ସୀତାରାମ ଅଗ୍ରୱାଲ
ବାଣପୁର: ବହୁ ପ୍ରତିକ୍ଷିତ ୫-ଟି ସଚିବ ଭିକେ ପାଣ୍ଡିଆନଙ୍କ ବାଣପୁର ଗସ୍ତ ଶେଷ ହୋଇଛି। ଏହାକୁ ନେଇ ବାଣପୁରବାସୀ ବହୁତ ଖୁସି। ମା’ ଭଗବତୀ ମନ୍ଦିରର ବିକାଶ ହେବ। ମନ୍ଦିର ନୂଆ ରୂପରେଖ ପାଇବ। ଦେଶରେ ଖ୍ୟାତି ବଢିବ, ଯାହାକି ପ୍ରତ୍ୟେକ ବାଣପୁରିଆଙ୍କ ପାଇଁ ଗର୍ବର ବିଷୟ ହେବ। କିନ୍ତୁ ଏ ମଧ୍ୟରେ କିଛିଟା ଅତି ସମ୍ବେଦନଶୀଳ ପ୍ରସଙ୍ଗ ଅଛି, ଯାହାକୁ ଏଡାଇ ଦିଆଯାଇ ନପାରେ।
ସବୁଠାରୁ ବଡ଼ ପ୍ରସଙ୍ଗ ହେଲା ବସ ଷ୍ଟାଣ୍ଡ ନିର୍ମାଣ ପାଇଁ ରାସ୍ତା ପ୍ରଶସ୍ତିକରଣ। ଏଠାରେ ନାନା ମୁନିଙ୍କ ନାନା ମତ ପ୍ରକାଶ ପାଇଛି। ପ୍ରଥମତଃ ବାଣପୁରରେ ବସ ଷ୍ଟାଣ୍ଡ ନିର୍ମାଣ ଆଜିର ପ୍ରକଳ୍ପ ନୁହଁ। ଏହା ବହୁ ବର୍ଷ ପୁରୁଣା ପ୍ରକଳ୍ପ, ଯାହାକି ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇନାହିଁ।
ତେବେ ବସ ଷ୍ଟାଣ୍ଡ ନିର୍ମାଣ ସ୍ଥାନକୁ ନେଇ ଉପୁଜୁଛି ଦ୍ୱନ୍ଦ୍ୱ। ରାଜନୈତିକ ଦଳର ନେତାମାନେ ଗୋଟିଏ ସ୍ଥାନ କହୁଥିବା ବେଳେ ସରକାରୀ ଅଧିକାରୀ ମାନେ ଆଉ ଏକ ସ୍ଥାନ କହୁଛନ୍ତି। ୫- ଟି ସଚିବଙ୍କ ଗସ୍ତ ପରେ ଏହି ବସ ଷ୍ଟାଣ୍ଡ ପ୍ରକଳ୍ପକୁ ନେଇ ଦ୍ଵନ୍ଦ୍ଵ ଅଧିକ ବଢିଯାଇଛି। ଉଭୟ ସ୍ଥାନୀୟ ନେତା ଓ ପ୍ରଶାସନ ଅଧିକାରୀଙ୍କ ମଧ୍ୟରେ ଭିନ୍ନ ଭିନ୍ନ ମତ ପ୍ରକାଶ ପାଇଛି। କାରଣ ଏତେ ବର୍ଷ ହେଲା ବସ ଷ୍ଟାଣ୍ଡ ପାଇଁ ସ୍ଥାନ ନିରୂପଣ ହୋଇପାରୁନଥିବା ବେଳେ ପାଣ୍ଡିଆନଙ୍କ ଗସ୍ତ ନିମନ୍ତେ ତରବରିଆ ଭାବେ ଜିଲ୍ଲାପାଳଙ୍କ ସମ୍ମୁଖରେ ମନଇଚ୍ଛା ସ୍ଥାନର ପ୍ରସ୍ତାବ ଦିଆଯାଉଛି।
ସାଧାରଣତଃ ବସ ଷ୍ଟାଣ୍ଡଟି ସହର ମଧ୍ୟବର୍ତ୍ତୀ ଭାଗରେ ରହିଥାଏ, ଯାହାଦ୍ୱାରା ସମସ୍ତ ଯାତ୍ରୀଙ୍କୁ ସମାନ ଦୂର ପଡ଼ିବ। ନଚେତ ପୁରୀ ମାଳତୀପାଟପୁର ଏବଂ ନୟାଗଡ଼ର ନୂଆ ବସଷ୍ଟାଣ୍ଡ ପରି ଦଶା ଭୋଗିବାକୁ ପଡିବ। କାରଣ ଠିକ ସ୍ଥାନରେ ବସ ଷ୍ଟାଣ୍ଡ ହୋଇନପାରିଲେ, ଯାତ୍ରୀଙ୍କ ପାଇଁ ଏହା ଅଦରକାରୀ ହୋଇ ରହିବ। ତେଣୁ ବିଚାର ବିମର୍ଶ କରି ଉଚିତ ସ୍ଥାନ ନିରୂପଣ କଲେ ସ୍ଥାନୀୟ ଲୋକେ ଉପକୃତ ହେବା ସହ କୋଟି କୋଟି ଟଙ୍କାର ପ୍ରକଳ୍ପ ଜନତାଙ୍କ ପାଇଁ କାମରେ ଆସିବ।
