ନୂଆଦିଲ୍ଲୀ: ଫେବୃଆରୀ ୨୭ ତାରିଖରେ ୫୬ ଟି ରାଜ୍ୟସଭା ଆସନ ପାଇଁ ମତଦାନ ହେବ। ବିଶେଷ କଥା ହେଉଛି ନାମ ପ୍ରତ୍ୟାହାରର ଶେଷ ତାରିଖ ପୂର୍ବରୁ ମଧ୍ୟ ୪୧ ଟି ଆସନର ଚିତ୍ର ସମ୍ପୂର୍ଣ୍ଣ ସ୍ପଷ୍ଟ ହୋଇଯାଇଛି। ସରଳ ଶବ୍ଦରେ କହିବାକୁ ଗଲେ, ପ୍ରାର୍ଥୀମାନେ ରାଜ୍ୟସଭାର ୪୧ ଟି ଆସନରେ ନିର୍ଦ୍ବନ୍ଦରେ ଜିତିଛନ୍ତି, ବର୍ତ୍ତମାନ କେବଳ ୧୫ ଟି ସିଟ୍ ବାକି ଅଛି ଯେଉଁଥିରେ ନିର୍ବାଚନ ହେବାକୁ ଯାଉଛି। ପ୍ରକାଶଯୋଗ୍ୟ ଯେ, ବିଭିନ୍ନ ରାଜ୍ୟରେ ୪୧ ଟି ସିଟ୍ ପାଇଁ କେବଳ ୪୧ ଜଣ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିଲା, ଯାହାଙ୍କର ରାଜ୍ୟସଭାରେ ପହଞ୍ଚିବାର ରାସ୍ତା ସଫା ହୋଇଯାଇଛି।
Tag: ରାଜ୍ୟସଭା ନିର୍ବାଚନ
ଭୁବନେଶ୍ବର: ନିର୍ଦ୍ବନ୍ଦରେ ବିଜୟ ଲାଭ କରିଛନ୍ତି ତିନି ରାଜ୍ୟସଭା ପ୍ରାର୍ଥୀ। ସେମାନେ ହେଲେ ବିଜେଡିର ଦେବାଶୀଷ ସାମନ୍ତରାୟ, ଶୁଭାଶିଷ ଖୁଣ୍ଟିଆଏବଂ ବିଜେପିର ଅଶ୍ବିନୀ ବୈଷ୍ଣବ। ଆଜି ଥିଲା ନାମାଙ୍କନ ପତ୍ର ପ୍ରତ୍ୟାହାରର ଶେଷ ତାରିଖ। କେହି ନାମାଙ୍କନ ପତ୍ର ଦାଖଲ ନ କରିବା ଏବଂ ତିନି ଆସକୁ ତିନି ପ୍ରାର୍ଥୀ ଥିବା ଯୋଗୁଁ ବର୍ତ୍ତମାନ ଏମାନଙ୍କୁ ବିଜୟ ଘୋଷଣା କରାଯାଇଛି।
ଏହାପରେ ଏହି ବିଜୟ ପ୍ରାର୍ଥୀଙ୍କୁ ବିଧାନସଭା ତରଫରୁ ପ୍ରମାଣ ପତ୍ର ପ୍ରଦାନ କରାଯିବ। ସେମାନେ ରାଜ୍ୟସଭାରେ ପ୍ରମାଣପତ୍ର ଦାଖଲ କରିବା ପରେ ଶପଥ ଗ୍ରହଣ କରିବେ। ଖୁବ ଶିଘ୍ର ଓଡିଶାର ତିନି ସଦସ୍ୟ ଶପଥ ନେବେ ବୋଲି ଜଣାପଡିଛି।
ଭୁବନେଶ୍ୱର: ରାଜ୍ୟ ସ୍ୱାର୍ଥକୁ ପ୍ରାଥମିକତା ଦେଇ ଦଳୀୟ ସ୍ୱାର୍ଥକୁ ଭୁଲି ଯାଇଥିବା ନେତାମାନଙ୍କ ମଧ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଗରେ ଅଛନ୍ତି।
୧୯୯୪ ମସିହାରେ ଯେତେବେଳେ କେନ୍ଦ୍ର ରେଳ ରାଷ୍ଟ୍ରମନ୍ତ୍ରୀ କାହ୍ନୁଚରଣ ଲେଙ୍କା ରାଜ୍ୟସଭାରୁ ଅବସର ନେଲେ ତାଙ୍କୁ ଆଉଥରେ ରାଜ୍ୟସଭାକୁ ପଠାଇବା ସହିତ ରେଳ ବିଭାଗର ମନ୍ତ୍ରୀ କରିବାକୁ ସେତେବେଳର ମୁଖ୍ୟମନ୍ତ୍ରୀ ତଥା ବର୍ତ୍ତମାନର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବାପା ବିଜୁ ପଟ୍ଟନାୟକ ଚେଷ୍ଠା କରିଥିଲେ।
କାରଣ କାହ୍ନୁଚରଣ ଲେଙ୍କା ସେତେବେଳେ ଓଡ଼ିଶାରେ ରେଳ ଭିତ୍ତିଭୂମିର ବିକାଶ ଦିଗରେ ଅନେକ ପଦକ୍ଷେପ ନେଇଥିଲେ, ଯାହାକି ବିଜୁବାବୁଙ୍କୁ ଆକୃଷ୍ଟ କରିଥିଲା। କିନ୍ତୁ କଂଗ୍ରେସ ହାଇକମାଣ୍ଡ ବିଜୁବାବୁଙ୍କ କଥାରେ ରାଜି ହୋଇନଥିଲେ।
ଏବେ ପୁଅର ପାଳି। ୨୦୧୯ରେ ସେ ଯେତେବେଳେ ବିଜେପି ପକ୍ଷରୁ ରାଜ୍ୟସଭା ପାଇଁ ପ୍ରାର୍ଥୀ ହେଲେ, ସେତେବେଳେ ବିଜେପିର ସଂଖ୍ୟାବଳ ନ ଥିଲା। କିନ୍ତୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଡ଼ ହୃଦୟ ଦେଖାଇ ତାଙ୍କୁ ରାଜ୍ୟସଭାକୁ ସମର୍ଥନ ଦେଇ ନିର୍ବାଚିତ କରାଇଥିଲେ। ଅଶ୍ୱିନୀ ମଧ୍ୟ ଏହି ସହାୟତା ଋଣ ପରିଶୋଧ କରିବାକୁ ଯଥାସାଧ୍ୟ ଉଦ୍ୟମ କରିଛନ୍ତି।
୨୦୨୧ ଜୁଲାଇରେ ସେ ରେଳ ମନ୍ତ୍ରୀ ହେବା ପରେ ଓଡ଼ିଶାରେ ରେଳ ଭିତ୍ତିଭୂମିର ବିକାଶ ଓ ନୂତନ ରେଳ ଚଳାଚଳ କ୍ଷେତ୍ରରେ ବ୍ୟାପକ ପଦକ୍ଷେପ ନେବା ସହିତ ଅନୁଦାନ ରାଶି ଆଶାତୀତ ଭାବରେ ପ୍ରଦାନ କରିଛନ୍ତି। ଚଳିତ ବର୍ଷ କାମଚଳା ବଜେଟରେ ଓଡ଼ିଶାକୁ ୧୦,୫୩୬ କୋଟି ଟଙ୍କା ମଞ୍ଜୁର କରିଛନ୍ତି। ଗତ ବର୍ଷ ତୁଳନାରେ ଚଳିତ ବର୍ଷ ୫୨୪ କୋଟି ଅଧିକ ଅନୁଦାନ ମିଳିଛି।
ଅଶ୍ୱିନୀଙ୍କର ଏପରି କାମକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଶଂସା କରିବା ସହିତ ପୁଣିଥରେ ତାଙ୍କୁ ସଂସଦର ଉଚ୍ଚ ସଦନକୁ ପଠାଇବା ପାଇଁ ଦଳୀୟ ସ୍ୱାର୍ଥକୁ ରାଜ୍ୟ ସ୍ୱାର୍ଥ ଆଗରେ ତ୍ୟାଗ କରିବାକୁ ପଛଘୁଞ୍ଚା ଦେଇନାହାନ୍ତି। ନବୀନଙ୍କର ଏଭଳି କାର୍ଯ୍ୟକୁ ଓଡ଼ିଶାବାସୀ ପ୍ରଶଂସା କରିବା ସହିତ ବାପଠାରୁ ପୁଅ ଦୁଇପାଦ ଆଗରେ ବୋଲି ଆଲୋଚନା କରୁଛନ୍ତି।
