ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ଭାରତ ମଣ୍ଡପମଠାରେ ଭାରତର ସର୍ବବୃହତ ମୋବିଲିଟି ଏକ୍ସପୋ ‘ଭାରତ ମୋବିଲିଟି ଗ୍ଲୋବାଲ ଏକ୍ସପୋ -୨୦୨୫’କୁ ଉଦଘାଟନ କରିଛନ୍ତି। ସଭାକୁ ସମ୍ବୋଧିତ କରି ସେ କ୍ରମାଗତଭାବେ ତୃତୀୟଥର ପାଇଁ ସରକାର ଗଠନ ଲାଗି ନିର୍ବାଚିତ ହୋଇଥିବାରୁ ଜନସାଧାରଣଙ୍କୁ ଧନ୍ୟବାଦ ଜଣାଇଛନ୍ତି। ଚଳିତ ବର୍ଷ ଜାତୀୟ ରାଜଧାନୀ ଅଞ୍ଚଳର ଆଉ ଦୁଇଟି ସ୍ଥାନକୁ ଏହି ପ୍ରଦର୍ଶନୀର କାୟା ବିସ୍ତାର ହୋଇଥିବା ଉଲ୍ଲେଖ କରି ସେ ଏହି ବର୍ଷର ମୋବିଲିଟି ଏକ୍ସପୋକୁ ବହୁତ ବଡ଼ ଆକାର ନେଇଥିବା କହିଛନ୍ତି।
ଗତବର୍ଷ ଏହି ପ୍ରଦର୍ଶନୀରେ ୮୦୦ରୁ ଅଧିକ ପ୍ରଦର୍ଶକ ଏବଂ ଦେଢ଼ ଲକ୍ଷରୁ ଅଧିକ ଦର୍ଶକ ଆସିଥିଲେ। ଏଥର ଏଠାରେ ଦର୍ଶକଙ୍କ ସଂଖ୍ୟା ଆହୁରି ବଢ଼ିବ ବୋଲି ଆଶା କରାଯାଇଛି। ଚଳିତ ପ୍ରଦର୍ଶନୀ ସମୟରେ ଅର୍ଥାତ ଆସନ୍ତା ୫ ଦିନ ମଧ୍ୟରେ ଅନେକ ନୂଆ ଯାନ ଏଠାରେ ଉନ୍ମୋଚନ କରାଯିବ ଏବଂ ଏଥିରେ ବହୁ ପ୍ରତିନିଧି ଯୋଗ ଦେବେ ବୋଲି ଶ୍ରୀ ମୋଦୀ ଉଲ୍ଲେଖ କରିଛନ୍ତି। ଏହି ଅବିବୃଦ୍ଧି ଭାରତରେ ଯାତାୟାତ କ୍ଷେତ୍ରର ଭବିଷ୍ୟତ ସହ ଜଡ଼ିତ ବହୁତ ସକାରାତ୍ମକ ଦିଗକୁ ଦର୍ଶାଉଛି ବୋଲି ସେ ମତ ରଖିଛନ୍ତି। କାର୍ଯ୍ୟକ୍ରମ ସ୍ଥଳରେ ପ୍ରଦର୍ଶନୀ ପରିଦର୍ଶନ ବିଷୟରେ ଉଲ୍ଲେଖ କରି ଶ୍ରୀ ମୋଦୀ କହିଥିଲେ ଯେ ଭାରତର ଅଟୋମୋବାଇଲ ଶିଳ୍ପ ଚମତ୍କାର ସୃଷ୍ଟି ସହ ଭବିଷ୍ୟତ ପାଇଁ ପ୍ରସ୍ତୁତ ରହିଛି। ସେ ଏହି ଅବସରରେ ସମସ୍ତଙ୍କୁ ଶୁଭେଚ୍ଛା ଜଣାଇଛନ୍ତି।
ପ୍ରଧାନମନ୍ତ୍ରୀ ଏହି ଭବ୍ୟ କାର୍ଯ୍ୟକ୍ରମ ଅବସରରେ ରତନ ଟାଟା ଏବଂ ଓସାମୁ ସୁଜୁକିଙ୍କୁ ମନେ ପକାଇଥିଲେ। ଭାରତୀୟ ଅଟୋ କ୍ଷେତ୍ରର ଅଭିବୃଦ୍ଧି ତଥା ଭାରତର ମଧ୍ୟବିତ୍ତ ପରିବାରର ସ୍ୱପ୍ନକୁ ସାକାର କରିବାରେ ଉଭୟ ବିଶିଷ୍ଟ ବ୍ୟକ୍ତିଙ୍କ ଅବଦାନ ଅତୁଳନୀୟ ବୋଲି ସେ ମନ୍ତବ୍ୟ ଦେଇଥିଲେ। ତାଙ୍କର ଐତିହ୍ୟ ଭାରତର ସମଗ୍ର ଯାତାୟାତ କ୍ଷେତ୍ରକୁ ପ୍ରେରଣା ଯୋଗାଇବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ।
