ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୭୭ତମ ସ୍ୱାଧୀନତା ଦିବସ ଉତ୍ସବ ପାଳନର ନେତୃତ୍ୱ ନେବ। ନୂଆଦିଲ୍ଲୀର ଐତିହାସିକ ଲାଲକିଲ୍ଲାର ପ୍ରାଚୀର ଉପରୁ ଜାତୀୟ ପତାକା ଉତ୍ତୋଳନ କରି ପ୍ରଧାନମନ୍ତ୍ରୀ ଶ୍ରୀ ମୋଦୀ ଦେଶବାସୀଙ୍କୁ ଉଦ୍ବୋଧନ ଦେବା ସହିତ ଏହି ଜାତୀୟ ଉତ୍ସବ ପାଳନର ଶୁଭାରମ୍ଭ କରିବେ। ଚଳିତବର୍ଷର ସ୍ୱାଧୀନତା ଦିବସରେ ଗତ କିଛି ବର୍ଷ ଧରି ପାଳିତ ହୋଇ ଆସୁଥିବା ଆଜାଦି କା ଅମୃତ ମହୋତ୍ସବର ଉଦ୍ଯାପନ ହେବ।
୨୦୨୧ ମାର୍ଚ୍ଚ ୧୨ରେ ଏହି ମହୋତ୍ସବ ପ୍ରଧାନମନ୍ତ୍ରୀଙ୍କ ଦ୍ୱାରା ଗୁଜରାଟର ସାବରମତି ଆଶ୍ରମରୁ ଆରମ୍ଭ ହୋଇଥିଲା। ଏହି ଅମୃତ ମହୋତ୍ସବର ଉଦ୍ଯାପନ ସହିତ ଆରମ୍ଭ ହେବ ‘ଅମୃତକାଳ’ । ୨୦୪୭ ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା ପାଇଁ ପ୍ରଧାନମନ୍ତ୍ରୀ ଶ୍ରୀ ମୋଦୀ ଯେଉଁ ସ୍ୱପ୍ନ ଦେଖିଛନ୍ତି ଏହି ଅମୃତକାଳରେ ତାହାକୁ ସାକାର କରିବାକୁ ଉଦ୍ୟମ ଆରମ୍ଭ ହେବ । ୭୭ତମ ସ୍ୱାଧୀନତା ଦିବସକୁ ପାଳନ କରିବା ପାଇଁ ବିଭିନ୍ନ ପ୍ରକାର ପଦକ୍ଷେପ ଗ୍ରହଣ କରାଯାଇଛି । ପୂର୍ବବର୍ଷ ତୁଳନାରେ ଚଳିତବର୍ଷ ଏହି ଉତ୍ସବକୁ ଅଧିକ ସଂଖ୍ୟାରେ ଲୋକଙ୍କୁ ନିମନ୍ତ୍ରଣ କରାଯାଇଛି ।
ସ୍ୱତନ୍ତ୍ର ଅତିଥି- ଦେଶର ବିିଭିନ୍ନ କ୍ଷେତ୍ରରେ ପ୍ରତିଷ୍ଠିତ ବ୍ୟକ୍ତି ବିଶେଷ ଏବଂ ସେମାନଙ୍କ ପତି/ପତ୍ନୀଙ୍କୁ ୭୭ତମ ସ୍ୱାଧୀନତା ଦିବସ ଉତ୍ସବ ଦେଖିବାକୁ ନିମନ୍ତ୍ରଣ କରାଯାଇଛି । ସେମାନେ ସ୍ୱତନ୍ତ୍ର ନିମନ୍ତ୍ରିତ ଅତିଥିଭାବେ ଲାଲକିଲ୍ଲାର ଉତ୍ସବ ସ୍ଥଳରେ ଉପସ୍ଥିତ ରହିବେ । ସରକାରଙ୍କ ‘ଜନ ଭାଗିଦାରୀ’ ପ୍ରୟାସରେ ଏଭଳି ପଦକ୍ଷେପ ଗ୍ରହଣ କରାଯାଇଛି ।
