ରମେଶ ମହାନ୍ତି
ଜଗତସିଂହପୁର : ଝଙ୍କଡର ଅଧିଷ୍ଠାତ୍ରୀ ଦେବୀ ସାରଳା ମନ୍ଦିରର ଭୋଗ ଦୋକାନ, ଦୀପ ଦୋକାନ, ଗାଡି଼ ପାର୍କିଙ୍ଗ, ଯୋତାଷ୍ଟାଣ୍ଡ ଓ ଶୌଚାଳୟର ବାର୍ଷିକ ନିଲାମ ପାଇଁ ଗତକାଲି ଟେଣ୍ଡର ଆହ୍ବାନ କରାଯାଇଥିଲା। ସାରଳା ମନ୍ଦିର ପ୍ରଶାସନର କାର୍ଯ୍ୟନିର୍ବାହୀ ଅଧିକାରୀ ସୌର୍ଯ୍ୟ ରଞ୍ଜନ ପରିଜା, ମନ୍ଦିର ପୋଲିସ ଫାଣ୍ଡି ଅଧିକାରୀ, କନକପୁର ପୋଲିସ ଫାଣ୍ଡି ଅଧିକାରୀଙ୍କ ଉପସ୍ଥିତିରେ ଟେଣ୍ଡର ଖୋଲାଯାଇଥିଲା। ଦୀପଦୋକାନ ପାଇଁ ୩ଟି ଟେଣ୍ଡର ପଡିଥିବା ବେଳେ ସର୍ବୋଚ୍ଚ ଟେଣ୍ଡର ଦାତା ତ୍ରୀଲୋଚନ ରାଉଳଙ୍କୁ ୭୫ଲକ୍ଷ ୮୫ ହଜାର ୫୫୦ଟଙ୍କାରେ ନିଲାମ ଦିଆଯାଇଥିଲା।
ଭୋଗ ଦୋକାନ ପାଇଁ ୮୦ଲକ୍ଷ ୫୩ ହଜାର ୩୦୩ ଟଙ୍କାରେ ଚନ୍ଦନ ପଣ୍ଡା ଏକମାତ୍ର ବ୍ୟକ୍ତି ଭାବରେ ଟେଣ୍ଡର ପକାଇଥିବାରୁ ଏହି ଟେଣ୍ଡର କାହାରିକୁ ଦିଆଯାଇନାହିଁ। ଏହି ଟେଣ୍ଡରଟିକୁ ବିଚାର ପାଇଁ ଜଗତସିଂହପୁର ଜିଲ୍ଲାପାଳ ତଥା ଶାରଳା ମନ୍ଦିର ଟ୍ରଷ୍ଟି ସଂଗ୍ରାମ କେଶରୀ ମହାପାତ୍ରଙ୍କ ନିକଟକୁ ପଠାଇ ଦିଆଯାଇଛି। ଶୌଚାଳୟ ନିମନ୍ତେ ମଧ୍ୟ ସମାନ ଭାବରେ ଗୋଟିଏ ଟେଣ୍ଡର ପଡିଥିବାରୁ ନିଲାମ ପ୍ରକ୍ରିୟା ଅସମାହିତ ରହିଛି । ଅପରପକ୍ଷରେ ଯୋତାଷ୍ଟାଣ୍ଡ ଓ ଗାଡି଼ପାର୍କିଂ ନିମନ୍ତେ କେହିବି ଟେଣ୍ଡର ପକାଇ ନାହାନ୍ତି। ଗାଡି଼ପାର୍କିଂ ନିଲାମ କରାଗଲେ ନିଲାମଧାରୀମାନେ ଚୁକ୍ତି ଖିଲାପକରି ଯାତ୍ରୀଙ୍କ ଠାରୁ ମନଇଛା ଅର୍ଥ ଆଦାୟ କରାଯାଉଥିବା ନେଇ ଅଭିଯୋଗ ଶୁଣିବାକୁ ମିଳୁଛି। ଗାଡିପାର୍କିଂକୁ ମନ୍ଦିର ପ୍ରଶାସନ ନିଜ ଅଧୀନରେ ରଖିବାକୁ ସ୍ଥାନୀୟ ଅଧିବାସୀଙ୍କ ପକ୍ଷରୁ ଦାବି କରାଯାଇଛି।