ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସିଂ ମାଧ୍ୟମରେ ଜାତୀୟ ରୋଜଗାର ମେଳାକୁ ସମ୍ବୋଧିତ କରିବା ସହ ବିଭିନ୍ନ ସରକାରୀ ବିଭାଗ ଏବଂ ସଂଗଠନରେ ନୂତନ ଭାବେ ନିଯୁକ୍ତି ପାଇଥିବା କର୍ମଚାରୀମାନଙ୍କୁ ୫୧,୦୦୦ରୁ ଅଧିକ ନିଯୁକ୍ତି ପତ୍ର ବଣ୍ଟନ କରିଥିଲେ। ଦେଶର ବିଭିନ୍ନ ମନ୍ତ୍ରଣାଳୟରୁ ମନୋନୀତ ହୋଇଥିବା କର୍ମଚାରୀମାନେ ରେଳ ମନ୍ତ୍ରଣାଳୟ, ଡାକ ବିଭାଗ, ଗୃହ ମନ୍ତ୍ରଣାଳୟ, ରାଜସ୍ୱ ବିଭାଗ, ଉଚ୍ଚଶିକ୍ଷା ବିଭାଗ, ବିଦ୍ୟାଳୟ ଶିକ୍ଷା ଓ ସାକ୍ଷରତା ବିଭାଗ ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ସମେତ ବିଭିନ୍ନ ମନ୍ତ୍ରଣାଳୟ/ବିଭାଗରେ ସରକାରଙ୍କ ସହ ଯୋଗ ଦେବେ। ପ୍ରଧାନମନ୍ତ୍ରୀଙ୍କ ଅଭିଭାଷଣ ସମୟରେ ଦେଶର ୩୭ଟି ସ୍ଥାନକୁ ମେଳା ସହ ଯୋଡ଼ାଯାଇଥିଲା।
ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଗତବର୍ଷ ଅକ୍ଟୋବରରେ ରୋଜଗାର ମେଳା ଆରମ୍ଭ ହୋଇଥିବାବେଳେ ବର୍ତ୍ତମାନ ରୋଜଗାର ମେଳାର ଯାତ୍ରା ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟରେ ପହଞ୍ଚିଛି ଏବଂ କେନ୍ଦ୍ର ଓ ଏନଡିଏ ଶାସିତ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ବିଭିନ୍ନ ରୋଜଗାର ମେଳାରେ ଲକ୍ଷ ଲକ୍ଷ ଯୁବକଙ୍କୁ ସରକାରୀ ଚାକିରି ପାଇଁ ନିଯୁକ୍ତି ପତ୍ର ପ୍ରଦାନ କରାଯାଇଛି। ଆଜି ମଧ୍ୟ ୫୦ ହଜାରରୁ ଅଧିକ ଯୁବକଯୁବତୀଙ୍କୁ ସରକାରୀ ଚାକିରି ଦିଆଯାଇଛି। ପ୍ରଧାନମନ୍ତ୍ରୀ ନବ ନିଯୁକ୍ତ ବ୍ୟକ୍ତି ଏବଂ ସେମାନଙ୍କ ପରିବାରକୁ ଅଭିନନ୍ଦନ ଜଣାଇଥିଲେ।
