ଭୁବନେଶ୍ବର: ଓଡିଶାର ଖାଲିପଡିଥିବା ଗୋଟିଏ ରାଜ୍ୟସଭା ଆସନ ପାଇଁ ଉପନିର୍ବାଚନ ହେବ ବୋଲି ଘୋଷଣା ହୋଇସାରିଛି। ସେହି ଅନୁସାରେ ଆସନ୍ତା ସେପ୍ଟେମ୍ବର ୩ ତାରିଖ ଉପନିର୍ବାଚନ ହେବ। ଏଥିପାଇଁ ଅଗଷ୍ଟ ୧୪ରେ ଉପନିର୍ବାଚନ ନିମନ୍ତେ ବିଜ୍ଞପ୍ତି ପ୍ରକାଶ ପାଇବ। ଅଗଷ୍ଟ ୨୧ ହେଉଛି ନାମାଙ୍କନ ପତ୍ର ଦାଖଲର ଶେଷ ଦିନ। ୨୨ରେ ନାମାଙ୍କନପତ୍ର ଯାଞ୍ଚ କରାଯିବ।
ବିଜେଡି ନେତ୍ରୀ ମମତା ମହାନ୍ତ ହଠାତ ରାଜ୍ୟସଭା ସାଂସଦ ପଦରୁ ଏବଂ ଦଳରୁ ଇସ୍ତଫା ପ୍ରଦାନ କରି ବିଜେପିରେ ସାମିଲ ହୋଇଛନ୍ତି। ସେ ରାଜ୍ୟସଭା ପଦରୁ ଇସ୍ତଫା ଦେବା ପରେ ସେହି ଆସନଟି ଖାଲି ପଡିଛି। ତେବେ ବର୍ତ୍ତମାନ ଏହାର ଉପନିର୍ବାଚନ ହେଲେ ବିଜେପି ପ୍ରାର୍ଥୀ ଜିତିବା ନିଶ୍ଚିତ। ସେଥିପାଇଁ ବିଜେପି କାହାକୁ ପ୍ରାର୍ଥୀ କରିବ ସେ ନେଇ କଳ୍ପନାଜଳ୍ପନା ଆରମ୍ଭ ହୋଇଯାଇଛି।
ତେବେ ଦିଲ୍ଲୀ ସୁତ୍ର ଅନୁସାରେ ପୁଣି ଥରେ ମମତା ମହାନ୍ତ ବିଜେପି ପ୍ରାର୍ଥୀ ହେବେ। ସେଥିପାଇଁ କୁଆଡେ ତାଙ୍କୁ ପ୍ରତିଶୃତି ଦିଆଯାଇଛି ବୋଲି କୁହାଯାଉଛି। ସେ ବିଜେପିର ସାଂସଦ ଭାବେ କାର୍ଯ୍ୟ କରିବେ। ତେବେ ଅନ୍ୟ ଏକ ସୁତ୍ର ଅନୁସାରେ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ନାମ ସର୍ବାଗ୍ରେ ରହିଛି। ତାଙ୍କ ନେତୃତ୍ବରେ ବିଜେପି ଓଡିଶାରେ ଭଲ ପ୍ରଦର୍ଶନ କରିଛି। ସେଥିପାଇଁ ତାଙ୍କୁ ରାଜ୍ୟସଭା ପଠାଯାଇ ପୁରସ୍କୃତ କରାଯିବ ବୋଲି ଜଣାପଡିଛି।
ତେବେ ଏହି ଦୁଇ ଜଣ ପରେ ଆଉ ଯାହା ନାମ ଆସୁଛି ସେ ହେଉଛନ୍ତି ପୂର୍ବତନ ମନ୍ତ୍ରୀ ବିଶେଶ୍ବର ଟୁଡୁ। କାରଣ ହେଲା ଦଳ ଏଥର ବିଶେଶ୍ବରଙ୍କୁ ଟିକେଟ ଦେଲା ନାହିଁ। ତଥାପି ସେ ଦଳତ୍ୟାଗ ନ କରି ନିର୍ବାଚନ ପ୍ରଚାରରେ ନିଜକୁ ସାମିଲ କରିଛନ୍ତି। ସେଥିପାଇଁ ତାଙ୍କୁ ପୁରସ୍କାର ସ୍ବରୂପ ରାଜ୍ୟସଭାକୁ ପଠାଯିବ ବୋଲି କଳ୍ପନା ଜଳ୍ପନା ପ୍ରକାଶ ପାଇଛି।
ତେବେ ଭିତିରଆ ସୁତ୍ର ଅନୁସାରେ ମନମୋହନ ସାମଲଙ୍କୁ ଦିଲ୍ଲୀର ଏକ ଶକ୍ତିଶାଳି ଗୋଷ୍ଟୀ ପ୍ରବଳ ବିରୋଧ କରୁଛନ୍ତି। ସେ ଯେପରି କେନ୍ଦ୍ର ରାଜନୀତିକୁ ନ ଆସନ୍ତୁ ସେଥିପାଇଁ ସବୁପ୍ରକାରର ପ୍ରଚେଷ୍ଠା ଜାରୀ ରହିଛି। ଏହି ଗୋଷ୍ଠୀ ଯଦି ସଫଳ ହୁଅନ୍ତି ତେବେ ମନମୋହନଙ୍କ ରାଜ୍ୟସଭା ସାଂସଦ ଆଶା ମଉଳିଯିବ। ଶେଷରେ ସେ ରାଜ୍ୟ ଯୋଜନା ବୋର୍ଡର ଅଧ୍ୟକ୍ଷ ଭାବେ ନିଯୁକ୍ତି ପ୍ରଦାନ କରାଯିବ।