ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ରାଜ୍ୟ ସରକାରଙ୍କ ତରଫରୁ ଗଂଜାମ ଜିଲ୍ଲା ପ୍ରଶାସନ କରୋନା ସଂକ୍ରମଣକୁ ନେଇ ଭୂତାଣୁର ମୁକାବିଲା ଓ ନିରାକରଣକୁ ଗୁରୁତ୍ୱର ସହ ଗ୍ରହଣ କରିଥିବାବେଳେ ସମ୍ଭାବ୍ୟ ସ୍ୱାସ୍ଥ୍ୟ ସମସ୍ୟାକୁ ଦୃଷ୍ଟିରେ ରଖି ୱାନ ଷ୍ଟପ୍ ସେଣ୍ଟର (ସଖୀ), ବ୍ରହ୍ମପୁର ତରଫରୁ ଏକ ସତର୍କତାମୂଳକ ସଚେତନତା କାର୍ଯ୍ୟକ୍ରମ କେନ୍ଦ୍ର ପ୍ରଶାସିକା ମହେଶ୍ୱତା ପାଢ଼ୀଙ୍କ ନେତୃତ୍ୱରେ ମହାରାଜା କୃଷ୍ଣଚନ୍ଦ୍ର ଗଜପତି ଭେଷଜ ମହାବିଦ୍ୟାଳୟ ନିକଟରେ ଅନୁଷ୍ଠିତ ହୋଇଥିଲା ।
ଏହି ସଚେତନତା କାର୍ଯ୍ୟକ୍ରମକୁ ପାଞ୍ଚଜଣିଆ ବିଶିଷ୍ଟ ଦସଗୋଟି ଦଳରେବ ବିଭକ୍ତ କରାଯାଇଥିଲା ଓ ପ୍ରତିଟି ଦଳ ମହାବିଦ୍ୟାଳୟର ବିଭିନ୍ନ ସ୍ଥାନରେ ସଚେତନତା ହିଁ ପ୍ରତିକାର ସ୍ୱରରେ ବ୍ୟକ୍ତିଗତ ଓ ସାମାଜିକ ସ୍ତରରେ ଜନଜାଗରଣ ଓ ଦାୟିତ୍ୱବୋଧ ସହ ଭୂତାଣୁ ଯେଭଳି ନ ବ୍ୟାପିବ ସେଥିନିମନ୍ତେ ପ୍ରତ୍ୟେକ ଜନମାନସରେ ସଚେତନତା ସୃଷ୍ଟି କରିବା ସହ ନିଜେ ସତର୍କତା ଅବଲମ୍ବନ କଲେ କରୋନା ଭୂତାଣୁର ଭୟ ରହିବ ନାହିଁ ସଂଦେଶ ପ୍ରଦାନ କରିଥିଲେ । କରୋନା ଭୂତାଣୁର ପ୍ରତିରୋଧ ଓ ନିୟନ୍ତ୍ରଣ କରିବା ନିମନ୍ତେ ବ୍ରହ୍ମପୁର ସହର ତତ୍ ସଂଗେ ସଂଗେ ଗ୍ରାମାଞ୍ଚଳରେ ମଧ୍ୟ ବ୍ୟାପକ ସଚେତନତା କରାଯିବା ସହ ଜିଲ୍ଲାପାଳଙ୍କ ତରଫରୁ ଦିଆଯାଇଥିବା ନିର୍ଦ୍ଦେଶାବାଳୀକୁ ପାଳନ କରିବା ନିମନ୍ତେ ସାଧାରଣ ଲୋକଙ୍କୁ ସୂଚନା ପ୍ରଦାନର ନିଷ୍ପତ୍ତି ନିଆଯାଇଛି ।
ଉକ୍ତ କାର୍ଯ୍ୟକ୍ରମକୁ ସହ ନିର୍ଦ୍ଦେଶକ ପ୍ରଭୁପ୍ରସାଦ ପାତ୍ର, ଆଇଏସ୍ଆର୍ଡ଼ି ବ୍ରହ୍ମପୁର, ସାକ୍ଷୀ କେନ୍ଦ୍ରର ସ୍ନେହମୟୀ ପାଢ଼ୀ, ସୌମ୍ୟାରାଣୀ, ଲିପିକା, ଆସ୍କିଲା, ତମ୍ବାଳି, ପାର୍ବତୀ ଓ ମଧୁସ୍ମିତା, ଚାଇଲ୍ଡ ଲାଇନ୍ କେନ୍ଦ୍ରରୁ ପ୍ରଣତୀ, ପ୍ରିୟଙ୍କା, ପ୍ରଭାତ ଓ ବଳରାମ, ମହିଳା ସଂଗଠନ ତରଫରୁ ସବିତା ସାହୁକାର, ରଂଜନା ମିଶ୍ର, ଜ୍ୟୋତ୍ସ୍ନା ଦାସ ଓ ରାଣୀ ପ୍ରମୁଖ ଯୋଗଦାନ କରିିଥିଲେ । ଏଥିରେ ସଚେତନତା ସୃଷ୍ଟି କରିବା ସହ ମୁହଁରେ ମୁଖା ପିନ୍ଧିବା, କାଶିଲେ ରୁମାଲ କିମ୍ବା ଟିଶୁ ପେପର ବ୍ୟବହାର କରିବା ଓ ବାରମ୍ବାର ହାତ ଧୋଇବାର ବାର୍ତ୍ତା ଦେଇଥିଲେ ।