ଭୁବନେଶ୍ବର: ବହୁ ବାଦ ବିବାଦ, ବହୁ ଚର୍ଚ୍ଚା ପରେ ଆଜି ରାଜ୍ୟସଭା ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଛନ୍ତି କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ। ବିଜେପିର ପ୍ରାର୍ଥୀ ଭାବେ ସେ ଏହି ପ୍ରାର୍ଥୀ ପତ୍ର ଦାଖଲ କରିଛନ୍ତି। ଆଜି ସକାଳେ ଅଶ୍ବିନୀ ବିଜେପି ସଭାପତି ମନମୋହନ ସାମଲ, ବିରୋଧୀ ଦଳର ମୁଖ୍ୟସଚେତକ ମୋହନ ମାଝି ଓ ବହୁ ବିଧାୟକ ତାଙ୍କ ସାଥିରେ ଥିଲେ।
ସେ ବିଧାନସଭାରେ ରିଟର୍ଣ୍ଣି ଅଫିସରଙ୍କୁ ତାଙ୍କ ପ୍ରାର୍ଥୀପତ୍ର ଦାଖଲ କରିଛନ୍ତି। ତାଙ୍କ ପ୍ରାର୍ଥୀତ୍ବକୁ ବିଜେଡି ସମର୍ଥନ କରୁଥିଲେ ମଧ୍ୟ ପ୍ରାର୍ଥୀପତ୍ର ଦାଖଲ ବେଳେ କେହି ତାଙ୍କ ସାଥିରେ ନ ଥିଲେ। ଆଜି ନାମାଙ୍କନ ଦାଖଲର ଶେଷ ତାରିଖ। ଓଡିଶାର ତିନୋଟି ଆସନ ଖାଲି ରହୁଥିବାରୁ ବର୍ତ୍ତମାନ ତିନିଜଣ ପ୍ରାର୍ଥୀପତ୍ର ଦାଖଲ କରିଛନ୍ତି। ତେଣୁ ଏହି ତିନି ନିଶ୍ଚିତ ନିର୍ବାଚିତ ହେବେ।
ଭୁବନେଶ୍ବର: ବିଜେଡି ସମର୍ଥନରେ ବିଜେପିର ଅଶ୍ବିନୀ ବୈଷ୍ଣବ ରାଜ୍ୟସଭାକୁ ପୁଣି ଯିବେ। ଏହାକୁ ନେଇ ରାଜ୍ୟ ରାଜନୀତିରେ ବେଶ ହଟଚମଟ ଲାଗି ରହିଛି। ଏଥିରେ କେଉଁଦଳର କ୍ଷତି ହେବ କାହାର ଲାଭ ହେବ ଚାଲିଛି ହିସାବ ନିକାସ। ତେବେ ଏହି ଘଟଣା ପରେ ରାଜ୍ୟ ବିଜେପି ସଭାପତି କହିଛନ୍ତି ଯେ, ଆମେ କାହାର ସମର୍ଥନ ମାଗି ନାହୁଁ। ଯଦି ନିର୍ବାଚନରେ କେହି ସମର୍ଥନ ଦେଲା ଭଲ କଥା।
ସେ ଆହୁରି କହିଥିଲେ ଯେ, ଆମେ ମୁଖ୍ୟ ବିରୋଧୀ ଦଳ ଭାବେ ରାଜ୍ୟସଭା ପାଇଁ ପ୍ରାର୍ଥୀ ଦେଇଛୁ। ଆଉ ଯଦି କେହି ପ୍ରାର୍ଥୀ ଦେବ ସେଥିରେ କାହାର କିଛି କହିବାର ନାହିଁ। ନିର୍ବାଚନରେ ଛିଡା ହେଲେ ସମସ୍ତଙ୍କର ସମର୍ଥନ ଆବଶ୍ୟକ। ସେହି ଆଶା କରି ବିଜେପି ପ୍ରାର୍ଥୀ ଦେଇଛି। ଆସନ୍ତାକାଲି ଆମେ ନାମାଙ୍କନ ପତ୍ର ଦାଖଲ କରିବୁ। ତେବେ ଆଗାମୀ ଦିନରେ ବିଜେଡି ବିଜେପି ମେଣ୍ଟ ହେବ କି କଣ ପଚାରା ଯିବାରୁ ସେ ଏହାକୁ ଖଣ୍ଡନ କରିଥିଲେ।
ଭୁବନେଶ୍ବର: ରାଜ୍ୟସଭା ପ୍ରାର୍ଥୀ ଭାବେ ଅଶ୍ବିନୀ ବୈଷ୍ଣବଙ୍କ ନାମ ବିଜେପି ଘୋଷଣା କରିବା ପରେ ବିଜେଡି ତାହାକୁ ସମର୍ଥନ କରିଛି। ଆଜି ଦଳ ତରଫରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦସ୍ତଖତରେ ଏ ନେଇ ବିଜ୍ଞପ୍ତି ପ୍ରକାଶ ପାଇଛି। ଏଥିରେ କୁହାଯାଇଛି ଯେ, ରେଳମନ୍ତ୍ରୀ ଅଶ୍ବିନୀ ବୈଷ୍ଣବଙ୍କ ରାଜ୍ୟସଭା ପ୍ରାର୍ଥୀତ୍ବକୁ ବିଜେଡି ସମର୍ଥନ କରୁଛି।
ପୂର୍ବରୁ ଏହି ଆଶଙ୍କା ସୃଷ୍ଟି ହୋଇଥିଲା। କାରଣ ବିଜେଡି ତିନୋଟି ରାଜ୍ୟସଭା ଆସନରେ ଜିତିବାକୁ ଥିଲେ ମଧ୍ୟ ଦୁଇଟି ଆସନରେ ପ୍ରାର୍ଥୀ ଦେଇଥିଲା। ଫଳରେ ଅନ୍ୟ ଆସନଟି ପୂର୍ବପରି ଅଶ୍ବିନୀ ବୈଷ୍ଣବଙ୍କୁ ଦିଆଯିବ ବୋଲି ଚର୍ଚ୍ଚା ଚାଲିଥିଲା। ଯାହା ସତ ବୋଲି ପ୍ରମାଣିତ ହୋଇଛି।
ଭୁବନେଶ୍ବର: ଖାଲିପଡିଥିବା ତିନୋଟି ରାଜ୍ୟସଭା ଆସନରେ ବର୍ତ୍ତମାନ ବିଜେଡି ଦୁଇଜଣଙ୍କ ନାମ ଘୋଷଣା କରିସାରିଛି। ସେମାନେ ପ୍ରାର୍ଥିପତ୍ର ମଧ୍ୟ ଦାଖଲ କରିସାରିଛନ୍ତି। ହେଲେ ତୃତୀୟ ପ୍ରାର୍ଥୀ କିଏ ହେବ ଏ ପର୍ଯ୍ୟନ୍ତ ବିଜେଡି ଘୋଷଣା କରି ନାହିଁ।
ତିନୋଟି ଆସନ ବିଜେଡି ଜିତିବାର କ୍ଷମତା ଥିଲେ ମଧ୍ୟ କଣ ପାଇଁ ଗୋଟିଏ ଆସନ ସସପେନସ ରଖାଗଲା ତାହା ଜଣାପଡି ନାହିଁ।
ଅନ୍ୟପଟେ ଓଡିଶା ଗସ୍ତରେ ବୁଧବାର ଦିନ ଆସୁଛନ୍ତି ରେଳମନ୍ତ୍ରୀ ଅଶ୍ବିନୀ ବୈଷ୍ଣବ। ସେ କେତେକ ରେଳ ପ୍ରକଳ୍ପର ସମୀକ୍ଷା ସହିତ ଟେଲି ଯୋଗାଯୋଗର ବୈଠକ ଅଛି। ଏଥିସହିତ ସେ ବିଜେପି ପାର୍ଟି ଅଫିସ ଯିବାର କାର୍ଯ୍ୟକ୍ରମ ମଧ୍ୟ ରହିଛି।
ତାଙ୍କର ଏହି ଗସ୍ତକୁ ନେଇ ଚର୍ଚ୍ଚା ଜୋର ଧରିଛି। ସେ ଦୁଇଦିନ ଓଡିଶାରେ ରହିବାର କାର୍ଯ୍ୟକ୍ରମ ରହିଛି। ରାଜ୍ୟସଭା ନାମାଙ୍କନ ସମୟ ଦୁଇ ଦିନରେ ଅର୍ଥାତ 15 ତାରିଖରେ ଶେଷ ହେବ।
ତେବେ ପୁଣି ଥରେ ବିଜେଡି ସମର୍ଥନରେ ରାଜ୍ୟସଭାକୁ ଅଶ୍ବନୀ ବୈଷ୍ଣବ ଯିବେ ବୋଲି ସମ୍ଭାବନା ଦେଖାଦେଲାଣି। ତେବେ ସେ ଓଡିଶା ପହଞ୍ଚିବା ପରେ ତାଙ୍କର ପ୍ରତିକ୍ରିୟା କଣ ରଖୁଛନ୍ତି ତାହାକୁ ଅପେକ୍ଷା।
ଭୁବନେଶ୍ବର: ଆଜି ବିଜେଡିର ଦୁଇ ରାଜ୍ୟସଭା ପ୍ରାର୍ଥୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ପ୍ରାର୍ଥୀପତ୍ର ଦାଖଲ କରିଛନ୍ତି। ସେମାନେ ହେଲେ ଦେବାଶିଷ ସାମନ୍ତରାୟ ଏବଂ ଶୁଭାଶିଷ ଖୁଣ୍ଟିଆ। ଆଜି ଦଳିୟ ନେତାଙ୍କ ଗହଣରେ ବିଧାନସଭା ଯାଇ ଉଭୟ ନାମାଙ୍କନ ଦାଖଲ କରିଛନ୍ତି।
