କଲିକତା: ପଶ୍ଚିମବଙ୍ଗର ହଂସଖଲି ଅଞ୍ଚଳରେ ଗଣଦୁଷ୍କର୍ମ ଏବଂ ହତ୍ୟା ଘଟଣାରେ ସିବିଆଇ ସ୍ଥାନୀୟ ଟିଏମସି ନେତା ତଥା ମୁଖ୍ୟ ଅଭିଯୁକ୍ତଙ୍କ ପିତାଙ୍କୁ ଗିରଫ କରିଛି। ସିବିଆଇ ଅନୁଯାୟୀ, ପ୍ରମାଣକୁ ନଷ୍ଟ କରିବା ଏବଂ ପୀଡିତାଙ୍କ ପରିବାର ସଦସ୍ୟଙ୍କୁ ଭୟଭୀତ କରିବାରେ ଅଭିଯୁକ୍ତ ଏକ ସକ୍ରିୟ ଭୂମିକା ଗ୍ରହଣ କରିଛନ୍ତି।
ଟିଏମସି ନେତା ପୀଡ଼ିତାଙ୍କ ପରିବାରକୁ ଧମକ ଦେଇ ତାଙ୍କ ଲୋକମାନଙ୍କୁ ହଂସଖଲି (ନଦିଆ ଜିଲ୍ଲାର ଅଂଶ) ରେ ପୀଡ଼ିତାଙ୍କ ଘରକୁ ପଠାଇଥିଲେ। ସିବିଆଇ ଅନୁଯାୟୀ, ଅନୁସନ୍ଧାନରୁ ଜଣାପଡିଛି ଯେ, ଡାକ୍ତରଖାନା ନିଆଯିବାବେଳେ ଝିଅଟି ଯେପରି ସଠିକ ଚିକିତ୍ସା ପାଇବ ନାହିଁ, ସେଭଳି ଅଭିଯୁକ୍ତ ତାଙ୍କ ରାଜନୈତିକ ସମ୍ପର୍କ ବ୍ୟବହାର କରିବାକୁ ଚେଷ୍ଟା କରିଛନ୍ତି।
ଏଜେନ୍ସି ଅଧିକାରୀ କହିଛନ୍ତି ଯେ, ପୀଡିତାଙ୍କ ପରିବାର ଯଦି ପୋଲିସ ନିକଟକୁ ଆସନ୍ତି, ତେବେ ସେମାନଙ୍କୁ ଭୟଙ୍କର ପରିଣାମ ଭୋଗିବାକୁ ପଡିବ ବୋଲି ଅଭିଯୁକ୍ତମାନେ ଧମକ ଦେଇଥିଲେ। ପୀଡ଼ିତାର ଶୀଘ୍ର ଅନ୍ତିମ ସଂସ୍କାର କରିବା ଲାଗି ଅଭିଯୁକ୍ତମାନେ ତାଙ୍କ ପରିବାରକୁ ବାଧ୍ୟ କରିଥିଲେ। ଏପ୍ରିଲ ୪ ତାରିଖରେ ସ୍ଥାନୀୟ ନେତାଙ୍କ ଘରେ ତାଙ୍କ ପୁଅର ଜନ୍ମଦିନ ଭୋଜିରେ ଗଣଦୁଷ୍କର୍ମ ହୋଇଥିବା ଅଭିଯୋଗ ହୋଇଥିଲା।
ପୀଡ଼ିତାର ପିତାମାତାଙ୍କ କହିବାନୁସାରେ, ସେ ରାତିରେ ମୃତ୍ୟୁବରଣ କରିଥିଲେ। ଏହି ମାମଲାରେ ପୀଡ଼ିତାଙ୍କ ପିତାମାତା ଏପ୍ରିଲ ୯ ତାରିଖରେ ପୋଲିସ ନିକଟରେ ଅଭିଯୋଗ କରିଥିଲେ। ବର୍ତ୍ତମାନ ଏହି ମାମଲାରେ ବାପା ଓ ପୁଅଙ୍କ ସମେତ ଅତି କମରେ ୬ ଅଭିଯୁକ୍ତଙ୍କୁ ଗିରଫ କରାଯାଇଛି।