ରଣପୁର: ରାଜ୍ୟ ସରକାର ରାଜ୍ୟର ପୂର୍ବ ଐତିହ୍ୟକୁ ସୁରକ୍ଷା ଦେବାଲାଗି ପ୍ରାଚୀନ ଶିଳାଲେଖ ଓ ଐତିହାସିକ ପୀଠ ସ୍ଥଳୀଗୁଡିକୁ ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା ସହିତ ସହ ବନ୍ଧିତହୋଇ କୋଟିକୋଟି ଟଙ୍କା ଖର୍ଚ୍ଚ କରି ସେଗୁଡିକର ପୁନରୁଦ୍ଧାର ଓ ସ୍ଥାୟିତ୍ୱ କରୁଥିବା ବେଳେ ପ୍ରଶାସନିକ ଉଦାସୀନତା ପାଇଁ ଦୀପତଳ ଅନ୍ଧାର ସଦୃଶ ଏଇମିତି ଏକ ରୋଚକ ଘଟଣା ଦେଖିବାକୁ ମିଳିଛି ରଣପୁର ବ୍ଳକ୍ କ୍ୟାମ୍ପସରେ। ବ୍ଳକର ପୁରୁଣା କାର୍ଯ୍ୟାଳୟ ସମୁଖରେ ରଣପୁରର ସଂଗ୍ରାମୀମାନଙ୍କୁ ସ୍ମରଣ କରିବା ସହିତ ଭବିଷ୍ୟତ ରଣପୁରିଆ ଦାୟଦମାନଙ୍କ ଉଦ୍ଦେଶ୍ୟରେ ପ୍ରତିଷ୍ଠା ହୋଇଥିବା ଦୁଇଗୋଟି ସ୍ମୃତିସ୍ତମ୍ଭ ବା ପ୍ରାଚୀନ ଶିଳାଲେଖ ଆଜି ଜରାଜୀର୍ଣ୍ଣ ଅବସ୍ଥାରେ।
ସୂଚନା ଆଉକି’, ରଣପୁର ବ୍ଳକ୍ ପୁରୁଣା କାର୍ଯ୍ୟାଳୟ ସମ୍ମୁଖରେ ପ୍ରବେଶ ପଥ ଫାଟକ ଆଡ଼କୁ ସାମନା କରି ତତ୍କାଳୀନ ପଞ୍ଚାୟତରାଜ୍ ମନ୍ତ୍ରୀ ସ୍ୱର୍ଗତ ବୃନ୍ଦାବନ ନାୟକଙ୍କ କରକମଳରେ ୨୬ ଫେବୃଆରୀ,୧୯୬୩ ରେ ଦୁଇଟି ସ୍ମୃତି ସ୍ତମ୍ଭରେ ଶିଳାଲେଖ କରାଯାଇ ସ୍ଥାପନ କରାଯାଇଥିଲା। ବ୍ରିଟିଶ ଶାସନ ବିରୁଦ୍ଧରେ ରଣପୁରରେ ଜାଗିଉଠିଥିବା ଗଡ଼ଜାତ ପ୍ରଜା ଆନ୍ଦୋଳନରେ ଶହିଦ୍ ହୋଇଥିବା ମୟୂରଝାଲିଆ ଗାଁ’ର ଅର୍ଜୁନ ରାଉତଙ୍କ ସମେତ ଅଞ୍ଚଳର ବୀରପୁତ୍ର ସଂଗ୍ରାମୀ ରଘୁନାଥ ମହାନ୍ତି,ଦିବାକର ପରିଡ଼ାଙ୍କ ପରି ଏଗାର ଜଣଙ୍କ ନାମ ଓଡ଼ିଶା ତଥା ଭାରତ ଇତିହାସରେ ବେଶ୍ ପରିଚିତ।