“ଲୋକଙ୍କ ଆକାଂକ୍ଷା ଏବଂ ଯୁବବର୍ଗଙ୍କ ଶକ୍ତି ଦ୍ୱାରା ପରିଚାଳିତ ଭାରତର ଅଟୋମୋବାଇଲ କ୍ଷେତ୍ରରେ ଏକ ଅଭୂତପୂର୍ବ ପରିବର୍ତ୍ତନ ଦେଖିବାକୁ ମିଳୁଛି”, ବୋଲି ପ୍ରଧାନମନ୍ତ୍ରୀ କହିଛନ୍ତି। ଗତ ଏକ ବର୍ଷ ମଧ୍ୟରେ ଭାରତୀୟ ଅଟୋ ଶିଳ୍ପ ପ୍ରାୟ ୧୨% ବୃଦ୍ଧି ପାଇଛି। ମେକ୍ ଇନ୍ ଇଣ୍ଡିଆ ଓ ମେକ୍ ଫର୍ ଦି ୱାର୍ଲ୍ଡ ମନ୍ତ୍ର ଯୋଗୁଁ ଏହି କ୍ଷେତ୍ରର ରପ୍ତାନି ବୃଦ୍ଧି ପାଉଛି ବୋଲି ସେ କହିଛନ୍ତି। ଶ୍ରୀ ମୋଦୀ କହିଥିଲେ ଯେ ଭାରତରେ ବାର୍ଷିକ ବିକ୍ରି ହେଉଥିବା କାର୍ ସଂଖ୍ୟା ଅନେକ ଦେଶର ଜନସଂଖ୍ୟାକୁ ଟପିଯାଇଛି। ବର୍ଷକୁ ପାଖାପାଖି ୨.୫ କୋଟି କାର୍ ବିକ୍ରି ଏ କ୍ଷେତ୍ରର କ୍ରମାଗତ ଭାବେ ବୃଦ୍ଧି ପାଉଥିବା ଚାହିଦାକୁ ଦର୍ଶାଉଛି ବୋଲି ସେ କହିଛନ୍ତି। ଏଥିଯୋଗୁ ଯାତାୟାତ କ୍ଷେତ୍ରର ଭବିଷ୍ୟତକୁ ନେଇ ଭାରତକୁ ଏତେ ଉଚ୍ଚ ଆଶାରେ ଦେଖାଯାଉଛି ବୋଲି ସେ କହିଥିଲେ।
“ଭାରତ ବର୍ତ୍ତମାନ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି ଏବଂ ତୃତୀୟ ବୃହତ୍ତମ ଯାତ୍ରୀବାହୀ ଯାନ ବଜାର’ ଭାବେ ପରିଚିତ ହେଉଛି। ଏହା ବିଶ୍ୱର ଶ୍ରଷ୍ଠ ତିନି ଅଟୋ ବଜାର ଆଡ଼କୁ ମୁହାଁଇଛି। ଯେତେବେଳେ ଏହି ଯାତ୍ରାରେ ଦେଶ ଅଗ୍ରସର ହେବ, ଭାରତର ଅଟୋମୋବାଇଲ ବଜାରରେ ଅଭୂତପୂର୍ବ ପରିବର୍ତନ ଓ ସମ୍ପ୍ରସାରଣ ଦେଖିବାକୁ ମିଳିବ ବୋଲି ସେ କହିଛନ୍ତି। ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମ ମାଧ୍ୟମରେ ଦେଶର ବୃହତ ଯୁବ ଜନସଂଖ୍ୟା, ବିସ୍ତାରିତ ମଧ୍ୟବିତ୍ତ ଶ୍ରେଣୀ, ଦ୍ରୁତ ସହରୀକରଣ, ଆଧୁନିକ ଭିତ୍ତିଭୂମି ବିକାଶ ଏବଂ ସୁଲଭ ଯାନ ସମେତ ଭାରତରେ ଯାତାୟାତର ଭବିଷ୍ୟତକୁ ଅନେକ ଭାବେ ପ୍ରୋତ୍ସାହିତ କରୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି।
ଅଟୋ ଶିଳ୍ପର ଅଭିବୃଦ୍ଧି ପାଇଁ ଉଭୟ ଆବଶ୍ୟକତା ଏବଂ ଆକାଂକ୍ଷାକୁ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ ଭାରତରେ ଉଭୟ ରହିଛି। ଆସନ୍ତା ଅନେକ ଦଶନ୍ଧି ଯାଏ ଭାରତ ପୃଥିବୀର ଯୁବା ଦେଶ ଭାବେ ପରିଚିତ ହେବ। ଆଟୋ ମୋବାଇଲ୍ କ୍ଷେତ୍ରଲାଗି ଯୁବକ ସବୁଠାରୁ ବଡ଼ ଗ୍ରାହ ହୋଇଥିବାରୁ ଏହି କ୍ଷେତ୍ରର ଭବିଷ୍ୟତ ଦେଶରେ ବହୁତ ଉଜ୍ଜଳ ବୋଲି କସେ କହିଛନ୍ତି। ଏହି ବୃହତ ଯୁବ ଜନସଂଖ୍ୟା ଯଥେଷ୍ଟ ଚାହିଦା ସୃଷ୍ଟି କରିବ ବୋଲି ସେ ଉଲ୍ଲେଖ କରିଛନ୍ତି। ଏହାବ୍ୟତୀତ ପ୍ରଧାନମନ୍ତ୍ରୀ ଦର୍ଶାଇଥିଲେ ଯେ ଅନ୍ୟ ଏକ ପ୍ରମୁଖ ଗ୍ରାହକ ହେଉଛନ୍ତି ଭାରତର ମଧ୍ୟବିତ୍ତ ଏବଂ ଗତ ଦଶନ୍ଧି ମଧ୍ୟରେ ୨୫ କୋଟି ଭାରତୀୟ ଦାରିଦ୍ର୍ୟରୁ ମୁକୁଳି ଏକ ନବ-ମଧ୍ୟବିତ୍ତ ଶ୍ରେଣୀ ଗଠନ କରିଛନ୍ତି ଯେଉମାନେ ସେମାନଙ୍କର ପ୍ରଥମ ଗାଡ଼ି କିଣୁଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ବିକାଶଧାରାରେ ଏହି ଗୋଷ୍ଠୀ ନିଜର ଗାଡ଼ି ବଦଳରେ ଆଗକୁ ଅନ୍ୟ ଉନ୍ନତ ଗାଡ଼ି, ଯାହା ଦ୍ୱାରା ଅଟୋ ସେକ୍ଟର ଲାଭବାନ ହେବ।
ଏକଦା ଭାରତରେ କାର୍ ନ କିଣିବା ପଛରେ ଭଲ ଓ ପ୍ରଶସ୍ତ ରାସ୍ତାର ଅଭାବ ଏକ କାରଣ ଥିଲା ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ପରିସ୍ଥିତି ବଦଳୁଛି ଏବଂ “ଯାତାୟାତରେ ସହଜତା ଆଣିବା, ଭଲ ରାସ୍ତା ତିଆରି କରିବା ବର୍ତ୍ତମାନ ଭାରତ ପାଇଁ ଏକ ପ୍ରମୁଖ ପ୍ରାଥମିକତା” ହୋଇଛି। ଗତବର୍ଷ ବଜେଟରେ ଭିତ୍ତିଭୂମି ବିକାଶ ପାଇଁ ୧୧ ଲକ୍ଷ କୋଟିରୁ ଅଧିକ ଟଙ୍କା ବ୍ୟୟବରାଦ କରାଯାଇଥିଲା ବୋଲି ସେ ଉଲ୍ଲେଖ କରିଥିଲେ। ସମଗ୍ର ଭାରତରେ ବହୁ ଲେନ୍ ରାଜପଥ ଏବଂ ଏକ୍ସପ୍ରେସ୍ ୱେ ନିର୍ମାଣ କରାଯାଉଛି। ପୁଣି ପିଏମ୍ ଗତିଶକ୍ତି ଜାତୀୟ ମାଷ୍ଟର ପ୍ଲାନ୍ ବହୁବିଧ ସଂଯୋଗକୁ ତ୍ୱରାନ୍ୱିତ କରିଛି ଏବଂ ପରିବହନ ଖର୍ଚ୍ଚ ହ୍ରାସ କରିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଜାତୀୟ ଲଜିଷ୍ଟିକ୍ ନୀତି ଭାରତକୁ ବିଶ୍ୱସ୍ତରରେ ସର୍ବାଧିକ ପ୍ରତିଦ୍ୱନ୍ଦ୍ୱିତାମୂଳକ ଖର୍ଚ୍ଚ ପରିବହନ ପାଇଁ ସୁଯୋଗ ସୃଷ୍ଟି କରିବ। ଏହି ନୀତି ଅଟୋମୋବାଇଲ ଶିଳ୍ପ ପାଇଁ ଅନେକ ନୂତନ ସୁଯୋଗ ଖୋଲିଛି ଏବଂ ଦେଶରେ ଗାଡ଼ିର ଚାହିଦା ବୃଦ୍ଧି ପଛରେ ଏକ ଗୁରୁତ୍ୱପୂର୍ଣ୍ଣ କାରଣ ବୋଲି ସେ ଉଲ୍ଲେଖ କରିଛନ୍ତି।
ଉତ୍ତମ ଭିତ୍ତିଭୂମି ସହିତ ନୂତନ ଜ୍ଞାନକୌଶଳକୁ ମଧ୍ୟ ସମନ୍ୱିତ କରାଯାଉଛି ବୋଲି ଶ୍ରୀ ମୋଦୀ କହିଛନ୍ତି। ଫାସ୍ଟ୍ୟାଗ୍ ଭାରତରେ ଡ୍ରାଇଭିଂ ଅଭିଜ୍ଞତାକୁ ଅଧିକ ସହଜ କରିଛି ବୋଲି ସେ ମନ୍ତବ୍ୟ ଦେଇଥିଲେ। ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ଜାତୀୟ କମନ୍ ମୋବିଲିଟି କାର୍ଡ ଭାରତରେ ନିରବଚ୍ଛିନ୍ନ ଯାତ୍ରା ବ୍ୟବସ୍ଥାକୁ ଆହୁରି ସରଳ ଓ ସୁଦୃଢ଼ କରୁଛି। ସଂଯୋଜିତ ଯାନ ଏବଂ ସ୍ୱୟଂଚାଳିତ ଡ୍ରାଇଭିଂରେ ଦ୍ରୁତ ଅଗ୍ରଗତି ଦ୍ୱାରା ଭାରତ ବର୍ତ୍ତମାନ ସ୍ମାର୍ଟ ମୋବିଲିଟି ଆଡକୁ ଅଗ୍ରସର ହେଉଛି ବୋଲି ସେ ଉଲ୍ଲେଖ କରିଥିଲେ।
