ନୂଆଦିଲ୍ଲୀ: ଆଗାମୀ ସପ୍ତାହରେ ରାଜ୍ୟସଭାରେ ଦିଲ୍ଲୀରେ ଅଧିକାରୀଙ୍କ ବଦଳି ସଂକ୍ରାନ୍ତ ବିଲ୍ ପରେ ଆଲୋଚନା ହେବ ବୋଲି ସୂଚନା ମିଳିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ଏହି ବିଲକୁ ଅନୁମୋଦନ ମିଳିଛି। ଏହି ବିଲ ପରେ ଆଲୋଚନା ପୂର୍ବରୁ ଇଣ୍ଡିଆ ଆଲାଏନ୍ସର ସମସ୍ତ ଦଳ ହ୍ୱିପ୍ ଜାରି କରିଛନ୍ତି।
ମୌସୁମୀ ଅଧିବେଶନ ପାଇଁ ଦଳର ରାଜ୍ୟସଭା ସାଂସଦ ବିଲ୍ ବିରୋଧରେ ଭୋଟ୍ ଦେଇ ଦଳର ଆଭିମୁଖ୍ୟକୁ ସମର୍ଥନ କରିବା ପାଇଁ ଜେଡିୟୁ ହ୍ୱିପ୍ ଜାରି କରିଛି। ଜେଡିୟୁ ପକ୍ଷରୁ ଜାରି ହୋଇଥିବା ହ୍ୱିପରେ ରାଜ୍ୟସଭାଉପାଧ୍ୟକ୍ଷଙ୍କୁ ମଧ୍ୟ ସାମିଲ କରାଯାଇଛି।
ହରିବଂଶ ନାରାୟଣ ସିଂଙ୍କୁ ଉପସ୍ଥିତ ରହିବାକୁ କୁହାଯାଇଛି
ରାଜ୍ୟସଭା ଉପାଧ୍ୟକ୍ଷ ତଥା ଜେଡିୟୁ ସାଂସଦ ହରିବଂଶ ନାରାୟଣ ସିଂହଙ୍କୁ ମଧ୍ୟ ଜେଡିୟୁ ଜାରି କରିଥିବା ହ୍ୱିପରେ ସାମିଲ କରାଯାଇଛି। ଏନେଇ ତାଙ୍କ କାର୍ଯ୍ୟାଳୟ ପକ୍ଷରୁ ମଧ୍ୟ ସୂଚନା ଦିଆଯାଇଛି। ଅନେକ ସମୟରେ ହରିବଂଶ ପାର୍ଟି ଲାଇନରୁ ଦୂରେଇ ଯାଉଥିବା ଦେଖିବାକୁ ମିଳିଥିଲା, ଯାହା ପରେ ତାଙ୍କ ଏବଂ ଦଳ ମଧ୍ୟରେ ମତଭେଦକୁ ନେଇ ଚର୍ଚ୍ଚା ହୋଇଥିଲା।
ଗତ ବର୍ଷ ଅଗଷ୍ଟରେ ବିଜେପି ସହ ଜେଡିୟୁର ମେଣ୍ଟ ଭାଙ୍ଗିବା ପରେ ମଧ୍ୟ ସେ ନିଜ ପଦରେ ରହିଛନ୍ତି। ଉଭୟ ଦଳ ମଧ୍ୟରୁ କୌଣସି ଦଳ ତାଙ୍କୁ ନିଜ ପଦରୁ ଇସ୍ତଫା ଦେବାକୁ ଚାପ ପକାଇନଥିଲେ।
ସମସ୍ତ ସାଂସଦଙ୍କୁ ହ୍ୱିପ୍ ଜାରି କଲା ବିଜେପି: ଅନିଲ ହେଗଡେ
ଏହି ପ୍ରସଙ୍ଗରେ ଗଣମାଧ୍ୟମକୁ ପଚରାଯିବାରୁ ଜେଡିୟୁ ମୁଖ୍ୟ ସଚେତକ ଅନୀଲ ହେଗଡେ କହିଛନ୍ତି ଯେ ଯେତେବେଳେ ବି ଗୁରୁତ୍ୱପୂର୍ଣ୍ଣ ବିଲ୍ ଆସେ ସେତେବେଳେ କେବଳ ଜେଡିୟୁ ନୁହେଁ ବରଂ ସବୁ ଦଳ ନିଜ ନିଜ ସାଂସଦଙ୍କୁ ହ୍ୱିପ୍ ଜାରି କରିଥାନ୍ତି। ଆମେ ଆମ ଦଳର ସାଂସଦମାନଙ୍କୁ ହ୍ୱିପ୍ ଜାରି କରିଛୁ, ଏହା ଆମେ ସବୁବେଳେ କରିଆସୁଛୁ। ତେବେ ଅତୀତରେ କୌଣସି ସମୟରେ ଉପାଧ୍ୟକ୍ଷଙ୍କୁ ହ୍ୱିପ୍ ଜାରି କରାଯାଇଥିଲା କି ନାହିଁ ତାହା ମୁଁ ଜାଣିନାହିଁ ବୋଲି ହେଗଡେ କହିଛନ୍ତି।
ମୋଦିଙ୍କ ନିକଟତର ହେବାରେ ଲାଗିଛନ୍ତି ହରିବଂଶ
ସାମ୍ପ୍ରତିକ ସମୟରେ ହରିବଂଶ ନାରାୟଣ ସିଂହ ତାଙ୍କ ଦଳର ନେତା ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କଠାରୁ ଦୂରତା ବଜାୟ ରଖି ପ୍ରଧାନମନ୍ତ୍ରୀ ମୋଦୀ ଏବଂ ବିଜେପିର ଘନିଷ୍ଠ ହେବାରେ ଲାଗିଛନ୍ତି। ନୂଆ ସଂସଦ ଭବନ ଉଦଘାଟନରୁ ଜେଡିୟୁ ନିଜକୁ ଦୂରେଇ ରଖିଥିଲା, କିନ୍ତୁ ହରିବଂଶ ଏଥିରେ ସକ୍ରିୟ ଭୂମିକା ଗ୍ରହଣ କରିଥିଲେ। ସେତେବେଳେ ଜେଡିୟୁ ମୁଖ୍ୟ ମୁଖପାତ୍ର ନୀରଜ କୁମାର ହରିବଂଶଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ।
ଅଧ୍ୟକ୍ଷ କିମ୍ବା ଉପାଧ୍ୟକ୍ଷଙ୍କୁ ହ୍ୱିପ୍ ଜାରି କରିପାରିବେ ନାହିଁ
ରାଜ୍ୟସଭା ନିୟମ ଅନୁଯାୟୀ କୌଣସି ଦଳର ହ୍ୱିପ୍ ସେହି ସଦସ୍ୟଙ୍କ ଉପରେ ଲାଗୁ ହୁଏ ନାହିଁ ଯେପର୍ଯ୍ୟନ୍ତ ସେ ଗୃହ ଚଳାଇବା ପାଇଁ ଚେୟାରରେ ବସିଛନ୍ତି, ତେଣୁ ଏବେ ହରିବଂଶଙ୍କୁ ଗୃହର ଚେୟାରରେ ବସି ଗୃହ ଚଳାଇବାକୁ ପଡ଼ିବ।