ବିଭିନ୍ନ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ଆୟୋଜିତ ରୋଜଗାର ମେଳା ଯୁବଗୋଷ୍ଠୀଙ୍କ ଭବିଷ୍ୟତ ପ୍ରତି ସରକାରଙ୍କ ପ୍ରତିବଦ୍ଧତାର ସଙ୍କେତ ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେଉଁ କ୍ଷେତ୍ରରେ ମିଶନ ମୋଡରେ କାମ ଚାଲିଛି। ନିଯୁକ୍ତି ପ୍ରକ୍ରିୟାରେ ଯୁବବର୍ଗଙ୍କ ବିଶ୍ୱାସ ବଢ଼ୁଥିବାରୁ ଶ୍ରୀ ମୋଦୀ କହିଥିଲେ, “ଆମେ କେବଳ ନିଯୁକ୍ତି ପ୍ରଦାନ କରୁନାହୁଁ ବରଂ ଏକ ସ୍ୱଚ୍ଛ ବ୍ୟବସ୍ଥା ମଧ୍ୟ ବଜାୟ ରଖୁଛୁ। ସେ କହିଛନ୍ତି ଯେ ସରକାର କେବଳ ପ୍ରକ୍ରିୟାକୁ ସୁବ୍ୟବସ୍ଥିତ କରିବା ପାଇଁ ନୁହେଁ ବରଂ ପରୀକ୍ଷା ପ୍ରକ୍ରିୟାର ପୁନର୍ଗଠନ ପାଇଁ ପ୍ରୟାସ କରୁଛନ୍ତି। କର୍ମଚାରୀ ଚୟନ ଚକ୍ର ଅଧୀନରେ ନିଯୁକ୍ତି ପାଇଁ ଲାଗିଥିବା ସମୟକୁ ମଧ୍ୟ ଅଧାକୁ ହ୍ରାସ କରାଯାଇଛି ବୋଲି ସେ ଉଲ୍ଲେଖ କରିଛନ୍ତି। ନିଯୁକ୍ତି ବିଜ୍ଞପ୍ତିଠାରୁ ନିଯୁକ୍ତି ପତ୍ର ମଧ୍ୟରେ ସାମଗ୍ରିକ ସମୟ ଯଥେଷ୍ଟ ହ୍ରାସ ପାଇଛି ବୋଲି ଶ୍ରୀ ମୋଦୀ ସ୍ପଷ୍ଟ କରିଛନ୍ତି। ଏସଏସସି ଅଧୀନରେ କେତେକ ପରୀକ୍ଷା ବିଷୟରେ ପ୍ରଧାନମନ୍ତ୍ରୀ ମୋଦୀ ସୂଚନା ଦେଇଛନ୍ତି ଯେ ଏହି ପରୀକ୍ଷା ବର୍ତ୍ତମାନ ହିନ୍ଦୀ ଏବଂ ଇଂରାଜୀ ବ୍ୟତୀତ ୧୩ଟି ଭିନ୍ନ ଭିନ୍ନ ଆଞ୍ଚଳିକ ଭାଷାରେ ଅନୁଷ୍ଠିତ ହେଉଛି ଯାହା ଫଳରେ ପରୀକ୍ଷାର୍ଥୀମାନେ ଭାଷା ପ୍ରତିବନ୍ଧକ ଭାଙ୍ଗିବା ସହଜ କରିପାରିବେ।
ବିକାଶର ଦ୍ରୁତ ଗତି ବିଷୟରେ ଉଲ୍ଲେଖ କରି ପ୍ରତ୍ୟେକ କ୍ଷେତ୍ରରେ ନୂତନ ନିଯୁକ୍ତି ସୁଯୋଗ ସୃଷ୍ଟି କରୁଛି। ମିଳିତ ଜାତିସଂଘ ଦ୍ୱାରା ଶ୍ରେଷ୍ଠ ପର୍ଯ୍ୟଟନ ଗ୍ରାମ ଭାବେ ପୁରସ୍କୃତ ହୋଇଥିବା ଧୋର୍ଡୋ ଗ୍ରାମ ଏବଂ ହୋୟଶାଳା ମନ୍ଦିର ପରିସର ଓ ଶାନ୍ତି ନିକେତନ ପାଇଁ ବିଶ୍ୱ ଐତିହ୍ୟ ସ୍ଥଳର ମାନ୍ୟତା ପାଇଥିବା କଥା ସେ ଉଲ୍ଲେଖ କରିଥିଲେ। ଏହି ବିକାଶ ଏବଂ ପର୍ଯ୍ୟଟନ ବୃଦ୍ଧି ଯୁବପିଢ଼ିଙ୍କ ପାଇଁ ନୂତନ ସୁଯୋଗ ସୃଷ୍ଟି କରିବ। ସେହିଭଳି କ୍ରୀଡ଼ାକ୍ଷେତ୍ରରେ ଉନ୍ନତି ମଧ୍ୟ ନୂଆ ବାଟ ସୃଷ୍ଟି କରୁଛି ବୋଲି ସେ କହିଛନ୍ତି।