ଭାରତର ଅଟୋ ଶିଳ୍ପର ଅଭିବୃଦ୍ଧି ସମ୍ଭାବନାରେ ‘ମେକ୍ ଇନ୍ ଇଣ୍ଡିଆ ଅଭିଯାନ’ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ପ୍ରଧାନମନ୍ତ୍ରୀ କହିଥିଲେ ଯେ ପିଏଲଆଇ ଯୋଜନା ମେକ୍ ଇନ୍ ଇଣ୍ଡିଆ ଅଭିଯାନକୁ ତ୍ୱରାନ୍ୱିତ କରିଛି, ଯାହା ୨.୨୫ ଲକ୍ଷ କୋଟି ଟଙ୍କାରୁ ଅଧିକ ବିକ୍ରିରେ ସହାୟକ ହୋଇଛି। ଏହି ଯୋଜନା ଦେଢ଼ ଲକ୍ଷରୁ ଅଧିକ ପ୍ରତ୍ୟକ୍ଷ ନିଯୁକ୍ତି ସୃଷ୍ଟି କରିଛି ବୋଲି ସେ ସୂଚନା ଦେଇଛନ୍ତି। ଅଟୋମୋବାଇଲ କ୍ଷେତ୍ରରେ ନିଯୁକ୍ତି ସୃଷ୍ଟି ଅନ୍ୟ କ୍ଷେତ୍ରଉପରେ ବହୁଗୁଣିତ ପ୍ରଭାବ ପକାଇଛି ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ। ଏମଏସଏମଇ କ୍ଷେତ୍ର ଦ୍ୱାରା ବହୁ ସଂଖ୍ୟକ ଅଟୋ ପାର୍ଟସ ଉତ୍ପାଦନ କରାଯାଉଛି ବୋଲି ସେ କହିଥିଲେ। ଅଟୋମୋବାଇଲ୍ କ୍ଷେତ୍ରରେ ଅଭିବୃଦ୍ଧି ସହିତ ଏମଏସଏମଇ, ପରିବହନ, ପର୍ଯ୍ୟଟନ କ୍ଷେତ୍ରରେ ମଧ୍ୟ ନୂତନ ନିଯୁକ୍ତି ସୃଷ୍ଟି ହେଉଛି ବୋଲି ସେ କହିଥିଲେ।
ଅଟୋ କ୍ଷେତ୍ରକୁ ପ୍ରତ୍ୟେକ ସ୍ତରରେ ସରକାର ପ୍ରଦାନ କରୁଥିବା ବ୍ୟାପକ ସହାୟତା ଉପରେ ଆଲୋକପାତ କରି ଶ୍ରୀ ମୋଦୀ କହିଥିଲେ ଯେ ଗତ ଦଶନ୍ଧି ମଧ୍ୟରେ ଶିଳ୍ପରେ ଏଫଡିଆଇ, ପ୍ରଯୁକ୍ତି ହସ୍ତାନ୍ତର ଏବଂ ବୈଶ୍ୱିକ ଭାଗିଦାରୀ ପାଇଁ ନୂତନ ମାର୍ଗ ସ୍ଥାପିତ ହୋଇଛି। କେବଳ ଗତ ଚାରି ବର୍ଷ ମଧ୍ୟରେ ଏହି କ୍ଷେତ୍ର୩୬ ବିଲିୟନ ଡଲାରରୁ ଅଧିକ ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶକୁ ଆକୃଷ୍ଟ କରିଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ଆଗାମୀ ବର୍ଷଗୁଡ଼ିକରେ ଏହି ସଂଖ୍ୟା ବହୁଗୁଣିତ ହେବ ବୋଲି ଆଶା କରାଯାଉଛି ବୋଲି ସେ ଉଲ୍ଲେଖ କରିଛନ୍ତି। ଭାରତ ରେ ଅଟୋ ଉତ୍ପାଦନ ପାଇଁ ଏକ ସମ୍ପୂର୍ଣ୍ଣ ଇକୋସିଷ୍ଟମ ବିକଶିତ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ପ୍ରଧାନମନ୍ତ୍ରୀ ଦୋହରାଇଥିଲେ।
