Tag: ଯାଜପୁର

ଭୁୁବନେଶ୍ୱର/ଯାଜପୁର: ଯାଜପୁରସ୍ଥିତ ସରକାରୀ ଆଇଟିଆଇର ୱେଲ୍ଡିଂ ବିଭାଗ ଏବେ ସମ୍ପୂର୍ଣ୍ଣ ନୂଆ ରୂପ ପାଇଛି। ସେଠାରେ “ଥର୍ମାଲ କଟିଂ ଆଣ୍ଡ୍ ୱେଲ୍ଡିଂ” ଭଳି ଅତ୍ୟାଧୁନିକ ବିଷୟରେ ସେଣ୍ଟର ଅଫ୍ ଏକ୍ସଲେନ୍ସ ବା ଉତ୍କର୍ଷ କେନ୍ଦ୍ର ସ୍ଥାପନ କରାଯାଇଛି। ଫଳରେ ସେଠାରେ ଯୁବପିଢ଼ିଙ୍କୁ ଏବେ ଉନ୍ନତ ଢାଞ୍ଚାରେ ଶିଳ୍ପ ଉପଯୋଗୀ ତାଲିମ ଦେଇ ସେମାନଙ୍କ ଦକ୍ଷତାକୁ ବିକଶିତ କରାଯାଇପାରୁଛି।

ଓଡ଼ିଶା ଖଣିଜ ପଦାର୍ଥ ଧାରକ ଅଞ୍ଚଳ ଉନ୍ନୟନ ନିଗମ ବା ଓମ୍ବାଡସି ପାଣ୍ଠି ସହାୟତାରେ ଓଡ଼ିଶାର ୫ଟି ଖଣି ପ୍ରଭାବିତ ଜିଲ୍ଲାରେ ମୋଟ ୧୪ଟି ସରକାରୀ ଶିଳ୍ପ ତାଲିମ ଓ ବୈଷୟିକ ଶିକ୍ଷା ଅନୁଷ୍ଠାନରେ ଏଭଳି ଉତ୍କର୍ଷ କେନ୍ଦ୍ର ପ୍ରତିଷ୍ଠା କରାଯାଉଛି। ଯାଜପୁର ସହିତ କେନ୍ଦୁଝର, ମୟୂରଭଞ୍ଜ, ଝାରସୁଗୁଡ଼ା ଏବଂ ଦେବଗଡ଼ ଜିଲ୍ଲାରେ ଏହିସବୁ କେନ୍ଦ୍ର ବିକଶିତ କରାଯାଉଛି। ତା’ ଭିତରେ ରହିଛି ୮ଟି ଆଇଟିଆଇ, ୩ଟି ପଲିଟେକନିକ୍ ଏବଂ ୩ଟି ଇଞ୍ଜିନିୟରିଂ କଲେଜ।

୨୦୧୫ ମସିହାରେ ରାଜ୍ୟ ସରକାରଙ୍କ ପକ୍ଷରୁ ଯାଜପୁରଠାରେ ଆଇଟିଆଇ ସ୍ଥାପନ କରାଯାଇଥିଲା। ଏହି ଦକ୍ଷତା ବିକାଶ କେନ୍ଦ୍ରରେ ବର୍ତ୍ତମାନ ୫ଟି ଟ୍ରେଡ୍ – ଫିଟର, ଇଲେକ୍ଟ୍ରିସିଆନ୍‌, ଏମଏମଭି, ୱେଲ୍ଡର ଏବଂ କମ୍ପ୍ୟୁଟର ଅପରେଟର ପ୍ରୋଗ୍ରାମିଂ ଆସିଷ୍ଟାଣ୍ଟ ବିଷୟରେ ଯୁବକ ଯୁବତୀମାନଙ୍କୁ ତାଲିମ ଦିଆଯାଉଛିୟ।

ଏଠାରେ ଥିବା ୱେଲ୍ଡିଂ ଟ୍ରେଡକୁ “ଥର୍ମାଲ କଟିଂ ଆଣ୍ଡ୍ ୱେଲ୍ଡିଂ” ବିଷୟରେ ଉତ୍କର୍ଷ କେନ୍ଦ୍ର ଭାବେ ରୂପାନ୍ତରିତ କରାଯାଇଛି। ମେସର କଟିଂ ସିଷ୍ଟମସ୍ କମ୍ପାନିର ବୈଷୟିକ ସହାୟତାରେ ଏହି ଆଧୁନିକ ଭିତ୍ତିଭୂମି ପ୍ରସ୍ତୁତ କରାଯାଇଛି। ରାଜ୍ୟ ସରକାରଙ୍କ “ସ୍କିଲ୍ଡ ଇନ୍ ଓଡ଼ିଶା” କାର୍ଯ୍ୟକ୍ରମ ଅଧୀନରେ ଏଭଳି ଦକ୍ଷତା ବିକାଶ କେନ୍ଦ୍ର ମାଧ୍ୟମରେ ଭବିଷ୍ୟତ ଲାଗି ଦକ୍ଷ ମାନବସମ୍ବଳ ପ୍ରସ୍ତୁତ କରାଯାଉଛି।

ଓମ୍ବାଡସି ସହାୟତାରେ ନିର୍ମିତ ଏହି ଉତ୍କର୍ଷ କେନ୍ଦ୍ରରେ ଛାତ୍ରଛାତ୍ରୀଙ୍କ ସୁବିଧା ପାଇଁ ଅତ୍ୟାଧୁନିକ ଲାବୋରେଟୋରି ରହିଛି। ଏଠାରେ ଲେଜର କଟିଂ, ପ୍ଲାଜମା କଟିଂ, ଡେଷ୍ଟ୍ରକ୍ଟିଭ୍ ଓ ନନ-ଡେଷ୍ଟ୍ରକ୍ଟିଭ୍ ଟେଷ୍ଟିଂ ମେସିନ ସହିତ ଆଧୁନିକ ୱେଲ୍ଡିଂ ମେସିନ ଆଦି ରଖାଯାଇଛି। ଛାତ୍ରଛାତ୍ରୀମାନେ ଏହିସବୁ ମେସିନରେ କାମ କରି ଶିଖିବା ସହ ଭବିଷ୍ୟତରେ ବିଭିନ୍ନ ଶିଳ୍ପରେ ଯାଇ କିପରି ଦକ୍ଷତାର ସହ କାମ କରିପାରିବେ ସେ ଦିଗରେ ପ୍ରସ୍ତୁତ ହେଉଛନ୍ତି।

