ରମେଶ ମହାନ୍ତି
ଜଗତସିଂହପୁର: ଜଗତସିଂହପୁର ଜିଲ୍ଲା ଆଇନସେବା ପ୍ରାଧିକରଣ ପକ୍ଷରୁ ମଣ୍ଡାସାହି ପଞ୍ଚାୟତ ଅଫିସରେ ଆଇନ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଜିଲ୍ଲା ଆଇନସେବା ପ୍ରାଧିକରଣର ସଚିବ କମଳାକାନ୍ତ ରାଉତଙ୍କ ଅଧ୍ୟକ୍ଷତାରେ ପରିଚାଳିତ କାର୍ଯ୍ୟକ୍ରମରେ ଜଗତସିଂହପୁର ବିଡିଓ ସାଗର କୁମାର ନନ୍ଦ, ସରପଞ୍ଚ ଚିତ୍ତରଞ୍ଜନ ରାଉଳ, ସମିତି ସଭ୍ୟ ବିଶ୍ବନାଥ ବାରିକ୍, ଓ୍ବାର୍ଡ ମେମ୍ବର ସଞ୍ଜୟ ବାରିକ୍, ପାରାଲିଗାଲ୍ ସ୍ବେଚ୍ଛାସେବୀ କ୍ଷୀରୋଦ କୁମାର ଦାଶ, ମନୋଜ ସ୍ବାଇଁ, ଶୁଭଲକ୍ଷ୍ମୀ ନାୟକ, ଅବନୀକାନ୍ତ ମହାରଣା, ଜଗତସିଂହପୁର ଥାନା ଅଧିକାରୀ ଏବଂ ଅନ୍ୟାନ୍ୟ ଭଦ୍ରବ୍ୟକ୍ତି ଯୋଗଦେଇଥିଲେ।
ଶିବିରରେ ଅତିଥିମାନେ ସାଇବର ଅପରାଧ ଉପରେ ଥିବା ଆଇନ ଆଦି ବିଷୟରେ ଆଲୋଚନା କରି ଉପସ୍ଥିତ ଜନସାଧାରଣଙ୍କୁ ସଚେତନ କରାଇଥିଲେ। ସଭାରେ ପ୍ରାଧିକରଣର ସଚିବ ଶ୍ରୀ ରାଉତ ଇଣ୍ଟେଲିକ୍ଚୁଆଲ୍ ପ୍ରପଟି ଯଥା ପ୍ୟାଣ୍ଟେଟ୍, ଟ୍ରେଡ୍ ମାର୍କ, କପିରାଇଟ୍ ଇତ୍ୟାଦି ବିଷୟରେ ବୁଝାଇବା ସହିତ ଅନ୍ଲାଇନ୍ ପେମେଣ୍ଟ, ମୋବାଇଲ୍ ବ୍ୟାକିଂ, ସାମାଜିକ ଗଣମାଧ୍ୟମର ସୁରକ୍ଷିତ ବ୍ୟବହାର ଆଦି ବିଷୟରେ ଆଲୋକପାତ କରିଥିଲେ। ତତ୍ସହିତ ପ୍ରାଧିକରଣର ସଚିବ ଶ୍ରୀ ରାଉତ ଲୋକମାନଙ୍କ ଦୈନନ୍ଦୀନ ଜୀବନରେ କାମକୁ ଆସୁଥିବା ଆଇନ ଆଦି ବିଷୟରେ ଆଲୋଚନା କରିବା ପୂର୍ବକ, ଆଇନସେବା ପ୍ରାଧିକରଣର ଦାୟିତ୍ବ, ମହିଳା ଓ ବୟସ୍କଙ୍କ ପାଇଁ ଉଦ୍ଦିଷ୍ଟ ଥିବା ଆଇନ, କିଶୋର ନ୍ୟାୟ ଆଇନ ନିୟମ, ବାଧ୍ୟତାମୂଳକ ଶିକ୍ଷାଗତ ଅଧିକାର ନିୟମ, କନ୍ୟା ସନ୍ତାନର ମହତ୍ତ୍ବ, ପ୍ରାକ୍ ଗର୍ଭଧାରଣ ଓ ପ୍ରାକ୍ ପ୍ରସୂତୀ ନିଦାନ ଅଧିନିୟମ ଓ ପାରିବାରିକ ହିଂସା ନିରୋଧ ଆଇନ ଆଦି ବିଷୟରେ ଆଲୋଚନା କରାଯାଇଥିଲା। ସଭାରେ ଆଖପାଖ ଅଞ୍ଚଳର ଦୁଇ ଶହରୁ ଉର୍ଦ୍ଧ୍ବ ପୁରୁଷ ଓ ମହିଳାମାନେ ଯୋଗଦାନ କରିଥିଲେ।