ସେମାନଙ୍କ ପ୍ରାର୍ଥୀପତ୍ର ଦାଖଲ ବେଳେ ମୁଖ୍ୟମନ୍ତ୍ରୀଙ୍କ ସହିତ ମନ୍ତ୍ରୀ ବିକ୍ରମ ଆରୁଖ, ମନ୍ତ୍ରୀ ଅତନୁ ସବ୍ୟସାଚୀ ନାୟକ, ମୁଖ୍ୟସଚେତକ ପ୍ରଶାନ୍ତ ମୁଦୁଲି, ବିଧାୟକ ଅରୁଣ ସାହୁ, ପ୍ରତାପ ଜେନା ଏବଂ ଉମା ସାମନ୍ତରାୟ ପ୍ରମୁଖ ଉପସ୍ଥିତ ଥିଲେ।
ତେବେ ବିଜେଡି ତୃତୀୟ ପ୍ରାର୍ଥୀଙ୍କୁ ଜିତାଇବାରେ ସକ୍ଷମ ଥିବା ବେଳେ ଏ ପର୍ଯ୍ୟନ୍ତ ତାଙ୍କ ନାମ ଘୋଷଣା ହୋଇ ନାହିଁ। ଦୁଇ ଜଣଙ୍କ ନାମ ଘୋଷଣା ହେବା ପରେ କଣ ପାଇଁ ଦଳ ତୃତୀୟ ପ୍ରାର୍ଥୀଙ୍କ ନାମ ଘୋଷଣା କରି ନାହିଁ ସେ ନେଇ ସସପେନସ ଜାରୀ ରହିଛି।
ଭୁବନେଶ୍ବର: ରାଜ୍ୟସଭା ନିର୍ବାଚନ ପାଇଁ ଆଜି ପ୍ରକାଶ ପାଇଲା ବିଜ୍ଞପ୍ତି। ସେହି ଅନୁସାରେ ଆଜିଠାରୁ ଫେବ୍ରୁଆରୀ ୧୫ ତାରିଖ ପର୍ଯ୍ୟନ୍ତ ନାମାଙ୍କନ ପତ୍ର ଦାଖଲ କରାଯିବ। ଏହାପରେ ଫେବୃଆରୀ ୧୬ ତାରିଖରେ ନାମାଙ୍କନ ପତ୍ର ଯାଞ୍ଚ ହେବ। ସେହିପରି ୨୦ ଫେବୃଆରୀ ସୁଦ୍ଧା ପ୍ରାର୍ଥୀ ପତ୍ର ପ୍ରତ୍ୟାହାର କରିପାରିବେ।
୨୭ ଫେବୃଆରୀ ସକାଳ ୯ଟା ରୁ ୪ଟା ଯାଏ ଭୋଟ ଗ୍ରହଣ ହେବ। ସେହିଦିନ ଅପରାହ୍ନ ୫ ଟାରୁ ଭୋଟ ଗଣତି କରାଯିବ। ଓଡ଼ିଶାର ତିନି ରାଜ୍ୟ ସଭା ସିଟ ପାଇଁ ନିର୍ବାଚନ ହେବ। ଆସନ୍ତା ଏପ୍ରିଲ ୩ରେ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ, ବିଜେଡି ସାଂସଦ ପ୍ରଶାନ୍ତ ନନ୍ଦ ଓ ଅମର ପଟ୍ଟନାୟକଙ୍କ କାର୍ଯ୍ୟ କାଳ ଶେଷ ହେଉଛି।
ଭୁବନେଶ୍ବର: ଆଜି ନିର୍ବାଚନ କମିଶନର ରାଜ୍ୟସଭା ନିର୍ବାଚନ ପାଇଁ ତାରିଖ ଘୋଷଣା କରିଛନ୍ତି। ସେହି ଅନୁସାରେ ଆସନ୍ତା ଫେବୃୟାରୀ ୨୭ ତାରିଖରେ ହେବ ଏହି ନିର୍ବାଚନ। ସେହିପରି ନାମାଙ୍କନ ପତ୍ର ଦାଖଲ ସମୟ ହେଉଛି ଫେବୃୟାରୀ ୧୫ ତାରିଖ, ପ୍ରାର୍ଥୀପତ୍ର ଯାଞ୍ଚ ୧୬ ତାରିଖରେ ହେବ। ଫେବୃୟାରୀ ୨୦ ତାରିଖରେ ନାମାଙ୍କନ ପତ୍ର ପ୍ରତ୍ୟାହାର ତାରିଖ ରହିଛି।
ଏଥିରେ ମୋଟ ୧୫ଟି ରାଜ୍ୟର ୫୬ ଆସନରେ ନିର୍ବାଚନ ହେବ। ସେଥିମଧ୍ୟରୁ ଓଡିଶାର ୩ଟି ଆସନରେ ମଧ୍ୟ ନିର୍ବାଚନ ହେବ। ଯେଉଁ ସାଂସଦଙ୍କ ଆସନ ଖାଲି ହେଉଛି ସେମାନେ ହେଲ ଅଶ୍ବନୀ ବୈଷ୍ଣବ, ଅମର ପଟ୍ଟନାୟକ ଏବଂ ପ୍ରଶାନ୍ତ ନନ୍ଦ। ଉତ୍ତର ପ୍ରଦେଶରେ ସର୍ବାଧିକ ୧୦ଟି ଆସନ ଖାଲି ହେଉଥିବା ବେଳେ ବିହାର ଓ ମହାରାଷ୍ଟ୍ରରେ ୬ ଟି ଲେଖାଏଁ ଆସନ ଖାଲି ହେଉଛି।
ନୂଆଦିଲ୍ଲୀ: ଆଜି ତୃଣମୂଳ କଂଗ୍ରେସ (ଟିଏମସି) ଦଳ ପଶ୍ଚିମବଙ୍ଗରୁ ରାଜ୍ୟସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି। ଟିଏମସି ଟୁଇଟ୍ କରି ଲେଖିଛି ଯେ, ଆଗାମୀ ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିବା ଅତ୍ୟନ୍ତ ଆନନ୍ଦଦାୟକ। ଏହା ସହିତ ସମସ୍ତ ପ୍ରାର୍ଥୀଙ୍କୁ ମଧ୍ୟ ଦଳ ପକ୍ଷରୁ ଶୁଭେଚ୍ଛା ଜଣାଯାଇଛି।
ଟିଏମସି ଆସନ୍ତା ରାଜ୍ୟସଭା ନିର୍ବାଚନ ପାଇଁ ଡେରେକ ଓ’ ବ୍ରାଇନ୍, ଡୋଲା ସେନ୍, ସୁଖେନ୍ଦୁ ଶେଖର ରୟ, ସମୀରୁଲ ଇସଲାମ, ପ୍ରକାଶ ଚିକ୍ ବଡାଇକ୍ ଏବଂ ସାକେତ ଗୋଖଲେଙ୍କ ନାମ ଉପରେ ଦଳ ମୋହର ଲଗାଇଛି। ପଶ୍ଚିମବଙ୍ଗରୁ ମୋଟ ୭ ଜଣ ରାଜ୍ୟସଭା ଆସନ ପାଇଁ ନିର୍ବାଚନ ଅନୁଷ୍ଠିତ ହେବ, ଯେଉଁଥିପାଇଁ ଗତ ଗୁରୁବାରରୁ ନାମାଙ୍କନ ପ୍ରକ୍ରିୟା ଆରମ୍ଭ ହୋଇଛି।
ଲୋକଙ୍କ ସେବା ପାଇଁ ପ୍ରକୃତ ଭକ୍ତି ସହ କାର୍ଯ୍ୟ କରିବାକୁ ଟିଏମସି ଦଳ ବଙ୍ଗଳାର ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥୀଙ୍କୁ କହିଛି। ଦଳ ସମସ୍ତ ପ୍ରାର୍ଥୀଙ୍କୁ ଲୋକମାନଙ୍କ ପ୍ରତି ଉତ୍ସର୍ଗୀକୃତ ହେବାକୁ କହିଥିଲେ। ଟୁଇଟ୍ କରି ଟିଏମସି ଲେଖିଛି ଯେ ତ୍ରିନାମୁଲର ଅବିସ୍ମରଣୀୟ ଆତ୍ମା ଏବଂ ପ୍ରତ୍ୟେକ ଭାରତୀୟଙ୍କ ଅଧିକାର ପାଇଁ ଓକିଲାତି କରିବାର ସ୍ଥାୟୀ ଉତ୍ତରାଧିକାରୀ ବଜାୟ ରଖନ୍ତୁ।
ନୂଆଦିଲ୍ଲୀ: କେନ୍ଦ୍ର ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଆଜି ସୁପ୍ରିମକୋର୍ଟଙ୍କଠାରୁ ଏକ ବଡ଼ ଆଶ୍ଵସ୍ତି ପାଇଛନ୍ତି। ସିନ୍ଧିଆଙ୍କ ରାଜ୍ୟସଭା ନିର୍ବାଚନକୁ ଚ୍ୟାଲେଞ୍ଜ କରୁଥିବା ଆବେଦନ ଶୁଣାଣି କରିବା ପାଇଁ ସୁପ୍ରିମକୋର୍ଟ ମନା କରି ଦେଇଛନ୍ତି।