“ଯାତାୟାତ ବ୍ୟବସ୍ଥାରେ ସୁଧାର ପାଇଁ ସେଭେନ୍ ସି”: କମନ, କନେକ୍ଟେଡ୍, କନେକ୍ଟିଭିନିଏଣ୍ଟ, କଂଞ୍ଜେସନ୍ ଫ୍ରୀ, ଚାର୍ଜଡ, କ୍ଲିନ ଏବଂ କଟିଂ ଏଜ୍ (ସାଧାରଣ, ସଂଯୋଜିତ, ସୁବିଧାଜନକ, ଭିଡ଼ ମୁକ୍ତ, ଚାର୍ଜ, ସ୍ୱଚ୍ଛ ଏବଂ ଅତ୍ୟାଧୁନିକ) ବିଷୟରେ ତାଙ୍କର ଦୃଷ୍ଟିକୋଣକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ ସବୁଜ ଯାତାୟାତ ଉପରେ ଧ୍ୟାନ ଦେବା ଏହି ଦୃଷ୍ଟିକୋଣର ଏକ ଅଂଶ ଅଟେ। ସେ ମନ୍ତବ୍ୟ ଦେଇଥିଲେ ଯେ ଭାରତ ଏକ ଯାତାୟାତ ବ୍ୟବସ୍ଥା ନିର୍ମାଣ କରୁଛି ଯାହା ଉଭୟ ଅର୍ଥନୀତି ଏବଂ ପରିବେଶକୁ ସମର୍ଥନ କରେ ଏବଂ ଜୀବାଶ୍ମ ଇନ୍ଧନ ଆମଦାନୀ ଖର୍ଚ୍ଚ ହ୍ରାସ କରେ। ସବୁଜ ପ୍ରଯୁକ୍ତିବିଦ୍ୟା, ଇଭି, ହାଇଡ୍ରୋଜେନ ଇନ୍ଧନ ଏବଂ ଜୈବ ଇନ୍ଧନର ବିକାଶ ଉପରେ ଗୁରୁତ୍ୱପୂର୍ଣ୍ଣ ଗୁରୁତ୍ୱ ଦିଆଯାଉଛି ବୋଲି ସେ ଉଲ୍ଲେଖ କରିଥିଲେ। ଏହି ଦୃଷ୍ଟିକୋଣକୁ ଦୃଷ୍ଟିରେ ରଖି ଜାତୀୟ ଇଲେକ୍ଟ୍ରିକ୍ ମୋବିଲିଟି ମିଶନ ଏବଂ ସବୁଜ ହାଇଡ୍ରୋଜେନ ମିଶନ ଭଳି ପଦକ୍ଷେପ ଆରମ୍ଭ କରାଯାଇଛି ବୋଲି ପ୍ରଧାନମନ୍ତ୍ରୀ ଆଲୋକପାତ କରିଥିଲେ।
ବିଗତ କିଛି ବର୍ଷ ମଧ୍ୟରେ ଭାରତରେ ଇଲେକ୍ଟ୍ରିକ୍ ମୋବିଲିଟିର ଦ୍ରୁତ ଅଭିବୃଦ୍ଧି ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ କହିଥିଲେ ଯେ ଗତ ଦଶନ୍ଧି ମଧ୍ୟରେ ଇଲେକ୍ଟ୍ରିକ୍ ଯାନର ବିକ୍ରି ୬୪୦ ଗୁଣ ବୃଦ୍ଧି ପାଇଛି। ୧୦ ବର୍ଷ ପୂର୍ବେ ବାର୍ଷିକ ମାତ୍ର ୨୬୦୦ ଇଲେକ୍ଟ୍ରିକ୍ ଯାନ ବିକ୍ରି ହେଉଥିବା ବେଳେ ୨୦୨୪ରେ ୧୬.୮୦ ଲକ୍ଷରୁ ଅଧିକ ଇଲେକ୍ଟ୍ରିକ୍ ଯାନ ବିକ୍ରି ହୋଇଛି। ଆଜି ଗୋଟିଏ ଦିନରେ ଯେତିକି ଇଲେକ୍ଟ୍ରିକ୍ ଯାନ ବିକ୍ରି ହୋଇଛି, ତାହା ଏକ ଦଶନ୍ଧି ପୂର୍ବେ ସମଗ୍ର ବର୍ଷରେ ବିକ୍ରି ହୋଇଥିବା ସଂଖ୍ୟାଠାରୁ ଦୁଇଗୁଣ ଅଧିକ ବୋଲି ସେ ଗୁରୁତ୍ୱାରୋପ କରିଥିଲେ। ଏହି ଦଶନ୍ଧି ଶେଷ ସୁଦ୍ଧା ଭାରତରେ ଇଲେକ୍ଟ୍ରିକ୍ ଯାନ ସଂଖ୍ୟା ଆଠ ଗୁଣ ବୃଦ୍ଧି ପାଇବ, ଯାହା ଏହି କ୍ଷେତ୍ରରେ ପ୍ରଚୁର ସମ୍ଭାବନାକୁ ସ୍ପଷ୍ଟ କରୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି।।
ଦେଶରେ ଇଲେକ୍ଟ୍ରିକ୍ ଯାନ ଦ୍ୱାରା ଯାତାୟାତ ସମ୍ପ୍ରସାରଣ ପାଇଁ ସରକାରଙ୍କ ଦ୍ୱାରା ପ୍ରଦାନ କରାଯାଉଥିବା ନିରନ୍ତର ସହାୟତା ଓ ନୀତିଗତ ନିଷ୍ପତ୍ତି ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ ପାଞ୍ଚ ବର୍ଷ ପୂର୍ବେ ଆରମ୍ଭ ହୋଇଥିବା ଫେମ୍ -୨ ଯୋଜନାରେ ୮ ହଜାର କୋଟି ଟଙ୍କାରୁ ଅଧିକ ପ୍ରୋତ୍ସାହନ ପ୍ରଦାନ କରାଯାଇଥିଲା। ୫ ହଜାରରୁ ଅଧିକ ଇଲେକ୍ଟ୍ରିକ୍ ବସ୍ ସମେତ ୧୬ ଲକ୍ଷରୁ ଅଧିକ ଇଭିକୁ ସହାୟତା କରି ଇଲେକ୍ଟ୍ରିକ୍ ଯାନ କ୍ରୟ ଏବଂ ଚାର୍ଜିଂ ଭିତ୍ତିଭୂମି ନିର୍ମାଣରେ ଏହି ଅର୍ଥ ବ୍ୟବହୃତ ହୋଇଛି ବୋଲି ସେ ଗୁରୁତ୍ୱାରୋପ କରିଥିଲେ। କେନ୍ଦ୍ର ସରକାରଙ୍କ ଦ୍ୱାରା ଯୋଗାଇ ଦିଆଯାଇଥିବା ୧୨୦୦ରୁ ଅଧିକ ଇଲେକ୍ଟ୍ରିକ୍ ବସ୍ ଦିଲ୍ଲୀରେ ଚଳାଚଳ କରୁଛି ବୋଲି ସେ ଉଲ୍ଲେଖ କରିଛନ୍ତି। ପ୍ରଧାନମନ୍ତ୍ରୀ ତୃତୀୟ ପାଳିରେ ପିଏମ ଇ-ଡ୍ରାଇଭ ଯୋଜନା ଆରମ୍ଭ ଉପରେ ଆଲୋକପାତ କରିଥିଲେ, ଯାହା ଦୁଇ ଚକିଆ ଯାନ, ତିନି ଚକିଆ ଯାନ, ଇ-ଆମ୍ବୁଲାନ୍ସ ଏବଂ ଇ-ଟ୍ରକ୍ ସମେତ ପାଖାପାଖି ୨୮ ଲକ୍ଷ ଇଭି କିଣିବାରେ ସହାୟତା କରିବ। ପ୍ରାୟ ୧୪ ହଜାର ଇଲେକ୍ଟ୍ରିକ୍ ବସ୍ କିଣାଯିବ ଏବଂ ବିଭିନ୍ନ ଯାନ ପାଇଁ ସାରା ଦେଶରେ ୭୦ ହଜାରରୁ ଅଧିକ ଫାଷ୍ଟ ଚାର୍ଜର ଲଗାଯିବ। ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଦେଶର ଛୋଟ ସହରଗୁଡିକରେ ପାଖାପାଖି ୩୮ହଜାର ଇ-ବସ୍ ଚଳାଚଳକୁ ସହାୟତା କରିବା ପାଇଁ ତୃତୀୟ ପାଳିରେ ପିଏମ ଇ-ବସ୍ ସେବା ଆରମ୍ଭ କରାଯାଇଛି । ଇଭି ଉତ୍ପାଦନ ପାଇଁ ସରକାରଙ୍କ ଦ୍ୱାରା ପ୍ରଦାନ କରାଯାଉଥିବା ନିରନ୍ତର ସହାୟତା ଉପରେ ଆଲୋକପାତ କରି ଶ୍ରୀ ମୋଦୀ କହିଥିଲେ ଯେ ଭାରତରେ ଇଭି କାର୍ ଉତ୍ପାଦନରେ ଆଗ୍ରହୀ ବିଶ୍ୱ ନିବେଶକଙ୍କ ପାଇଁ ସୁଯୋଗ ସୃଷ୍ଟି କରାଯାଇଛି। ଏହାଦ୍ୱାରା ଭାରତରେ ଗୁଣାତ୍ମକ ଇଭି ଉତ୍ପାଦନ ଇକୋସିଷ୍ଟମକୁ ସମ୍ପ୍ରସାରଣ କରିବା ଏବଂ ମୂଲ୍ୟ ଶୃଙ୍ଖଳା ନିର୍ମାଣକରିବାରେ ସହାୟକ ହେବ ବୋଲି ସେ କହିଥିଲେ।
ଗ୍ଲୋବାଲ ୱାର୍ମିଂ ଏବଂ ଜଳବାୟୁ ପରିବର୍ତ୍ତନ କ୍ଷେତ୍ରରେ ଆହ୍ୱାନର ମୁକାବିଲା ପାଇଁ ସୌର ଶକ୍ତି ଏବଂ ବିକଳ୍ପ ଇନ୍ଧନକୁ ନିରନ୍ତର ପ୍ରୋତ୍ସାହନ ଦେବାର ଆବଶ୍ୟକତା ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ ଭାରତର ଜି-୨୦ ଅଧ୍ୟକ୍ଷତା ସମୟରେ ସବୁଜ ଭବିଷ୍ୟତ ଉପରେ ଗୁରୁତ୍ୱ ଦିଆଯାଇଥିଲା। ଭାରତରେ ଉଭୟ ଇଭି ଏବଂ ସୌର ଶକ୍ତି ଉପରେ ଗୁରୁତ୍ୱପୂର୍ଣ୍ଣ କାର୍ଯ୍ୟ କରାଯାଉଛି ବୋଲି ସେ କହିଥିଲେ । ପ୍ରଧାନମନ୍ତ୍ରୀ ସୂର୍ଯ୍ୟଘର – ମାଗଣା ବିଦ୍ୟୁତ ଯୋଜନାରେ ଛାତ ଉପରେ ସୌର ପ୍ରକଳ୍ପ ନିର୍ମାଣ କରି ଲୋକେ ବିଜୁଳି ବିଲ୍ରୁ ମୁକ୍ତି ପାଇପାରୁଛନ୍ତି। ଏହା ଏକ ମିଶନରେ ପରିଣତ ହୋଇଚି ଏବଂ ଏହି