ନୂଆଦିଲ୍ଲୀ: କର୍ଣ୍ଣାଟକର ହାଭେରୀ ଜିଲ୍ଲାରୁ ସଲମାନ ଖାନଙ୍କୁ ଧମକ ଦେଇଥିବା ଅଭିଯୁକ୍ତଙ୍କୁ ମୁମ୍ବାଇ ପୋଲିସ ଗିରଫ କରିଛି। ଅଭିଯୁକ୍ତଙ୍କ ନାମ ବିକାରାମ ଜଲାରାମ ବିଷ୍ନୋଇ। ଏହି ବ୍ୟକ୍ତି ସଲମାନ ଖାନଙ୍କୁ ହତ୍ୟା କରିବାକୁ ଧମକ ଦେଇଥିଲେ। ଏହି ଗିରଫଦାରୀ ଦ୍ଵାରା ପୋଲିସକୁ ବଡ ସଫଳତା ମିଳିଛି।
ବିକାରାମ ଜଲାରାମ ବିଷ୍ନୋଇ ଏକ ଧମକପୂର୍ଣ୍ଣ ବାର୍ତ୍ତାରେ କହିଥିଲା ଯେ, ଯେ ସେ ଜେଲରେ ଥିବା ଗ୍ୟାଙ୍ଗଷ୍ଟର ଲରେନ୍ସ ବିଷ୍ନୋଇଙ୍କ ଭାଇ। ଧମକ ଦେଇ କୁହାଯାଇଥିଲା ଯେ, ଯଦି ସଲମାନ ଖାନ ସେମାନଙ୍କ ଦାବି ପୂରଣ ନକରନ୍ତି ତେବେ ତାଙ୍କୁ ହତ୍ୟା କରାଯିବ। ସୂଚନାନୁସାରେ, ସଲମାନଙ୍କ ଠାରୁ ୨ କୋଟି ଟଙ୍କା ଦାବି କରିବା ସହିତ ଅଭିନେତାଙ୍କୁ ତାଙ୍କ ମନ୍ଦିରକୁ ଯାଇ କ୍ଷମା ମାଗିବା ପାଇଁ ଅଭିଯୁକ୍ତ ମଧ୍ୟ କହିଥିଲେ।
ଧମକପୂର୍ଣ୍ଣ ବାର୍ତ୍ତା ଆଧାରରେ ମୁମ୍ବାଇର ୱର୍ଲି ପୋଲିସ ଷ୍ଟେସନରେ ଏକ ମାମଲା ରୁଜୁ ହୋଇଥିଲା। ଯେତେବେଳେ ପୋଲିସ ତଦନ୍ତ ଆରମ୍ଭ କଲା, ସେତେବେଳେ ଜଣାପଡିଲା ଯେ ଏହି ଧମକ କର୍ଣ୍ଣାଟକରୁ ପଠାଯାଇଛି। ଏହା ପରେ ମୁମ୍ବାଇ ପୋଲିସ କର୍ଣ୍ଣାଟକରେ ସ୍ଥାନୀୟ ପୋଲିସ ସହାୟତାରେ ଅଭିଯୁକ୍ତକୁ ଖୋଜିବା ଆରମ୍ଭ କରି ହାଭେରୀରେ ଗିରଫ କରିଥିଲା।
ବିକାରାମ ଜଲାରାମ ବିଷ୍ନୋଇ ରାଜସ୍ଥାନର ଜାଲୋରର ବାସିନ୍ଦା ଏବଂ କର୍ଣ୍ଣାଟକର ଏକ ନିର୍ମାଣ ସ୍ଥଳରେ କାର୍ଯ୍ୟ କରୁଥିଲେ। ସେ ହାଭେରୀର ଗୌଦର ଅଞ୍ଚଳର ଅନ୍ୟ ଶ୍ରମିକମାନଙ୍କ ସହିତ ଏକ କୋଠରୀରେ ରହୁଥିଲେ। ଗିରଫ ପରେ ମୁମ୍ବାଇ ପୋଲିସ ଅଭିଯୁକ୍ତଙ୍କୁ ଟ୍ରାଞ୍ଜିଟ୍ ରିମାଣ୍ଡରେ ଆଣି ମୁମ୍ବାଇକୁ ଆଣିଛି, ଯେଉଁଠାରେ ଅଧିକ ପଚରାଉଚରା ଚାଲିଛି। ଏଥିସହ ଗ୍ୟାଙ୍ଗଷ୍ଟର ଲରେନ୍ସ ବିଷ୍ନୋଇଙ୍କ ସହ ଜଡିତ ସମ୍ଭାବ୍ୟ ସଂଯୋଗ ସମ୍ପର୍କରେ ମୁମ୍ବାଇ ପୋଲିସ ଅଭିଯୁକ୍ତଙ୍କଠାରୁ ସୂଚନା ପାଇବାକୁ ଚେଷ୍ଟା କରୁଛି।