ଏହି ଆବେଦନରେ ମଧ୍ୟପ୍ରଦେଶର କଂଗ୍ରେସ ନେତା ଗୋବିନ୍ଦ ସିଂ କହିଛନ୍ତି ଯେ, ୨୦୧୮ରେ ଭୋପାଳର ଶ୍ୟାମାଲା ହିଲ୍ସ ପୋଲିସ ଷ୍ଟେସନରେ ଜ୍ୟୋତିରାଦିତ୍ୟ ସିନ୍ଧିଆଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା, କିନ୍ତୁ ସେ ରାଜ୍ୟସଭା ନିର୍ବାଚନ ପାଇଁ ନାମାଙ୍କନ ଦାଖଲ କରିବାବେଳେ ସେ ଏହା ବିଷୟରେ ସୂଚନା ଦେଇନାହାଁନ୍ତି।
ନୂଆଦିଲ୍ଲୀ: ମହାରାଷ୍ଟ୍ରର ମହା ବିକାଶ ଆଘାଡିରେ ମତଭେଦ ବୃଦ୍ଧି ପାଇବାରେ ଲାଗିଛି। ରାଷ୍ଟ୍ରପତି ନିର୍ବାଚନରେ ମହା ବିକାଶ ଆଘାଡି (MVA) ର ଦଳ ବିଭିନ୍ନ ପ୍ରାର୍ଥୀଙ୍କୁ ସମର୍ଥନ କରିଥିବାବେଳେ ମହାରାଷ୍ଟ୍ର ବିଧାନ ପରିଷଦରେ ବିରୋଧୀଦଳର ନେତା ଚୟନକୁ ନେଇ ଏହି ଦଳମାନେ ମଧ୍ୟ ଭିନ୍ନ ଭିନ୍ନ ରାସ୍ତା ନେଇଥିଲେ। ଏବେ ମହାରାଷ୍ଟ୍ର କଂଗ୍ରେସରେ ଶିବସେନା ଏକ ଫାଟ ସୃଷ୍ଟି କରିଛି। ମହାରାଷ୍ଟ୍ରର ସିନ୍ଧୁଦୂର୍ଗ ଜିଲ୍ଲାର ବହୁ କଂଗ୍ରେସ ନେତା ଉଦ୍ଧବ ଠାକରେଙ୍କ ହାତରେ ଶିବ ବନ୍ଧନ ବାନ୍ଧି ଶିବସେନା (ଉଦ୍ଧବ ଠାକରେ ଦଳ) ରେ ଯୋଗ ଦେଇଥିଲେ।
କଂଗ୍ରେସରୁ ଶିବସେନାରେ ଯୋଗ ଦେଇଥିବା ନେତାଙ୍କ ମଧ୍ୟରେ ସିନ୍ଧୁଦୂର୍ଗ କଂଗ୍ରେସ ଜିଲ୍ଲା ସଭାପତି ବାଲା ଗାୱଡେ, ପରିବେଶ ବିଭାଗର ରାଜ୍ୟ ସଚିବ ସଚ୍ଚିତାନନ୍ଦ ବୁଗଡେ, ଏନଏସୟୁ ଜିଲ୍ଲା ସଭାପତି କୌସ୍ତୁବ ଗାୱଡେ, ବିଭାଗୀୟ ସଚିବ ସନ୍ଦୀପ କୋଠୱାଲେ, କିରଣ ଗାୱଡେ, ବୈଭବ ସୂତାର ଏବଂ ବହୁ ପଦାଧିକାରୀ ଅଛନ୍ତି। ସମସ୍ତେ ଉଦ୍ଧବ ଠାକରେଙ୍କ ଉପସ୍ଥିତିରେ ଶିବସେନାରେ ଯୋଗ ଦେଇଥିଲେ। ଏହି ଅବସରରେ ଶିବସେନା ସାଂସଦ ବିନାୟକ ରାଉତ ଏବଂ ଶିବସେନାର ଅନ୍ୟ ପାଦାଧିକାରୀମାନେ ମଧ୍ୟ ଉପସ୍ଥିତ ଥିଲେ।
ରାଜ୍ୟସଭା ନିର୍ବାଚନ ପରେ ମହା ବିକାଶ ଆଘାଡିଙ୍କ ସହଯୋଗୀଙ୍କ ମଧ୍ୟରେ ମତଭେଦ ହୋଇଥିଲା। ରାଜ୍ୟସଭା ନିର୍ବାଚନ ସମୟରେ ଏହି ସହଯୋଗୀ ଦଳର ନେତାମାନେ ବିଜେପି ପ୍ରାର୍ଥୀ ପାଇଁ ଭୋଟ୍ ଦେଇଥିଲେ। ଏଥି ସହିତ ଶିବସେନାରେ ବିଦ୍ରୋହ ପରେ ମହା ବିକାଶ ଆଘାଡିଙ୍କ ସରକାର ମଧ୍ୟ ପତନ ହୋଇଥିଲା। ଶିବସେନାର ଅନେକ ବିଦ୍ରୋହୀ ନେତା ମଧ୍ୟ ଶିବସେନାରେ ବିଭାଜନ ସୃଷ୍ଟି କରୁଥିବା ଏନସିପି ଏବଂ କଂଗ୍ରେସକୁ ଅଭିଯୋଗ କରିଥିଲେ।
ନିକଟରେ ଉଦ୍ଧବ ଠାକରେଙ୍କ ଶିବସେନା ରାଜ୍ୟ ବିଧାନ ପରିଷଦରେ ବିରୋଧୀଦଳର ନେତା ପଦବୀ ପାଇଁ ଦାବି କରିଥିଲେ। ଏହି ପଦବୀ ପାଇଁ କଂଗ୍ରେସ ଏବଂ ଏନସିପି ମଧ୍ୟ ଦୌଡରେ ଥିଲେ। ଅନ୍ୟପକ୍ଷରେ ମହାବିକାଶ ଆଘାଡି (ଏମଭିଏ) ଦଳଗୁଡ଼ିକ ରାଷ୍ଟ୍ରପତି ନିର୍ବାଚନରେ ଅଲଗା ହୋଇଯାଇଥିଲେ। ରାଷ୍ଟ୍ରପତି ନିର୍ବାଚନରେ କଂଗ୍ରେସ ଏବଂ ଏନସିପି ମିଳିତ ବିରୋଧୀ ପ୍ରାର୍ଥୀ ଯଶବନ୍ତ ସିହ୍ନାଙ୍କୁ ସମର୍ଥନ କରୁଥିବାବେଳେ ଶିବସେନା ଏନଡିଏର ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିଥିଲେ।
ହରିୟାଣା: ହରିୟାଣା ରାଜ୍ୟସଭା ନିର୍ବାଚନରେ କଂଗ୍ରେସର ଖେଳକୁ ନଷ୍ଟ କରିଥିବା କୁଲଦୀପ ବିଷ୍ନୋଇ ବିଜେପି ଯାଇପାରନ୍ତି। ଗୃହମନ୍ତ୍ରୀ ଅମିତ ଶାହା ବିଜେପି ସଭାପତି ଜେପି ନାଡାଙ୍କୁ କୁଲଦୀପ ଭେଟିବା ପରେ ଏହି ଆଲୋଚନା ଆରମ୍ଭ ହୋଇଛି। ଆପଣଙ୍କୁ କହିରଖୁଛୁ ଯେ ରାଜ୍ୟସଭା ନିର୍ବାଚନରେ ଦଳ ବିରୋଧରେ ଲଢିଥିବା କୁଲଦୀପ ବିଷ୍ନୋଇଙ୍କୁ ବିଜେପିରେ ଯୋଗଦେବା ପାଇଁ ଦୀର୍ଘ ସମୟ ଧରି ଆଲୋଚନା ହେଉଛି। ଏହି ସମୟରେ ଦିଲ୍ଲୀରେ ସେ ବିଜେପିର ବରିଷ୍ଠ ନେତାଙ୍କୁ ଭେଟି କଳ୍ପନା ଜଳ୍ପନାକୁ ଆହୁରି ବଢେଇ ଦେଇଛନ୍ତି।
ପ୍ରକାଶ ଯୋଗ୍ୟ ଯେ, କୁଲଦୀପ ବିଷ୍ନୋଇ ନିଜେ ଟୁଇଟ୍ କରି ଉଭୟ ନେତାଙ୍କୁ ଭେଟିବା ବିଷୟରେ ସୂଚନା ସେୟାର କରିଛନ୍ତି। ଅମିତ ଶାହାଙ୍କୁ ଭେଟିବାର ଚିତ୍ର ଟ୍ୱିଟ୍ କରି କୁଲଦୀପ ଲେଖିଛନ୍ତି ଯେ, “ଅମିତ ଶାହାଙ୍କୁ ଭେଟିବା ପ୍ରକୃତ ଗୌରବର ବିଷୟ। ଭାରତ ପ୍ରତି ତାଙ୍କର ଦୃଷ୍ଟିକୋଣ ଆଶ୍ଚର୍ଯ୍ୟଜନକ।”
ଏଥି ସହିତ ଉଭୟ ନେତାଙ୍କୁ ଭେଟିବା ପରେ ସେ ନିଜ ଟୁଇଟର ଆକାଉଣ୍ଟରୁ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଛବି ହଟାଇ ଦେଇଛନ୍ତି। ସେହିଭଳି ବାୟୋରେ ସେ ନିଜକୁ ପୂର୍ବତନ ସାଂସଦ ତଥା ବର୍ତ୍ତମାନର ବିଧାୟକ ବୋଲି ବର୍ଣ୍ଣନା କରିଛନ୍ତି। କିନ୍ତୁ ଦଳ ବିଷୟରେ ଉଲ୍ଲେଖ କରାଯାଇ ନାହିଁ।
