ରଞ୍ଜିତ ପଣ୍ଡା
କୁଜଙ୍ଗ: ଏରସମା ବ୍ଳକ ଅନ୍ତର୍ଗତ ଢିଙ୍କିଆ ପଞ୍ଚାୟତରେ ଆଜି ସ୍ଥାନୀୟ ଲୋକମାନଙ୍କ ପକ୍ଷରୁ ପଲ୍ଲୀସଭା ଅନୁଷ୍ଠିତ ହୋଇ ଯାଇଛି। ୧୨ ନମ୍ବର ୱାର୍ଡ଼ସଭ୍ୟଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଏହି ସଭାରେ ଜିନ୍ଦଲ ପ୍ରକଳ୍ପ ବିରୋଧୀ ନିଷ୍ପତ୍ତି ଗୃହୀତ ହୋଇଛି। ଜଙ୍ଗଲ ଅଧିକାର ନିୟମ ଆଧାରରେ ଜଙ୍ଗଲ ଉପରେ କେବଳ ଏହା ଉପରେ ନିର୍ଭର କରୁଥିବା ଜନସାଧାରଣ ମାନଙ୍କର ଅଧିକାର ରହିବା ଉଚିତ୍। ଶହଶହ ବର୍ଷ ଧରି ପୁରୁଷାନୁକ୍ରମେ ସ୍ଥାନୀୟ ଢିଙ୍କିଆବାସୀ ଜଙ୍ଗଲ ଉପରେ ନିର୍ଭର କରି ଜିବୀକା ନିର୍ବାହ କରିଆସୁଛନ୍ତି। ଜଙ୍ଗଲ ଜମିଉପରେ ବିଭିନ୍ନ ଅର୍ଥକାରୀ ଫସଲ ଚାଷକରି ସେମାନେ ପ୍ରତିପୋଷିତ ହୋଇ ଆସୁଛନ୍ତି। ବିଭିନ୍ନ ଶିଳ୍ପ ପ୍ରତିଷ୍ଠାନ ତୁରନ୍ତ ଅନୁବ୍ରବେଶ ବନ୍ଦ କରନ୍ତୁ ବୋଲି ଜନସାଧାରଣ ମାନେ ଦାବି କରିଥିଲେ। ଅନ୍ୟପକ୍ଷରେ ଜଙ୍ଗଲ ଅଧିକାର ଆଇନବଳରେ ପ୍ରଥମେ ଜଙ୍ଗଲ ଉପରେ ସ୍ଥାନୀୟ ଲୋକମାନଙ୍କର ଅଧିକାର ରହିଛି। ତେଣୁ ଏଠାରେ ଶିଳ୍ପ ପ୍ରତିଷ୍ଠା କରାଗଲାବେଳେ ସେମାନଙ୍କର ମତାମତକୁ ଗୁରୁତ୍ୱ ପ୍ରଦାନ କରାଯାଇ ନଥିବା ଅଭିଯୋଗ କରିଥିଲେ। ଜିନ୍ଦଲ ପ୍ରକଳ୍ପ ପାଇଁ ଜନଶୁଣାଣୀ ଶିବିର ମଧ୍ୟ କରାଯାଇ ନାହିଁ। ତେଣୁ ସର୍ବ ସମ୍ମତିକ୍ରମେ ପଲ୍ଲୀସଭାରେ ଜିନ୍ଦଲ ପ୍ରକଳ୍ପକୁ ବିରୋଧ କରାଯିବ ବୋଲି ମତପ୍ରକାଶ ପାଇଥିଲା। ଆଜି ପଲ୍ଲୀସଭାର ଫଳାଫଳକୁ ସମସ୍ତ ଜନପ୍ରତିନିଧି, ଜିଲ୍ଲାପାଳ, ଜିଲ୍ଲା ଆରକ୍ଷୀ ଅଧୀକ୍ଷକ,ରାଜ୍ୟ ଓ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରଣାଳୟ, ମୁଖ୍ୟମନ୍ତ୍ରୀ, ପ୍ରଧାନମନ୍ତ୍ରୀ, ମାନ୍ୟବର ରାଷ୍ଟ୍ରପତି ପ୍ରମୁଖଙ୍କୁ ଅବଗତ କରାଯାଇଥିବା ଜଣାପଡ଼ିଛି। ଆଜିର ପଲ୍ଲୀସଭାପରେ ପ୍ରସ୍ଥାବିତ ଅଂଚଳରେ ଜିନ୍ଦଲ ବିରୋଧୀ ସ୍ୱର ତୀବ୍ର ହୋଇଥିବା ଆଲୋଚନା ହେଉଛି।