“ଦେଶ ବିଦେଶର ବିଭିନ୍ନ ଶିଳ୍ପ ସଂସ୍ଥାରେ କାମ କରିବା ପାଇଁ ଆଜି ଦକ୍ଷ ଯୁବପିଢ଼ିଙ୍କର ଚାହିଦା ବଢ଼ିଛି। ତେଣୁ ଅତ୍ୟାଧୁନିକ ଜ୍ଞାନକୌଶଳକୁ ଆଧାରକରି ତଥା ଶିଳ୍ପ-ଉପଯୋଗୀ ଢାଞ୍ଚାରେ ଯାଜପୁର ସରକାରୀ ଆଇଟିଆଇରେ ଯୁବକ ଯୁବତୀମାନଙ୍କୁ ତାଲିମ ଦିଆଯାଉଛି। ଓମ୍ବାଡସି ସହାୟତାରେ ଆଜିର ଦିନରେ ବିଭିନ୍ନ ଶିଳ୍ପ ସଂସ୍ଥାରେ ବ୍ୟବହାର ହେଉଥିବା ଅତ୍ୟାଧୁନିକ ମେସିନ ଏଠାରେ ସ୍ଥାପନ କରାଯାଇଛି। ଫଳରେ ତାହା ଛାତ୍ରଛାତ୍ରୀମାନଙ୍କ ପ୍ରଶିକ୍ଷଣ ଲାଗି ଅଧିକ ଉପଯୋଗୀ ହୋଇପାରୁଛି”, କହିଛନ୍ତି ଯାଜପୁର ସରକାରୀ ଆଇଟିଆଇର ଅଧ୍ୟକ୍ଷା ସବିତାରାଣୀ ସାହୁ।

ଯାଜପୁର ସରକାରୀ ଆଇଟିଆଇରେ “ଥର୍ମାଲ କଟିଂ ଆଣ୍ଡ୍ ୱେଲ୍ଡିଂ” ବିଷୟରେ ଥିବା ଉତ୍କର୍ଷ କେନ୍ଦ୍ରରେ ରାଜ୍ୟର ବିଭିନ୍ନ ସରକାରୀ ଆଇଟିଆଇରୁ ଛାତ୍ରଛାତ୍ରୀ ଓ ପ୍ରଶିକ୍ଷକମାନେ ଆସି ମଧ୍ୟ ତାଲିମ ନେଉଛନ୍ତି। ୨୦୨୨-୨୩ ଶିକ୍ଷା ବର୍ଷରେ ପଟ୍ଟାମୁଣ୍ଡାଇ, ଭୁବନେଶ୍ୱର, ବ୍ରହ୍ମପୁର ଏବଂ ବଡ଼ବିଲସ୍ଥିତ ସରକାରୀ ଆଇଟିଆଇର ଛାତ୍ରଛାତ୍ରୀମାନେ ୬ଟି ବ୍ୟାଚରେ ଏଠାରେ ଆସି ତାଲିମ ନେଇଥିଲେ। ୨୦୨୩-୨୪ ବର୍ଷରେ ଏଭଳି ୨୦ଟି ବ୍ୟାଚକୁ “ଥର୍ମାଲ କଟିଂ ଆଣ୍ଡ୍ ୱେଲ୍ଡିଂ”ରେ ଅତ୍ୟାଧୁନିକ ତାଲିମ ଦେବାକୁ ଲକ୍ଷ୍ୟ ରଖାଯାଇଛି।

ଏହି କେନ୍ଦ୍ରରେ ଛାତ୍ରଛାତ୍ରୀମାନଙ୍କୁ ସେମାନଙ୍କ ନିଜ ନିଜ ଟ୍ରେଡ୍ ସହିତ ନିଯୁକ୍ତି କ୍ଷେତ୍ରରେ କିପରି ସଫଳତାର ସହ କାମ କରିବେ ସେଥିପାଇଁ ଆବଶ୍ୟକ ତାଲିମ ଦିଆଯାଉଛି। ଏହାସହିତ ବିଭିନ୍ନ ଶିଳ୍ପ ଅନୁଷ୍ଠାନର ସହଭାଗିତାରେ ଛାତ୍ରଛାତ୍ରୀମାନଙ୍କ ପାଇଁ ଅତିରିକ୍ତ ତାଲିମ କାର୍ଯ୍ୟକ୍ରମ କରାଯାଉଛି। ଯାଜପୁର ସରକାରୀ ଆଇଟିଆଇର ଆନୁସଙ୍ଗିକ ଭିତ୍ତିଭୂମିର ବିକାଶ ଲାଗି ମଧ୍ୟ ଓମ୍ବାଡସି ପାଣ୍ଠିରୁ ସହାୟତା ଦିଆଯାଉଛି।

ଭୁବନେଶ୍ୱର/ଯାଜପୁର: ଯାଜପୁର ଜିଲ୍ଲା ସଦର ମହକୁମାରେ ପ୍ରତିଷ୍ଠା କରାଯାଇଥିବା ରାଜ୍ୟର ପ୍ରଥମ “ମିଶନ ଶକ୍ତି ଭବନ” ସ୍ଥାନୀୟ ମହିଳା ସ୍ୱ୍ୱୟଂ ସହାୟକ ଗୋଷ୍ଠୀର ମା’ମାନଙ୍କ ଜୀବିକା ପାଇଁ ଏକ ନୂଆ ବାଟ ହୋଇପାରିଛି। ଏହି ବହୁମୁଖୀ ଭିତ୍ତିଭୂମି ମାଧ୍ୟମରେ ମହିଳାମାନଙ୍କର ଦକ୍ଷତା ବିକାଶ ସହିତ ଏସଏଚଜି ଦ୍ୱାରା ପ୍ରସ୍ତୁତ ବିଭିନ୍ନ ସାମଗ୍ରୀ ବର୍ଷ ସାରା ବିକ୍ରୟ ପାଇଁ ଏକ ପ୍ରମୁଖ କେନ୍ଦ୍ର ପାଲଟିଛି।

