ରଞ୍ଜିତ ପଣ୍ଡା
କୁଜଙ୍ଗ: କୁଜଙ୍ଗବ୍ଳକ ଅନ୍ତର୍ଗତ କାଳିଆପଟଠାରେ ଗତକାଲି ଦ୍ୱିତୀୟ ବାର୍ଷିକ ମୁକ୍ତ ମଂଚ ନାଟକ ପ୍ରତିଯୋଗିତା ଉଦଘାଟିତ ହୋଇଯାଇଛି। ଆୟୋଜକ ହାପିକ୍ଳବର ସଭାପତି ବାବସ ରାଉତଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଏହି ଉଦ୍ଘାଟନୀ ଉତ୍ସବରେ ମୁଖ୍ୟ ଅତିଥିଭାବେ କୁଜଙ୍ଗ ପଂଚାୟତ ସମିତି ଅଧ୍ୟକ୍ଷ ସ୍ମୃତିରଞ୍ଜନ ବେହେରା ବକ୍ତବ୍ୟ ପ୍ରଦାନ କରି କଳିଆପାଟ ଅଂଚଳ ସ୍ୱାଧୀନତାର ପୂର୍ବବର୍ତ୍ତୀ ସମୟରେ ମହାତ୍ମାଗାନ୍ଧୀଙ୍କ ନେତୃତ୍ୱରେ ହେଉଥିବା ଲବଣାସତ୍ୟାଗ୍ରହ ଆନ୍ଦୋଳନରେ ଅଂଚଳର ନେତୃତ୍ୱ ଗ୍ରହଣ କରିଥିବା ପ୍ରକାଶ କରିଥିଲେ। ମୁଖ୍ୟବକ୍ତା ଭାବେ ରାଜସ୍ୱ ବିଭାଗର ଅଧିକାରୀ ତ୍ରିଭୁବନ ଜୟସିଂହ ବକ୍ତବ୍ୟ ପ୍ରଦାନ କରି ସାହିତ୍ୟ, ସଂସ୍କୃତି, ଭାଇଚାର, ଏକତା ତଥା ପାରସ୍ପରିକ ସହଯୋଗର ପ୍ରାଣକେନ୍ଦ୍ର ଗାଁ ହୋଇଥିବାରୁ ସମସ୍ତେ ପୁଣି ଗାଁକୁ ଫେରିଯିବାକୁ ଆହ୍ୱାନ ଜଣାଇଥିଲେ। ସମ୍ପାଦକ ସବୀର କୁମାର ସାମଲ ବିବରଣୀ ପାଠ କରିଥିଲେ।
ଅନ୍ୟମାନଙ୍କ ମଧ୍ୟରେ ସ୍ଥାନୀୟ ସରପଂଚ ନନ୍ଦିନୀ ପଣ୍ଡା, ସମିତିସଭ୍ୟା ପୁଷ୍ପଲତା ବେହେରା, ଜିଲ୍ଲାପରିଷଦ ସଭ୍ୟା ସୁଶ୍ରୀ ପ୍ରିୟଦର୍ଶିନୀ, କଳ୍ପନା ସୂତାର, କ୍ଳବର ଉପଦେଷ୍ଠା ଦିପ୍ତୀରଞ୍ଜନ ବେହେରା, ଡ଼ାକ୍ତର ପ୍ରସନ୍ନ କୁମାର ସାମଲ, ମଥୁରାନନ୍ଦ ଦାସ, ହରେକୃଷ୍ଣ ସାମଲ, ସବନୀ କୁମାର ପରିଡ଼ା, କ୍ଳବର ସହସମ୍ପାଦକ ପ୍ରଦୀପ କୁମାର ରାଉତ ପ୍ରମୁଖ ବକ୍ତବ୍ୟ ପ୍ରଦାନ କରିଥିଲେ। ଏହି ଅବସରରେ ମଂଚାସୀନ ଅତିଥିମାନେ କ୍ଳବର ମୁଖ୍ୟପତ୍ର ‘ ମୋ ଠିକଣା’ ଉନ୍ମୋଚିତ କରାଯାଇଥିଲା। ପରେ ମା ନାରାୟଣୀ ଡ଼୍ରାମାଟିକ କ୍ଳବ ରାଢଙ୍ଗ ଭୁବନେଶ୍ୱର ପକ୍ଷରୁ ନାଟକ ‘ସିନ୍ଦୁର ସାଜିଲା କଳଙ୍କ ଟୀକା’ ମଂଚସ୍ଥ କରାଯାଇଥିଲା।
ଗତ ୨ ତାରିଖଠାରୁ ଆରମ୍ଭ ହୋଇଥିବା ଏହି ପ୍ରତିଯୋଗିତା ଆସନ୍ତା ୭ ତାରିଖ ପର୍ଯ୍ୟନ୍ତ ଚାଲିବ। ୮ ତାରିଖରେ ପୁରସ୍କାର ବିତରଣୀ ଉତ୍ସବ ଅନୁଷ୍ଠିତ ହେବ ବୋଲି ଅୟୋଜକଙ୍କ ପକ୍ଷରୁ ପ୍ରକାଶ କରାଯାଇଛି। ସେହିପରି ଭାବେ ପରବର୍ତ୍ତୀ ସମୟରେ ଗୋବିନ୍ଦପୁର ପକ୍ଷରୁ ‘ତୋ ନାଁରେ ମୋ ନାଁକୁ ଦେଇଛି ଯୋଡ଼ି’,ରାହାମା ପକ୍ଷରୁ ‘କାହାଣୀ କାନ୍ଦୁଛି ଆଖି ଲୁଚାଇ’ ନେହେରୁ ବଙ୍ଗଳା ପକ୍ଷରୁ ‘ମିଛୁଆ ରାଧୁଆ ଗପ ସରିଲା’, ଯାଜପୁର ଟାଉନ ପକ୍ଷରୁ ‘କନିଆ ସାଜିଛି କଣ୍ଢେଇ ରାଣୀ’, ନିଆଳୀ ପକ୍ଷରୁ ‘ ଏଠି ରାତି ସରେନା’ ନାଟକ ମଞ୍ଚସ୍ଥ କରାଯିବ ବୋଲି ଜଣାପଡ଼ିଛି।
କାର୍ଯ୍ୟକ୍ରମକୁ ହାପି କ୍ଳବ ପକ୍ଷରୁ ଅଧ୍ୟାପକ ଅଜୟ ରାଉତ, ପ୍ରଭଞ୍ଜନ ରାଉତ,ନୀରଞ୍ଜନ ସାମଲ, ମନୋଜ ବେହେରା, ବିଶ୍ୱମ୍ବର ତରାଇ, ଦେବବ୍ରତ ପରିଡ଼ା, ସନ୍ତୋଷ ପରିଡ଼ା, ଶତୃଘ୍ନ ଦଳାଇ, ସତ୍ୟବ୍ରତ ମାଝୀ, ନିମାଇଁ ପଣ୍ଡା, ତପନ ଦଳାଇ, ଶିବ ସାମଲ ପ୍ରମୁଖ ପରିଚାଳନା କରୁଥିବା ଜଣାପଡ଼ିଛି।