ସ୍ୱତନ୍ତ୍ର ଅତିଥିଙ୍କ ମଧ୍ୟରେ ଅଛନ୍ତି ଦେଶର ୬୬୦ପ୍ରାଣବନ୍ତ ଗ୍ରାମର ୪୦୦ରୁ ଅଧିକ ସରପଞ୍ଚ, କୃଷକ ଉତ୍ପାଦକ ସଂଗଠନ ଯୋଜନାର ୨୫୦ ପ୍ରତିନିଧି, ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନାର ୫୦ହିତାଧିକାରୀ, ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନାର ୫୦ଲାଭାର୍ଥୀ, ସେଣ୍ଟ୍ରାଲ ଭିଷ୍ଟା ପ୍ରକଳ୍ପ ଓ ନୂଆ ସଂସଦ ଭବନ ନିର୍ମାଣର ୫୦ଜଣ ଶ୍ରମଯୋଗୀ ନିର୍ମାଣ ଶ୍ରମିକ, ୫୦ଜଣ ଖଦୀ କର୍ମୀ, ୫୦ଜଣ ସୀମାନ୍ତ ସଡକ ନିର୍ମାଣରେ ନିୟୋଜିତ କର୍ମୀ, ଅମୃତ ସରୋବର ଯୋଜନା ଓ ହର୍ ଘର୍ ଜଲ୍ ଯୋଜନାରେ ସମ୍ପୃକ୍ତ ୫୦ଜଣ ଲେଖାଏଁ ବ୍ୟକ୍ତି, ୫୦ଜଣ କରି ପ୍ରାଥମିକ ସ୍କୁଲ ଶିକ୍ଷକ, ନର୍ସ ଓ ମତ୍ସ୍ୟଜୀବୀ । ଏହି ସ୍ୱତନ୍ତ୍ର ଅତିଥିଙ୍କ ମଧ୍ୟରୁ କେତେକଙ୍କୁ ସେମାନଙ୍କ ଦିଲ୍ଲୀ ଅବସ୍ଥାନ କାଳରେ ଜାତୀୟ ଯୁଦ୍ଧ ସ୍ମାରକ ବୁଲି ଦେଖିôବା ସହିତ ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ଶ୍ରୀ ଅଜୟ ଭଟ୍ଟଙ୍କ ସହ ସାକ୍ଷାତ କରିବାର କାର୍ଯ୍ୟସୂଚୀ ଚୂଡାନ୍ତ ହୋଇସାରିଛି । ପ୍ରତ୍ୟେକ ରାଜ୍ୟ/କେନ୍ଦ୍ରଶାସିତ ଅଞ୍ଚଳରୁ ୭୫ଦମ୍ପତିଙ୍କୁ ସେମାନଙ୍କ ପାରମ୍ପରିକ ବେଶ ପୋଷାକ ପରିଧାନ କରି ଲାଲକିଲ୍ଲା ଉତ୍ସବ ଉପଭୋଗ କରିବାର ସୁଯୋଗ ମଧ୍ୟ ଦିଆଯାଇ ଯଥାବିଧି ନିମନ୍ତ୍ରଣ କରାଯାଇଛି ।
ସେଲଫି ପଏଣ୍ଟସ୍:- ମୋଟ ୧୨ଟି ସେଲ୍ଫି ପଏଣ୍ଟ ପ୍ରସ୍ତୁତ କରାଯାଇଛି । ଏହାର ପୃଷ୍ଠଭୂମିରେ ରହିଛି ସରକାରଙ୍କର ବିଭିନ୍ନ ଯୋଜନା ଓ କାର୍ଯ୍ୟକ୍ରମର ସନ୍ତକ । ଏଥିରେ ଜାତୀୟ ଯୁଦ୍ଧ ସ୍ମାରକ, ଇଣ୍ଡିଆ ଗେଟ୍, ବିଜୟ ଚୌକ, ନୂଆଦିଲ୍ଲୀ ରେଳଷ୍ଟେସନ, ପ୍ରଗତି ମଇଦାନ, ରାଜଘାଟ, ଜାମା ମସ୍ଜିଦ୍, ମେଟ୍ରୋ ଷ୍ଟେସନ୍ସ, ରାଜୀବ ଚୌକ ମେଟ୍ରୋ ଷ୍ଟେସନ, ଦିଲ୍ଲୀ ଗେଟ୍ ମେଟ୍ରୋ ଷ୍ଟେସନ, ଆଇଟିସ ମେଟ୍ରୋ ଗେଟ୍, ନୌବତ ଖାନା ଓ ଶୀଶ୍ଗଞ୍ଜ ଗୁରୁଦ୍ୱାରା ଏଥିରେ ସ୍ଥାନ ପାଇଛି ।
