ଚିଲିକା: ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ଅନ୍ତର୍ଗତ ଇଚ୍ଛାପୁର ଗ୍ରାମରେ ଶ୍ରୀ ଶ୍ରୀ ବାବା ବାଙ୍କନିଧି ଦେବଙ୍କ ପବିତ୍ର ପୀଠରେ ଏକ ବିଂଶତମ ବାର୍ଷିକ ବିଶ୍ଵଶାନ୍ତି ଶୈବଯାଗ ଓ ଏକ ଲକ୍ଷ ଆଠ ରୁଦ୍ରଦୀପ ମହାଯଜ୍ଞ ଅନୁଷ୍ଠିତ ହୋଇଅଛି। ଶନିବାର ଅଙ୍କୁରାରୋପଣ (କଳସ ଯାତ୍ରା) ସମ୍ପାଦିତ ହୋଇଥିବା ବେଳେ ରବିବାର ଦିନ ଠାକୁରମାନଙ୍କର ଆଗମନ ଓ ଯଜ୍ଞ ଆରମ୍ଭ ହୋଇଥିଲା। ଯଜ୍ଞରେ ଯୋଗଦେବା ନିମନ୍ତେ କପିଳାସ ନିବାସୀ ଶ୍ରୀ ଶ୍ରୀ ଚନ୍ଦ୍ରଶେଖର ଦେବ, ବିଶ୍ଵ ପ୍ରସିଦ୍ଧ ପୁରୀସ୍ଥ ଶ୍ରୀ ଜଗନ୍ନାଥଙ୍କ ଆଜ୍ଞାମାଳ, ହରିପୁର ଗ୍ରାମର ଆରାଧ୍ୟ ଦେବତା ଶ୍ରୀ ଶ୍ରୀ ପ୍ରତାପରୁଦ୍ରଦେବ ଏବଂ ମା ଦୁଆରଶୁଣୀ କାଠି ଠାକୁରାଣୀ, ନଈରୀ ଗ୍ରାମର ଆରାଧ୍ୟ ଦେବତା ଶ୍ରୀ ଶ୍ରୀ ହରିହର ଦେବ, ବାଲିଆ ଗ୍ରାମର ଶ୍ରୀ ଶ୍ରୀ ବାଲଙ୍କେଶ୍ବର ଦେବ, ଇଚ୍ଛାପୁର ଗ୍ରାମର ଦେବାଦେବୀ ଯଥା- ମା ରାମ ଚଣ୍ଡୀ ଦେବୀ, ଶ୍ରୀ ଜଗନ୍ନାଥ ଦେବ, ଶ୍ରୀ ଯଜ୍ଞ ନାରାୟଣ ଦେବ, ଶ୍ରୀ ଗାଦିଶ୍ୱର ଦେବ, ଶ୍ରୀ ତ୍ରିନାଥ ଦେବ ଏବଂ ମା ତାରିଣୀ ମଧ୍ୟ ଆଗମନ କରିଛନ୍ତି। ସୋମବାର ଠାରୁ ବୁଧବାର ତିନି ଦିନ ଧରି ସନ୍ଧ୍ୟା ୦୬:୩୦ ରୁ ଏକ ଲକ୍ଷ ଆଠ ପ୍ରଦୀପ ପ୍ରଜ୍ଜ୍ୱଳନ କରାଯିବ। ତତ୍ ସହିତ ପ୍ରତ୍ୟେକ ଦିନ ମଙ୍ଗଳ ଆଳତୀ, ସୂର୍ଯ୍ୟପୂଜା, ଚଣ୍ଡୀ, ବଗଳା, ଶୀତଳା, ପଞ୍ଚାକ୍ଷରୀ ଜପ, ସିଦ୍ଧିବିନାୟକ, ଘୃତ ଆହୁତି,୧୦୦୮ ବେଲପତ୍ର ଅର୍ପଣ, ନାମ ସଙ୍କୀର୍ତ୍ତନ, ପ୍ରବଚନ, ଆରତୀ ଓ ପୁଷ୍ପାଞ୍ଜଳି ଏବଂ ପ୍ରସାଦ ସେବନ କାର୍ଯ୍ୟକ୍ରମ ଚାଲୁ ରହିବ।
