ଭୁବନେଶ୍ୱର: ଚଳିତ ନଭେମ୍ବର ମାସ ୩୦ରୁ ଆସନ୍ତା ଡିସେମ୍ବର ୪ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ଅନୁଷ୍ଠିତ ହେବ ମେକଇନ୍ ଓଡିଶା କନକ୍ଲେଭ-୨୦୨୨। ଏହି ପରିପ୍ରେକ୍ଷୀରେ ଆଜି ଜନତା ମଇଦାନ ଠାରେ ଭୂମି ପୂଜା ଉତ୍ସବ ଅନୁଷ୍ଠିତ ହୋଇଯାଇଛି। ଶିଳ୍ପ ବିଭାଗର ପ୍ରମୁଖ ଶାସନ ସଚିବ ତଥା ଇଡକୋ ଏବଂ ଇପିକଲର ଅଧ୍ୟକ୍ଷ ଶ୍ରୀ ହେମନ୍ତ କୁମାର ଶର୍ମାଙ୍କ ଉପସ୍ଥିତିରେ ଇଡକୋର ପରିଚାଳନା ନିର୍ଦ୍ଦେଶକ ଶ୍ରୀ ଭୁପିନ୍ଦର ସିଂ ପୁନିଆ ଏହି ଭୂମି ପୂଜନ କାର୍ଯ୍ୟକୁ ସମାହିତ କରିଥିଲେ।
ଏହି ପରିପ୍ରେକ୍ଷୀରେ ପ୍ରମୁଖ ଶାସନ ସଚିବ ଶ୍ରୀ ଶର୍ମା କହିଥିଲେ ଯେ, ୨୦୧୬ରେ ପ୍ରଥମ ଓ ୨୦୧୮ ରେ ଦ୍ୱିତୀୟ ସଂସ୍କରଣ ଆୟୋଜନ ପରେ ଏହା ହେଉଛି ମେକ୍ ଇନ୍ ଓଡ଼ିଶା କନକ୍ଳେଭର ୩ୟ ସଂସ୍କରଣ। ଗତକାଲି ମାନ୍ୟବର ମୁଖ୍ୟମନ୍ତ୍ରୀ ମେକ୍ ଇନ୍ ଓଡିଶା କନକ୍ଲେଭ୍ ଓ୍ୱେବ୍ ସାଇଟ୍ ଏବଂ ମୋବାଇଲ ଆପ୍ ର ଶୁଭାରମ୍ଭ କରିଛନ୍ତି। ଆଜି ଏହି ଉପଲକ୍ଷେ ପାଲିଲିୟନ୍ ନିର୍ମାଣ ପାଇଁ ଭୂମି ପୂଜନ କରାଯାଇଛି। ମେକ୍ ଇନ୍ ଓଡିଶାରେ ଯେଉଁମାନେ ଅଂଶଗ୍ରହଣ କରିବେ, ସେମାନଙ୍କର ପଞ୍ଜୀକରଣ ଆରମ୍ଭ ହୋଇଯାଇଛି।
ଏହି ସଂସ୍କରଣ ପାଇଁ ଜନତା ମଇଦାନରେ ପାଭିଲିୟାନ ପ୍ରସ୍ତୁତି ନିମନ୍ତେ ଆଜି ଶୁଭାରମ୍ଭ ହୋଇଛି। ସମସ୍ତ ପ୍ରସ୍ତୁତି ପାଇଁ ପ୍ରାୟ ୨୦ ରୁ ୨୫ ଦିନ ଲାଗିବ। ଆୟୋଜିତ ଏହି ୫ ଦିନିଆ କନକ୍ଳେଭକୁ ମାନ୍ୟବର ମୁଖ୍ୟମନ୍ତ୍ରୀ ନଭେମ୍ବର ୩୦ ତାରିଖ ସଂଧ୍ୟାରେ ଉଦ୍ଘାଟନ କରିବେ । ଡିସେମ୍ବର ୧ ତାରିଖ ସକାଳେ ପ୍ଲିନାରୀ ସେସନ ଅନୁଷ୍ଠିତ ହେବ। ଏଥିରେ ଦେଶ ବିଦେଶର ବହୁ ଶିଳ୍ପ ସଂସ୍ଥାର ଶିଳ୍ପପତି ତଥା ପ୍ରତିନିଧିମାନ ଯୋଗଦେଇ ବିଶେଷ ଆଲୋଚନାରେ ଅଂଶଗ୍ରହଣ କରିବ ।
