ଶିମଲା: ଭାରତର ହିମାଚଳ ପ୍ରଦେଶରେ ରୁଷ-ୟୁକ୍ରେନ ପ୍ରେମୀ ଦମ୍ପତି ବିବାହ ବନ୍ଧନରେ ବାନ୍ଧି ହୋଇ ପ୍ରେମର ବାର୍ତ୍ତା ପଠାଇଛନ୍ତି। ଆଜିକାଲି ୟୁକ୍ରେନ-ଋଷ ଯୁଦ୍ଧର ନିଆଁରେ ଜଳୁଛି। ଏହି ସମୟରେ ଜଣେ ୟୁକ୍ରେନ ମହିଳା ଏବଂ ଋଷର ଜଣେ ବ୍ୟକ୍ତି ଧର୍ମଶାଳାରେ ବିବାହ କରିଛନ୍ତି ଏବଂ ଯୁଦ୍ଧ ନକରିବା ଲାଗି ଦୁଇ ଦେଶକୁ ଅନୁରୋଧ କରିଛନ୍ତି।
୨୮ ବର୍ଷିୟା ୟୁକ୍ରେନ ମହିଳା ଅଲୋନା ବର୍ମାକା ଏବଂ ୩୭ ବର୍ଷୀୟ ରୁଷୀୟ ଇସ୍ରାଏଲୀୟ ପୁରୁଷ ସର୍ଗେଇ ନୋଭିକୋଭ ସୋମବାର ଦିନ ଭାରତର ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ସେମାନଙ୍କର ବିବାହ ପଞ୍ଜିକରଣ କରିଛନ୍ତି। ସେମାନେ ଏକ ମାସ ପୂର୍ବରୁ ହିନ୍ଦୁ ପରମ୍ପରା ଅନୁଯାୟୀ ବିବାହ ରୀତିନୀତି କରିସାରିଛନ୍ତି। ମହିଳା କହିଛନ୍ତି ଯେ, ହିନ୍ଦୁ ସଂସ୍କୃତି ବହୁତ ସୁନ୍ଦର, ତେଣୁ ଆମେ ସ୍ଥିର କଲୁ ଯେ ଆମେ ହିନ୍ଦୁ ରୀତିନୀତି ଅନୁଯାୟୀ ବିବାହ କରିବୁ।
ପ୍ରକୃତରେ, ଯେତେବେଳେ ନୋଭିକୋଭ୍ ଇସ୍ରାଏଲରେ ରହୁଥିଲେ, ସେ ସେଠାରେ ଆଲୋନାଙ୍କୁ ଭେଟିଥିଲେ। ଦୁହେଁ ୬ ବର୍ଷ ଧରି ସମ୍ପର୍କ ରଖିଥିଲେ। ଏକ ବର୍ଷ ପୂର୍ବେ ଦୁହେଁ ଭାରତ ଆସିଥିଲେ ଏବଂ ଜାଣିବାକୁ ପାଇଲେ ଯେ ଧର୍ମଶାଳା ହିନ୍ଦୁ ପରମ୍ପରା ଓ ସଂସ୍କୃତି ସହିତ ବିବାହ କରିବା ପାଇଁ ଏକ ସ୍ୱତନ୍ତ୍ର ସ୍ଥାନ।
ନୋଭିକୋଭ କହିଛନ୍ତି ଯେ, ଋଷ ଏବଂ ୟୁକ୍ରେନ ଗୋଟିଏ ଦେଶ ଥିଲେ। ଭାଇମାନଙ୍କ ପରି ବାସ କରୁଥିଲେ। ଯୁଦ୍ଧ ନୁହେଁ, ଆମେ ପ୍ରେମ କରିବା ଆବଶ୍ୟକ। ହିଂସା ଆଦୌ ଭଲ ନୁହେଁ।
ଏସଡିଏମ ଧର୍ମଶାଳା ଶିଳ୍ପା ବେକତା ନବ ବିବାହିତ ଦମ୍ପତିଙ୍କ ବିବାହ ପଞ୍ଜୀକରଣ ପ୍ରମାଣପତ୍ର ପ୍ରଦାନ କରିଛନ୍ତି। ବେକତା ଗଣମାଧ୍ୟମକୁ କହିଛନ୍ତି ଯେ, ଧର୍ମଶାଳାରେ ବିଦେଶୀମାନଙ୍କ ପ୍ରାୟ ୪୦ ପ୍ରତିଶତ ବିବାହ ସ୍ୱତନ୍ତ୍ର ବିବାହ ଅଧିନିୟମ ଅନୁଯାୟୀ ପଞ୍ଜିକୃତ ହୋଇଛି। “ଜାନୁୟାରୀ ୧ ରୁ ସେପ୍ଟେମ୍ବର ୫ ତାରିଖ ୨୦୨୨ ପର୍ଯ୍ୟନ୍ତ ୧୦୬ ଟି ବିବାହ ପଞ୍ଜିକୃତ ହୋଇଛି। ପ୍ରାୟ ୪୦ ବିବାହ ବିଦେଶୀମାନଙ୍କ ସହିତ ଜଡିତ।