ଓଡ଼ିଶା ଖଣିଜ ପଦାର୍ଥ ଧାରକ ଅଞ୍ଚଳ ଉନ୍ନୟନ ନିଗମ ବା ଓମ୍ବାଡ୍‌ସି ପାଣ୍ଠି ବିନିଯୋଗରେ ଯାଜପୁର ଟାଉନଠାରେ ସରକାର ଏହି ଭବନ ନିର୍ମାଣ କରିଛନ୍ତି। ଏହି ଅତ୍ୟାଧୁନିକ ଭିତ୍ତିଭୂମିଠାରେ ଜିଲ୍ଲାର ଏସଏଚଜି ମହିଳାମାନଙ୍କ ପାଇଁ କମ୍ପ୍ୟୁଟର ତାଲିମ ସହ ଆର୍ଥିକ ସାକ୍ଷରତା ଓ ମୋବାଇଲ ମାଧ୍ୟମରେ ବିଭିନ୍ନ ପ୍ରକାର ଡିଜିଟାଲ କାରବାର ସମ୍ପର୍କରେ ଶିକ୍ଷା ଦିଆଯାଉଛି। ଫଳରେ ସେମାନେ ନିଜ ନିଜର ବ୍ୟବସାୟ ପରିଚାଳନା ଲାଗି ଅଧିକ ଦକ୍ଷ ହୋଇପାରୁଛନ୍ତି।

“କମ୍ପ୍ୟୁଟର ଶିଖିବା ଲାଗି ମୋ’ ମନରେ ଆଗ୍ରହ ରହିଥିଲା। ମିଶନ ଶକ୍ତି ଭବନ ହେବାରୁ ମୋର ଏହି ଇଚ୍ଛା ପୂରଣ ହୋଇପାରିଛି। ମୁଁ ଏବେ ନିଜେ କମ୍ପ୍ୟୁଟର ଚଲାଇବା ସହ ବିଭିନ୍ନ କାମ ସୁବିଧାରେ କରିପାରୁଛି। ଆଗକୁ ଏହା ମତେ ଅଧିକ ସହାୟକ ହେବ”, କହନ୍ତି ଯାଜପୁର ଜିଲ୍ଲାର ଜଣେ ଏସଏଚଜି ମା’ ଅନନ୍ୟା ସାଉ।

ସେହିପରି ମିଶନ ଶକ୍ତି ଭବନରେ ଏସଏଚଜି ମା’ମାନଙ୍କ ପାଇଁ ବିଧିବଦ୍ଧ ସିଲେଇ ତାଲିମ ବ୍ୟବସ୍ଥା କରାଯାଇଛି। ଏଥିପାଇଁ ଭବନରେ ୫୦ଟି ସିଲେଇ ମେସିନ ରହିଛି ଏବଂ ଆବଶ୍ୟକ ପ୍ରଶିକ୍ଷକଙ୍କୁ ନିଯୁକ୍ତ କରାଯାଇଛି। ଏହି ତାଲିମ କାର୍ଯ୍ୟକ୍ରମ ମାଧ୍ୟମରେ ଯାଜପୁର ଜିଲ୍ଲାର ଅନେକ ଏସଏଚଜି ସଦସ୍ୟା ସ୍ୱାବଲମ୍ବୀ ହେଉଛନ୍ତି।

ଏହି ୪୫ ଦିନିଆ ତାଲିମ ଶେଷ ହେବା ପରେ ଜିଲ୍ଲାସ୍ତରୀୟ ମିଶନ ଶକ୍ତି ମହାସଂଘ ପକ୍ଷରୁ ଏସଏଚଜି ମା’ମାନଙ୍କୁ ମାଗଣାରେ ଗୋଟିଏ ଲେଖାଏଁ ସିଲେଇ ମେସିନ ଦିଆଯାଉଛି। ଫଳରେ ସେମାନେ ଘରେ ରହି ବିଭିନ୍ନ ପ୍ରକାର ସିଲେଇ କାମ କରି ଭଲ ଦି’ ପଇସା ରୋଜଗାର କରିପାରୁଛନ୍ତି।

“ଆଗରୁ ଆମେ ଘରେ ଘରେ ବଡ଼ି, ପାମ୍ପଡ଼ ଆଦି ତିଆରି କରୁଥିଲୁ। ହେଲେ ଏବେ ସିଲେଇ ଶିଖି ଏହି ନୂଆ କାମ କରିପାରୁଛୁ। ପ୍ରଶାସନ ପକ୍ଷରୁ ଆମକୁ ଅଙ୍ଗନବାଡ଼ି ଏବଂ ସ୍କୁଲ ପିଲାମାନଙ୍କ ପାଇଁ ୟୁନିଫର୍ମ ତିଆରି କାମ ମିଳୁଛି। ଏହା ଆମକୁ ରୋଜଗାରର ଏକ ନୂଆ ବାଟ ଦେଖାଇଛି”, କହନ୍ତି ଜିଲ୍ଲାର ଆଉ ଜଣେ ଏସଏଚଜି ସଦସ୍ୟା ମିନତି ସେନାପତି।
ମିଶନ ଶକ୍ତି ଭବନରେ ଗୋଲ୍ଡେନ୍ ଗ୍ରାସ୍‌, ନଡ଼ିଆ କତା, ଝୋଟରୁ ବିଭିନ୍ନ ସାମଗ୍ରୀ ପ୍ରସ୍ତୁତି ପାଇଁ ମଧ୍ୟ ଏସ୍‌ଏଚଜି ମହିଳାମାନଙ୍କୁ ତାଲିମ ଦିଆଯାଉଛି। ଏହିସବୁ ହସ୍ତକଳା ସାମଗ୍ରୀର ଆଜି ବଜାରରେ ଚାହିଦା ବଢୁଛି।

ଯାଜପୁର ଜିଲ୍ଲାର ୧୦ଟି ବ୍ଲକ୍ ଓ ୨ଟି ପୌରପାଳିକାରେ ରହିଛି ୨୫ ହଜାରରୁ ଅଧିକ ମହିଳା ସ୍ୱୟଂ ସହାୟକ ଗୋଷ୍ଠୀ। ସେଥିମଧ୍ୟରୁ ଅଧିକାଂଶ ଗୋଷ୍ଠୀ ହସ୍ତତନ୍ତ, ଟେରାକୋଟା, ଘର ସାଜସଜ୍ଜା ଉପକରଣ ଓ ବିଭିନ୍ନ ପ୍ରକାର ଖାଦ୍ୟ ସାମଗ୍ରୀ ପ୍ରସ୍ତୁତ କରୁଛନ୍ତି। ଏସବୁ ଜିନିଷର ପ୍ରଦର୍ଶନୀ ଏବଂ ନିୟମିତ ବିକ୍ରିବଟା ଲାଗି ମିଶନ ଶକ୍ତି ଭବନରେ ସ୍ୱତନ୍ତ୍ର ଆଉଟଲେଟ୍ ଖୋଲାଯାଇଛି।