ଏଥିରେ ସ୍ଥାନୀତ ସ୍କିମ୍/ ପ୍ରୟାସ ମଧ୍ୟରେ ରହିଛି ଗ୍ଲୋବାଲ ହୋପ୍, ଭ୍ୟାକ୍ସିନ ଓ ଯୋଗ, ଉଜ୍ଜ୍ୱଳା ଯୋଜନା, ମହାକାଶ ଶକ୍ତି, ଡିଜିଟାଲ ଇଣ୍ଡିଆ, ସ୍କିଲ ଇଣ୍ଡିଆ, ଷ୍ଟାର୍ଟ ଅପ୍ ଇଣ୍ଡିଆ, ସ୍ୱଚ୍ଛ ଭାରତ, ସଶକ୍ତ ଭାରତ, ନୟା ଭାରତ, ପ୍ରଧାନମନ୍ତ୍ରୀ ଆବାସ ଯୋଜନା ଓ ଜଳ ଜୀବନ ମିଶନ ।
ଏହି ଉତ୍ସବର ଅଂଶବିଶେଷର ସ୍ୱରୂପ ଏକ ଅନ୍ଲାଇନ ସେଲଫି କଣ୍ଟେଷ୍ଟ (ପ୍ରତିଯୋଗିତା) ଆୟୋଜିତ ହେବ । ମାଏଁ ଗଭ୍ ପୋର୍ଟାଲରେ ପ୍ରତିରକ୍ଷା ମନ୍ତ୍ରଣାଳୟ ଏହି ପ୍ରତିଯୋଗିତାକୁ ଅଗଷ୍ଟ ୧୫ରୁ ୨୦ଯାଏ ଆୟୋଜନ କରିବ । ଲୋକମାନେ ନିର୍ଦ୍ଧାରିତ ସେଲଫି ପଏଣ୍ଟରେ ଏକ ବା ଏକାଧିକ ସ୍ଥାନରେ ସେଲ୍ଫି ନେଇ ମାଏଁ ଗଭ୍ ପ୍ଲାଟଫର୍ମରେ ତାହାକୁ ଅପ୍ଲୋଡ କରି ପ୍ରତିଯୋଗିତାରେ ସାମିଲ ହୋଇପାରିବେ । ପ୍ରତ୍ୟେକ ଇନ୍ଷ୍ଟାଲେସନ (ଅଧିଷ୍ଠାନ)ରୁ ଜଣେ ଲେଖାଏଁ ଏମିତି ୧୨ଜଣ ବିଜେତାଙ୍କୁ ଅନ୍ଲାଇନ ସେଲ୍ଫି କଣ୍ଟେଷ୍ଟରେ ବଛାଯିବ । ପ୍ରତ୍ୟେକ ବିଜେତାଙ୍କୁ ୧୦ହଜାର ଟଙ୍କା ଲେଖାଏଁ ପୁରସ୍କାର ରାଶି ପ୍ରଦାନ କରାଯିବ ।
ଇ-ନିମନ୍ତ୍ରଣ- ସବୁ ସରକାରୀ ନିମନ୍ତ୍ରିତ ଅତିଥିମାନଙ୍କୁ ଆମନ୍ତ୍ରଣ ପୋର୍ଟାଲ ମାଧ୍ୟମରେ ଇ-ନିମନ୍ତ୍ରଣ ପତ୍ର ପ୍ରେରଣ କରାଯାଇଛି । www.aamantran.mod.gov.in ମାଧ୍ୟମରେ ୧୭,୦୦ ଇ -ନିମନ୍ତ୍ରଣ ପତ୍ର ଇତିମଧ୍ୟରେ ପଠାସାରିଲାଣି ।