ନୂଆଦିଲ୍ଲୀ: ୪ ଟି ରାଜ୍ୟରେ ୧୬ ଟି ରାଜ୍ୟସଭା ଆସନ ପାଇଁ ଶୁକ୍ରବାର ଦିନ ନିର୍ବାଚନ ଅନୁଷ୍ଠିତ ହୋଇଥିଲା। ଭୋଟ ଗଣତି ଅପରାହ୍ନ ୫ ଟା ପରେ ହେବାର ଥିଲା। କିନ୍ତୁ ହରିୟାଣା ଏବଂ ମହାରାଷ୍ଟ୍ରରେ ନିୟମ ଉଲ୍ଲଂଘନ ଅଭିଯୋଗ ହେତୁ ଭୋଟ୍ ଗଣନାରେ ପ୍ରାୟ ଆଠ ଘଣ୍ଟା ବିଳମ୍ବ ହୋଇଥିଲା। ତେବେ ରାଜସ୍ଥାନ ଏବଂ କର୍ଣ୍ଣାଟକ ପାଇଁ ଫଳାଫଳ ପୂର୍ବରୁ ହୋଇସାରିଛି। କିନ୍ତୁ ହରିୟାଣା ଏବଂ ମହାରାଷ୍ଟ୍ରରେ ଭୋଟ୍ ଗଣନାକୁ ମଧ୍ୟରାତ୍ରିରେ ନିର୍ବାଚନ ଆୟୋଗ ଅନୁମୋଦନ କରିଛନ୍ତି। ରାଜସ୍ଥାନରେ ଚାରୋଟି ଆସନ ମଧ୍ୟରୁ ତିନିଟି କଂଗ୍ରେସ ଏବଂ ଗୋଟିଏ ଆସନ ବିଜେପି ଜିତିଛି। ଏଥି ସହ କର୍ଣ୍ଣାଟକରେ ବିଜେପି ୩ ଟି ସିଟ୍ ଏବଂ କଂଗ୍ରେସ ଗୋଟିଏ ସିଟ୍ ପାଇଛି। ଯେଡିଏସକୁ କୌଣସି ଆସନ ମିଳିନାହିଁ।
ମହାରାଷ୍ଟ୍ରର ୬ ଟି ଆସନ ଉପରେ ନିଷ୍ପତ୍ତି ଅନୁଯାୟୀ ମହାବିକାସ୍ ଅଗାଡିର ୩ ଜଣ ପ୍ରାର୍ଥୀ ଏବଂ ବିଜେପିର ୩ ଜଣ ପ୍ରାର୍ଥୀ ଜିତିଛନ୍ତି। ଷଷ୍ଠ ଆସନ ପାଇଁ ମହାବିକାସ ଅଗାଡିଙ୍କୁ ଏକ ଝଟକା ମିଳିଥିଲା। ଏହି ଆସନରେ ବିଜେପିର ଧନଞ୍ଜୟ ମହାଡିକ ଶିବସେନାର ସଞ୍ଜୟ ପାୱାରଙ୍କୁ ପରାସ୍ତ କରିଛନ୍ତି। ଧନଞ୍ଜୟ ମହାଦିକ ୪୧.୫୮ ଭୋଟ୍ ଏବଂ ସଞ୍ଜୟ ପାୱାର ୩୯.୨୬ ଭୋଟ୍ ପାଇଛନ୍ତି।
ଶିବସେନାର ସଞ୍ଜୟ ରାଉତଙ୍କୁ ୪୧ ଭୋଟ, କଂଗ୍ରେସର ଇମ୍ରାନ ପ୍ରତାପଗଡିଙ୍କୁ ୪୪ ଭୋଟ ଏବଂ ଏନସିପିର ପ୍ରଫୁଲ୍ଲ ପଟେଲ ୪୩ ଭୋଟ ପାଇଥିଲେ। ଅନ୍ୟପକ୍ଷରେ ବିଜେପିର ପୀୟୁଷ ଗୋୟଲ ୪୮ ଟି ଏବଂ ଅନିଲ ବୋଣ୍ଡେ ୪୮ ଭୋଟ୍ ପାଇଛନ୍ତି।
ରାଜସ୍ଥାନରେ ତିନିଜଣ କଂଗ୍ରେସ ପ୍ରାର୍ଥୀ ଜିତିଛନ୍ତି। ଆଉ ଗୋଟିଏ ଆସନ ବିଜେପିର ଅଂଶରେ ଆସିଛି। ତେବେ ବିଜେପି ସମର୍ଥିତ ସୁଭାଷ ଚନ୍ଦ୍ର ହାରିଯାଇଛନ୍ତି।
ଶୁକ୍ରବାର ଦିନ ରାଜସ୍ଥାନରେ ହେବାକୁ ଥିବା ରାଜ୍ୟସଭା ନିର୍ବାଚନରେ କଂଗ୍ରେସ ତିନୋଟି ଆସନରେ ସହଜ ବିଜୟ ପଞ୍ଜିକରଣ କରିଛି। ଏହାର ତିନି ପ୍ରାର୍ଥୀ ମୁକୁଲ ୱାସନିକ, ରଣଦୀପ ସୁରଜେୱାଲା ଏବଂ ପ୍ରମୋଦ ତିୱାରୀ ଜିତିଥିଲେ। ଫଳାଫଳ ପରେ ମୁଖ୍ୟମନ୍ତ୍ରୀ ଗେହଲୋଟ୍ କହିଛନ୍ତି ଯେ ଏହି ବିଜୟ ରାଜସ୍ଥାନରେ କଂଗ୍ରେସର ଏକତାର ବାର୍ତ୍ତା ଅଟେ।
ଚଣ୍ଡିଗଡ଼: ହରିୟାଣାରେ ଦୁଇଟି ରାଜ୍ୟସଭା ଆସନ ପାଇଁ ଅନୁଷ୍ଠିତ ନିର୍ବାଚନର ଫଳାଫଳ ଆଜି ଆସିଛି। ପ୍ରାୟ ଆଠ ଘଣ୍ଟା ବିଳମ୍ବରେ ଗଣନା ଆରମ୍ଭ ହେବା ପରେ ବିଜେପି ପ୍ରାର୍ଥୀ କୃଷ୍ଣ ଲାଲ ପଂୱାର ଏବଂ ବିଜେପି ସମର୍ଥିତ ସ୍ଵାଧୀନ ପ୍ରାର୍ଥୀ କାର୍ତ୍ତିକେୟ ଶର୍ମାଙ୍କୁ ବିଜେତା ଘୋଷିତ କରାଯାଇଛି। କଂଗ୍ରେସ ପ୍ରାର୍ଥୀ ଅଜୟ ମାକେନ୍ ୨୯ ଭୋଟ ପାଇବା ପରେ ମଧ୍ୟ ନିର୍ବାଚନରେ ହାରିଯାଇଛନ୍ତି। ନିର୍ବାଚନ ଫଳାଫଳ ଘୋଷଣା ପରେ ମୁଖ୍ୟମନ୍ତ୍ରୀ ତଥା ବିଜେପି ନେତା ମନୋହର ଲାଲ ଖଟ୍ଟର ଟୁଇଟ୍ କରି ନବ ନିର୍ବାଚିତ ରାଜ୍ୟସଭା ସଦସ୍ୟମାନଙ୍କୁ ଅଭିନନ୍ଦନ ଜଣାଇଛନ୍ତି। ସେ ଲେଖିଛନ୍ତି, “ହରିୟାଣାର ନୂତନ ନିର୍ବାଚିତ ରାଜ୍ୟସଭା ସାଂସଦ କ୍ରିଷ୍ଣ ଲାଲ ପାନୱାର ଏବଂ କାର୍ତ୍ତିକେୟ ଶର୍ମାଙ୍କୁ ମୋର ହାର୍ଦ୍ଦିକ ଅଭିନନ୍ଦନ। ପ୍ରାର୍ଥୀଙ୍କ ସଫଳତା ହେଉଛି ଗଣତନ୍ତ୍ରର ବିଜୟ। ଆମର ମହାନ ଦେଶର ବିକାଶରେ ସେମାନଙ୍କର ନୂତନ ଦାୟିତ୍ଵ ପାଇଁ ମୋର ଶୁଭେଚ୍ଛା।
ପ୍ରକାଶ ଯୋଗ୍ୟ ଯେ, ଶୁକ୍ରବାର ଦିନ ହୋଇଥିବା ଭୋଟିଂରେ ବିଜେପି ପ୍ରାର୍ଥୀ ୩୧ ଭୋଟ, ସ୍ୱାଧୀନ ପ୍ରାର୍ଥୀ ୨୮ ଏବଂ କଂଗ୍ରେସ ପ୍ରାର୍ଥୀ ୨୯ ଭୋଟ ପାଇଥିଲେ। ତଥାପି ଭୋଟର ଗଣିତ ଏପରି ହେଲା ଯେ, କାର୍ତ୍ତିକେୟଙ୍କୁ ବିଜେତା ଘୋଷିତ କରାଯାଇଥିଲା। ବାସ୍ତବରେ, ହରିୟାଣାର ମୋଟ ୯୦ ବିଧାୟକଙ୍କ ମଧ୍ୟରୁ ଜଣେ ସ୍ଵାଧୀନ ଭୋଟ୍ ଦେଇ ନାହାଁନ୍ତି ଏବଂ ଗୋଟିଏ ଭୋଟ୍ ପ୍ରତ୍ୟାଖ୍ୟାନ ହୋଇ ୮୮ ଟି ଭୋଟ୍ ବୈଧ ହୋଇଛି। ପ୍ରତ୍ୟେକ ପ୍ରାର୍ଥୀ ଜିତିବା ପାଇଁ ୨୯.୩୪ ଭୋଟ୍ ଆବଶ୍ୟକ କରନ୍ତି। ଯେହେତୁ ପଂୱାରଙ୍କୁ ୩୧ ଭୋଟ ମିଳିଥିଲା, କାର୍ତ୍ତିକେୟ ଦ୍ୱିତୀୟ ସର୍ବାଧିକ ଭୋଟ ପ୍ରାର୍ଥୀ ହୋଇଥିବାରୁ ତାଙ୍କର ୧.୬୬ ଭୋଟ୍ ବିଜେପି ସମର୍ଥିତ ଶର୍ମାଙ୍କ ନିକଟକୁ ଯାଇଥିଲା।