ମିଶନ ଶକ୍ତି ଭବନକୁ ଏକ ବହୁମୁଖୀ ଭିତ୍ତିଭୂମି ରୂପେ ନିର୍ମାଣ କରାଯାଇଛି। ଏଠାରେ ତାଲିମ ଓ ବିକ୍ରୟ କେନ୍ଦ୍ର ଛଡ଼ା ବିଭିନ୍ନ ପ୍ରକାର ବ୍ୟବହାର ପାଇଁ ଆନୁଷଙ୍ଗିକ ଭିତ୍ତିଭୂମି ରହିଛି। ସଭାସମିତି ପରିଚାଳନା ପାଇଁ ଅଡିଟୋରିୟମ, ମା’ମାନଙ୍କ ବୈଠକ ପାଇଁ ସଭାଗୃହ ଏବଂ ଜିଲ୍ଲାର ବିଭିନ୍ନ ସ୍ଥାନରୁ ଆସୁଥିବା ଏସଏଚଜି ସଦସ୍ୟାଙ୍କ ରହିବା ସୁବିଧା ପାଇଁ ରହଣି ସ୍ଥଳର ବ୍ୟବସ୍ଥା କରାଯାଇଛି।

“ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟାମାନଙ୍କ ସଶକ୍ତିକରଣ ଦିଗରେ ଏକ ବଡ଼ ଭୂମିକା ଗ୍ରହଣ କରିଛି ମିଶନ ଶକ୍ତି ଭବନ। ଏଠାରେ ବିଭିନ୍ନ ପ୍ରକାର କାର୍ଯ୍ୟକ୍ରମ ସହ ଡିଜିଟାଲ ସାକ୍ଷରତା ପାଇଁ ୧୦ ହଜାରରୁ ଅଧିକ ମା’ଙ୍କୁ ତାଲିମ ଦିଆଯିବା ଫଳରେ ସେମାନଙ୍କ ଦକ୍ଷତା ବଢ଼ି ପାରିଛି। ସହର ବା ଗାଁରେ ରହି ଆଜି ସେମାନେ ମୋବାଇଲ ଫୋନ ବ୍ୟବହାର କରି ଅନଲାଇନ ଜରିଆରେ ନିଜ ନିଜର କାରବାର ପରିଚାଳନା କରିପାରୁଛନ୍ତି”, କହିଛନ୍ତି ଯାଜପୁର ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟନିର୍ବାହୀ ଅଧିକାରୀ ଅଶୋକ କୁମାର ବେହୁରିଆ।

ଏହି ଭବନର ପରିଚାଳନା ଦାୟିତ୍ୱ ଯାଜପୁର ଜିଲ୍ଲା ମିଶନ ଶକ୍ତି ମହାସଂଘ ହାତରେ ନ୍ୟସ୍ତ କରାଯାଇଛି । ଏଠାରେ ଥିବା ବିଭିନ୍ନ ସୁବିଧା ସୁଯୋଗ ସମ୍ପର୍କରେ ମହାସଂଘର ସଭାପତି ସୁଜାତା ସାହୁ କହନ୍ତି, ଏହି ଭବନରେ ଏସଏଚଜି ମା’ମାନଙ୍କ ଜୀବିକା ପାଇଁ ବିଭିନ୍ନ ପ୍ରକାରର ତାଲିମ ଦିଆଯାଉଛି । ତେଣୁ ଜିଲ୍ଲାର ବିଭିନ୍ନ ଗାଁ ଓ ସହରରୁ ମହିଳାମାନେ ନିୟମିତ ଏଠାକୁ ଆସୁଛନ୍ତି । ସେମାନଙ୍କ ପାଇଁ ଏଠାରେ ଦକ୍ଷତା ବିକାଶ ଓ ଉତ୍ପାଦନ କ୍ଷମତା ବୃଦ୍ଧି ତାଲିମ ସହ ବଜାର ସଂଯୋଗ ବ୍ୟବସ୍ଥା କରାଯାଇଛି ।”

ରାଜ୍ୟର ୮ଟି ଖଣି ପ୍ରଭାବିତ ଜିଲ୍ଲାରେ ଆଦିବାସୀ ଓ ସ୍ଥାନୀୟ ଅଞ୍ଚଳର ବିକାଶକୁ ଦୃଷ୍ଟିରେ ରଖି ବିଭିନ୍ନ ଜନକଲ୍ୟାଣ କାର୍ଯ୍ୟକ୍ରମ ଲାଗି ଓମ୍ବାଡସି ପାଣ୍ଠିରୁ ଅର୍ଥ ବ୍ୟବସ୍ଥା କରାଯାଉଛି । ଯାଜପୁରରେ ଓମ୍ବାଡ୍‌ସି ସହାୟତାରେ ନିର୍ମିତ ମିଶନ ଶକ୍ତି ଭବନ ଆଜି ଜିଲ୍ଲାର ମହିଳା ସଶକ୍ତିକରଣ ପାଇଁ ଚାଲିଥିବା ବିଭିନ୍ନ କାର୍ଯ୍ୟକ୍ରମକୁ ଅଧିକ ପ୍ରଭାବୀ କରିପାରିଛି । ଏହା ସହିତ ସେମାନଙ୍କ ଦୀର୍ଘସ୍ଥାୟୀ ଜୀବିକା ପାଇଁ ମଧ୍ୟ ଏକ ଆଶା ହୋଇପାରିଛି ।

ଭୁବନେଶ୍ୱର: କଂଗ୍ରେସ ଦଳର ନୀତି ଆଦର୍ଶରେ ଅନୁପ୍ରାଣିତ ହୋଇ ଯାଜପୁର ଜିଲ୍ଲା ବିଜୁ ମହିଳା ଜନତା ଦଳର ଉପସଭାନେତ୍ରୀ ଶ୍ରୀମତୀ ଆରତୀ ଦେଓଙ୍କ ସମେତ ବହୁ ବିଜେଡ଼ି କର୍ମୀ ଆଜି ବିଜେଡ଼ି ଛାଡ଼ି କଂଗ୍ରେସ ଦଳରେ ସାମିଲ ହୋଇଛନ୍ତି ।