ଶ୍ରୀ ଶର୍ମା ଆହୁରି ମଧ୍ୟ କହିଥିଲେ ଯେ, ଓଡିଶାରେ ରସାୟନିକ, ଧାତବ, ଦକ୍ଷତା ବିକାଶ, ଷ୍ଟାର୍ଟ ଅପ୍ସ, ସାର, ପରିବହନ,ଖାଦ୍ୟ ପ୍ରକ୍ରିୟାକରଣ, ବୟନ ଶିଳ୍ପ, ପୋଷାକ ଡିଜାଇନିଂ ପ୍ରସ୍ତୁତି, ବ୍ୟବସାୟିକ-କୃଷି ଆଦି କ୍ଷେତ୍ର ଭଳି ଉପଯୋଗୀ ଥିବା ବିଭିନ୍ନ କ୍ଷେତ୍ରରେ ଶିଳ୍ପପତିମାନଙ୍କର ରହିଥିବା ଅଭିଜ୍ଞତା ଏବଂ ଓଡିଶାରେ ଥିବା ନୂଆ ନୂଆ ବ୍ୟବସାୟିକ ସମ୍ଭାବନାର ସୁଯୋଗ କିପରି ସେମାନେ ନେଇପାରିବେ, ସେ ସଂପର୍କରେ ଆଲୋଚନା କରିବେ ।
ଡିସେମ୍ବର ୨ ଓ ୩ ତାରିଖରେ ଓଡ଼ିଶା ରାଜ୍ୟ ସରକାରଙ୍କ ସଂପୃକ୍ତ ଉପରୋକ୍ତ ବିଭିନ୍ନ ବିଭାଗମାନଙ୍କର ଶିଳ୍ପ ନୀତି ସଂସ୍କରଣ ପ୍ରକାଶପାଇବ । ଶିଳ୍ପନୀତି ନିର୍ଦ୍ଧାରଣ -୨୦୧୫ ରେ ଥିବା ବ୍ୟବସ୍ଥାରେ ଆବଶ୍ୟକ ପରିବର୍ତ୍ତନ କରାଯାଇ ଶିଳ୍ପନୀତି ନିର୍ଦ୍ଧାରଣ -୨୦୨୨ ପ୍ରକାଶନ ପାଇଁ ଆବଶ୍ୟକୀୟ ସଂଶୋଧନ ଅଣାଯାଇଛି ।
ଯେଉଁ କ୍ଷେତ୍ରରେ ଅଧିକ ନିଯୁକ୍ତି ସୁଯୋଗ ରହିଛି ଏବଂ ଆମର କଂଚାମାଲ ଉପଲବ୍ଧ ରହିଛି ଏବଂ ଯେଉଁସବୁ କ୍ଷେତ୍ରରେ ଅଧିକ ବିଭିନ୍ନ ପ୍ରକାର ପଦାର୍ଥ ଓ ଉତ୍ପାଦନର ସମ୍ଭାବନା ରହିଛି, ସେହିସବୁ କ୍ଷେତ୍ରକୁ ଆଇ.ପି.ଆର୍-୨୦୨୨ରେ ଗୁରୁତ୍ୱ ଦିଆଯାଇଛି । ଏହା ବ୍ୟତୀତ ଓଡିଶାରେ ଥିବା ପାରାଦ୍ୱୀପ,ଧାମରା ଗୋପାଳପୁର ଓ ଆଗାମୀ ଦିନରେ ହେବାକୁ ଯାଉଥିବା ସୁବର୍ଣ୍ଣରେଖା ବନ୍ଦର, ଯେଉଁଠାରେ ଶିଳ୍ପପତିମାନେ ରପ୍ତାନିଭିତ୍ତିକ ବ୍ୟବସାୟ କରିବାକୁ ଚାହିଁବେ, ସେମାନଙ୍କ ପାଇଁ ଏହି ସଂସ୍କରଣରେ ଗୁରୁତ୍ୱ ଦିଆଯିବ ।
ଏଥି ସହିତ ପଶ୍ଚିମ ଓଡିଶା, ଯେଉଁବାଟ ଦେଇ ବିଜୁ ଏକ୍ସପ୍ରେସ୍ ଓ୍ୱେ ଯାଇଛି, ଯାହାକୁ ଆମେ ବିଜୁ ଇକୋନୋମିକ୍ କରିଡର ଭାବେ ବିବେଚନା କରୁଛୁ, ତନ୍ମଧ୍ୟରେ କେତେକ ଅଂଚଳକୁ ଶିଳ୍ପ କରିଡର ଭାବେ ଚିହ୍ନଟ କରାଯାଇ ସେହି ସବୁ ଅଂଚଳରେ କୃଷିଭିତ୍ତିକ ଶିଳ୍ପ ଯଥା-କପା, ଧାନ, ଚିନାବାଦାମ, ମକ୍କା, ବୟନଶିଳ୍ପ ଆଦି ବ୍ୟବସାୟିକ ଶିଳ୍ପର ସୁଯୋଗକୁ ଗୁରୁତ୍ୱ ଦିଆଯିବ ବୋଲି ପ୍ରମୁଖ ଶାସନ ସଚିବ ଶ୍ରୀ ଶର୍ମା କହିଛନ୍ତି ।
