ଆରମ୍ଭ ହୋଇଯାଇଛି ବିଧାନସଭା ବଜେଟ୍ ଅଧିବେଶନ । ପଞ୍ଚଦଶ ବିଧାନସଭାର ଶେଷ ଅଧିବେଶନ ଆଜି ଠାରୁ ଆରମ୍ଭ ହୋଇଛି । ଏହା ୧୨ ତାରିଖ ପର୍ଯ୍ୟନ୍ତ ଚାଲିବ । ରାଜ୍ୟପାଳ ପ୍ରଫେସର ଗଣେଶୀ ଲାଲ ବଜେଟ୍ ଅଧିବେଶନର ଆରମ୍ଭରେ ଅଭିଭାଷଣ ପ୍ରଦାନ କରିଛନ୍ତି । ନବୀନ ସରକାରଙ୍କ ଚତୁର୍ଦ୍ଦଶ ପାଳିର ଶେଷ ବଜେଟ୍ ଅଧିବେଶନ୍ରେ ରାଜ୍ୟପାଳ ତାଙ୍କ ଅଭିଭାଷଣରେ ସରକାରଙ୍କ ଲୋକାଭିମୁଖୀ ଯୋଜନା ସହିତ ଓଡ଼ିଶାର ବିକାଶର ଗାଥା ବର୍ଣ୍ଣନା କରିଛନ୍ତି । ରାଜ୍ୟରେ ଦ୍ରୁତଗତିରେ ଶିଳ୍ପାୟନ ବଢିବାରେ ଲାଗିଛି ବୋଲି କହିବା ସହିତ ସାଧାରଣ ବଣ୍ଟନ ବ୍ୟବସ୍ଥାରେ ଓଡ଼ିଶା ଦେଶରେ ନମ୍ବର ଓ୍ବାନ୍ ବୋଲି ରାଜ୍ୟପାଳ କହିଛନ୍ତି । ସେହିପରି ନବୀନ ସରକାରଙ୍କ କଲ୍ୟାଣୀକାରୀ ଯୋଜନା ’ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା’ ରାଜ୍ୟର ଗରିବ ଲୋକଙ୍କୁ ଉପକୃତ କରାଉଛି ବୋଲି କହିଛନ୍ତି । ନିକଟରେ ରାଜ୍ୟ ସରକାରଙ୍କ ନୂତନ ଯୋଜନା ‘କାଳିଆ’ ଚାଷୀ ଓ ଭାଗଚାଷୀଙ୍କୁ ପାଇଁ ଏକ ଉନ୍ନତ ପଦକ୍ଷେପ ବୋଲି ଅଭିହିତ କରିଛନ୍ତି ରାଜ୍ୟପାଳ । ସେହିପରି ‘ମମତା’ ଯୋଜନା ଜରିଆରେ ଓଡ଼ିଶାର ଗରିବ ଗର୍ଭବତୀ ଓ ପ୍ରସୂତୀ ମହିଳାଙ୍କୁ ଉତ୍ତମ ସ୍ବାସ୍ଥ୍ୟ ପରୀକ୍ଷା ସହ ସୁରକ୍ଷିତ ମାତୃତ୍ବ ପାଇଁ ଏହାର କାର୍ଯ୍ୟ ଦୃଷ୍ଟାନ୍ତମୂଳକ ବୋଲି ରାଜ୍ୟପାଳ କହିଛନ୍ତି । ସେହିପରି ଅବହେଳିତ ଛାତ୍ରଛାତ୍ରୀମାନଙ୍କ ପାଇଁ ଗୋପବନ୍ଧୁ ସହାୟତା ଯୋଜନା, ଆଦିବାସୀ ବହୁଳ ଜିଲ୍ଲାରେ ସ୍ବତନ୍ତ୍ର ଉନ୍ନୟନ ପରିଷଦ ଗଠନ କରାଯାଇଛି । ସେହିପରି ଶାଳ କଳାକାରମାନଙ୍କୁ ମାସିକ ୧୨୦୦ଟଙ୍କା ଆର୍ଥିକ ସହାୟତା ସହ ଶାଳ ପତ୍ର ଉପରେ ରୟାଲିଟି ଉଚ୍ଛେଦ ଏକ ଉତ୍ତମ ପଦକ୍ଷେପ ବୋଲି ରାଜ୍ୟପାଳ ତାଙ୍କ ଅଭିଭାଷଣରେ ବ୍ୟକ୍ତ କରିଛନ୍ତି । ଗୁଣାତ୍ମକ ଶିକ୍ଷା ପାଇଁ ରାଜ୍ୟରେ ୨୮ଟି ଆଦର୍ଶ ବିଦ୍ୟାଳୟ ସ୍ଥାପିତ ହୋଇଥିବାବେଳେ ରାଜ୍ୟ ୫ଥର କୃଷିକର୍ମଣ ପୁରସ୍କାର ପାଇଛି । ରାଜ୍ୟ ପୋଲାଭରମ୍ ଓ ମହାନଦୀ ପାଇଁ ସରକାରଙ୍କ ସହ ଲଢେଇ ମଧ୍ୟ ଜାରି ରଖିବ ବୋଲି ରାଜ୍ୟପାଳ ଶ୍ରୀଗଣେଶୀ ଲାଲ୍ ତାଙ୍କ ଅଭିଭାଷଣରେ କହିଛନ୍ତି ।