“ସରକାର ପାରମ୍ପରିକ କ୍ଷେତ୍ରକୁ ସୁଦୃଢ଼ କରୁଛନ୍ତି ଯାହା ନିଯୁକ୍ତି ସୁଯୋଗ ପ୍ରଦାନ କରୁଛି ଏବଂ ଅକ୍ଷୟ ଶକ୍ତି, ମହାକାଶ, ଅଟୋମେସନ୍ ଏବଂ ପ୍ରତିରକ୍ଷା ରପ୍ତାନି ଭଳି ନୂତନ କ୍ଷେତ୍ରକୁ ପ୍ରୋତ୍ସାହିତ କରୁଛି”, ପ୍ରଧାନମନ୍ତ୍ରୀ କହିଥିଲେ । ଡ୍ରୋନ୍ ଟେକ୍ନୋଲୋଜି କ୍ଷେତ୍ରରେ ନୂଆ ବାଟ ଖୋଲିବା ଉପରେ ଆଲୋକପାତ କରିବା ସହ ଫସଲ ଆକଳନ ଓ ଏହାର ସହାୟତାରେ ହେଉଥିବା ପୋଷକ ତତ୍ତ୍ୱ ସିଞ୍ଚନର ଉଦାହରଣ ଦେଇଥିଲେ। ସ୍ଵାମୀତ୍ୱ ଯୋଜନା ଅଧୀନରେ ଜମି ମ୍ୟାପିଂ ପାଇଁ ଡ୍ରୋନ ବ୍ୟବହାର କରାଯାଉଛି ବୋଲି ପ୍ରଧାନମନ୍ତ୍ରୀ ସୂଚନା ଦେଇଥିଲେ । ହିମାଚଳ ପ୍ରଦେଶର ଲାହୋଲ ସ୍ପିତି ଅଞ୍ଚଳରେ ଡ୍ରୋନ୍ ବ୍ୟବହାର କରି ଔଷଧ ଯୋଗାଣ ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ, ଯାହା ଦ୍ୱାରା ଆନୁମାନିକ ସମୟ ୨ ଘଣ୍ଟାରୁ ୨୦-୩୦ ମିନିଟ୍ କୁ ହ୍ରାସ ପାଇଥିଲା। ଷ୍ଟାର୍ଟଅପ୍ ଗୁଡିକ ମଧ୍ୟ ଡ୍ରୋନରୁ ବହୁତ ଲାଭବାନ ହୋଇଛନ୍ତି ଏବଂ ନୂତନ ଡିଜାଇନ୍ ଏବଂ ଟେକ୍ନୋଲୋଜି ସୃଷ୍ଟି କରିବାରେ ସାହାଯ୍ୟ କରିଛନ୍ତି ।
୧୦ ବର୍ଷ ପୂର୍ବେ ମାତ୍ର ୩୦ ହଜାର କୋଟି ଟଙ୍କା ତୁଳନାରେ ୧.୨୫ ଲକ୍ଷ କୋଟିରୁ ଅଧିକ ବିକ୍ରି ହୋଇଥିବା ଖଦିର ପୁନରୁତ୍ଥାନ ସମ୍ପର୍କରେ ପ୍ରଧାନମନ୍ତ୍ରୀ ସ୍ପର୍ଶ କରିଥିଲେ । ଏହା ଖଦି ଓ ଗ୍ରାମୋଦ୍ୟୋଗ କ୍ଷେତ୍ରରେ ଅନେକ ନିଯୁକ୍ତି ସୃଷ୍ଟି କରିଛି, ବିଶେଷ କରି ମହିଳାମାନେ ଉପକୃତ ହୋଇଛନ୍ତି।
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ କୌଣସି ଦେଶର ଯେକୌଣସି ପ୍ରତିଯୋଗିତାମୂଳକ ଲାଭକୁ ସମ୍ପୂର୍ଣ୍ଣ ରୂପେ କାର୍ଯ୍ୟକାରୀ କରିବା ପାଇଁ ଯୁବକମାନଙ୍କର ଶକ୍ତି ଆବଶ୍ୟକ । ଦକ୍ଷତା ଏବଂ ଶିକ୍ଷାର ପଦକ୍ଷେପ ବିଷୟରେ ସେ ଉଲ୍ଲେଖ କରିଥିଲେ ଯାହା