ଏହି ଅବସରରେ ଭୁବନେଶ୍ୱର ପ୍ରଦେଶ କଂଗ୍ରେସ କାର୍ଯ୍ୟାଳୟ ଠାରେ ଆୟୋଜିତ ମିଶ୍ରଣ ପର୍ବ କାର୍ଯ୍ୟକ୍ରମରେ ପ୍ରଦେଶ କଂଗ୍ରେସ କମିଟି ସଭାପତି ଶ୍ରୀ ଶରତ ପଟ୍ଟନାୟକ ସମସ୍ତଙ୍କୁ ପୁଷ୍ପମାଲ୍ୟ, ଉତ୍ତରୀୟ ପ୍ରଦାନ କରି ସ୍ୱାଗତ କରିଥିଲେ ଏବଂ ଆନୁଷ୍ଠାନିକ ଭାବେ କଂଗ୍ରେସ ଦଳରେ ଗ୍ରହଣ କରିନେଇଥିଲେ। ଉଦ୍‌ବୋଧନ ଦେଇ ଶ୍ରୀ ପଟ୍ଟନାୟକ କହିଲେ ଯେ, ଶ୍ରୀମତୀ ଦେଓଙ୍କ ଯୋଗଦାନ କଂଗ୍ରେସକୁ ଯାଜପୁର ଜିଲ୍ଲାରେ ସୁଦୃଢ଼ କରିବ। ଯାଜପୁର ଜିଲ୍ଲା କଂଗ୍ରେସ ସଭାପତି ଶ୍ରୀ ମନୋଜ ରାଉତ ଏହି କାର୍ଯ୍ୟକ୍ରମକୁ ସଂଯୋଜନା କରି ସମସ୍ତଙ୍କୁ ସ୍ୱାଗତ କରିଥିଲେ।

ନିଜ ବକ୍ତବ୍ୟରେ ଶ୍ରୀମତୀ ଦେଓ କହିଲେ ଯେ ଆଗାମୀ ଦିନରେ କଂଗ୍ରେସ ସୁଦୃଢ଼ କରିବାରେ ମୁଁ ନିଷ୍ଠାପର ଭାବରେ ମୋର ଉଦ୍ୟମ ଜାରି ରଖିବି ବୋଲି ସେ କହିଥିଲେ। ଶ୍ରୀମତୀ ଦେଓଙ୍କ ସହ ବିଜେଡ଼ି ଛାଡ଼ି କଂଗ୍ରେସରେ ଯୋଗ ଦେଇଥିବା ଅନ୍ୟ ନେତୃବୃନ୍ଦ ହେଲେ ସର୍ବଶ୍ରୀ ସେକ୍ ଇମ୍‌ତିୟାଜ ଖାନ୍‌, ଏସ୍‌.କେ. ଅଲ୍ଲହାଜ ଅଲ୍ଲୀ, ମନୋଜ ଜେନା, ମଙ୍ଗୁମହାନ୍ତି, ଅନନ୍ତ ଘଡ଼େଇ, ନରେଶ ବେହୁରିଆ, ମମିତା ମଲ୍ଲିକ, ଅଲିଭା ଘଡ଼େଇ, ସନ୍ଧ୍ୟା ମଲ୍ଲିକ, ଦିପୁ ମଲ୍ଲିକ, ଗୋପାଳ ଜେନା ଓ ପ୍ରକାଶ ଦେଓ ପ୍ରମୁଖ।

ଆଜିର ଏହି କାର୍ଯ୍ୟକ୍ରମରେ କଟକ ଜିଲ୍ଲା କଂଗ୍ରେସ କମିଟିର ସଭାପତି ଶ୍ରୀ ମାନସ ଚୌଧୁରୀ, ଭୁବନେଶ୍ୱର ଜିଲ୍ଲା ସଭାପତି ଶ୍ରୀ ବିଶ୍ୱଜିତ୍ ଦାଶ, ଜାନକୀବଲ୍ଲଭ ପଟ୍ଟନାୟକ, ପୂର୍ବତନ ବିଧାୟକ ଶ୍ରୀ ଚିନ୍ମୟ ପ୍ରସାଦ ବେହୁରା, ରଜନୀ ମହାନ୍ତି, ପ୍ରଦେଶ ଛାତ୍ର କଂଗ୍ରେସ ସଭାପତି ଶ୍ରୀ ୟାସିର ନୱାଜ, ପ୍ରକାଶ ମିଶ୍ର, ଭୁବନେଶ୍ୱର ଜିଲ୍ଲା ଯୁବ କଂଗ୍ରେସ ସଭାପତି ଶ୍ରୀ ରଞ୍ଜିତ୍ ପାତ୍ର, ସୁବ୍ରତ ମହାପାତ୍ର, ପ୍ରଭାତ ପ୍ରତାପ ସିଂ, ବ୍ଲକ ସଭାପତି ଶ୍ରୀ ଅଶୋକ ଦାସ, ଗୀତାଞ୍ଜଳୀ ମହାନ୍ତି, ମିହିର ଆଚାର୍ଯ୍ୟ, ଜୟକୃଷ୍ଣ ସୁବୁଧି ଓ ଅମରେଶ ପରିଡ଼ା ପ୍ରମୁଖ ଉପସ୍ଥିତ ଥିଲେ।

ଭୁବନେଶ୍ୱର : ସ୍ୱାଧୀନତାର ୭୫ ବର୍ଷ ପୂର୍ତି ଅବସରରେ ଦେଶ ଆଜି ସ୍ୱାଧୀନତାର ଅମୃତ ମହୋତ୍ସବ ପାଳନ କରୁଛି। ସ୍ୱାଧୀନତାର ଅମୃତ ମହୋତ୍ସବ ପ୍ରତ୍ୟେକ ଭାରତୀୟଙ୍କ ପାଇଁ ଗର୍ବ ଓ ଗୌରବର ବିଷୟ। ଏହି ଅବସରରେ ଆଜି ଯାଜପୁର ଜିଲ୍ଲା ଧର୍ମଶାଳା ଠାରେ ଆୟୋଜିତ ‘ହର୍ ଘର୍ ତ୍ରିରଙ୍ଗା’ କାର୍ଯ୍ୟକ୍ରମରେ ରାଜ୍ୟ ସଭାପତି ଶ୍ରୀ ସମୀର ମହାନ୍ତି ଯୋଗ ଦେଇଛନ୍ତି।

ରାଜ୍ୟ ସଭାପତି ଶ୍ରୀ ମହାନ୍ତିଙ୍କ ସମେତ ହଜାର ହଜାର ସଂଖ୍ୟାରେ କାର୍ଯ୍ୟକର୍ତା ଓ ଜନସାଧାରଣ ତ୍ରିରଙ୍ଗା ପତାକାକୁ ହାତରେ ଧରି ଏହି ଯାତ୍ରାରେ ସାମିଲ ହୋଇଥିଲେ।
ଆଗାମୀ ୨୫ ବର୍ଷର ଅମୃତ କାଳଖଣ୍ଡ ଆମ ସମସ୍ତଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ବିଶେଷ ଭାବେ ଯୁବପିଢୀଙ୍କ ପାଇଁ ସ୍ୱତନ୍ତ୍ର ଆହ୍ୱାନ ବୋଲି ରାଜ୍ୟ ସଭାପତି ଶ୍ରୀ ସମୀର ମହାନ୍ତି କହିଛନ୍ତି।

