ନୂଆଦିଲ୍ଲୀ: କେନ୍ଦ୍ର ସରକାର କର୍ମଚାରୀମାନଙ୍କ ପାଇଁ ଏକ ଖୁସି ଖବର। ସେମାନଙ୍କ ଦରମା ଏବଂ ପେନସନଭୋଗୀଙ୍କ ଭତ୍ତା ପୁନର୍ବିବେଚନ କରିବା ପାଇଁ ଅଷ୍ଟମ ପେ କମିଶନ୍ ଗଠନ କରିବାକୁ ସରକାର ସମ୍ମତି ଦେଇଛି। ଏ ନେଇ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅନୁମୋଦନ କରିଛନ୍ତି। କ୍ୟାବିନେଟ ବୈଠକ ପରେ ଏହାକୁ ଘୋଷଣା କରିଛନ୍ତି ମନ୍ତ୍ରୀ ଅଶ୍ୱିନୀ ବୈଷ୍ଣବ।
ସାଧାରଣ ଭାବରେ ସେପ୍ଟେମ୍ବର ୨୦୨୬ରେ ୭ମ ପେ କମିଶନ୍ର କାର୍ଯ୍ୟକାଳ ଶେଷ ହେବ। ଏହି ପରିସ୍ଥିତିରେ ଅଷ୍ଟମ ପେ କମିଶନ୍ ୨୦୨୫ରେ ଗଠିତ ହେବା ଦ୍ୱାରା ତାହା ଠିକ ସମୟରେ ଲାଗୁ ହେବ ବୋଲି ନିଶ୍ଚିତ ହୋଇଛି।
ଅଷ୍ଟମ ପେ କମିଶନ୍ର ମୁଖ୍ୟ ବିବରଣୀ
କେତେ କର୍ମଚାରୀ ପାଇବେ: ୪୯ ଲକ୍ଷରୁ ଅଧିକ କେନ୍ଦ୍ର ସରକାର କର୍ମଚାରୀ ଏବଂ ପ୍ରାୟ ୬୫ ଲକ୍ଷ ପେନସନଭୋଗୀ ଏହା ପାଇବେ।
ସମୟସୀମା: ୭ମ ପେ କମିଶନ୍ର କାର୍ଯ୍ୟକାଳ ସମାପ୍ତ ପୂର୍ବରୁ ଏହାର ପୂର୍ଣ୍ଣ ରୂପରେଖ ପ୍ରକାଶିତ ହେବ।
ପରାମର୍ଶ: କେନ୍ଦ୍ର ଓ ରାଜ୍ୟ ସରକାର ଏବଂ ଅନ୍ୟ ଗୁରୁତ୍ୱପୂର୍ଣ୍ଣ ପକ୍ଷମାନଙ୍କ ସହିତ ଆଲୋଚନା କରାଯିବ।
ସ୍ୱାଧୀନତା ପରେ, ସରକାର ସାତଟି ପେ କମିଶନ୍ ଗଠନ କରିଛନ୍ତି। ଯାହା କେନ୍ଦ୍ରୀୟ କର୍ମଚାରୀମାନଙ୍କ ଦରମା ଏବଂ ଭତ୍ତା ଢାଞ୍ଚା ନିର୍ଦ୍ଧାରଣରେ ମୁଖ୍ୟ ଭୂମିକା ଗ୍ରହଣ କରିଥାଏ। ଅନେକ ରାଜ୍ୟ ସରକାର ମଧ୍ୟ ସେମାନଙ୍କ କର୍ମଚାରୀଙ୍କ ପାଇଁ ଏହାକୁ ଅନୁସରଣ କରିଥାନ୍ତି।
