ଭୁବନେଶ୍ବର: ଓଡିଶୀ ନୃତ୍ୟକୁ ୟୁରୋପରେ ପ୍ରଚାର ପ୍ରସାର କରିବା ପାଇଁ ଆରମ୍ଭ ହେଲା ଏକ ଅଭିନବ ପଦକ୍ଷେପ। ଯୁବ ଓଡିଶୀ ନୃତ୍ୟଶିଳ୍ପୀ ତଥା ଜାତିସଂଘର ୱାର୍ଲ୍ଡ ଫୁଡ ପୋଗ୍ରାମ ର ଅଫିସର ବୈଶାଳୀ ମହାନ୍ତି ଏହି ପଦକ୍ଷେପ ଗ୍ରହଣ କରିଛନ୍ତି। ଗ୍ଲୋବାଲ ସେଣ୍ଟର ଫର ପିସ୍ ଆଣ୍ଡ ପରଫରମିଂ ଆର୍ଟ ସଂସ୍ଥା ମାଧ୍ୟମରେ ଏହି ପଦକ୍ଷେପ ଆରମ୍ଭ କରାଯାଇଛି। ଏଥିରେ ପ୍ରତିବର୍ଷ ୟୁରୋପର ବିଭିନ୍ନ ଦେଶରେ ଓଡିଶୀ ନୃତ୍ୟ ଉତ୍ସବ ଆୟୋଜନ କରିବାର ନିଷ୍ପତି ଗ୍ରହଣ କରାଯାଇଛି।
ସେଥିପାଇଁ ଗତ ଚାରି ତାରିଖରେ ସ୍ପେନରେ ଆୟୋଜିତ ହୋଇଥିଲା ଓଡିଶୀ ନୃତ୍ୟ ଉତ୍ସବ। ଏଥିରେ ପ୍ରଖ୍ୟାତ ଓଡିଶୀ ନୃତ୍ୟଶିଳ୍ପୀ ଗୁରୁ ସୁଜାତା ମହାପାତ୍ର ଓଡିଶୀ ନୃତ୍ୟ ପରିବେଷଣ କରିଥିଲେ। ଏଥିସହିତ ଫ୍ରାନ୍ସର ନୃତ୍ୟଶିଳ୍ପୀ କ୍ରାନି ଲିବ୍ଲାନସ, ବାଙ୍ଗାଲାଦେଶର ମ୍ରିତିକା ବରୁଆ ଏବଂ ନିଜେ ବୈଶାଳୀ ମହାନ୍ତି ଓଡିଶୀ ପରିବେଷଣ କରିଥିଲେ। ବିଦେଶୀ ନୃତ୍ୟଶିଳ୍ପୀଙ୍କୁ ଓଡିଶୀ ନୃତ୍ୟ ପ୍ରତି ଆକୃଷ୍ଠ କରିବା ପାଇଁ ଏକ କର୍ମଶାଳାର ମଧ୍ୟ ଆୟୋଜନ କରାଯାଇଥିଲା। ଏହି କାର୍ଯ୍ୟକ୍ରମକୁ ସ୍ପେନରେ ଥିବା ଭାରତୀୟ ଦୂତାବାସ ତଥା ରାଷ୍ଟ୍ରଦୂତ ଦୀନେଶ ପଟ୍ଟନାୟକ ସହଯୋଗ କରିଥିଲେ।
ସେହିପରି ଏହି ସିରିଜ ଉତ୍ସବର ପ୍ରଥମ ପର୍ଯ୍ୟାୟ କାର୍ଯ୍ୟକ୍ରମ ଇଟାଲୀ ରାଜଧାନୀ ରୋମରେ ଆୟୋଜିତ ହୋଇଥିଲା। ଦୁଇଦିନ ଧରି ଚାଲିଥିବା ଏହି ଉତ୍ସବରେ ପ୍ରଖ୍ୟାତ ଓଡିଶୀ ନୃତ୍ୟଶିଳ୍ପୀ ପଦ୍ମଶ୍ରୀ ଇଲିୟାନ ସିତାରିଷ୍ଟ ଯୋଗ ଦେଇଥିଲେ। ସେ ନିଜେ ନୃତ୍ୟ ପରିବେଷଣ କରିବା ସହିତ ଏକ କର୍ମଶାଳାରେ ବିଦେଶୀ ନୃତ୍ୟଶିଳ୍ପୀଙ୍କୁ ଏହି ନୃତ୍ୟଶୈଳୀ ସଂପର୍କରେ ଅବଗତ କରାଇଥିଲେ। ଏହି କାର୍ଯ୍ୟକ୍ରମରେ ଇଟାଲୀର ନୃତ୍ୟଶିଳ୍ପୀ ଗଂଗା ଦେବୀ, ସିଲିଭିୟା ଭୋନା, ବାଙ୍ଗାଲାଦେଶର ମ୍ରିତିକା ବରୁଆ, ଲିପ୍ସା ଶତପଥୀ, ଶିଳ୍ପା ଏବଂ ବୈଶୀଳୀ ମହାନ୍ତି ପ୍ରମୁଖ ଓଡିଶୀ ପରିବେଷଣ କରିଥିଲେ। ରୋମରେ ମଧ୍ୟ ଭାରତୀୟ ଦୂତାବାସ ତରଫରୁ ଏହି ନୃତ୍ୟ ଉତ୍ସବ ପାଇଁ ସହଯୋଗ ପ୍ରଦାନ କରାଯାଇଥିଲା।
ଖୁବ ଶିଘ୍ର ୟୁରୋପର ଅନ୍ୟାନ୍ୟ ଦେଶରେ ମଧ୍ୟ ଏହି ଉତ୍ସବର ଆୟୋଜନ କରାଯିବ ବୋଲି ଏହାର ଆୟୋଜକ ବୈଶାଳୀ ମହାନ୍ତି କହିଛନ୍ତି।