ଯୁବପିଢୀଙ୍କୁ ସ୍ୱାଧୀନତା ଏବଂ ସ୍ୱାଧୀନତା ସଂଗ୍ରାମୀଙ୍କ ସଂଗ୍ରାମ ଏବଂ ବଳିଦାନ ସଂପର୍କରେ ଭଲଭାବେ ଅବଗତ କରାଇବା ଏହି ଯାତ୍ରାର ମୂଳ ଲକ୍ଷ୍ୟ। ସ୍ୱାଧୀନତା ସଂଗ୍ରାମରୁ ଶକ୍ତି ଏବଂ ସ୍ୱାଧୀନତା ସେନାନୀଙ୍କ ବିଚାର ଓ ସଂକଳ୍ପକୁ ପାଥେୟ କରି ଆସନ୍ତା ଅମୃତ କାଳଖଣ୍ଡରେ ଭାରତବର୍ଷକୁ ଆତ୍ମନିର୍ଭର, ବିଶ୍ୱର ଶ୍ରେଷ୍ଠ ଦେଶ ଏବଂ ବିଶ୍ୱଗୁରୁ ଭାବେ ଗଢି ତୋଳିବା ପାଇଁ ଯୁବପୀଢିଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଆଜିର ଏହି ଅମୃତ ବେଳାରେ ଯୁବପିଢୀ ସଂକଳ୍ପ ନେବା ଆବଶ୍ୟକ ବୋଲି ଭାରତୀୟ ଜନତା ପାର୍ଟିର ରାଜ୍ୟ ସଭାପତି ଶ୍ରୀ ମହାନ୍ତି କହିଛନ୍ତି।

ଏହି ଅମୃତ ମହୋତ୍ସବ କାଳଖଣ୍ଡରେ ମୋଦୀ ସରକାରଙ୍କ ୮ବର୍ଷ ଶାସନ ମଧ୍ୟରେ ଓଡ଼ିଆ ଅସ୍ମିତା ପାଇଁ ତାଙ୍କ ଭୂମିକା ଅତୁଳନୀୟ। ସମସ୍ତ କ୍ଷେତ୍ରରେ ମୋଦି ସରକାର ଆଜି ଓଡ଼ିଆଙ୍କୁ ସମ୍ମାନୀତ କରିଛନ୍ତି। ନିଜ ମନ୍ତ୍ରୀମଣ୍ଡଳରେ ୩ ଓଡ଼ିଆଙ୍କୁ ମନ୍ତ୍ରୀ କରିବା ସହ ସମସ୍ତ ପ୍ରଶାସନିକ କ୍ଷେତ୍ରରେ ଓଡ଼ିଆଙ୍କୁ ପ୍ରାଥମିକତା ଦେଇଛନ୍ତି। ସେହିଭଳି ସର୍ବୋପରି ଦେଶର ପ୍ରଥମ ସାମ୍ବିଧାନିକ ପଦବୀ ରାଷ୍ଟ୍ରପତି ପଦରେ ଅଳଂକୃତ ହୋଇଥିବା ଶ୍ରୀମତୀ ଦ୍ରୌପଦୀ ମୁୁର୍ମୁ ଆମ ରାଜ୍ୟ ତଥା ଦେଶକୁ ଗୌରବାନ୍ୱିତ କରିଛନ୍ତି।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ଓ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ନେତୃତ୍ୱରେ ସମଗ୍ର ଭାରତ ବର୍ଷରେ ଘରେ ଘରେ ତ୍ରିରଙ୍ଗା ଉଡାଇବା ପାଇଁ ଦେଶବାସୀଙ୍କୁ ଆହ୍ୱାନ ଦେଇଛନ୍ତି। ଭାରତୀୟ ଜନତା ପାଟି ଅଗଷ୍ଟ ୯ କ୍ରାନ୍ତିଦିବସଠାରୁ ତ୍ରିରଙ୍ଗା ଯାତ୍ରା ଆରମ୍ଭ ହୋଇ ସ୍ୱାଧୀନତା ଦିବସରେ ଶେଷ ହୋଇଛି। ତ୍ରିରଙ୍ଗା ମାଧ୍ୟମରେ ଜାତୀୟତାବାଦ, ରାଷ୍ଟ୍ରବାଦ ପ୍ରଚାର କରିବା ସହ ଦେଶପ୍ରେମ ଜାଗ୍ରତ କରିବା ଭାରତୀୟ ଜନତା ପାର୍ଟିର ଉଦ୍ଦେଶ୍ୟ ବୋଲି ଶ୍ରୀ ମହାନ୍ତି କହିଛନ୍ତି ।

ଏହି ପଦଯାତ୍ରାରେରାଜ୍ୟ କାର୍ଯ୍ୟକାରିଣୀ ସଦସ୍ୟ ତଥା ଜିଲ୍ଲା ପ୍ରଭାରୀ ଶ୍ରୀ ଶାରଦା ଶତପଥୀ, ଜିଲ୍ଲା ସଭାପତି ଶ୍ରୀ ଗୌତମ ରାୟ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଶ୍ରୀମତୀ ସ୍ମୃତିରେଖା ପହି, ଅନୁସୂଚିତ ଜାତି ମୋର୍ଚ୍ଚାରାଜ୍ୟ ସଂଯୋଜକ ରବି ନାରାୟଣ ବେହେରା ପ୍ରମୁଖ ଉପସ୍ଥିତ ଥିଲେ।

ଭୁବନେଶ୍ବର: ବଙ୍ଗୋବ ସାଗରରେ ସୃଷ୍ଟି ହୋଇଥିବା ଘୂର୍ଣ୍ଣ ବଳୟ ସକ୍ରିୟ ହେବାରେ ଲାଗିଛି। ଫଳରେ ଏହାର ପ୍ରଭାବରେ ରାଜ୍ୟର ୧୫ ଜିଲ୍ଲାରେ ପ୍ରବଳ ବର୍ଷା ସମ୍ଭାବନା ରହିଛି ବୋଲି ପାଣିପାଗ ବିଭାଗ ତରଫରୁ କୁହାଯାଇଛି। ସେହି ଜିଲ୍ଲାଗୁଡିକ ହେଲା ଅନୁଗୁଳ, ଢେଙ୍କାନାଳ, କଟକ, ନୟାଗଡ଼, ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡା, ଯାଜପୁର, କନ୍ଧମାଳ, ଗଞ୍ଜାମ, ବୌଦ୍ଧ, ସମ୍ବଲପୁର, ମୟୂରଭଞ୍ଜ, ଦେବଗଡ଼ ଓ କେନ୍ଦୁଝର।

