ଲକ୍ଷ୍ନୌ: ଉତ୍ତରପ୍ରଦେଶର ପ୍ରୟାଗରାଜରେ ତୁଲସୀ ପିଠାଧୀଶ୍ୱର ଜଗଦଗୁରୁ ସ୍ଵାମୀ ରାମଭଦ୍ରାଚାର୍ଯ୍ୟ ପ୍ରଧାନମନ୍ତ୍ରୀ ମୋଦୀ ଏବଂ ଲୋକସଭା ନିର୍ବାଚନ ସମ୍ପର୍କରେ ଏକ ବଡ଼ ବିବୃତ୍ତି ଦେଇଛନ୍ତି। ସ୍ଵାମୀ ରାମଭଦ୍ରାଚାର୍ଯ୍ୟ କହିଛନ୍ତି ଯେ, ୨୦୨୪ ମସିହାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୁଣି ଥରେ ଦେଶର ପ୍ରଧାନମନ୍ତ୍ରୀ ହେବେ। ୨୦୨୪ ଲୋକସଭା ନିର୍ବାଚନର ଫଳାଫଳ ବିଜେପି ସପକ୍ଷରେ ଭଲ ହେବ ବୋଲି ସେ ଦାବି କରିଛନ୍ତି। ଏହି ସମୟରେ ବିରୋଧୀ ଦଳର ମେଣ୍ଟ I.N.D.I.A.କୁ ସ୍ଵାମୀ ରାମଭଦ୍ରାଚାର୍ଯ୍ୟ କୌରବଙ୍କ ସହ ତୁଳନା କରିଛନ୍ତି। ସ୍ଵାମୀ ରାମଭଦ୍ରାଚାର୍ଯ୍ୟ କହିଛନ୍ତି ଯେ, ୨୦୨୪ ଲୋକସଭା ନିର୍ବାଚନରେ ପାଣ୍ଡବ ଏବଂ କୌରବଙ୍କ ମଧ୍ୟରେ ଲଢେଇ ହେବ ଏବଂ ପୁଣି ଥରେ ପାଣ୍ଡବ ଜିତିବେ।
ଅଯୋଧ୍ୟା ପରେ ଜ୍ଞାନବାପୀ ଏବଂ ମଥୁରା ଶ୍ରୀ କୃଷ୍ଣ ଜନ୍ମଭୂମି ବିବାଦ ସମ୍ପର୍କରେ ସ୍ବାମୀ ରାମଭଦ୍ରାଚାର୍ଯ୍ୟ କହିଛନ୍ତି ଯେ, ଉଭୟ ମାମଲାରେ ହିନ୍ଦୁମାନେ ଜିତିବେ। ଅଯୋଧ୍ୟା ମାମଲାରେ ସୁପ୍ରିମକୋର୍ଟରେ ପ୍ରମାଣ ଏବଂ ତଥ୍ୟ ଉପସ୍ଥାପନ କରିଥିବା ରାମଭଦ୍ରାଚାର୍ଯ୍ୟ କହିଛନ୍ତି ଯେ, ଯଦି ସରକାର ଏବଂ କୋର୍ଟ ତାଙ୍କୁ ଡାକନ୍ତି ତେବେ ସେ ନିଶ୍ଚିତ ସେଠାକୁ ଯିବେ। ହିନ୍ଦୁମାନଙ୍କ ତରଫରୁ ପକ୍ଷ ରଖିବେ ଏବଂ ତଥ୍ୟ ମଧ୍ୟ ଉପସ୍ଥାପନ କରିବେ। ଏହି ସମୟରେ ସ୍ବାମୀ ରାମଭଦ୍ରାଚାର୍ଯ୍ୟ ISRO ବୈଜ୍ଞାନିକମାନଙ୍କୁ ଆଦିତ୍ୟ-ଏଲ୧ ଉତକ୍ଷେପଣ କରିଥିବାରୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି ଯେ, ଚନ୍ଦ୍ରଯାନ- ୩ ଭଳି ଏହା ମଧ୍ୟ ସଫଳତାର ସହ କାମ କରିବ।
ସ୍ଵାମୀ ପ୍ରସାଦ ମୌର୍ଯ୍ୟ ବ୍ରାହ୍ମଣବାଦକୁ ଟାର୍ଗେଟ କରିଥିଲେ:
ଉଲ୍ଲେଖ ଯୋଗ୍ୟ ଯେ, ସ୍ଵାମୀ ରାମଭଦ୍ରାଚାର୍ଯ୍ୟଙ୍କ ବିଷୟରେ ଏସପି ନେତା ସ୍ୱାମୀ ପ୍ରସାଦ ମୌର୍ଯ୍ୟ କହିଥିଲେ ଯେ ବ୍ରାହ୍ମଣ ଧର୍ମର ମୂଳ ଅତ୍ୟନ୍ତ ଗଭୀର ଏବଂ ବ୍ରାହ୍ମଣ ଧର୍ମକୁ ହିନ୍ଦୁ ଧର୍ମ ବୋଲି କୁହାଯାଉଛି। ମୌର୍ଯ୍ୟ ଦାବି କରିଛନ୍ତି ଯେ, ହିନ୍ଦୁ ଧର୍ମ ପ୍ରକୃତରେ ପଛୁଆ, ଆଦିବାସୀ ଏବଂ ଦଳିତଙ୍କୁ ଏକ ବୁଢିଆଣୀ ଜାଲରେ ପକାଇବା ପାଇଁ ଏକ ଷଡଯନ୍ତ୍ର। ଯଦି ହିନ୍ଦୁ ଗୋଟିଏ ଧର୍ମ ହୋଇଥାନ୍ତା, ତେବେ ସେଠାରେ ଦଳିତ ତଥା ପଛୁଆ ଲୋକଙ୍କୁ ମଧ୍ୟ ସମ୍ମାନ ଦିଆଯାଇଥାନ୍ତା। ବ୍ରାହ୍ମଣବାଦ ମଧ୍ୟ ସମସ୍ତ ଅସମାନତାର କାରଣ। ହିନ୍ଦୁ ନାମକ କୌଣସି ଧର୍ମ ନାହିଁ, ହିନ୍ଦୁ ଧର୍ମ କେବଳ ଏକ ପ୍ରତାରଣା।