ନୂଆଦିଲ୍ଲୀ: ଜାତୀୟ ମୂଲ୍ୟାଙ୍କନ ଏବଂ ମାନ୍ୟତା ପରିଷଦ (ନାକ୍) ଦ୍ବାରା ଉଚ୍ଚ ଶିକ୍ଷାନୁଷ୍ଠାନଗୁଡ଼ିକୁ ମାନ୍ୟତା ପ୍ରଦାନ କରାଯିବା କ୍ଷେତ୍ରରେ କେତେକ ବିସଙ୍ଗତିକୁ ନେଇ ନିକଟରେ କିଛି ଗଣମାଧ୍ୟମରେ ଖବର ପ୍ରକାଶ ପାଇଛି। ତେବେ ଏ ସମ୍ପର୍କରେ ନାକ୍ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି। ନାକ୍ ଦ୍ବାରା ଜାରି ଏକ ପ୍ରେସ୍ ବିବୃତ୍ତିରେ କୁହାଯାଇଛି ଯେ, ଗଣମାଧ୍ୟମରେ ପ୍ରକାଶ ପାଇଥିବା ସିଏଜିଙ୍କ ରିପୋର୍ଟ ଚୁଡ଼ାନ୍ତ ନୁହେଁ। କାରଣ ନାକ୍ ନିର୍ଦ୍ଦେଶକଙ୍କ ପକ୍ଷରୁ ଡ୍ରାଫ୍ଟ ଅନୁପାଳନର ଜବାବ ସିଏଜିଙ୍କ ନିକଟକୁ ପଠାଯାଇଛି ଯାହାକି ବର୍ତ୍ତମାନ ବିଚାରାଧୀନ ରହିଛି। ସିଏଜିଙ୍କ କାର୍ଯ୍ୟାଳୟଙ୍କ ପକ୍ଷରୁ କେତେକ ପରିବର୍ତ୍ତନ ପାଇଁ ଦିଆଯାଇଥିବା ପରାମର୍ଶକୁ ମଧ୍ୟ କାର୍ଯ୍ୟକାରୀ କରାଯାଉଛି ଏବଂ ଏକ ସଂଶୋଧିତ ଡ୍ରାଫ୍ଟ ପ୍ରସ୍ତୁତ କରାଯାଉଛି।
ପ୍ରଥମ ମାମଲାରେ ନଷ୍ଟ ହେବା ଯୋଗ୍ୟ ଏବଂ ନଷ୍ଟ ହେଉନଥିବା ଆବର୍ଜନା ପରିଚାଳନା ପାଇଁ ୧୦୦୦ ପଏଣ୍ଟରୁ ନାକ୍ ୧୬ ପଏଣ୍ଟ ଦିଆଯିବା ନେଇ ଯେଉଁ ପ୍ରଶ୍ନ ଉଠିଛି ସେ ସମ୍ପର୍କରେ ମଧ୍ୟ ସ୍ପଷ୍ଟୀକରଣ ଦିଆଯାଇଛି। କଲେଜ ପକ୍ଷରୁ ଏନଏସଏସ ସ୍ବେଚ୍ଛାସେବୀଙ୍କ ଦ୍ବାରା ଉଚିତ ବର୍ଜ୍ୟବସ୍ତୁ ପରିଚାଳନା କରାଯାଇ କ୍ୟାମ୍ପସକୁ ସଫା ରଖାଯାଇଛି। ପରିସରରେ ଗଛ ଲଗାଯିବା ସହିତ ସେଥିରେ କ୍ୟୁଆର କୋଡ୍ ଦିଆଯାଇଛି। ସେହିପରି ବର୍ଷା ଜଳ ପରିଚାଳନା ଏବଂ ଜୈବିକ ଖତ ପ୍ରସ୍ତୁତି ମଧ୍ୟ କରାଯାଇଛି। ଅନାବଶ୍ୟକ ବର୍ଜ୍ୟବସ୍ତୁକୁ ନଜଳାଇବାକୁ ନାକ୍ ପକ୍ଷରୁ ଦିଆଯାଇଥିବା ପରାମର୍ଶକୁ କଲେଜ୍ ଗ୍ରହଣ କରିଛି।
ଦ୍ବିତୀୟ ମାମଲାରେ କର୍ମଚାରୀ ଓ ଛାତ୍ରଛାତ୍ରୀଙ୍କ ଦ୍ବାରା କରାଯାଇଥିବା ସବୁଜ ପ୍ରୟାସ ନିମନ୍ତେ ୧୦୦୦ ପଏଣ୍ଟରୁ ୨ ପଏଣ୍ଟ ଦିଆଯାଇଛି। ଛଅଟି ମାପଦଣ୍ଡକୁ ଆଧାର କରି ପ୍ଲାଷ୍ଟିକ ମୁକ୍ତ କ୍ୟାମ୍ପସ୍ ଗଠନ ପାଇଁ ପଦକ୍ଷେପ ସ୍ବରୂପ ଏହି ମାନ୍ୟତା ଦିଆଯାଇଛି। କଲେଜ କ୍ୟାମ୍ପସକୁ ପ୍ଲାଷ୍ଟିକ ମୁକ୍ତ କରିବା ଏବଂ କାଗଜମୁକ୍ତ କାର୍ଯ୍ୟାଳୟ ପାଇଁ ପଦକ୍ଷେପ ନେବା ନିମନ୍ତେ ଏଭଳି ମୂଲ୍ୟାଙ୍କନ କରାଯାଇଛି। ତେବେ ସବୁଜ ଅଭ୍ୟାସର ଅନ୍ୟ ମାପଦଣ୍ଡଗୁଡ଼ିକ କ୍ଷେତ୍ରରେ ସେଭଳି ପଦକ୍ଷେପ ଗ୍ରହଣ କରାଯାଇନାହିଁ।
ତୃତୀୟ ମାମଲାଟି ଉଚ୍ଚ ଶିକ୍ଷାନୁଷ୍ଠାନର ଶିକ୍ଷାବର୍ଷ ପରିଚାଳନା ସହିତ ଜଡ଼ିତ। ଏଥିରେ କଲେଜ ଦ୍ବାରା ନିୟମିତ ଇଣ୍ଟରନାଲ ଆୟୋଜନ ସହିତ ଶିକ୍ଷାବର୍ଷ ପରିଚାଳନା ଆଧାରରେ ଗୁଣବତ୍ତା ଅନୁଯାୟୀ ମୂଳ୍ୟାଙ୍କନ କରାଯାଇଛି। ନାକ୍ ଦଳ କ୍ଷେତ୍ର ପରିଦର୍ଶନ କରିବା ସହିତ ସ୍ଥିତି ଅନୁଧ୍ୟାନ କରି ମୂଲ୍ୟାଙ୍କନ କରିଛନ୍ତି। ସାମଗ୍ରିକ ଜ୍ଞାନ ଓ ବୁଦ୍ଧିମତା ଏବଂ ଉଚ୍ଚ ଶିକ୍ଷାନୁଷ୍ଠାନ ପକ୍ଷରୁ ଦିଆଯାଇଥିବା ଦସ୍ତାବିଜ ଆଧାରରେ ମାନ୍ୟତା ପ୍ରଦାନ କରାଯାଇଛି।
ଚତୁର୍ଥରେ ନାକ୍ ପକ୍ଷରୁ କୁହାଯାଇଛି ଯେ, ସବୁ ମାପଦଣ୍ଡ ବା ମେଟ୍ରିକ୍ସ ପାଇଁ ଶିକ୍ଷାନୁଷ୍ଠାନଗୁଡ଼ିକୁ ଦସ୍ତାବିଜ ଦାଖଲ କରିବା ଆବଶ୍ୟକ। କ୍ବାଲିଟେଟିଭ ମେଟ୍ରିକ୍ସ ବା ଗୁଣବତ୍ତା ମାପଦଣ୍ଡ ପାଇଁ ୫୦୦ ଶବ୍ଦ ମଧ୍ୟରେ ବିବରଣୀ ସହିତ ଅତିରିକ୍ତ ଦସ୍ତାବିଜ ଦାଖଲ କରାଯିବା ଉଚିତ୍। ସେହିପରି ପରିମାଣ ଆଧାରିତ ମାପଦଣ୍ଡ ବା କ୍ବାଣ୍ଟିଟେଟିଭ ମେଟ୍ରିକ୍ସ କ୍ଷେତ୍ରରେ ସଂଖାତ୍ମକ ମୂଲ୍ୟ ସହିତ ଅତିରିକ୍ତ ଦସ୍ତାବିଜ ଦାଖଲ କରାଯିବା ଆବଶ୍ୟକ।ଏହାକୁ ଅନଲାଇନ ବ୍ୟବସ୍ଥାରେ ବିଭାଜିତ କରାଯାଇଛି।
ସୂଚନାଯୋଗ୍ୟ ଯେ, ଗତ ତିନି ଦଶନ୍ଧି ଧରି ନାକ୍ ବିଶ୍ବର ଅନ୍ୟତମ ସବୁଠୁ ବଡ଼ ଉଚ୍ଚ ଶିକ୍ଷା ବ୍ୟବସ୍ଥାର ଗୁଣବତ୍ତା ସୁନିଶ୍ଚିତ କରିବା କ୍ଷେତ୍ରରେ କାର୍ଯ୍ୟ କରି ଆସୁଛି । ନାକ ସବୁବେଳେ ସମୟ ପରିକ୍ଷୀତ ପଦ୍ଧତି ଏବଂ ଢାଞ୍ଚା ବ୍ୟବହାର କରି ବିଭିନ୍ନ ବ୍ୟବସ୍ଥା ଓ ମତବିନିୟମ ଆଧାରିତ ପ୍ଲାଟଫର୍ମ ଜରିଆରେ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକର ମୂଲ୍ୟାଙ୍କନ ଏବଂ ମାନ୍ୟତା ପ୍ରଦାନ କାର୍ଯ୍ୟ କରିଥାଏ।ଉଚ୍ଚ ଶିକ୍ଷାନୁଷ୍ଠାନର ମାନ ବୃଦ୍ଧି ପ୍ରକ୍ରିୟାରେ ନାକ୍ ସବୁବେଳେ ସମସ୍ତ ଅଂଶୀଦାରମାନଙ୍କୁ ନେଇ କାର୍ଯ୍ୟ କରିଥାଏ। ‘‘ଉନ୍ନତମାନର ମୂଲ୍ୟାଙ୍କନ ଜରିଆରେ ଗୁଣବତ୍ତା ସୁନିଶ୍ଚିତ କରିବା’’ ନାକ୍ର ସଂକଳ୍ପ ଓ ଲକ୍ଷ୍ୟ। ଏହା ସବୁବେଳେ ଉତ୍ତରଦାୟୀ, ପାରଦର୍ଶୀ ଓ ନୈତିକ ପ୍ରକ୍ରିୟାରେ ମୂଲ୍ୟାଙ୍କନ ଓ ମାନ୍ୟତା ପ୍ରଦାନ କାର୍ଯ୍ୟ ସମ୍ପାଦନ କରିଥାଏ।