ମିଶନ ଦ୍ୱାରା ବ୍ୟାଟେରୀ ଏବଂ ଷ୍ଟୋରେଜ୍ ସିଷ୍ଟମର ବଢ଼ୁଥିବା ଚାହିଦା ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ। ଉନ୍ନତ ରସାୟନ ବିଜ୍ଞାନ ସେଲ ବ୍ୟାଟେରୀ ଷ୍ଟୋରେଜକୁ ପ୍ରୋତ୍ସାହିତ କରିବା ପାଇଁ କେନ୍ଦ୍ର ସରକାର ୧୮,୦୦୦ କୋଟି ଟଙ୍କାର ପିଏଲଆଇ ଯୋଜନା ଆରମ୍ଭ କରିଛନ୍ତି। ଏହି କ୍ଷେତ୍ରରେ ଉଲ୍ଲେଖନୀୟ ପୁଞ୍ଜିନିବେଶ ପାଇଁ ଏହା ଉପଯୁକ୍ତ ସମୟ ବୋଲି ଶ୍ରୀ ମୋଦୀ କହିଥିଲେ। ଶକ୍ତି ସଂରକ୍ଷଣ କ୍ଷେତ୍ରରେ ଷ୍ଟାର୍ଟଅପ୍ ଆରମ୍ଭ କରିବାକୁ ସେ ଦେଶର ଯୁବକମାନଙ୍କୁ ଅନୁରୋଧ କରିଥିଲେ। ଭାରତରେ ଉପଲବ୍ଧ ସାମଗ୍ରୀ ବ୍ୟବହାର କରି ବ୍ୟାଟେରୀ ଏବଂ ଷ୍ଟୋରେଜ୍ ସିଷ୍ଟମ ତିଆରି କରିପାରୁଥିବା ଉଦ୍ଭାବନ ଉପରେ କାର୍ଯ୍ୟ କରିବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ସେ ଉଲ୍ଲେଖ କରିଛନ୍ତି ଯେ ଏହି କ୍ଷେତ୍ରରେ ଯଥେଷ୍ଟ କାର୍ଯ୍ୟ ହୋଇସାରିଛି, କିନ୍ତୁ ଏହାକୁ ମିଶନ ମୋଡରେ ଆଗେଇ ନେବା ଜରୁରୀ।
କେନ୍ଦ୍ର ସରକାରଙ୍କ ସ୍ପଷ୍ଟ ଉଦ୍ଦେଶ୍ୟ ଓ ପ୍ରତିବଦ୍ଧତା ଉପରେ ଗୁରୁତ୍ୱ ାରୋପ କରି ଶ୍ରୀ ମୋଦୀ କହିଥିଲେ ଯେ ନୂଆ ନୀତି ପ୍ରଣୟନ ହେଉ କିମ୍ବା ସଂସ୍କାର କାର୍ଯ୍ୟକାରୀ ହେଉ, ସରକାରଙ୍କ ପ୍ରୟାସ ଜାରି ରହିଛି। ନିର୍ମାତାଙ୍କୁ ଗାଡ଼ି ସ୍କ୍ରାପିଂ ନୀତିର ଫାଇଦା ନେବାକୁ ଅନୁରୋଧ କରି ସେ ପରାମର୍ଶ ଦେଇଛନ୍ତି ଯେ ଅଧିକରୁ ଅଧିକ ଲୋକଙ୍କୁ ପୁରୁଣା ଗାଡି ସ୍କ୍ରାପ୍ କରିବାକୁ ପ୍ରୋତ୍ସାହିତ କରିବା ପାଇଁ କଂପାନିଗୁଡ଼ିକ ନିଜସ୍ୱ ପ୍ରୋତ୍ସାହନ ଯୋଜନା ଆରମ୍ଭ କରିପାରିବେ। ଏହି ପ୍ରେରଣା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଏହା ଦେଶର ପରିବେଶ ପାଇଁ ଏକ ଗୁରୁତ୍ୱପୂର୍ଣ୍ଣ ସେବା ହେବ ବୋଲି ପ୍ରଧାନମନ୍ତ୍ରୀ ଆଲୋକପାତ କରିଥିଲେ।
ଅଟୋମୋବାଇଲ ଶିଳ୍ପ ଉଦ୍ଭାବନ ଏବଂ ପ୍ରଯୁକ୍ତି ବିଦ୍ୟା ଦ୍ୱାରା ପରିଚାଳିତ ବୋଲି ପ୍ରଧାନମନ୍ତ୍ରୀ କହିଛନ୍ତି। ଆସୁଥିବା ସମୟ ପୂର୍ବ ଦେଶ, ଏସିଆ ଓ ଭାରତର ବୋଲି ସେ କହିଥିଲେ। ଯାତାୟତ କ୍ଷେତ୍ରରେ ନିଜର ଭବିଷ୍ୟତ ଦେଖିବାକୁ ଚାହୁଁଥିବା ପ୍ରତ୍ୟେକ ନିବେଶକଙ୍କ ପାଇଁ ଭାରତ ଏକ ଉତ୍କୃଷ୍ଟ ଗନ୍ତବ୍ୟସ୍ଥଳ ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ନିଜର ଅଭିଭାଷଣ ଶେଷ କରି ଶ୍ରୀ ମୋଦୀ ସମସ୍ତଙ୍କୁ ଆଶ୍ୱାସନା ଦେଇଥିଲେ ଯେ ସରକାର ସମ୍ପୂର୍ଣ୍ଣ ସହଯୋଗ କରୁଛନ୍ତି। ଏଣୁ “ମେକ୍ ଇନ୍ ଇଣ୍ଡିଆ, ମେକ୍ ଫର୍ ଦି ୱାର୍ଲ୍ଡ” ମନ୍ତ୍ର ସହିତ ଆଗକୁ ବଢ଼ିବାକୁ ସମସ୍ତଙ୍କୁ ଉତ୍ସାହିତ କରିଥିଲେ।
କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନିତିନ ଗଡକରୀ, କେନ୍ଦ୍ର ଗୃହ ନିର୍ମାଣ ଓ ସହରାଞ୍ଚଳ ବ୍ୟାପାର ମନ୍ତ୍ରୀ ମନୋହର ଲାଲ, କେନ୍ଦ୍ର ଭାରୀ ଶିଳ୍ପ ଏବଂ ଇସ୍ପାତ ମନ୍ତ୍ରୀ ଏଚ୍ ଡି କୁମାରସ୍ୱାମୀ, କେନ୍ଦ୍ର ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୂଷ ଗୋୟଲ, କେନ୍ଦ୍ର ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ମନ୍ତ୍ରୀ ଜିତନ ରାମ ମାଝୀ, କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ସିଂହ ପୁରୀଙ୍କ ସମେତ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ଏହି ଉତ୍ସବରେ ଉପସ୍ଥିତ ଥିଲେ।
ପୃଷ୍ଠଭୂମି
ଭାରତ ମୋବିଲିଟି ଗ୍ଲୋବାଲ ଏକ୍ସପୋ ୨୦୨୫ ଜାନୁଆରୀ ୧୭ରୁ ୨୨ ପର୍ଯ୍ୟନ୍ତ ତିନୋଟି ଭିନ୍ନ ଭିନ୍ନ ସ୍ଥାନରେ ଅନୁଷ୍ଠିତ ହେଉଛି। ସେଗୁଡ଼ିକ ହେଲା ନୂଆଦିଲ୍ଲୀର ଭାରତ ମଣ୍ଡପମ୍, ଯଶୋଭୂମି ଏବଂ ଗ୍ରେଟର ନୋଏଡାର ଇଣ୍ଡିଆ ଏକ୍ସପୋ ସେଣ୍ଟର ଆଣ୍ଡ ମାର୍ଟ। ଏକ୍ସପୋରେ ୯ଟି ସୋ, ୨୦ରୁ ଅଧିକ କନଫରେନ୍ସ ଓ ପ୍ୟାଭିଲିୟନ ଆୟୋଜନ କରାଯାଇଛି। ଏହାବ୍ୟତୀତ ଏହି ଏକ୍ସପୋରେ ଶିଳ୍ପ ଓ ଆଞ୍ଚଳିକ ସ୍ତର ମଧ୍ୟରେ ସହଯୋଗକୁ ସକ୍ଷମ କରିବା ପାଇଁ ଯାତାୟାତ କ୍ଷେତ୍ରରେ ନୀତି ଏବଂ ପଦକ୍ଷେପ ପ୍ରଦର୍ଶନ କରିବା ପାଇଁ ରାଜ୍ୟ ଅଧିବେଶନ ମଧ୍ୟ ରହିବ।
ଭାରତ ମୋବିଲିଟି ଗ୍ଲୋବାଲ ଏକ୍ସପୋ ୨୦୨୫ର ଲକ୍ଷ୍ୟ ସମଗ୍ର ଗମନାଗମନ ମୂଲ୍ୟ ଶୃଙ୍ଖଳକୁ ଗୋଟିଏ ଛତା ତଳେ ଏକାଠି କରିବା । ଚଳିତ ବର୍ଷର ଏକ୍ସପୋରେ ପ୍ରଦର୍ଶକ ଏବଂ ଆଗନ୍ତୁକ ଭାବରେ ସମଗ୍ର ବିଶ୍ୱରୁ ଅଂଶଗ୍ରହଣ ସହିତ ବିଶ୍ୱସ୍ତରୀୟ ମହତ୍ତ୍ୱ ଉପରେ ବିଶେଷ ଗୁରୁତ୍ୱ ଦିଆଯାଇଛି। ଏହା ଏକ ଶିଳ୍ପ-ନେତୃତ୍ୱାଧୀନ ଏବଂ ସରକାରଙ୍କ ସମର୍ଥିତ ପଦକ୍ଷେପ ଏବଂ ଭାରତର ଇଞ୍ଜିନିୟରିଂ ରପ୍ତାନୀ ପ୍ରୋତ୍ସାହନ ପରିଷଦ ଦ୍ୱାରା ବିଭିନ୍ନ ଶିଳ୍ପ ସଂସ୍ଥା ଏବଂ ଅଂଶୀଦାର ସଂଗଠନର ମିଳିତ ସହଯୋଗରେ ଆୟୋଜିତ ହେଉଛି।