ଏଭଳି ପରିସ୍ଥିତିରେ କାର୍ତ୍ତିକେୟଙ୍କୁ ୨୯.୬୬ ଭୋଟ୍ (୨୮+ ୧.୬୬) ମିଳିଥିଲା, ଯେଉଁଥିପାଇଁ ସେ ଜିତିଥିଲେ। ଏଠାରେ, ମାକେନ୍ ୨୯ ଭୋଟରେ ରହିଯାଇଥିଲେ। ଉଭୟ ଦଳ ଭୋଟ୍ ଦେବାରେ ବିଧାୟକଙ୍କ ନିୟମ ଉଲ୍ଲଂଘନ କରିଥିବା ଅଭିଯୋଗ ହେବା ପରେ ଶୁକ୍ରବାର ବିଳମ୍ବିତ ରାତିରେ ନିର୍ବାଚନ ଆୟୋଗ ଭୋଟ୍ ଗଣିବା ଆରମ୍ଭ କରିଥିଲେ। ଏଥି ସହିତ, ଶନିବାର ଭୋର ୩.୧୦ ରେ ଫଳାଫଳ ଘୋଷଣା କରାଯାଇଥିଲା। ବାସ୍ତବରେ, ବିଜେପି ତଥା ସ୍ଵାଧୀନ ପ୍ରାର୍ଥୀମାନେ କଂଗ୍ରେସ ବିଧାୟକ କିରଣ ଚୌଧୁରୀ ଏବଂ ବିବି ବତ୍ରାଙ୍କୁ ନିଜର ବାଲାଟ କାଗଜପତ୍ର ଦେଖାଇଥିବା ଅଭିଯୋଗ କରିଛନ୍ତି।
ଏଠାରେ କଂଗ୍ରେସ ମଧ୍ୟ ନିର୍ବାଚନ ଆୟୋଗଙ୍କ ନିକଟକୁ ଯାଇ ମୁକ୍ତ ଏବଂ ନିରପେକ୍ଷ ନିର୍ବାଚନ ପ୍ରକ୍ରିୟାକୁ ନଷ୍ଟ କରିବାକୁ ଚେଷ୍ଟା କରୁଥିବା ଅଭିଯୋଗ କରିଛି ଏବଂ ତୁରନ୍ତ ଫଳାଫଳ ଘୋଷଣା କରିବାକୁ ଦାବି କରିଛି।
ନୂଆଦିଲ୍ଲୀ: ରାଜ୍ୟସଭାର ୫୭ ଟି ସିଟ୍ ଖାଲି ପଡିଛି। ଏହି ଆସନଗୁଡିକ ପୂରଣ କରିବା ପାଇଁ ୪୧ ଜଣ ପ୍ରାର୍ଥୀ ନିର୍ବିରୋଧ ମନୋନୀତ ହୋଇଛନ୍ତି। ୪ ଟି ରାଜ୍ୟରେ ୧୬ ଟି ରାଜ୍ୟସଭା ଆସନ ପାଇଁ ଭୋଟ୍ ଗ୍ରହଣ କରାଯାଇଛି। ଏଥର କେନ୍ଦ୍ରରେ ନରେନ୍ଦ୍ର ମୋଦୀ ସରକାରରେ ୪ ଜଣ ମନ୍ତ୍ରୀଙ୍କ ରାଜ୍ୟସଭା କାର୍ଯ୍ୟକାଳ ଶେଷ ହେଉଛି। ଏଥିମଧ୍ୟରେ ନିର୍ମଳା ସୀତାରମଣ, ପୀୟୁଷ ଗୋୟଲ ଏବଂ ମୁଖତାର୍ ଅବ୍ବାସ ନକଭି ଅନ୍ତର୍ଭୁକ୍ତ। ଏଥିସହିତ ଜେଡିୟୁ କୋଟାରୁ ମୋଦୀ ସରକାରରେ ମନ୍ତ୍ରୀ ଆରସିପି ସିଂଙ୍କ କାର୍ଯ୍ୟକାଳ ମଧ୍ୟ ଶେଷ ହେଉଛି।
ବିଜେପି ନିର୍ମଳା ସୀତାରମଣ ଏବଂ ପୀୟୁଷ ଗୋୟଲଙ୍କୁ ପୁନଃ ମନୋନୀତ କରିଛି। ବିଜେପି କର୍ଣ୍ଣାଟକର କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ପ୍ରାର୍ଥୀ କରିଥିବାବେଳେ ପୀୟୁଷ ଗୋୟଲଙ୍କୁ ମହାରାଷ୍ଟ୍ରରୁ ଟିକେଟ ଦେଇଛି। ଯେହେତୁ ମୁଖତାର୍ ଅବ୍ବାସ ନକଭିଙ୍କ ଟିକେଟ କାଟି ଦିଆଯାଇଛି।
କେଉଁ ମନ୍ତ୍ରୀଙ୍କ ଉପରେ ଖଣ୍ଡା ଝୁଲୁଛି?
ଯଦି ଦୁଇ ମନ୍ତ୍ରୀ ନିର୍ମଳା ସୀତାରମଣ ଏବଂ ପୀୟୁଷ ଗୋୟଲଙ୍କୁ ପୁଣିଥରେ ଉପର ଗୃହକୁ ପଠାଇବାକୁ ବିଜେପି ନିଷ୍ପତ୍ତି ନେଇଛନ୍ତି, ହେଲେ କେନ୍ଦ୍ର ମନ୍ତ୍ରୀ ମୁଖତାର୍ ଅବ୍ବାସ ନକଭିଙ୍କୁ ଏଥର ଟିକେଟ ଦିଆଯାଇ ନାହିଁ। ଏହା ବ୍ୟତୀତ ଦଳ ଜେଡିୟୁ କୋଟାରୁ କେନ୍ଦ୍ରର ମନ୍ତ୍ରୀ ଆରସିପି ସିଂଙ୍କୁ ମନୋନୀତ କରାଯାଇନାହିଁ। ଆରସିପି ସିଂଙ୍କ ସ୍ଥାନରେ ଖିରୁ ମହତୋଙ୍କୁ ଜେଡିୟୁ ପ୍ରାର୍ଥୀ କରିଛି।
କେନ୍ଦ୍ର ମନ୍ତ୍ରୀ ମୁଖତାର୍ ଅବ୍ବାସ ନକଭି ବର୍ତ୍ତମାନ ଝାଡଖଣ୍ଡର ରାଜ୍ୟସଭା ସାଂସଦ ଏବଂ ଜୁଲାଇ ୭ ତାରିଖରେ ଅବସର ନେଉଛନ୍ତି। ରାଜ୍ୟସଭାରୁ ମୁଖତାର୍ ଅବ୍ବାସ ନକଭି ଏବଂ ଆରସିପି ସିଂଙ୍କ ଟିକେଟ କଟାଯିବା ପରେ ଏବେ ମନ୍ତ୍ରୀ ପଦର ଆସନକୁ ବଞ୍ଚାଇବା ଏକ ଆହ୍ଵାନ ହୋଇପଡିଛି। ନିୟମ ଅନୁଯାୟୀ, ଯଦି ମୁଖତାର୍ ଅବ୍ବାସ ନକଭି ଏବଂ ଆରସିପି ସିଂ ୬ ମାସ ମଧ୍ୟରେ ସଂସଦରେ ପହଞ୍ଚିବେ ନାହିଁ, ତେବେ ସେମାନଙ୍କୁ ମନ୍ତ୍ରୀ ପଦରୁ ଇସ୍ତଫା ଦେବାକୁ ପଡ଼ିବ।
୨୦୧୬ ରେ କେନ୍ଦ୍ରର ମୋଦୀ ସରକାରରେ ମୁସଲମାନ ଚେହେରା ଭାବରେ ମୁଖତାର୍ ଅବ୍ବାସ ନକଭି ଝାଡଖଣ୍ଡରୁ ଉପର ଗୃହର ସଦସ୍ୟ ଭାବରେ ନିର୍ବାଚିତ ହୋଇଥିଲେ। ତାଙ୍କର କାର୍ଯ୍ୟକାଳ ୭ ଜୁଲାଇରେ ଶେଷ ହେବ। ଏଥର ମୁଖତାର୍ ଅବ୍ବାସ ନକଭିଙ୍କ ସ୍ଥାନରେ ଆଦିତ୍ୟ ସାହୁଙ୍କୁ ଝାଡଖଣ୍ଡରୁ ରାଜ୍ୟସଭା ପାଇଁ ମନୋନୀତ କରାଯାଇଛି। ଯଦିଓ ଦଳ ଅନ୍ୟ ରାଜ୍ୟରୁ ନକଭିଙ୍କୁ ଟିକେଟ୍ ଦେବ ବୋଲି ବିଶ୍ୱାସ କରାଯାଉଥିଲା କିନ୍ତୁ ତାହା ହୋଇ ନଥିଲା।
ସେହିଭଳି ଆରସିପି ସିଂ ମଧ୍ୟ ଜଣେ ରାଜ୍ୟସଭା ସାଂସଦ ଏବଂ ରାଜ୍ୟସଭାରେ ତାଙ୍କର କାର୍ଯ୍ୟକାଳ ଆସନ୍ତା ମାସରେ ଶେଷ ହେବ। ଜେଡିୟୁ ତାଙ୍କୁ ଏଥର ରାଜ୍ୟସଭା ପାଇଁ ପ୍ରାର୍ଥୀ କରିନାହିଁ। ଏଭଳି ପରିସ୍ଥିତିରେ, କାର୍ଯ୍ୟକାଳ ଶେଷ ହେବା ପରେ କେନ୍ଦ୍ର ମନ୍ତ୍ରୀଙ୍କ ପଦବୀ ଯିବାର ସମସ୍ତ ସମ୍ଭାବନା ଅଛି। ବିଜେପି ସହିତ ଘନିଷ୍ଠ ସମ୍ପର୍କ ଥିବାରୁ ଆରସିପିଙ୍କ ସହିତ ଏହା କରାଯାଇଥିବା ଅନୁମାନ କରାଯାଉଛି। ଏହି ସମୟରେ ଆରସିପି ସିଂଙ୍କୁ ଆଉ ଏକ ସମସ୍ୟା ହୋଇଛି। ପୂର୍ବରୁ ତାଙ୍କୁ ରାଜ୍ୟସଭା ଟିକେଟ୍ ଦିଆଯାଇନଥିଲା ଏବଂ ବର୍ତ୍ତମାନ ତାଙ୍କଠାରୁ ଏକ ସରକାରୀ ବଙ୍ଗଳା ମଧ୍ୟ ନିଆଯାଇଛି।
