେଳେ ମାଡି ବସିଲା ଭିଜିଲାନ୍ସ। ଏହିପରି ଏକ ଘଟଣା ଖୋର୍ଦ୍ଧା ଜିଲ୍ଲା ହଳଦିଆ ସିଏଚସି ରେ ଘଟିଛି। ଆଜି ଦିନ ପ୍ରାୟ 12ଟା ବେଳେ ସେଠାକାର କ୍ଲର୍କ ଅନୁପ କୁମାର ଶତପଥୀ ପାଞ୍ଚ ହଜାର ଟଙ୍କା ଲାଞ୍ଚ ନେଉଥିବା ବେଳେ ଧରାପଡିଛନ୍ତି।
ଘଟଣାରୁ ଜଣାପଡିଛି ଯେ, ଶ୍ରୀ ଶତପଥୀ ଜଣେ ଅଭିଯୋଗକାରୀଙ୍କ ଜେଜେ ବାପାଙ୍କ ମୃତ ପ୍ରମାଣ ପତ୍ର ପାଇଁ ଆବେଦନ କରିଥିଲେ। ତାଙ୍କର ପୈତୃକ ସଂପତ୍ତି ବିକ୍ରି ପାଇଁ ସେ ଏହି ଆବେଦନ କରିଥିଲେ। ହେଲେ ଶ୍ରୀ ଶତପଥୀ ତାଙ୍କୁ ବହୁବାର ଅଫିସକୁ ଦଉଡାଇଥିଲେ। ଶେଷରେ ସେ ପାଞ୍ଚ ହଜାର ଟଙ୍କା ଲାଞ୍ଚ ମାଗିଥିଲେ। ଯୋଜନା ମୁତାବିକ ଆଜି ଭିଜିଲାନ୍ସ ତାଙ୍କୁ ଧରିବା ସହିତ ତାଙ୍କ ହାତରୁ ଲାଞ୍ଚ ଟଙ୍କା ମଧ୍ୟ ଉଦ୍ଧାର କରିଛି। ତାଙ୍କ ନାମରେ ମାମଲା ଋଜୁ ପରେ ଅଧିକ ତଦନ୍ତ ଚାଲିଛି।
