ଯାଜପୁର: ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଜିଲ୍ଲାସ୍ତରୀୟ ଏକ ମିଳିତ ଟିମ୍ ଯାଜପୁରରେ ଚଢ଼ାଉ କରି ଜଣେ ୧୪ ବର୍ଷୀୟ ଗୋତିଶ୍ରମିକଙ୍କୁ ଉଦ୍ଧାର କରିବାରେ ସଫଳ ହୋଇଛନ୍ତି। ଅନୁସୂଚିତ ଜନଜାତି (ଏସ୍ ଟି) ସମ୍ପ୍ରଦାୟର ଜଣେ ସଦସ୍ୟ ଉଦ୍ଧାର ହୋଇଥିବା ଶିଶୁଟି ଗତ ଦୁଇ ବର୍ଷ ହେବ ଶୋଷଣମୂଳକ ପରିସ୍ଥିତିରେ ଗୋରୁ ଓ ବଗିଚା ତଦାରଖକରିବାକୁ ବାଧ୍ୟ ହେଉଥିଲା।
ଏହି ଅଞ୍ଚଳରେ ଶିଶୁ ଶୋଷଣ ନେଇ ଏକାଧିକ ଅଭିଯୋଗ ଆସିବା ପରେ କର୍ତ୍ତୃପକ୍ଷ ଉଦ୍ଧାର ଅଭିଯାନ ଆରମ୍ଭ କରିଥିଲେ। ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ସେମାନେ ଘଟଣାସ୍ଥଳରେ ଚଢ଼ାଉ କରି ଶିଶୁଟିକୁ କଠିନ ଅବସ୍ଥାରୁ ଉଦ୍ଧାର କରିଥିଲେ। ୪ ବର୍ଷ ତଳେ ମାଲିକ ଶିଶୁର ବାପାଙ୍କୁ ଘର ନିର୍ମାଣ ପାଇଁ ୧୧ଟି ଆଜବେଷ୍ଟସ୍ ସିଟ୍ ଓ ୨ଟି ଲୁହା ରଡ୍ ପ୍ରଦାନ କରିଥିଲେ।
ଏହା ବଦଳରେ ବାପାଙ୍କୁ ମାସିକ ୭,୦୦୦ଟଙ୍କା ମଜୁରୀଦେବାକୁ ପ୍ରତିଶ୍ରୁତି ଦେଇ ମାଲିକଙ୍କ ବଗିଚା ତଦାରଖ କରିବାକୁ କୁହାଯାଇଥିଲା। ତେବେ ଗୋରୁ ଓ ବଗିଚାର ତଦାରଖକରିବାରେ ପିଲାକୁ ନିୟୋଜିତ କରିବାକୁ ମାଲିକ ବାପାଙ୍କୁ କହିଥିଲେ। କିନ୍ତୁ ନିଯୁକ୍ତିଦାତା ରାଜି ହୋଇଥିବା ଦେୟକୁ ଦେଇନଥିଲେ ଏବଂ ସାଧାରଣତଃ ସାପ୍ତାହିକ ବଜାର ଦିନମାନଙ୍କରେ ଅନୁରୋଧ କ୍ରମେ ବେଳେବେଳେ ୨୦୦-୩୦୦ ଟଙ୍କା ପ୍ରଦାନ କରୁଥିଲେ। ସର୍ବନିମ୍ନ ଦରମା ଏବଂ ଚଳପ୍ରଚଳ ସୀମିତ ଥିବାରୁ ପିଲାଟି ଦିନକୁ ୧୪ ଘଣ୍ଟାରୁ ଅଧିକ କାମ କରିବାକୁ ବାଧ୍ୟ ହୋଇଥିଲା। ପିତାମାତା ନିଯୁକ୍ତିଦାତାଙ୍କଠାରୁ ଅଗ୍ରୀମ ଦେୟ ଗ୍ରହଣ କରିଥିବାରୁ ଋଣ ସମ୍ପୂର୍ଣ୍ଣ ପରିଶୋଧ ନହେବା ପର୍ଯ୍ୟନ୍ତ ଶିଶୁକୁ ଅନ୍ୟ କାମ କରିବାକୁ ବାରଣ କରାଯାଇଥିଲା। ଜିଲ୍ଲା ପ୍ରଶାସନ ଏବେ ରିଲିଜ୍ ସାର୍ଟିଫିକେଟ୍ ପ୍ରଦାନ କରିବା ସହ ଶିଶୁର ଉପଯୁକ୍ତ ଥଇଥାନ ସୁନିଶ୍ଚିତ କରୁଛି। ବଣ୍ଡେଡ୍ ଲେବର ସିଷ୍ଟମ (ଉଚ୍ଛେଦ) ଆଇନ, ୧୯୭୬, ଶିଶୁ ଶ୍ରମିକ (ନିଷେଧ ଓ ନିୟନ୍ତ୍ରଣ) ଆଇନ, ୧୯୮୬, ଏସସି/ଏସଟି (ଅତ୍ୟାଚାର ନିବାରଣ) ଆଇନ, ୧୯୮୯ ଏବଂ ଅନ୍ୟ ପ୍ରାସଙ୍ଗିକ ଆଇନ ଅନୁଯାୟୀ ନିଯୁକ୍ତିଦାତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଚାଲିଛି।
ଉଦ୍ଧାର ଶିଶୁଟିକୁ ଶିଶୁ କଲ୍ୟାଣ କମିଟି (ସିଡବ୍ଲ୍ୟୁସି)ରେ ହାଜର କରାଯାଇ ଯାଜପୁର ଉତ୍କଳ ବାଳାଶ୍ରମରେ ଅସ୍ଥାୟୀ ଭାବେ ଆଶ୍ରୟ ଦିଆଯାଇଛି। ପିଲାଟି ବହୁତ ଖୁସି ହୋଇ ପାଠପଢ଼ା ଆରମ୍ଭ କରିବାକୁ ଆଗ୍ରହୀ ଥିବା ଜଣାପଡିଛି। ଜିଲ୍ଲା ଶିଶୁ ସୁରକ୍ଷା ଅଧିକାରୀ (ଡିସିପିଓ) ନିରଞ୍ଜନ କରଙ୍କ ତତ୍ତ୍ୱାବଧାନରେ ଚାଇଲ୍ଡ ହେଲ୍ପଲାଇନ ସଂଯୋଜକ, ସୁକିନ୍ଦା ସଦର ରାଜସ୍ୱ ନିରୀକ୍ଷକ, ସୁକିନ୍ଦା ପୁଲିସ ଓ ଅନ୍ୟ ଅଂଶୀଦାରମାନେ ଉଦ୍ଧାର କାର୍ଯ୍ୟକୁ ସଂଯୋଜନା କରିଥିଲେ।