ଫଟୋ- ଆଜି ସକାଳେ ଉପଗ୍ରହରୁ ମିଳିଥିବା ଚିତ୍ର

ଭୁବନେଶ୍ବର : ଆଜି ରାଜ୍ୟର 21ଟି ଜିଲ୍ଲାରୁ 595 କରୋନା ଆକ୍ରାନ୍ତ ଚିହ୍ନଟ ହୋଇଛି। ଗଞ୍ଜାମରୁ ସର୍ବାଧିକ 230 ଜଣ ଚିହ୍ନଟ ହୋଇଥିବାବେଳେ ଯାଜପୁରରୁ 97, ଖୋର୍ଦ୍ଧାରୁ 76,କୋରାପୁଟରୁ 44, ମାଲକାନଗିରିରୁ 36, ଗଜପତିରୁ 20, ମୟୂରଭଞ୍ଜରୁ 14, ବାଲେଶ୍ବର, ଭଦ୍ରକ ଓ କଟକରୁ 11 ଜଣ ଲେଖାଏଁ ଚିହ୍ନଟ ହୋଇଛନ୍ତି ।  ପୁରୀରୁ 10, ସୁନ୍ଦରଗଡରୁ 8 ଜଣ ଚିହ୍ନଟ ହୋଇଥିବାବେଳେ ନୟାଗଡ ଓ ଜଗତସିଂହପୁରୁ 5 ଜଣ ଲେଖାଏଁ ଚିହ୍ନଟ ହୋଇଛନ୍ତି । ସେହିପରି କଳାହାଣ୍ଡିରୁ 4, ବରଗଡ ଓ କେଉଁଝରରୁ 3 ଜଣ ଲେଖାଏଁ ରହିଛନ୍ତି ।  କେନ୍ଦ୍ରାପଡା, ରାୟଗଡା, ସମ୍ବଲପୁରରୁ 2 ଜଣ ଲେଖାଏଁ ଚିହ୍ନଟ ହୋଇଥିବାବେଳେ ବଲାଙ୍ଗିରରୁ ଜଣେ ରହିଛନ୍ତି ।

ଭୁବନେଶ୍ବର : ପୁଣି ଦୁଇଟି ମୁଣ୍ଡ ନେଲା କରୋନା । ଆଜି ରାଜ୍ୟରୁ ପୁଣି ଦୁଇଟି ମୁଣ୍ଡ ନେଇଛି କରୋନା । ମୃତକଜଣଙ୍କ ମଧ୍ୟରୁ ଜଣେ ଗଞ୍ଜାମ ଜିଲ୍ଲାର ହୋଇଥିବାବେଳେ ଯାଜପୁରରୁ ଅନ୍ୟ ଜଣେ ମୃତ୍ୟୁବରଣ କରିଥିବାର ସୂଚନା ଦେଇଛି ରାଜ୍ୟସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ।

ଗଞ୍ଜାମର ମୃତକଙ୍କ ବୟସ 77 ବର୍ଷ ବୋଲି ଜଣାପଡିଛି । ସେ ହାଇପର୍ଟେସନ୍‌ରେ ପୀଡ଼ିତ ଥିଲେ । ସେହିପରି ଯାଜପୁରରୁ ମୃତ୍ୟୁବରଣ କରିଥିବା ମୃତକଙ୍କ ବୟସ 64।ସେ  ଡାଇବେଟିସ୍‌ରେ ପୀଡ଼ିତ ଥିଲେ ବୋଲି ସୂଚନା ରହିଛି ।

ସୂଚନାଯୋଗ୍ୟ, ରାଜ୍ୟରେ ଏବେ ସୁଦ୍ଧା କରୋନା ମୃତ୍ୟୁ ସଂଖ୍ୟା 38ରେ ପହଞ୍ଚିଛି । ଗଞ୍ଜାମ ଜିଲ୍ଲାରେ ମୃତ୍ୟୁ ସଂଖ୍ୟା 21କୁ ବୃଦ୍ଧି ହୋଇଥିବାବେଳେ ଖୋର୍ଦ୍ଧା ଜିଲ୍ଲାରେ ମୃତ୍ୟୁ ସଂଖ୍ୟା 7ରେ ରହିଛି । ଆଜି ଯାଜପୁରରୁ ପ୍ରଥମ ମୁଣ୍ଡ ନେଇଛି କରୋନା । ସେହିପରି 10 ଜଣ କରୋନା ଆକ୍ରାନ୍ତ ହୋଇଥିବାବେଳେ ଅନ୍ୟ ରୋଗରେ ମୃତ୍ୟୁବରଣ କରିଥିବାର ସୂଚନା ରହିଛି ।

ଭୁବନେଶ୍ବର : ଆଜି ରାଜ୍ୟରେ 456ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଆଜି 24ଟି ଜିଲ୍ଲାରୁ 456ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଗଞ୍ଜାମ ଜିଲ୍ଲାରୁ ସର୍ବାଧିକ 166 ଚିହ୍ନଟ ହୋଇଥିବାବେଳେ ଯାଜପୁରରୁ 57, ବରଗଡରୁ 33, ନବରଙ୍ଗପୁରରୁ 24, ଜଗତସିଂହପୁରର 23, ଖୋର୍ଦ୍ଧାରୁ 21, ସୁନ୍ଦରଗଡରୁ 20, ସମ୍ବଲପୁରରୁ 15, ବାଲେଶ୍ବରରୁ 14, ରାୟଗଡା ଓ କଟକରୁ 13ଜଣ ଲେଖାଏଁ ଚିହ୍ନଟ ହୋଇଛନ୍ତି । ଭଦ୍ରକରୁ 12, କୋରାପୁଟରୁ 10, ମୟୂରଭଞ୍ଜରୁ 8, ବଲାଙ୍ଗିରରୁ 6 କେନ୍ଦ୍ରାପଡାରୁ 5ଜଣ ଚିହ୍ନଟ ହୋଇଛନ୍ତି । ନୟାଗଡରୁ ଚାରି ଓ ପୁରୀ ଓ କନ୍ଧମାଳରୁ 3ଜଣ ଲେଖାଏଁ ଚିହ୍ନଟ ହୋଇଛନ୍ତି । କେଉଁଝରରୁ 2 ଜଣ ଚିହ୍ନଟ ହୋଇଛନ୍ତି । ସେହିପରି ଢେଙ୍କାନାଳ, କଳାହାଣ୍ଡି, ଗଜପତି ଅନୁଗୁଳରୁ ଜଣେ ଲେଖାଏଁ ଚିହ୍ନଟ ହୋଇଛନ୍ତି ।