ଭୁବନେଶ୍ବର: ଆଜି ନିର୍ଦ୍ବନ୍ଦରେ ବିଜେଡିର ତିନିଜଣ ରାଜ୍ୟସଭା ପ୍ରାର୍ଥୀ ନିର୍ବାଚିତ ହୋଇଛନ୍ତି। ଆଜି ଅପରାହ୍ନ ୩ ଟା ପର୍ଯ୍ୟନ୍ତ ପ୍ରାର୍ଥୀପତ୍ର ପ୍ରତ୍ୟାହାର ଅବଧୀ ଥିଲା। ହେଲେ କୌଣସି ପ୍ରାର୍ଥୀ ନାମାଙ୍କନ ପତ୍ର ପ୍ରତ୍ୟାହାର ନ କରିବାରୁ ତାଙ୍କୁ ନିର୍ବାଚିତ ଘୋଷିତ କରାଗଲା। ସେମାନେ ହେଲେ ସୁଲତା ଦେଓ, ମାନସ ମଙ୍ଗରାଜ ଏବଂ ସସ୍ମିତ ପାତ୍ର। ଏହି ତିନିଜଣଙ୍କୁ ବିଧାନସଭା ରିଟର୍ଣିଂ ଅଫିସର ନିର୍ବାଚିତ ସାର୍ଟିଫିକେଟ ପ୍ରଦାନ କରିଥିଲେ।
ଅନ୍ୟତମ ପ୍ରାର୍ଥୀ ନିରଂଜନ ବିଶିଙ୍କ ପ୍ରାର୍ଥୀପତ୍ର ପ୍ରତ୍ୟାହାର ଅବଧୀ ୬ ଜୁନ ପର୍ଯ୍ୟନ୍ତ ରହିଛି। କାରଣ ଏହା ଉପନିର୍ବାଚନ ଥିବାରୁ ଏଥିପାଇଁ ଅଲଗା ବିଜ୍ଞପ୍ତି ପ୍ରକାଶ ପାଇଥିଲା। ସେହି ଅନୁସାରେ ୨ ଜୁନ୍ରେ ନାମାଙ୍କନ ଦାଖଲର ଶେଷ ତାରିଖ ଥିଲା। ସେହିପରି ଜୁନ ୩ ତାରିଖରେ ନାମାଙ୍କନ ପତ୍ର ଯାଞ୍ଚ କରାଯାଇଥିଲା। ଏହି ଆସନ ପାଇଁ ଆସନ୍ତା ୧୩ ତାରିଖରେ ନିର୍ବାଚନ ଅନୁଷ୍ଠିତ ହେବାକୁ ଥିଲେ ମଧ୍ୟ ୬ ତାରିଖରେ ତାଙ୍କୁ ମଧ୍ୟ ନିର୍ଦ୍ବନ୍ଦରେ ନିର୍ବାଚିତ ଘୋଷଣା କରାଯିବ।
ନୂଆଦିଲ୍ଲୀ: ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥୀ ଚୟନକୁ ନେଇ କଂଗ୍ରେସରେ ଅଶାନ୍ତି ଦେଖାଦେଇଛି। କିଛି ନେତା ରାଜ୍ୟସଭା ପ୍ରାର୍ଥୀ ହୋଇ ନ ଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି ଏବଂ ନିଜ ପାର୍ଟୀକୁ ସମାଲୋଚନା କରିଛନ୍ତି। ରାଜ୍ୟସଭା ପାଇଁ ପ୍ରାର୍ଥୀପତ୍ର ମିଳିନଥିବାରୁ ଗାଜିଆବାଦର ଆଚାର୍ଯ୍ୟ ପ୍ରମୋଦ କୃଷ୍ଣ କହିଛନ୍ତି ଯେ, କିଛି କଂଗ୍ରେସ ନେତା ‘ହିନ୍ଦୁ’ ଶବ୍ଦକୁ ଘୃଣା କରନ୍ତି। ଏଭଳି ପରିସ୍ଥିତିରେ ଜଣେ ହିନ୍ଦୁ ଧାର୍ମିକ ନେତାଙ୍କୁ ରାଜ୍ୟସଭାକୁ କିପରି ପଠାଯାଇପାରିବ? ପ୍ରକାଶ ଯୋଗ୍ୟ ଯେ, ଗାଜିଆବାଦର କଲ୍କି ପୀଠେଶ୍ୱର ଆଚାର୍ଯ୍ୟ ପ୍ରମୋଦ କୃଷ୍ଣଙ୍କୁ ପ୍ରିୟଙ୍କା ଗାନ୍ଧୀଙ୍କ ନିକଟତର ବିବେଚନା କରାଯାଏ।
ଏଥି ସହିତ ମହାରାଷ୍ଟ୍ରରେ ମଧ୍ୟ କଂଗ୍ରେସରେ ଫାଟ ସୃଷ୍ଟି ହୋଇଛି। ବାସ୍ତବରେ, ଇମ୍ରାନ ପ୍ରତାପଗଡି ପ୍ରାର୍ଥୀ ହେବା ପରେ ସାଧାରଣ ସମ୍ପାଦକ ପଦରୁ ଆଶିଶରାଓ ଦେଶମୁଖ ଇସ୍ତଫା ଦେଇଛନ୍ତି।
ପ୍ରମୋଦ କୃଷ୍ଣ ଗଣମାଧ୍ୟମକୁ କହିଛନ୍ତି ଯେ, ରାଜ୍ୟସଭା ପାଇଁ କଂଗ୍ରେସ ଭୁଲ ପ୍ରାର୍ଥୀ ଚୟନ କରିଛି। ଛତିଶଗଡ ଏବଂ ରାଜସ୍ଥାନରେ ବାହ୍ୟ ନେତାଙ୍କ ପ୍ରାର୍ଥୀତ୍ୱକୁ ମଧ୍ୟ ସେ ବିରୋଧ କରିଛନ୍ତି। ପ୍ରମୋଦ କୃଷ୍ଣ କହିଛନ୍ତି ଯେ, ଛତିଶଗଡ ଏବଂ ରାଜସ୍ଥାନରେ କୌଣସି ସ୍ଥାନୀୟ ନେତା ପ୍ରାର୍ଥୀ ହୋଇନାହାଁନ୍ତି। ସେ କହିଛନ୍ତି ଯେ, ହରିୟାଣାର ଅଜୟ ମାକେନ୍ ଏବଂ ରାଜସ୍ଥାନର ରଣଦୀପ ସୁରଜେୱାଲାଙ୍କୁ ରାଜ୍ୟସଭା ପାଇଁ ପ୍ରାର୍ଥୀ କରାଯାଇଛି।
ପ୍ରମୋଦ କୃଷ୍ଣ କହିଛନ୍ତି ଯେ, ସ୍ଥାନୀୟ ନେତାଙ୍କ ଅବହେଳା ହେତୁ ଦଳର ଅବସ୍ଥା ଖରାପ ହେଉଛି, ଦଳର ନେତୃତ୍ୱ ଏହା ଜାଣିବା ଉଚିତ୍। ଉଲ୍ଲେଖ ଯୋଗ୍ୟ ଯେ, ଆଚାର୍ଯ୍ୟ ପ୍ରମୋଦ କୃଷ୍ଣ ଜଣେ ହିନ୍ଦୁ ନେତା ଭାବରେ ଜଣାଶୁଣା। ସେ ଜଣେ ଅତି ସ୍ପଷ୍ଟ ଏବଂ ପ୍ରଭାବଶାଳୀ ନେତା ଭାବରେ ଜଣାଶୁଣା, ଯେଉଁଥିପାଇଁ ତାଙ୍କୁ ଟିଭି ବିତର୍କରେ ଦଳର ପକ୍ଷ ରଖିବା ପାଇଁ ପଠାଯାଏ।
ଭୁବନେଶ୍ବର: ଆଜି ବିଜେଡିର ଚାରିଜଣ ପ୍ରାର୍ଥୀ ରାଜ୍ୟସଭା ପାଇଁ ନାମାଙ୍କନ ଦାଖଲ କରିଛନ୍ତି। ବିଧାନସଭା ପ୍ରକୋଷ୍ଠରେ ରିଟର୍ଣ୍ଣିଂ ଅଫିସରଙ୍କ ନିକକଟରେ ଏହି ଚାରିଜଣ ନାମାଙ୍କନ ପତ୍ର ଦାଖଲ କରିଛନ୍ତି। ସେମାନେ ହେଲେ ସୁଲତା ଦେଓ, ମାନସ ମଙ୍ଗରାଜ, ସସ୍ମିତ ପାତ୍ର ଏବଂ ନିରଂଜନ ବିଶି।
