ସୀତାରାମ ଅଗ୍ରୱାଲ
ବାଣପୁର: ବର୍ତ୍ତମାନ ଜଙ୍ଗଲରୁ କାଠ ଚୋରି କରିବା ନିମନ୍ତେ ଦୁର୍ବୃତ୍ତ ମାନେ ନୂଆ ତରିକା ଆପଣେଇଛନ୍ତି। ଜଙ୍ଗଲର ଗୋଟିଏ ପାର୍ଶ୍ଵରୁ ନିଆଁ ଲଗାଇ ବନକର୍ମଚାରିଙ୍କୁ ବ୍ୟସ୍ତ ରଖୁଥିବା ବେଳେ ଅପରପାର୍ଶ୍ୱରୁ କାଠ ଚୋରିକରିବା ଭଳି ଏକ ସାଂଘାତିକ ଅଭିଯୋଗ ହେଉଛି। ତେବେ ଏପରି ଏକ ଯୋଜନା କରୁଥିବାବେଳେ ବନ ବିଭାଗ ହାତରେ ଚୋରା ଶାଗୁଆନ କାଠ ସହ ୩ ଜଣ କାଠ ମାଫିଆ ଗିରଫ ହୋଇଛନ୍ତି।
ସୂଚନା ମୁତାବକ ଖୋର୍ଦ୍ଧା ଜିଲ୍ଲା ବାଲୁଗାଁ ବନଖଣ୍ଡ ଅଧିନସ୍ଥ ବାଣପୁର ବରବରା ସେକ୍ସନ ଅନ୍ତର୍ଗତ କଟୁଆଳ ସରଂକ୍ଷିତ ଜଙ୍ଗଲରେ ଗତକାଲି ରାତିରେ ତିନି ଜଣ ଦୁର୍ବୃତ୍ତ ଗୋଟାଏ ପାର୍ଶ୍ୱରେ ନିଆଁ ଲଗାଇ ଶାଗୁଆନ କାଠ କାଟିବାରେ ବ୍ୟସ୍ତ ଥିଲେ। କିନ୍ତୁ କିଛି ଦିନ ହେଲା ସମ୍ପୃକ୍ତ ଜଙ୍ଗଲରେ ମନୁଷ୍ୟକୃତ ନିଆଁ ଲାଗୁଥିବାର ଅଭିଯୋଗ ହୋଇଆସୁଥିଲା। ଏନେଇ ବାଲୁଗାଁ ବନାଞ୍ଚଳ ଅଧିକାରୀ ପ୍ରତାପ ମହାନ୍ତିଙ୍କ ନେତୃତ୍ୱରେ ଦୁଇ ସେକ୍ସନ ଫୋର୍ସ ସମ୍ପୃକ୍ତ ଜଙ୍ଗଲରେ ପୂର୍ବରୁ ପଇଁତରା ମାରୁଥିଲେ। ସ୍ଥାନୀୟ ଗ୍ରାମବାସୀଙ୍କଠୁ କିଛି ଦୁର୍ବୁତ୍ତ କାଠ କାଟୁଥିବା ଖବର ପାଇ ଘଟଣାସ୍ଥଳରେ ବନବିଭାଗ ପହଁଚିଥିଲା। ଏବଂ ସେଠାରୁ ୩ ଜଣ କାଠ ମାଫିଆଙ୍କୁ ଗିରଫ କରିଥିଲା। ଗିରଫ ଅଭିଯୁକ୍ତମାନେ ହେଲେ ପ୍ରଦୀପ ଶବର, ସନିଆ ଶବର ଏବଂ ଡମ୍ବୁରୁ ଶବର।
ସେମାନଙ୍କ ନିକଟରୁ ୬ ଖଣ୍ଡ ଶାଗୁଆନ କାଠ ଗଣ୍ଡି ସହ ୨ ଗୋଟି ସାଇକେଲ ଜବତ କରିଛି ବନବିଭାଗ। ଗିରଫ ଅଭିଯୁକ୍ତଙ୍କ ବିରୁଦ୍ଧରେ ଓଡିଶା ଜଙ୍ଗଲ ଅଧିନିୟମ ଆଇନ ଅନୁଯାୟୀ କେସ ନମ୍ବର ଓ.ଆର-୧(ଖ)/୨୦୨୧-୨୨ ରେ ମାମଲା ରୁଜୁ କରାଯାଇଛି। ଏବଂ ଆଜି ସମସ୍ତ ଅଭିଯୁକ୍ତମାନଙ୍କୁ ବାଣପୁର କୋର୍ଟ ଚାଲାଣ କରାଯାଇଥିବାର ବାଲୁଗାଁ ବନାଞ୍ଚଳ ଅଧିକାରୀ ଶ୍ରୀ ମହାନ୍ତି ସୂଚନା ଦେଇଛନ୍ତି।
ଉକ୍ତ ଚଢାଉରେ ବନପାଳ ଦୁଃଶାସନ ନାୟକ, ବନରକ୍ଷୀ ବିଶ୍ୱଜିତ ପ୍ରଧାନ, ଜ୍ୟୋତିରଞ୍ଜନ ସାହୁ, ସୌମ୍ୟରଂଜନ ବେହେରା, ସନ୍ତୋଷ ପଟ୍ଟନାୟକ ଏବଂ ଜଗୁଆଳି ଉପେନ୍ଦ୍ର ଜାନି, କ୍ଷିତୀଶ ଦାସ ଆଦି ସାମିଲ ଥିଲେ।