ନୂଆଦିଲ୍ଲୀ: ଆଜି ସୁପ୍ରିମ କୋର୍ଟ ଚଣ୍ଡିଗଡ ମେୟର ନିର୍ବାଚନ ନେଇ କ୍ଷୁବ୍ଧ ହୋଇଛନ୍ତି। ମୁଖ୍ୟ ବିଚାରପତି ଜଷ୍ଟିସ ଡି ୱାଇ ଚନ୍ଦ୍ରଚୁଡ କହିଛନ୍ତି ଏହି ନିର୍ବାଚନରେ ଗଣତନ୍ତ୍ରର ହତ୍ୟା କରାଯାଇଛି। ଚଣ୍ଡିଗଡ ମେୟର ନିର୍ବାଚନରେ ପ୍ରିଜାଇଡିଂ ଅଫିସର ଭୋଟ ଫିକ୍ସିଂ ଅଭିଯୋଗ ହୋଇଥିଲା। ଯାହାର ଶୁଣାଣି କରି ଆଜି କୋର୍ଟ ଏପରି ମନ୍ତବ୍ୟ ଦେଇଛନ୍ତି।
ଚଣ୍ଡିଗଡ ମେୟର ନିର୍ବାଚନରେ ବିଜେପି ପ୍ରାର୍ଥୀ ମନୋଜ ସୁନାକର ଆପ ପ୍ରାର୍ଥୀଙ୍କୁ ପରାଜିତ କରିଥିଲେ। ଯେଉଁଥିରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। କାରଣ ଆପ ପାଖରେ ସଂଖ୍ୟା ଗରିଷ୍ଠତା ଥିବା ବେଳେ ସେମାନେ କିପରି ହାରିଲେ ବୋଲି ତନାଘନା କରିଥିଲେ।
ପରେ ଜଣାପଡିଥିଲା ଯେ, ଏହି ଭୋଟ ବେଳେ କାଉନସିଲରଙ୍କ ୮ଟି ଭୋଟ ନାକଚ ହୋଇଯାଇଛି। ଏହା ଭୋଟ ଫିକ୍ସି ବୋଲି ଆପ କାଉନସିଲର ଦାବୀ କରି ଘେରାଉ କଲେ। ପରେ ଏହି ପକ୍ରିୟାକୁ ରେକର୍ଡ ହେଉଥିବା ଭିଡିଓ ଯାଞ୍ଚ କରାଯାଇଥିଲା। ସେଥିରେ ଦେଖାଯାଇଥିଲା ଯେ, ପ୍ରିଜାଇଡିଂ ଅଫିସର ବାଲଟ ପେପରେ ଦସ୍ତଖତ କରିବା ବଦଳରେ ତା ଉପରେ ଗାରାଗାରି କରୁଛନ୍ତି।
ଏହାକୁ ନେଇ ସେଠାରେ ଆପ ସଦସ୍ୟ ତୁମ୍ବିତୋଫାନ କରିଥିଲେ ମଧ୍ୟ ପ୍ରିଜାଇଡିଂ ଅଫିସର ବିଜେପି ପ୍ରାର୍ଥୀଙ୍କୁ ମେୟର ବୋଲି ଘୋଷଣା କରିଥିଲେ। ଏହାପରେ ମାମଲା କୋର୍ଟକୁ ଯିବା ପରେ ବିଚାରପତି ଭିଡିଓ ଯାଞ୍ଚ କରିଥିଲେ। ଏଥିରେ ପରିଲକ୍ଷିତ ହୋଇଥିଲା ଯେ, ପ୍ରିଜାଇଡିଂ ଅଫିସର ଅନୀଲ ମନୀଷ ବାଲଟ ଉପରେ ଗାରାଗାରି କରି ତାହାକୁ ନାକଚ କରି ଦେଇଛନ୍ତି।
ଏହି ଭିଡିଓ ଦେଖିବା ପରେ ସୁପ୍ରିମ କୋର୍ଟ କ୍ଷୁବ୍ଧ ହେବା ସହିତ ଗଣତନ୍ତ୍ରକୁ ହତ୍ୟା କରାଯାଇଛି ବୋଲି କହିଥିଲେ। ନିର୍ବାଚନରେ କଣ ଏପରି କରାଯାଏ କି ବୋଲି ପ୍ରଶ୍ନ କରିଥିଲେ। ସେ ପ୍ରିଜାଇଡିଂ ଅଫିସର ବିରୋଧରେ କ୍ରିମିନାଲ କେସ କରାଯିବ ଉଚିତ ବୋଲି କୋର୍ଟ ରୋକଠୋକ ଶୁଣାଇ ଦେଇଥିଲେ।
ଏଥିସହିତ କୋର୍ଟ ହାଇକୋର୍ଟକୁ ନିର୍ଦ୍ଦେଶ ଦେଇଛନ୍ତି ଯେ, ସମସ୍ତ ବାଲଟ ପେପର ସୁରକ୍ଷିତ ଭାବେ ରଖିବାକୁ ପଦକ୍ଷେପ ଗ୍ରହଣ କରନ୍ତୁ। ସେଠାକାର ପୋଲିସକୁ ନିର୍ଦ୍ଦେଶ ଦେଇ ଏହା ନିଶ୍ଚିତ କରାନ୍ତୁ। ଫେବୃୟାରୀ 12 ତାରିଖ ପରବର୍ତ୍ତି ଶୁଣାଣି ପର୍ଯ୍ୟନ୍ତ ତାହାର ସୁରକ୍ଷା ତଦାରଖ କରନ୍ତୁ ବୋଲି ସୁପ୍ରିମ କୋର୍ଟ ନିର୍ଦ୍ଦେଶ ଦେଇଛନ୍ତି।