ଯାଜପୁର : ଯାଜପୁର ଜିଲ୍ଲାରେ ସାଧାରଣ ଲୋକଙ୍କୁ ସରକାରୀ ଅଫିସ୍‌ ଯିବାକୁ ବାରଣ କରାଯାଇଛି । 8 ତାରିଖ ମଧ୍ୟରାତ୍ର ଯାଏ ଅଫିସ୍‌ ଯିବାକୁ ବାରଣ କଲେ ଜିଲ୍ଲାପାଳ । 48 ଘଣ୍ଟା ମଧ୍ୟରେ ଜିଲ୍ଲାରେ 81 ପଜିଟିଭ୍‌ ଚିହ୍ନଟ ପରେ ପଦକ୍ଷେପ । 81 ଜଣଙ୍କ ମଧ୍ୟରେ ଜଣେ ବରିଷ୍ଠ ସରକାରୀ ଅଫିସ୍‌ର ରହିଥିବାର ସୂଚନା ରହିଛି ।

ସୂଚନାଯୋଗ୍ୟ, ପୂର୍ବରୁ ଗଞ୍ଜାମରେ ମଧ୍ୟ ସରକାରୀ ଅଫିସ୍‌କୁ ସର୍ବସାଧାରଣଙ୍କୁ ବାରଣ କରାଯାଇଛି । ଗଞ୍ଜାମ ଜିଲ୍ଲାରେ ଥିବା ସବୁ ସରକାରୀ ଅଫିସ୍‌କୁ ସର୍ବସାଧାରଣଙ୍କ ଯିବା ଉପରେ ଜିଲ୍ଲା ପ୍ରଶାସନ ପକ୍ଷରୁ କଟକଣା ଜାରି କରାଯାଇଛି।

ଭୁବନେଶ୍ବର : ଆଜି ରାଜ୍ୟରୁ ନୂତନ 264ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଆଜି 23ଟି ଜିଲ୍ଲାରୁ ମୋଟ୍‌ 264ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଗଞ୍ଜାମରୁ ସର୍ବାଧିକ 76 ଜଣ ଚିହ୍ନଟ ହୋଇଥିବାବେଳେ ଯାଜପୁରରୁ 41 ଜଣ ଚିହ୍ନଟ ହୋଇଛନ୍ତି। କେଉଁଝରରୁ 25 ଚିହ୍ନଟ ଜଣ ଚିହ୍ନଟ ହୋଇଥିବା ସ୍ଥଳେ ଝାରସୁଗୁଡା ଓ ବରଗଡରୁ 18 ଜଣ ଲେଖାଏଁ ଚିହ୍ନଟ ହୋଇଛନ୍ତି । ସେହିପରି ଖୋର୍ଦ୍ଧା ଓ ମୟୂରଭଞ୍ଜର 15 ଜଣ ଲେଖାଏ ଚିହ୍ନଟ ହୋଇଛନ୍ତି । ସେହିପରି ବାଲେଶ୍ବର ଓ କଟକରୁ 12 ଜଣ ଲେଖାଏଁ ରହିଛନ୍ତି । ପୁରୀରୁ 7 ଜଣ ଚିହ୍ନଟ ହୋଇଥିବା ସ୍ଥଳେ ସୁନ୍ଦରଗଡ, ଜଗତସିଂହପୁର ଓ ଅନୁଗଳୁରୁ 4 ଜଣ ଲେଖାଏଁ ଚିହ୍ନଟ ହୋଇଛନ୍ତି । ମାଲ୍‌କାନଗିରି, ନୟାଗଡ ଓ ବଲାଙ୍ଗିରରୁ ଦୁଇଜଣ ଲେଖାଏଁ ଚିହ୍ନଟ ହୋଇଥିବାବେଳେ କନ୍ଧମାଳ,ସମ୍ବଲପୁର, କଳାହାଣ୍ଡି, ଗଜପତି, ନୂଆପଡା, ଭଦ୍ରକ, କୋରାପୁଟରୁ ଜଣେ ଲେଖାଏଁ ଚିହ୍ନଟ ହୋଇଛନ୍ତି ।

ଭୁବନେଶ୍ବର : ଆଜି ଆଉ 99 ଆକ୍ରାନ୍ତ ସୁସ୍ଥ ହୋଇଥିବା ନେଇ ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ରହିଛି । ଆଜି ସୁସ୍ଥଙ୍କ ମଧ୍ୟରେ ଯାଜପୁରରୁ ସର୍ବାଧିକ 16 ଜଣ ସୁସ୍ଥ ହୋଇଛନ୍ତି । ଖୋର୍ଦ୍ଧାରୁ 13 ଜଣ, କେନ୍ଦ୍ରାପଡାରୁ11 ଜଣ, ଗଞ୍ଜାମରୁ 9 ଜଣ, ଦେବଗଡରୁ 8, କଟକରୁ ଓ ଜଗତସିଂହପୁରର 7 ଜଣ ଲେଖାଏଁ ରହିଥିବାବେଳେ ବାଲେଶ୍ବର, ବରଗଡ ଓ ବଲାଙ୍ଗିରରୁ 6 ଜଣ ଲେଖାଏଁ ରହିଛନ୍ତି । କେଉଁଝରରୁ ତିନି ଜଣ ସୁସ୍ଥ ହୋଇଥିବାବେଳେ ନୟାଗଡରୁ 3 ଜଣ ସୁସ୍ଥ ହୋଇଛନ୍ତି । ସେହିପରି କୋରାପୁଟ, ସମ୍ବଲପୁର ଓ ସୁନ୍ଦରଗଡରୁ ଜଣେ ଲେଖାଏଁ ସୁସ୍ଥ ହୋଇଛନ୍ତି । ରାଜ୍ୟରେ ସୁସ୍ଥଙ୍କସଂଖ୍ୟା 1993ରେ ପହଞ୍ଚିଛି । ଆଜି ରାଜ୍ୟରେ 138 ଆକ୍ରାନ୍ତ ଚିହ୍ନଟ ହୋଇଥିବାବେଳେ ମୋଟ୍‌ ସଂକ୍ରମିତଙ୍କ ସଂଖ୍ୟା 2994ରେ ପହଞ୍ଚିଛି ।