ଯୁବପିଢ଼ିଙ୍କୁ ନୂତନ ସୁଯୋଗର ସମ୍ପୂର୍ଣ୍ଣ ଫାଇଦା ଉଠାଇବା ପାଇଁ ସଜ୍ଜିତ କରୁଛି । ନୂଆ ଜାତୀୟ ଶିକ୍ଷା ନୀତି, ନୂତନ ମେଡିକାଲ କଲେଜ, ଆଇଆଇଟି, ଆଇଆଇଏମ୍ ଏବଂ ଆଇଆଇଆଇଟି ପ୍ରତିଷ୍ଠା ହୋଇଛି ଏବଂ କୋଟି କୋଟି ଯୁବକଙ୍କୁ ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନାରେ ତାଲିମ ଦିଆଯାଇଛି। ବିଶ୍ୱକର୍ମା ବନ୍ଧୁମାନଙ୍କ ପାଇଁ ପିଏମ୍ ବିଶ୍ୱକର୍ମା ଯୋଜନା ଆରମ୍ଭ କରାଯାଇଛି । ପୁନରୁଦ୍ଧାର ଏବଂ ଉନ୍ନତି ବର୍ତ୍ତମାନର ଆଦେଶ ହୋଇଥିବାରୁ ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ ପିଏମ ବିଶ୍ୱକର୍ମା ଯୋଜନା ବିଶ୍ୱକର୍ମାମାନଙ୍କୁ ଆଧୁନିକ ଜ୍ଞାନକୌଶଳ ଏବଂ ଉପକରଣ ସହିତ ଯୋଡୁଛି ।
ଯୁବକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ରାଷ୍ଟ୍ର ନିର୍ମାଣ ପ୍ରକ୍ରିୟାର ଏକ ଗୁରୁତ୍ୱପୂର୍ଣ୍ଣ ଅଂଶ ଯାହା ଭାରତକୁ ଏକ ବିକଶିତ ରାଷ୍ଟ୍ର ରେ ପରିଣତ କରିବାପାଇଁ ପଥ ପ୍ରଶସ୍ତ କରିବ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ନିଯୁକ୍ତିପ୍ରାପ୍ତ ବ୍ୟକ୍ତିମାନେ ହିଁ ସରକାରୀ ଯୋଜନାଗୁଡ଼ିକୁ ଆଗେଇ ନେବେ ଏବଂ ଏହାକୁ ତୃଣମୂଳ ସ୍ତରରେ କାର୍ଯ୍ୟକାରୀ କରିବେ । “ଆଜି, ଆପଣମାନେ ସମସ୍ତେ ଆମର ରାଷ୍ଟ୍ର ନିର୍ମାଣ ଯାତ୍ରାରେ ଗୁରୁତ୍ୱପୂର୍ଣ୍ଣ ସହଯୋଗୀ ପାଲଟିଛନ୍ତି” ବୋଲି ପ୍ରଧାନମନ୍ତ୍ରୀ କହିଥିଲେ ଏବଂ ଭାରତର ଲକ୍ଷ୍ୟକୁ ସାକାର କରିବା ପାଇଁ ସେମାନଙ୍କର ସମସ୍ତ ଶକ୍ତି ସହିତ ଯୋଗଦାନ କରିବାକୁ ଅନୁରୋଧ କରିଥିଲେ । ପାଠପଢ଼ା ଜାରି ରଖିବା ସହ ଆଇଜିଓଟି କର୍ମଯୋଗୀ ପୋର୍ଟାଲର ବ୍ୟବହାର କରିବାକୁ ସେ ଅନୁରୋଧ କରିଛନ୍ତି। ଆପଣଙ୍କ ପ୍ରତ୍ୟେକ ପଦକ୍ଷେପ ଦେଶକୁ ବିକାଶ ପଥରେ ଦ୍ରୁତ ଗତିରେ ଆଗେଇ ନେବାରେ ସହାୟକ ହେବ ବୋଲି