ଏସବୁ କ୍ଷେତ୍ରରେ ଶିଳ୍ପ ପ୍ରତିଷ୍ଠା ପାଇଁ ରାଜ୍ୟ ସରକାରଙ୍କ ପକ୍ଷରୁ ସୁବିଧାରେ ଜମି, ଜଳ,ବିଦ୍ୟୁତ ଶକ୍ତି, ରାସ୍ତାଘାଟ ବ୍ୟବସ୍ଥାସାଙ୍ଗକୁ ଆନୁସଙ୍ଗିକ ସହଯୋଗ କରାଯିବ ବୋଲି ସେ କହିଥିଲେ ।
ପ୍ରମୁଖ ଶାସନ କହିଥିଲେ ଯେ, ମେକ୍ ଇନ୍ ଓଡିଶା କନକ୍ଲେଭକୁ ସୁଚାରୁରୂପେ ପରିଚାଳନା ପାଇଁ ଏହି ଜନତା ମଇଦାନରେ ବୃହତ୍ ପାଭିଲିୟନକୁ ଉତ୍ତମ ଭାବେ ପ୍ରସ୍ତୁତ କରାଯିବ । ଗଣମାଧ୍ୟମ ପାଇଁ ସ୍ୱତନ୍ତ୍ର ମିଡିଆ ଲାଉଞ୍ଜ, ପଡିଆର ୩ ପାର୍ଶ୍ୱରେ ପ୍ରଦର୍ଶନୀ ମଣ୍ଡପ, ମଝିରେ ପାଖାପାଖି ୨୦୦୦ ବ୍ୟକ୍ତିଙ୍କ ବସିବା ସୁବିଧା ସହିତ ବିଭିନ୍ନ ପର୍ୟ୍ୟାୟରେ ପ୍ରତ୍ୟହ ୨୦ ରୁ ୨୫ ହଜାର ଦର୍ଶକ ଏହାକୁ ପରିଦର୍ଶନ କରିବାର ବ୍ୟବସ୍ଥା କରାଯାଉଛି ।
ଏଥି ସହିତ ବ୍ୟବସାୟିକ ଆଲୋଚନା ପାଇଁ ପ୍ଲିନାରୀ ହଲ, ମୁଖ୍ୟମନ୍ତ୍ରୀ ତଥା ବିଶିଷ୍ଟ ବ୍ୟକ୍ତିଙ୍କ ପାଇଁ ଲାଉଞ୍ଜ,ସାଂସ୍କୃତିକ କାର୍ୟ୍ୟ ପରିବେଷଣ ପାଇଁ ପାଭିଲିୟନ ଆଦିର ବ୍ୟବସ୍ଥା ରହିବ । ଇଡେକୋର ପରିଚାଳନା ନିର୍ଦ୍ଦେଶକ ଶ୍ରୀ ଭୂପେନ୍ଦ୍ର ସିଂ ପୁନିଆ ଯୋଗଦେଇ କହିଲେ ଯେ, ଏହି ବୃହତ୍ ପାଭିଲିୟନରେ ୫ ଟି ସେକ୍ଟର କରାଯାଉଛି, ଯେଉଁଥିରେ ୨୦୦ ରୁ ୩୦୦ ବ୍ୟକ୍ତି ବସି ବ୍ୟବସାୟିକ ଆଲୋଚନା କରିପାରିବେ।
ତତ୍ ସହିତ ଫୁଟ୍ କୋର୍ଟ ମଧ୍ୟ ରହିବ, ଯେଉଁମାନେ ପରିଦର୍ଶନରେ ଆସିବେ, ସେମାନେ ମଧ୍ୟ ଏହାର ସୁଯୋଗ ନେବେ କ୍ଷ ଯେଉଁମାନେ ପରିଦର୍ଶନରେ ଆସିବେ, ସେମାନେ ମଧ୍ୟ ଏହାର ସୁଯୋଗ ନେବେ । ତତ୍ ସହିତ ଅଗ୍ମି ନିରାପତ୍ତା ଓ ସୁରକ୍ଷା ପ୍ରତି ସ୍ୱତନ୍ତ୍ର ଦୃଷ୍ଟି ଦିଆଯାଉଥିବା ସଂପର୍କରେ ଶ୍ରୀ ପୁନିଆ କହିଛନ୍ତି ।
ଅନୁଷ୍ଠିତ ଏହି ପୂଜା ଉତ୍ସବରେ ଶିଳ୍ପ ବିଭାଗ ଅତିରିକ୍ତ ଶାସନ ସଚିବ ଶ୍ରୀ ଶୁଭେନ୍ଦ୍ର କୁମାର ନାୟକଙ୍କ ସମେତ ଶିଳ୍ପ ବିଭାଗ, ଇଡକୋ ଏବଂ ଇପିକଲର ଅନ୍ୟ ବରିଷ୍ଠ ଉଚ୍ଚ କର୍ତ୍ତୃପକ୍ଷ ଏବଂ ପାଭିଲିଅନରେ ନିୟୋଜିତ ସଂସ୍ଥାର କର୍ମକର୍ତ୍ତା ଏବଂ କ୍ଷେତ୍ରସ୍ତରୀୟ କର୍ମଚାରୀମାନେ ଉପସ୍ଥିତ ଥିଲେ ।