ମଙ୍ଗଳବାର ଦିନ ଓଁ ଶ୍ରୀ ଶ୍ରୀ ବାବା ପତାଳେଶ୍ୱର ବାଳିକା ରାମନାଟ୍ୟ ସଂସଦ, ବଧିସାହି, ନୟାଗଡ଼ ଦ୍ଵାରା ପୌରାଣିକ ନାଟକ ସଂଗଠିତ ହେବ। ତତ୍ ସହିତ ବୁଧ ଓ ଗୁରୁବାର ଦିନ ଜନସାଧରଣଙ୍କ ନିମନ୍ତେ ଯାତ୍ରା ଦରବାର ଦ୍ଵାରା ସାମାଜିକ ଏବଂ ଶିକ୍ଷାଭିତ୍ତିକ ନାଟକ କାର୍ଯ୍ୟକ୍ରମ ମଧ୍ୟ ବ୍ୟବସ୍ଥା କରାଯାଇଅଛି ଏବଂ ପୂର୍ଣ୍ଣାହୁତି କାର୍ଯ୍ୟକ୍ରମ ସମ୍ପାଦିତ ହେବ।
ପ୍ରକାଶ ଥାଉକି ଆସନ୍ତାକାଲି ସୋମବାର ଦିନ ଶ୍ରୀ ଶ୍ରୀ ବାଙ୍କନିଧି ଦେବ ସ୍ବାସ୍ଥ୍ୟ ଶିବିର ପ୍ରତିବର୍ଷ ଭଳି ଏବର୍ଷ ମଧ୍ୟ ଆୟୋଜିତ ହେବ।
ଉକ୍ତ ଶିବିରରେ କର ଭିଜନ ଚକ୍ଷୁ ଚିକିତ୍ସାଳୟ ଭୁବନେଶ୍ବର ଏବଂ ଡ: ମୋହନସ୍, ବାମିଖାଲ, ଭୁବନେଶ୍ୱର ର ଅଭିଜ୍ଞ ଡାକ୍ତର ମାନଙ୍କ ଦ୍ଵାରା ଚକ୍ଷୁ ପରୀକ୍ଷା, ଡାଇ ବେଟିସ୍, ରକ୍ତଚାପ ଏବଂ ଅନ୍ୟାନ୍ୟ ରୋଗର ଚିକିତ୍ସା ସହିତ ଔଷଧ ଓ ଚଷମା ମାଗଣାରେ ପ୍ରଦାନ କରାଯିବ। ଯେଉଁ ମାନଙ୍କର ଅସ୍ତ୍ରୋପଚାର ଆବଶ୍ୟକ ସେମାନଙ୍କୁ କର ଭିଜନ ଚକ୍ଷୁ ଚିକିତ୍ସାଳୟ, ଭୁବନେଶ୍ବର ଦ୍ୱାରା ମାଗଣା ଚିକିତ୍ସା ଯୋଗଇଦେବା ପାଇଁ ବ୍ୟବସ୍ଥା କରାଯାଇଛି। ଇଚ୍ଛାପୁର ଗ୍ରାମର ସମାଜ ସେବୀ ସୀମାଞ୍ଚଳ ସ୍ୱାଇଁ, ରାମଚନ୍ଦ୍ର ଖୁଣ୍ଟିଆ, ଅକ୍ରୁର ପ୍ରଧାନ, ରତ୍ନାକର ସ୍ୱାଇଁ, ସାଗର ଶେଖର ଭୋଳ, ଲିଟୁ ସ୍ୱାଇଁ, କୁନାଲ ସ୍ଵାଇଁ ଏବଂ ଗ୍ରାମବାସୀବୃନ୍ଦଙ୍କ ପୂର୍ଣ୍ଣ ସହଯୋଗ ଦ୍ଵାରା ଉକ୍ତ କାର୍ଯ୍ୟ ସମ୍ପାଦିତ ହେବ।