ଦ୍ଵିତୀୟ କଥା ହେଲା ରାସ୍ତାର ପ୍ରଶସ୍ତିକରଣକୁ ନେଇ ମଧ୍ୟ ସ୍ଥାନୀୟ ଲୋକଙ୍କ ମଧ୍ୟରେ ସନ୍ଦେହ ସୃଷ୍ଟି ହୋଇଛି। ବର୍ତ୍ତମାନ ଯାହା ଖବର ରହିଛି, ଭଗବତୀ ମନ୍ଦିରକୁ ଯିବା ପାଇଁ କେବଳ ଦୋଳ ବେଦୀଠାରୁ ରାସ୍ତାକୁ ପ୍ରଶସ୍ତିକରଣ (୧୦ ମିଟର) କରାଯିବ। କିନ୍ତୁ ଏହାପୂର୍ବରୁ ଅନେକ ସ୍ଥାନ ସଂକୀର୍ଣ୍ଣ ରହିଛି। ଯାହା ବସ ଯିବା ଆସିବା ପାଇଁ ବହୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ବିଶେଷ କରି ଦକ୍ଷପ୍ରଜାପତି ମନ୍ଦିର ଠାରୁ ମଧ୍ୟ ଦୋଳବେଦୀ ପର୍ଯ୍ୟନ୍ତ ଗମନାଗମନର ସମସ୍ୟା ଦେଖାଯାଉଛି। ତେଣୁ ଭବିଷ୍ୟତକୁ ଲକ୍ଷ୍ୟ କରି ସହରର ଆରମ୍ଭରୁ ଯଦି ରାସ୍ତାର ପ୍ରଶସ୍ତିକରଣ କରାଯାଏ, ତେବେ ଏହା ସଫଳ ହୋଇପାରିବ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି। କାରଣ ପର୍ଯ୍ୟଟକ ଆସିଲେ ବାଇପାସ ଠାରୁ ସୁରୁଖୁରୁରେ ଭଗବତୀ ମନ୍ଦିର ଯାଏଁ ଅବାଧରେ ବସ ଯୋଗେ ଯାଇପାରିବେ।
ସେହିପରି ଭାବେ ମନ୍ଦିର ଉନ୍ନୟନ ପାଇଁ ଯଦି କିଛି ଦୋକାନୀ ବିସ୍ଥାପିତ ହେବେ ତେବେ ସେମାନଙ୍କ ବିସ୍ଥାପନ ବ୍ୟବସ୍ଥା କରିବା ସହ ସେମନାଙ୍କ ଜୀବିକା ପ୍ରତି ଦୃଷ୍ଟି ଦେବା କଥା। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଖୋର୍ଦ୍ଧା ଜିଲ୍ଲାପାଳ ବ୍ୟକ୍ତିଗତ ଭାବେ ବାଣପୁରରେ ଉପସ୍ଥିତ ରହି ଜନସାଧାରଣଙ୍କ ସମସ୍ୟା ଶୁଣି ମାଷ୍ଟର ପ୍ଲାନ ପ୍ରସ୍ତୁତ କରନ୍ତୁ ବୋଲି ସାଧାରଣରେ ଦାବି ହେଉଛି।
ଜିଲ୍ଲାପାଳ ଏ ନେଇ ଏନଏସି ର ସମସ୍ତ ନିର୍ବାଚିତ ଜନପ୍ରତିନିଧି, ସେବାୟତ, ସାମ୍ବାଦିକ, ବୁଦ୍ଧିଜୀବୀ ଏବଂ ବ୍ୟବସାୟୀ ସଂଘ ସହ ଆଲୋଚନା କରି ମାଷ୍ଟର ପ୍ଲାନ ପ୍ରସ୍ତୁତ କଲେ ତାହା ଦୀର୍ଘସ୍ଥାୟୀ ହେବ ବୋଲି ସ୍ଥାନୀୟ ବାସିନ୍ଦା ଆଶା କରିଛନ୍ତି। ତେବେ ଯଦି ଏଥିରେ ବ୍ୟତିକ୍ରମ ଘଟେ ତେବେ ନିଶ୍ଚିତ ଭାବେ ଭବିଷ୍ୟତରେ ମାଷ୍ଟରପ୍ଲାନକୁ ନେଇ ବାଣପୁରରେ ଅପ୍ରିତିକର ପରିସ୍ଥିତି ସୃଷ୍ଟି ହେବା ଘଟଣାକୁ ଏଡାଇଦିଆଯାଇନପାରେ।
ଖୋର୍ଦ୍ଧା ଜିଲ୍ଲାପାଳ ଆଇଏଏସ ସୁଦର୍ଶନ ଚକ୍ରବର୍ତ୍ତୀ ଜଣେ ଦକ୍ଷ ଯୁବ ପ୍ରଶାସକ ହୋଇଥିବା ବେଳେ ସେ ମାଷ୍ଟର ପ୍ଲାନ ପ୍ରସ୍ତୁତି ପୂର୍ବରୁ ଉକ୍ତ ବିଷୟଗୁଡିକୁ ନିଶ୍ଚିତ ଧ୍ୟାନ ଦେବେ ବୋଲି ବାଣପୁରବାସୀ ଆଶା କରିଛନ୍ତି।