ଉତ୍ସବ:-ଲାଲକିଲ୍ଲାରେ ପହଞ୍ଚିବା ପରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହ,ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ଶ୍ରୀ ଅଭୟ ଭଟ୍ଟ, ପ୍ରତିରକ୍ଷା ସଚିବ ଶ୍ରୀ ଗିରଧର ଅର୍ମାନେ ସ୍ୱାଗତ କରିବେ । ଏହାପରେ ପ୍ରତିରକ୍ଷା ସଚିବ ପ୍ରଧାନମନ୍ତ୍ରୀଙ୍କୁ ଦିଲ୍ଲୀ ଏରିଆର ଜେନେରାଲ ଅଫିସର କମାଣ୍ଡିଂ (ଜିଓସି) ଲେପ୍ଟନାଣ୍ଟ ଜେନେରାଲ ଧୀରଜ ସେଠଙ୍କ ସହ ପରିଚୟ କରାଇ ଦେବେ । ଏହା ପରେ ଜିଓସି ପ୍ରଧାନମନ୍ତ୍ରୀଙ୍କୁ ଅଭିବାଦନ ମଞ୍ଚକୁ ପାଛୋଟି ନେବେ । ସେଠାରେ ପ୍ରଧାନମନ୍ତ୍ରୀଙ୍କୁ ସେନାର ତିନି ବାହିନୀ ଓ ଦିଲ୍ଲୀ ପୁଲିସ ପକ୍ଷରୁ ଗାର୍ଡ ଅଫ ଅନର (ଅଭିବାଦନ) ପ୍ରଦାନ କରାଯିବ । ପ୍ରଧାନମନ୍ତ୍ରୀ ଏହି ଗାର୍ଡ ଅଫ୍ ଅନରକୁ ପରିଦର୍ଶନ କରିବେ ।
ପ୍ରଧାନମନ୍ତ୍ରୀଙ୍କ ପାଇଁ ଉଦ୍ଦିଷ୍ଟ ଗାର୍ଡ ଅଫ ଅନରରେ ଜଣେ ଲେଖାଏଁ ସାମରିକ ଅଧିକାରୀ ଓ ୨୫ଯବାନ ରହିବେ । ଏଥିରେ ଜଳ, ସ୍ଥଳ ଓ ଆକାଶ ବାହିନୀ ସମେତ ଦିଲ୍ଲୀ ପୁଲିସକୁ ଅନ୍ତର୍ଭୁକ୍ତ କରାଯାଇଛି ।ଏଥର ଏହି ଗାର୍ଡ ଅଫ ଅନର ସେବା ଭାରତୀୟ ସ୍ଥଳସେନାର ନେତୃତ୍ୱରେ ଅନୁଷ୍ଠିତ ହେଉଛି । ମେଜର ବିକାଶ ସଙ୍ଗୱାନ ଗାର୍ଡ ଅଫ ଅନରରେ ନେତୃତ୍ୱ ନେବେ ।
ସେନା କଣ୍ଟିନେଣ୍ଟର ମେଜର ଇନ୍ଦ୍ରଜିତ ସଚିନ, ନୌସେନା କଣ୍ଟିନେଣ୍ଟର ଲେପ୍ଟନାଣ୍ଟ କମାଣ୍ଡର ଏମ୍.ଭି ରାହୁଲ ରାମନ ଓ ବାୟୁ ସେନାର ସ୍କ୍ୱାର୍ଡନ ଲିଡର ଆକାଶ ଗଙ୍ଗହାସ ପ୍ରଧାନମନ୍ତ୍ରୀଙ୍କୁ ଗାର୍ଡ ଅଫ ଅନର ପ୍ରଦାନର ନେତୃତ୍ୱ ନେବେ । ଦିଲ୍ଲୀ ପୁଲିସ କଣ୍ଟିନେଣ୍ଟର ଗାର୍ଡ ଅଫ ଅନର ଅତିରିକ୍ତ ଡିସିପି ସନ୍ଧ୍ୟା ସ୍ୱାମୀଙ୍କ ନେତୃତ୍ୱରେ ପ୍ରଦାନ କରାଯିବ ।
ଗାର୍ଡ ଅଫ ଅନର ପରିଦର୍ଶନ କରିବା ପରେ ପ୍ରଧାନମନ୍ତ୍ରୀ ଲାଲକିଲ୍ଳାର ପ୍ରାଚୀର ଉପରକୁ ଯାତ୍ରା କରିବେ । ସେଠାରେ ତାଙ୍କୁ ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହ, ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ଶ୍ରୀ ଅଜୟ ଭଟ୍ଟ, ଚିଫ ଅଫ୍ ଡିଫେନ୍ସ ଷ୍ଟାଫ୍ ଜେନେରାଲ ଅନିଲ ଚୌହାନ, ସ୍ଥଳସେନା ମୁଖ୍ୟ ଜେନେରାଲ୍ ମନୋଜ ପାଣ୍ଡେ, ନୌସେନା ମୁଖ୍ୟ ଆଡମିରାଲ ଆର ହରି କୁମାର ଓ ବାୟୁ ସେନାର ମୁଖ୍ୟ ଏୟାର ଚିଫ୍ ମାର୍ଶାଲ ଭି.ଆର ଚୌଧୁରୀ ସ୍ୱାଗତ ଜଣାଇବେ । ଲାଲକିଲା ପ୍ରାଚୀର ଉପରେ ଜାତୀୟ ପତାକା ଉତ୍ତୋଳନ କରିବାରେ ପ୍ରଧାନମନ୍ତ୍ରୀଙ୍କୁ ଦିଲ୍ଲୀ ଜିଓସି ସାହାଯ୍ୟ ସହଯୋଗ କରିବେ । ଅତିିରିକ୍ତ ଭାବେ ମେଜର ନନ୍ଦିତା ନାୟାର ଓ ଜସ୍ମିନ କୌର ଏଥିରେ ସହଯୋଗ ଯୋଗାଇବେ
ଜାତୀୟ ତ୍ରିରଙ୍ଗା ଉତ୍ତୋଳନ ପରେ ଏହାକୁ ରାଷ୍ଟ୍ରୀୟ ସଲାମ ପ୍ରଦାନ କରାଯିବ । ସେନାର ବାଦ୍ୟ ପରିବେଷଣ ସହିତ ଜାତୀୟ ସଙ୍ଗୀତ ପରିବେଷଣ କରାଯିବାର କାର୍ଯ୍ୟକ୍ରମ ରହିଛି । ସେନାର ବାଦ୍ୟ କାର୍ଯ୍ୟକ୍ରମକୁ ନାଏବ ସୁବେଦାର ଜତିନ୍ଦର ସିଂହ ପରିଚାଳନା କରିବେ । ତ୍ରିରଙ୍ଗା ଉତ୍ତୋଳନ ପରେ ଏହାକୁ ୨୧ ତୋପ ସଲାମୀ ପ୍ରଦାନ କରାଯିବ । ଏହି କାମ ୮୭୧୧ ôଫିଲ୍ଡ ବ୍ୟାଟେରୀ ପରିଚାଳନା କରିବ ଏବଂ ନାଏବ ସବେଦାର ଅନୁପ ସିିଂହ ଏହାର ନେତୃତ୍ୱ ନେବେ ।
ପ୍ରଧାନମନ୍ତ୍ରୀଙ୍କ ଦ୍ୱାରା ଜାତୀୟ ପତାକା ଉତ୍ତୋଳନ ହେବା ପର ଦୁଇ ଧ୍ରୁବ-୩ ହେଲିକୋପ୍ଟର ଯୋଗେ ସଭାସ୍ଥଳରେ ପୁଷ୍କ ବୃଷ୍ଟି କରାଯିବ । ତାଙ୍କ ଭାଷଣ ଶେଷ ହେବାପରେ ଏନ୍ସିସି ପକ୍ଷରୁ ଜାତୀୟ ସଂଗୀତ ଗାନ କରାଯିବ । ଦେଶର ବିଭିନ୍ନ ସ୍କୁଲରୁ ଏଥିପାଇଁ ୧୧୦୦ ଏନ୍ସିସି କ୍ୟାଡେଟ୍କୁ ମନୋନୀତ କରାଯାଇଛି । ଉତ୍ସବର ଅଂଶସ୍ୱରୂପ ଏନ୍ସିସି କ୍ୟାଡେଟମାନେ ପାରମ୍ପରିକ ପୋଷାକରେ ଜ୍ଞାନପଥରେ ବସିବେ ଏବଂ ସେଥିପାଇଁ ଆବଶ୍ୟକ ବ୍ୟବସ୍ଥା କରଯାଇଛି । ଏହାଛଡା ଲାଲକିଲ୍ଲାରେ ଯେଉଁ ଫୁଲ ସଜ୍ଜା ହେବ ସେଥିରେ ଜି-୨୦ର ଚିହ୍ନ(ଲୋଗୋ) ଏଥର ରହିବ ।