ଗଡ଼ଜାତ ରଣପୁରରେ ଅତ୍ୟାଚାରୀ ରାଜା ଓ ଫିରିଙ୍ଗି ଶାସନର ମିଳିତ ହତ୍ୟା, ଲୁଣ୍ଠନ, କଷଣ, ତୋଷଣ ରାଜତନ୍ତ୍ର ଶାସନ ବିରୁଦ୍ଧରେ ପ୍ରଜା ଆନ୍ଦୋଳନ ଚାଲୁ ରହିଥିବା ବେଳେ ବ୍ରିଟିଶ୍ ସରକାରଙ୍କ ପ୍ରତିନିଧି ମେଜର୍ ବେଜେଲଗେଟ୍ ଙ୍କୁ ହତ୍ୟା କରିବା ଅପରାଧରେ ଜେଲ୍ ଦଣ୍ଡ ଭୋଗିଥିବା ସଂଗ୍ରାମୀମାନେ ଓ ବିହାର ଭାଗଲ୍ ପୁର ଜେଲ୍ ରେ ଫାଶୀ ଦଣ୍ଡରେ ଦଣ୍ଡିତ ହୋଇଥିବା ଶହିଦ୍ ରଘୁଦିବାକରଙ୍କ ସମେତ ଏଗାର ଜଣଙ୍କ ନାମ ଉକ୍ତ ଶିଳାଲେଖରେ ଲିପିବଦ୍ଧ ହୋଇଥିଲା। ଏବଂ ଦୁର୍ନୀତି ଠାରୁ ଦୂରେଇ ରହିବା ନିମନ୍ତେ ଶପଥ ପାଠକୁ ମଧ୍ୟ ଶିଳାଲେଖରେ ସ୍ଥାନିତ କରା ଯାଇଥିଲା।
ଉକ୍ତ ପ୍ରାଚୀନ ଶିଳାଲେଖ ସ୍ମୃତିସ୍ତମ୍ଭର ସୁରକ୍ଷା ଓ ପୁନରୁଦ୍ଧାର ପାଇଁ ବ୍ଲକର ବିଭିନ୍ନ ବୈଠକରେ ଆଲୋଚନା କରାଯିବା ସହ ସ୍ଥାନୀୟ ନେତାମାନଙ୍କ ସହିତ ଅଞ୍ଚଳର ବୁଦ୍ଧିଜୀବୀ ବହୁବାର ଆଲୋଚନା କରିଥିଲେ ସୁଦ୍ଧା କୌଣସି ସୁଫଳ ମିଳୁନଥିବାରୁ ବୁଦ୍ଧିଜୀବୀ ମହଲରେ ଅସନ୍ତୋଷ ଦେଖା ଦେଇଛି। ଏ ସଂକ୍ରାନ୍ତରେ ବ୍ଳକର ଅଧ୍ୟକ୍ଷା ଶ୍ରୀମତୀ ନିର୍ମଳା ବେହେରାଙ୍କ ସହିତ ଯୋଗାଯୋଗ କରିବାରୁ ସେ କୁହନ୍ତି ବିଡ଼ିଓଙ୍କ ସହିତ ଏ ସମ୍ପର୍କରେ ଆଲୋଚନା ସରିଛି। ଖୁବ୍ ଶୀଘ୍ର ଏହି ସ୍ମୃତିସ୍ତମ୍ଭ ଶିଳାଲେଖର ପୁନରୁଦ୍ଧାର କରାଯିବା ସହ ବ୍ଳକ୍ କ୍ୟାମ୍ପସକୁ ସରସସୁନ୍ଦର କରାଯିବ। ଏଥିପ୍ରତି ମୋର ବ୍ୟକ୍ତିଗତ ସ୍ତରରେ ଆନ୍ତରିକ ସହଯୋଗ ରହିବ।
ବିଡ଼ିଓ ଜ୍ୟୋତିପ୍ରକାଶ ସେଠୀ କହିଛନ୍ତି ଖୁବ୍ ଶୀଘ୍ର ପୁରାତନ ସ୍ମୃତିସ୍ତମ୍ଭ ଶିଳାଲେଖର ପୁନରୁଦ୍ଧାର ପାଇଁ ବରିଷ୍ଠ ସ୍ଥପତି ଓ ପ୍ରତ୍ନତତ୍ତ୍ୱ ବିଭାଗର ବୈଷୟିକ ବିଶେଷଜ୍ଞଙ୍କ ସହିତ ପ୍ରଶାସନିକ ସ୍ତରରେ ଆବଶ୍ୟକୀୟ ପରାମର୍ଶ ନିଆ ଯାଇ ପଦକ୍ଷେପ ନିଆ ଯିବ।