ଭୁବନେଶ୍ବର: ଦୀର୍ଘଦିନର ଚାଷୀ ଆନ୍ଦୋଳନର ଐତିହାସିକ ବିଜୟ ପରେ ଏହି ବିଜୟ ଉତ୍ସବକୁ ଆନୁଷ୍ଠାନିକ ଭାବେ ପାଳନ କରିବା ପାଇଁ ସଂଯୁକ୍ତ କିଷାନ ମୋର୍ଚ୍ଚା ଆହ୍ୱନରେ ନବନିର୍ମାଣ କୃଷକ ସଂଗଠନ ଓ ଯୁବଛାତ୍ର ସଂଗଠନର ବିଜୟ ଉତ୍ସବ, ସଭା ସମିତି ଶୋଭାଯାତ୍ରା ପାଳିତ ହୋଇଯାଇଛି। ଅଦିନିଆ ବର୍ଷା ଓ ଜୱାଦ ପ୍ରଭାବରେ ଓଡ଼ିଶା ଚାଷୀ ବ୍ୟାପକ କ୍ଷୟକ୍ଷତିର ସମ୍ମୁଖୀନ ହୋଇଥିବାରୁ ଯଥାଯୋଗ୍ୟ ନିରାଡ଼ମ୍ବର ଭାବରେ ଏହି ଉତ୍ସବକୁ ପାଳନ କରିବା ପାଇଁ ରାଜ୍ୟ ସଂଯୋଜକ ଶେଷଦେବ ନନ୍ଦ ଆହ୍ୱାନ କରିଥିଲେ।
ଆଜି ଖୋର୍ଦ୍ଧା, ନୟାଗଡ଼, କେନ୍ଦ୍ରାପଡ଼ା, ଜଗତସିଂହପୁର ଠାରୁ ଆରମ୍ଭ କରି ବଲାଙ୍ଗୀର ପର୍ଯ୍ୟନ୍ତ ବିଭିନ୍ନ ଅଞ୍ଚଳରେ ଚାଷୀମାନେ ସଭା, ସମିତି କରି ଏହି ଉତ୍ସବକୁ ପାଳନ କରିଛନ୍ତି। ସରକାର ତିନି କଳା କାନୁନ୍ ପ୍ରତ୍ୟାହାର ସହ ଚାଷୀମାନଙ୍କ ନାମରେ ଆନ୍ଦୋଳନ ସମୟରେ ହୋଇଥିବା ମୋକଦ୍ଦମା ପ୍ରତ୍ୟାହାର କରିଥିବାରୁ ଚାଷୀମାନେ ଖୁସିବ୍ୟକ୍ତ କରିଥିଲେ। ଚାଷୀ ଆନ୍ଦୋଳନ ସ୍ୱାଧୀନତା ପରେ ପ୍ରମାଣ କରିଦେଲା ଯେ, ସରକାର ଯେତେ ସଶକ୍ତ ହୁଅନ୍ତୁ, ଗଣମାଧ୍ୟମ ପ୍ରଚାର କରୁ କି ନକରୁ, ଆନ୍ଦୋଳନକାରୀମାନେ ଜିଦ୍ରେ ଅଟଳ ରହିଲେ ଆନ୍ଦୋଳନ ସଫଳ ହୁଏ। ଏହା ପରେ ଏମ୍.ଏସ୍.ପି. ଆଇନରେ ଅନ୍ତର୍ଭୁକ୍ତ କରିବା ପାଇଁ ଯେଉଁ ଦାବି ରହିଛି, ସେ ଦାବିକୁ ସଫଳ କରିବା ପାଇଁ ସଂଯୁକ୍ତ ମୋର୍ଚ୍ଚା ଲଗାତର ସରକାରଙ୍କ ସହ ଆଲୋଚନାରେ ରହିବା ସହ ଏହାର ଅଗ୍ରଗତିକୁ ସମୀକ୍ଷା କରିବ। ସେହିଭଳି ଓଡ଼ିଶାରେ ବ୍ୟାପକ କ୍ଷୟକ୍ଷତିକୁ ସରକାର ଭରଣା ନକଲେ ଆନ୍ଦୋଳନ ବଢିବ ବୋଲି ସେ କହିଛନ୍ତି।
ଆଜି ଭୁବନେଶ୍ୱରରେ ଯୁବଛାତ୍ର ସଂଗଠନ ତରଫରୁ ସଂଗଠନର ରାଜ୍ୟ ସଂଯୋଜକ ମନୱାର ଅଲ୍ଲୀ ଓ ଭୁବନେଶ୍ୱର ସଭାପତି ଅମିତ ଜେନାଙ୍କ ନେତୃତ୍ୱରେ ବିଜେବି ନଗରରୁ ଯୁବଛାତ୍ରମାନେ କାର୍ ଓ ବାଇକ୍ରେ ଏକ ସୁସଜ୍ଜିତ ଶୋଭାଯାତ୍ରାରେ ରାଜମହଲ, ମାଷ୍ଟର କ୍ୟାଣ୍ଟିନ ଛକ ଦେଇ ପରିକ୍ରମା କରିଥିଲେ। ଚାଷୀ ଏକତା ଜିନ୍ଦାବାଦ, ସରକାର ହାରିଲେ, ଚାଷୀ ଜିତିଲେ, ଭାରତ ବର୍ଷରେ ଚାଷୀ ବିରୋଧୀ କାନୁନ ଚଳିବ ନାହିଁ, ଏମ୍.ଏସ୍.ପି.କୁ ଆଇନ ପରିସରକୁ ଆଣିବା ଆମର ଦାବି ସ୍ଲୋଗାନମାନ ଦେଇଥିଲେ।
ଶେଷରେ ମନୱାର ଅଲ୍ଲୀ ଯୁବଛାତ୍ରମାନଙ୍କୁ ବକ୍ତବ୍ୟ ଦେଇ କହିଥିଲେ ଯେ, ଅନ୍ନଦାତାଙ୍କ ପ୍ରତି ଯେଉଁ ସରକାର ବେଇମାନ କରିବ, ତା ବିରୁଦ୍ଧରେ ଯୁବଛାତ୍ରମାନେ ଚାଷୀଙ୍କ ସପକ୍ଷ ନେଇ ରାସ୍ତାରେ ଠିଆ ହେବେ। ଆଜି ବିଜୟ ଉତ୍ସବ ପାଳନ ପରିପ୍ରେକ୍ଷୀରେ ଯୁବଛାତ୍ର ସମାଜ ଏହା ପ୍ରମାଣ କରିଦେଇଛି। ଏହି ଶୋଭାଯାତ୍ରାରେ ଅନ୍ୟମାନଙ୍କ ମଧ୍ୟରେ ସଂଗଠନର କାର୍ଯ୍ୟକାରିଣୀ ସଦସ୍ୟ ମଧୁମିତା ସାମଲ, ସୌମ୍ୟରଞ୍ଜନ ପଣ୍ଡା, ରଞ୍ଜନ ନାୟକ, ରୀତେଶ ଦାସ, ସତ୍ୟପ୍ରକାଶ ଦାସ ପ୍ରମୁଖ ସାମିଲ୍ ଥିଲେ।