ସେ କହିଥିଲେ। ଅଭିଭାଷଣ ଶେଷ କରି ପ୍ରଧାନମନ୍ତ୍ରୀ ଶରତ ପୂର୍ଣ୍ଣିମାର ପବିତ୍ର ଅବସରକୁ ଉଲ୍ଲେଖ କରିଥିଲେ ଏବଂ ଦେଶ ଭିତରେ ରୋଜଗାର ସୃଷ୍ଟି ପାଇଁ ଏକ ମାଧ୍ୟମ ଭୋକାଲ୍ ଫର୍ ଲୋକାଲର ବାର୍ତ୍ତା ପ୍ରଚାର କରିବାକୁ ନବ ନିଯୁକ୍ତ ମାନଙ୍କୁ ଅନୁରୋଧ କରିଥିଲେ ।
ପୃଷ୍ଠଭୂମି
ସାରା ଦେଶରେ ୩୭ଟି ସ୍ଥାନରେ ରୋଜଗାର ମେଳା ଅନୁଷ୍ଠିତ ହୋଇଛି | ଏହି ପଦକ୍ଷେପକୁ ସମର୍ଥନ କରି କେନ୍ଦ୍ର ସରକାରଙ୍କ ବିଭାଗ ଏବଂ ରାଜ୍ୟ ସରକାର/କେନ୍ଦ୍ରଶାସିତ ଅଞ୍ଚଳରେ ନିଯୁକ୍ତି ପ୍ରଦାନ କରାଯାଉଛି ଦେଶବ୍ୟାପୀ ଚୟନ ହୋଇଥିବା ନୂତନ ନିଯୁକ୍ତିପାଇଥିବା କର୍ମଚାରୀମାନେ ରେଳ ମନ୍ତ୍ରଣାଳୟ, ଡାକ ବିଭାଗ, ଗୃହ ମନ୍ତ୍ରଣାଳୟ, ରାଜସ୍ୱ ବିଭାଗ, ଉଚ୍ଚଶିକ୍ଷା ବିଭାଗ, ବିଦ୍ୟାଳୟ ଶିକ୍ଷା ଓ ସାକ୍ଷରତା ବିଭାଗ ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ସମେତ ବିଭିନ୍ନ ମନ୍ତ୍ରଣାଳୟ/ବିଭାଗରେ ସରକାରଙ୍କ ସହ ଯୋଗ ଦେବେ।
ରୋଜଗାର ମେଳା ହେଉଛି ନିଯୁକ୍ତି ସୃଷ୍ଟିକୁ ସର୍ବୋଚ୍ଚ ପ୍ରାଥମିକତା ଦେବା ପାଇଁ ପ୍ରଧାନମନ୍ତ୍ରୀଙ୍କ ପ୍ରତିଶ୍ରୁତି ପୂରଣ ଦିଗରେ ଏକ ପଦକ୍ଷେପ । ରୋଜଗାର ମେଳା ଅଧିକ ନିଯୁକ୍ତି ସୃଷ୍ଟି ରେ ଏକ ଉତପ୍ରେରକ ଭାବରେ କାର୍ଯ୍ୟ କରିବ ଏବଂ ଯୁବକମାନଙ୍କୁ ସେମାନଙ୍କ ସଶକ୍ତୀକରଣ ଏବଂ ଜାତୀୟ ବିକାଶରେ ଅଂଶଗ୍ରହଣ ପାଇଁ ଅର୍ଥପୂର୍ଣ୍ଣ ସୁଯୋଗ ପ୍ରଦାନ କରିବ ବୋଲି ଆଶା କରାଯାଉଛି ।
ଆଇଜିଓଟି କର୍ମଯୋଗୀ ପୋର୍ଟାଲର ଏକ ଅନଲାଇନ୍ ମଡ୍ୟୁଲ୍ କର୍ମଯୋଗୀ ପ୍ରାରମ୍ଭ ମାଧ୍ୟମରେ ନୂତନ ଭାବେ ନିଯୁକ୍ତି ପାଇଥିବା ଛାତ୍ରଛାତ୍ରୀମାନେ ନିଜକୁ ପ୍ରଶିକ୍ଷଣ ଦେବାର ସୁଯୋଗ ପାଉଛନ୍ତି, ଯେଉଁଠାରେ ‘ଯେକୌଣସି ଡିଭାଇସ୍’ ଶିକ୍ଷଣ ଫର୍ମାଟ ପାଇଁ ୭୫୦ରୁ ଅଧିକ ଇ-ଲର୍ଣ୍ଣିଂ ପାଠ୍ୟକ୍ରମ ଉପଲବ୍ଧ କରାଯାଇଛି।