ଆଜି ପୂର୍ବାହ୍ନରେ ସମସ୍ତ ପ୍ରାର୍ଥୀ ବିଧାନସଭା ଆସି ସେମାନଙ୍କ ନାମାଙ୍କନ ଦାଖଲ କରିଥିଲେ। ସାଥିରେ ବିଜେଡି ସଂଗଠକ ସଂପାଦକ ପ୍ରଣବ ପ୍ରକାଶ ଦାସ, ପୂର୍ବତନ ସାଂସଦ ପ୍ରସନ୍ନ ପାଟ୍ଟଶାଣୀ, ମନ୍ତ୍ରୀ ବିକ୍ରମ ଆରୁଖ, ମନ୍ତ୍ରୀ ଟୁକୁନି ସାହୁ, ପୂର୍ବତନ ସାଂସଦ ପ୍ରସନ୍ନ ଆଚାର୍ଯ୍ୟ ପ୍ରମୁଖ ଥିଲେ। ଆସନ୍ତାକାଲି ପ୍ରାର୍ଥୀପତ୍ର ଯାଞ୍ଚ କରାଯିବ। ବର୍ତ୍ତମାନ ଆଉ କେହି ନାମାଙ୍କନ ଦାଖଲ କରିବାକୁ ନ ଥିବାରୁ ଏହି ଚାରିଜଣଙ୍କୁ ବିଜୟୀ ଘୋଷଣା କରାଯିବ।
ଭୁବନେଶ୍ବର: ବହୁ ଚର୍ଚ୍ଚା ପରେ ଶେଷରେ ବିଜେଡି ସଭାପତି ନବୀନ ପଟ୍ଟନାୟକ ରାଜ୍ୟସଭା ପାଇଁ ଚାରିଜଣଙ୍କ ନାମ ମନୋନିତ କରିଛନ୍ତି। ଏହି ଚାରିଜଣ ହେଲେ ସୁଲତା ଦେଓ, ମାନସ ମଙ୍ଗରାଜ, ସସ୍ମିତ ପାତ୍ର ଏବଂ ନିରଞ୍ଜନ ବିଶି। ଏମାନଙ୍କ ମଧ୍ୟରୁ ସୁଲତା, ମାନସ ଏବଂ ସସ୍ମିତ ପୂର୍ଣ୍ଣକାଳୀନ ଅର୍ଥାତ ଛଅ ବର୍ଷ ପାଇଁ ରାଜ୍ୟସଭାକୁ ମନୋନିତ ହୋଇ ଯିବେ।
ହେଲେ ଶେଷ ପ୍ରାର୍ଥୀ ଯାହାକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଚାଲିଛି ସେ ହେଉଛନ୍ତି ନିରଞ୍ଜନ ବିଶି, ସ୍ବଳ୍ପ କାଳୀନ ଅବଧୀ ପାଇଁ ରାଜ୍ୟସଭା ଯିବେ। ରାଜ୍ୟ ରାଜନୀତିରେ ସୁଲତା, ମାନସ ଏବଂ ସସ୍ମିତଙ୍କ ନାମ ବେଶ ଚର୍ଚ୍ଚାରେ ଥିଲା। ଏହିତିନି ଜଣ ରାଜ୍ୟସଭାକୁ ନିଶ୍ଚିତ ଯିବେ ବୋଲି ଆନୁମାନ କରାଯାଉଥିଲା। ଯାହା ପରବର୍ତ୍ତି ସମୟରେ ସତ ହୋଇଛି।
ତେବେ ନବୀନ ଏହି ଚାରିଜଣଙ୍କୁ ବାଛିବାରେ ଏକ ମୁଖ୍ୟ କାରଣ ରହିଛି। ତାହା ହେଲା ସେ ସବୁ ବର୍ଗକୁ ପ୍ରାଧାନ୍ୟ ଦେଇ ଏହି ନିଷ୍ପତି ଗ୍ରହଣ କରିଛନ୍ତି। ପ୍ରଥମ ପ୍ରାର୍ଥୀ ସୁଲତା ଦେଓ ହେଉଛନ୍ତି ମହିଳା, ମାନସ ହେଉଛନ୍ତି ଓବିସି, ସସ୍ମତି ହେଉଛନ୍ତି ସଂଖ୍ୟାଲଘୁ ଆଉ ନିରଞ୍ଜନ ହେଉଛନ୍ତି ଆଦିବାସୀ।
ଏହି ଚାରି ବର୍ଗକୁ ଧ୍ୟାନରେ ରଖି ନବୀନ ଏହି ନିଷ୍ପତି ଗ୍ରହଣ କରିଥିବାର ସ୍ପଷ୍ଟ ହୋଇଛି। ଫଳରେ ବିରୋଧୀଙ୍କର ମୁହଁ ଚୁପ ହୋଇଯାଇଛି। ସେମାନେ ଯେଉଁ ଅଭିଯୋଗ କରିଥାଆନ୍ତେ ନବୀନ ମହିଳା, ଓବିସି, ସଂଖ୍ୟାଲଘୁ କିମ୍ବା ଆଦିବାସୀଙ୍କୁ ଗୁରୁତ୍ବ ଦେଉ ନାହାଁନ୍ତି, ତାହା ଆଉ କହିପାରିବେ ନାହିଁ।
ସୁଲତା ଦେଓ ବିଜେଡିର ଜଣେ ଆଗଧାଡି ନେତ୍ରୀ। ଦୀର୍ଘ ବର୍ଷ ଧରି ସେ ଏହି ଦଳରେ ଅଛନ୍ତି। ହେଲେ ତାଙ୍କୁ କୌଣସି ପଦପଦବୀ ଦିଆଯାଇ ନ ଥିଲା। ସମାଜ କଲ୍ୟାଣ ବୋର୍ଡ, ବିଜେଡି ପ୍ରବକ୍ତା ଏବଂ ପରବର୍ତ୍ତି ସମୟରେ ତାଙ୍କୁ ମହିଳା ଓ ଶିଶୁ କଲ୍ୟାଣ ବିଭାଗର ଉପଦେଷ୍ଠା କରାଯାଇଛି। ହେଲେ ତାହାର କୌଣସି ମାନେ ନ ଥିଲେ ମଧ୍ୟ ସୁଲତା ସୁଚାରୁ ରୂପେ ଏହି କାର୍ଯ୍ୟ କରିଛନ୍ତି। ଫଳରେ ନବୀନ ଶେଷରେ ତାଙ୍କୁ ରାଜ୍ୟସଭା ପଠାଇବାକୁ ଉଚିତ ମନେ କଲେ।
ସେହିପରି ମାନସ ମଙ୍ଗରାଜ ମଧ୍ୟ କଂଗ୍ରେସରୁ ଆସି ବିଜେଡିରେ ଯୋଗ ଦେବା ପରେ ଗଣମାଧ୍ୟମକୁ ସୁପରିଚାଳନା କରିବା କାର୍ଯ୍ୟ ସେ ଦକ୍ଷତାର ସହ କରିଛନ୍ତି। ତାଙ୍କୁ ପ୍ରଥମ ଥର ପାଇଁ ରାଜ୍ୟ ସରକାରଙ୍କ ଗଣମାଧ୍ୟମ ଉପଦେଷ୍ଠା ଭାବେ ନିଯୁକ୍ତି ଦେଇଛନ୍ତି। ଏହା ଦ୍ବାରା ସେ ବିଜେଡିର ଭାବମୂର୍ତ୍ତିକୁ ଗଣମାଧ୍ୟମରେ ଠିକ ଭାବେ ରଖିବା କାର୍ଯ୍ୟ ମଧ୍ୟ କରି ଦେଖାଇଛନ୍ତି।
ଅନ୍ୟତମ ପ୍ରାର୍ଥୀ ସସ୍ମିତ ପାତ୍ର ରାଜ୍ୟସଭାରେ ଯେତିକି ଦିନ ଥିଲେ ସେଥିରେ ସେ କେବଳ ବିଜେଡି କାହିଁକି ରାଜ୍ୟର ଟେକ ରଖିବାରେ ସକ୍ଷମ ହୋଇପାରିଥିଲେ। ତାଙ୍କର ବିଚକ୍ଷଣ ବୁଦ୍ଧି ସହିତ ଜାତୀୟ ତଥା ଆନ୍ତର୍ଜାତୀୟ ରାଜନୀତିରେ ସେ ବେଶ ପାରଂଗମ। ପ୍ରଥମ ଥର ନିର୍ବାଚନ ହୋଇ ମଧ୍ୟ ସେ ରାଜ୍ୟସଭାର ଉପାଧ୍ୟକ୍ଷ ପ୍ୟାନେଲ ପାଇଁ ମନୋନିତ ହେବା ନିଶ୍ଚିତ ଗର୍ବ ଓ ଗୌରବର କଥା। ସେ ପୁଣିଥରେ ରାଜ୍ୟସଭାକୁ ଯିବାର ଆବଶ୍ୟକତା ଥିଲା ଯାହା ନବୀନ କରି ଦେଖାଇଛନ୍ତି।
ତେବେ ସବୁ ପ୍ରାର୍ଥୀଙ୍କ ମଧ୍ୟରେ ନିରଞ୍ଜନ ବିଶି ହେଇଛନ୍ତି ଜଣେ ସପ୍ରାଇଜ ପ୍ରାର୍ଥୀ। କାରଣ ତାଙ୍କ ନାମ କେବେ ବି ଚର୍ଚ୍ଚାରେ ନ ଥିଲା। ନିରଂଜନ ବିଶି ହେଉଛନ୍ତି ବଲାଙ୍ଗୀରର ଜଣେ ତୁଙ୍ଗ ଆଦିବାସୀ ନେତା। ଯାହାଙ୍କର ସେଠାରେ ଏକ ବଡ ସଂଗଠନ ରହିଛି। ସେ ମଧ୍ୟ ଓଡିଶା ଆଦିବାସୀ ସଂଗଠନର ମହାସଚିବ ଅଛନ୍ତି। ଦଳକୁ ପଶ୍ଚିମ ଓଡିଶାରେ ସୁଦୃଢ କରିବା ପାଇଁ ତାଙ୍କୁ ନବୀନ ମନୋନିତ କରିଛନ୍ତି।