ସୀତାରାମ ଅଗ୍ରୱାଲ
ବାଣପୁର: ଆଜି ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଅଲାଇଡ଼ିହ ବାଇପାସ ନିକଟରେ ଥିବା ଏକ ଭଡାଘରେ ଜଣେ ଯୁବକ ଆତ୍ମହତ୍ୟା କରିଥିବାର ଅଭିଯୋଗ ହୋଇଛି।
ଖବର ମୁତାବକ ନୟାଗଡ଼ ଜିଲ୍ଲା ଚାନ୍ଦପୁର ଥାନା ଗୋପାଳପୁର ଅଂଚଳର ଲକ୍ଷ୍ମୀଧର ପରିଡା (୨୫) ନାମକ ଜଣେ ଯୁବକ ଭୁବନେଶ୍ୱର ଅଞ୍ଚଳରେ ଜନୈକ ଡାକ୍ତରଙ୍କ ନିକଟରେ କାର୍ଯ୍ୟ କରୁଥିବା ବେଳେ ବାଣପୁର ଅଲାଇଡ଼ିହ ବାଇପାସ ନିକଟସ୍ଥ ଏକ ଭଡା ଘରେ ରହୁଥିଲେ। ସେଠାରେ ଜନୈକ ମହିଳାଙ୍କୁ ପରିବାର ଲୋକଙ୍କ ଅଜାଣତରେ ପ୍ରେମ ବିବାହ କରିଥିଲେ।
ଲକ୍ଷ୍ମୀଧରଙ୍କ ସ୍ତ୍ରୀ ଗର୍ଭବତୀ ଥିବାବେଳେ ଶରୀର ଅସୁସ୍ଥ ଥିବାରୁ ତାଙ୍କୁ ବ୍ରହ୍ମପୁର ମେଡିକାଲକୁ ନେଇଥିଲେ। ସେଠାରେ ଲକ୍ଷ୍ମୀଧରଙ୍କ ସ୍ତ୍ରୀଙ୍କ ମୃତ୍ୟୁ ହୋଇଯିବାରୁ ତାଙ୍କୁ ପୁରୀ ନେଇ ସ୍ୱର୍ଗଦ୍ୱାରରେ ଦାହ କରିଥିଲେ। ତେଣୁ ଲକ୍ଷ୍ମୀଧର ଅବସାଦରେ ଥିବାରୁ ପରିବାର ଲୋକ ବୁଝାସୁଝା କରି ଗତକାଲି ଘରକୁ ନେଇଯାଇଥିଲେ। କିନ୍ତୁ ଆଜି ସକାଳୁ କାହାକୁ ନ ଜଣାଇ ଘରୁ ପଳାଇ ଆସିଥିବା ବେଳେ ଉକ୍ତ ଭଡାଘରେ ଭିତରପଟୁ କବାଟ କିଳି ଆତ୍ମହତ୍ୟା କରିଥିବା ଜଣାଯାଇଛି।
ପରିବାର ଲୋକ ଖବର ପାଇଁ ତାଙ୍କୁ ବାଣପୁର ମେଡିକାଲକୁ ଆଣିଥିବା ବେଳେ ତାଙ୍କର ମୃତ୍ୟୁ ହୋଇଯାଇଥିବା ଡାକ୍ତର କହିଥିଲେ ଏବଂ ସ୍ଥାନୀୟ ପୋଲିସକୁ ସୂଚନା ଦେଇଥିଲେ।
ସୂଚନା ପାଇ ବାଣପୁର ପୋଲିସ ଶବକୁ ଜବତ କରି ବ୍ୟବଚ୍ଛେଦ ପାଇଁ ଡାକ୍ତରଖାନାରେ ମହଜୁଦ ରଖିଛି। ଆସନ୍ତାକାଲି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯିବ ବୋଲି ପୋଲିସ ସୂଚନା ଦେଇଛି।
