ଭୁବନେଶ୍ୱର: ସବୁଜ ଭାରତ ତରଫରୁ ନିକୋ ପାର୍କ ଛକ ହୋଣ୍ଡା ସୋରୁମ୍ ସମ୍ମୁଖରେ ଏକ ଜଳଛତ୍ର ସେବା ଶିବିର ଉଦ୍ଘାଟିତ ହୋଇଯାଇଛି। ଭୁବନେଶ୍ୱର-ମଧ୍ୟ ବିଧାୟକ ଅନନ୍ତ ନାରାୟଣ ଜେନା ଏହି ଶିବିରକୁ ଉଦ୍ଘାଟନ କରି କହିଲେ ଯେ, ବର୍ତ୍ତମାନ ସାରା ରାଜ୍ୟରେ ଯେଉଁଭଳି ଭାବରେ ରୌଦ୍ରତାପ ବୃଦ୍ଧି ପାଉଛି, ତାହା ସାଧାରଣ ଜନତାଙ୍କ ଜୀବନ ଧାରଣ ଉପରେ ପ୍ରଭାବ ପକାଉଛି। ତଥାପି ଲୋକମାନେ ଖରାକୁ ଖାତିର ନକରି ନିଜ ନିଜ କାର୍ଯ୍ୟରେ ବ୍ୟସ୍ତ ରହୁଛନ୍ତି।
ଅନେକ ଲୋକ ରାସ୍ତାରେ ଯାଉଥିବା ବେଳେ ପାନୀୟ ଜଳର ଘୋର ସଙ୍କଟ ଯୋଗୁଁ ନିଜର ତୃଷ୍ଣା ମେଣ୍ଟାଇବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ପଥଚାରୀମାନଙ୍କ ମୁହଁରେ ଟିକେ ହସ ଫୁଟାଇବା ପାଇଁ ସବୁଜ ଭାରତ ତରଫରୁ ଏହି ଜଳସେବା ଶିବିର ଅନୁଷ୍ଠିତ ହୋଇଥିବାରୁ ସେ ସବୁଜ ଭାରତ ଅନୁଷ୍ଠାନକୁ ସାଧୁବାଦ ଜଣାଇଥିଲେ। ରାଜଧାନୀରେ ପ୍ରତି ୱାର୍ଡ଼ ଓ ଜନଗହଳିପୂର୍ଣ୍ଣ ସ୍ଥାନରେ ଜଳ ସେବା ଶିବିର ଖୋଲିଲେ ବହୁ ଲୋକ ଉପକୃତ ହୋଇପାରିବେ ବୋଲି ସେ ମତବ୍ୟକ୍ତ କରିଥିଲେ। ସମ୍ମାନିତ ଅତିଥି ଭାବେ ୩୫ ନମ୍ବର ୱାର୍ଡ଼ର କର୍ପୋରେଟର ରଞ୍ଜୁଲତା ରାୟ, ୩୬ ୱାର୍ଡ଼ର କର୍ପୋରେଟର ଅଲ୍ଲିଅଳୀ ମଲ୍ଲିକ, ବିଜୁ ଜନତା ଦଳର ସାଂସ୍କୃତିକ ସମନ୍ୱୟ ସାମ୍ମୁଖ୍ୟର ସାଧାରଣ ସମ୍ପାଦକ ପ୍ରବୀର ମହାନ୍ତି, ବିଜୁ ଜନତା ଦଳର ସାଧାରଣ ସମ୍ପାଦକ ତଥା ଦୂରଦର୍ଶୀର ସମ୍ପାଦକ ଦୁର୍ଗା ସାମନ୍ତରାୟ, ଡଃ ଜୀବନ ଦୀକ୍ଷିତ, କ୍ଲାପର ପ୍ରତିଷ୍ଠାତା ବିକାଶ ଦାଶ ପ୍ରମୁଖ ଉପସ୍ଥିତ ରହି ପଥଚାରୀମାନଙ୍କୁ ପାନୀୟ ଜଳ ବଣ୍ଟନ କରିଥିଲେ।
ସବୁଜ ଭାରତର ସଭାପତି ସତ୍ୟବ୍ରତ ଜେନାଙ୍କ ପୌରହିତ୍ୟରେ ଅନୁଷ୍ଠିତ ଏହି ଜଳସେବା ଶିବିରରେ ଅନିଲ୍ କୁମାର ଦାସ, ଜି. ରାମଚନ୍ଦ୍ର, ହେମନ୍ତ କୁମାର ମୁଦୁଲି, ଅଜିତ କୁମାର ଜେନା ଓ ରଶ୍ମିରଞ୍ଜନ ପଣ୍ଡା, ମିଥୁନ ଭୋଇ, ଶକ୍ତି ମିଶ୍ର ପ୍ରମୁଖ ଜଳଛତ୍ର ଶିବିରକୁ ପରଚାଳନା କରିଥିଲେ। ସବୁଜ ଭାରତରର ସଭାପତି ସତ୍ୟବ୍ରତ ଜେନା କହିଛନ୍ତି ଯେ, ସମ୍ପ୍ରତି ରାଜ୍ୟରେ ଦିନକୁ ଦିନ ରୌଦ୍ରତାପ ବଢି ବଢି ଚାଲିଛି। ଅସହ୍ୟ ଗୁଳୁଗୁଳି ଯୋଗୁଁ ଜନଜୀବନ ଏକପ୍ରକାର ଠପ ହୋଇଯାଇଛି।
କ୍ରମାଗତ ଭାବେ ବୃକ୍ଷଛେଦନ ଫଳରେ ବଢୁଛି ବିଶ୍ୱତାପମାନ, ପାନୀୟ ଜଳର ଅଭାବରୁ ବୃଦ୍ଧିପାଉଛି ଅଂଶୁଘାତ ଜନିତ ମୃତ୍ୟୁ। ପଥଚାରୀମାନେ ତୃଷ୍ଣା ମେଣ୍ଟାଇବାକୁ ପାଣି ମୁନ୍ଦିଏ ପିଇବା ପାଇଁ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ବର୍ତ୍ତମାନ ଗ୍ରୀଷ୍ମଋତୁ ଚାଲିଥିବାରୁ ପାନୀୟ ଜଳର ଘୋର ସଙ୍କଟ ଦେଖାଦେଇଛି। ଏସବୁକୁ ଦୃଷ୍ଟିରେ ରଖିବ ଆମ ଅନୁଷ୍ଠାନ ଲୋକମାନଙ୍କୁ ଜଳସେବା ଯୋଗଇ ଦେବା ପାଇଁ ଏହି ଜଳସେବା ଶିବିରର ଆୟୋଜନ କରାଯାଇଛି। ଅନୁଷ୍ଠାନର ଏପରି ପ୍ରୟାସକୁ ସାଧାରଣ ଜନତା ସାଧୁବାଦ ଜଣାଇଛନ୍ତି।