ଭୁବନେଶ୍ବର: ଗତକାଲି ବାରବାଟୀ ଷ୍ଟାଡିୟମରେ ଖେଳାଯାଇଥିବା କ୍ରିକେଟ୍ ମ୍ୟାଚ ଅବସରରେ ଫ୍ଲଡ୍ ଲାଇଟ୍ ଅଚଳ ଯୋଗୁଁ ଦୀର୍ଘ ୨୬ମିନିଟ୍ ଧରି ଖେଳ ବନ୍ଦ ରହିବା ଘଟଣା ଓଡ଼ିଶାର ଅଗଣିତ ଖେଳପ୍ରେମୀଙ୍କୁ ନିରାଶ କରିନି ବରଂ ଓଡ଼ିଶାର ସ୍ୱାଭିମାନକୁ ବିଶ୍ଵ ଦରବାରରେ ନିନ୍ଦିତ ଓ ଅପମାନିତ କରିଛି।
୫ ବର୍ଷର ଦୀର୍ଘ ପ୍ରତୀକ୍ଷାର ଅନ୍ତ ଘଟାଇ ଓଡ଼ିଶାବାସୀଙ୍କ ଭାଗ୍ୟରେ ଗୋଟିଏ କ୍ରିକେଟ୍ ମ୍ୟାଚର ଆୟୋଜନ ଖବରଟି ଓଡ଼ିଶାବାସୀଙ୍କୁ ଯେତିକି ଆହ୍ଲାଦିତ କରିଥିଲା ଗତକାଲିର ନିନ୍ଦିତ ଘଟଣାଟି ସେମାନଙ୍କ ମନ ଓ ପ୍ରାଣକୁ ଅଶେଷ ଆଘାତ ପ୍ରଦାନ କରିଛି। ଆପଣମାନେ ଜାଣିଥିବେ ଭାରତୀୟ ଇନିଂସର ସପ୍ତମ ଓଭରରେ ଓସିଏ ପୁରୁଣା ପ୍ୟାଭିଲିୟନ ନିକଟରେ ଥିବା ଫ୍ଲଡ୍ ଲାଇଟ୍ ଅଚଳ ହୋଇଯିବାରୁ ଓ ପୁନଶ୍ଚ ଲାଇଟ୍ ଜଳିବାରୁ ଗୋଟିଏ ବଲ୍ ପଡ଼ିବାପରେ ପୁନର୍ବାର ଲାଇଟ୍ ଲିଭିଯାଇଥିଲା।
ଉକ୍ତ ସମୟରେ ଭାରତର ସ୍କୋର ବିନା ୱିକେଟରେ ୪୮ରନ୍ ରହିଥିଲା ଓ ଦୁଇ ଭାରତୀୟ ବ୍ୟାଟ୍ସମ୍ୟାନ୍ ପିଚରେ ରହିଥିଲେ।ଏତେ ବଡ଼ ମ୍ୟାଚରେ ସନ୍ଧ୍ୟା ୬ ଘଟିକା ୧୭ମିନିଟରୁ ୬ଘଟିକା ୪୩ ମିନିଟ୍ ପର୍ଯ୍ୟନ୍ତ ପ୍ରାୟ ୨୬ମିନିଟ୍ ଫ୍ଲଡ୍ ଲାଇଟ୍ ନ ଜଳି ପାରିବାରୁ ଭାରତୀୟ ଖେଳାଳୀଙ୍କୁ ଉତ୍ସାହ ଓ ତୀବ୍ରତାରେ ବ୍ୟାଘାତ ସୃଷ୍ଟି ହେବାରୁ ବିରକ୍ତି ପ୍ରକାଶ କରି ଉଭୟ ବ୍ୟାଟ୍ସମ୍ୟାନ୍ ପ୍ୟାଭିଲିୟନକୁ ଫେରିଯାଇଥିଲେ। କେବଳ ଖେଳାଳି ନୁହନ୍ତି ଦର୍ଶକଙ୍କ ମଧ୍ୟରେ ଘୋର ନୈରାଶ୍ୟର ବାତାବରଣ ଖେଳିଯାଇଥିଲା।
ଏଭଳି ଗୁରୁତର ତ୍ରୁଟିର ଫଳସ୍ୱରୁପ ପରାଜୟର ଆଶଙ୍କାକୁ ହୁଏ ତ ଏଡାଇ ଯାଇ ହୋଇନଥାନ୍ତା ! ସର୍ବଦା ଓଡ଼ିଆ ଅସ୍ମିତାକୁ ଆଳ କରୁଥିବା ଭାଜପା ସରକାର ଆନ୍ତର୍ଜାତୀୟ ସ୍ତରରେ ସେହି ଅସ୍ମିତା ଓ ସ୍ବାଭିମାନକୁ ଅନ୍ଧକାରାଛନ୍ନ କରିନି ବରଂ କ୍ରୀଡା ବିଭାଗ ଏବଂ ଓସିଏ ଯେଉଁଭଳି ଭାବରେ ମ୍ୟାଚ୍ ପ୍ରସ୍ତୁତିକୁ ବେଖାତିର କରି ବଡ଼ବଡ଼ିଆ ଓ ନିଜ ଲୋକଙ୍କୁ ପାଶ୍ ବାଣ୍ଟିବାରେ ବ୍ୟସ୍ତ ରହିଲେ ତାହାର ଫଳସ୍ୱରୁପ ଏଭଳି ଏକ ଦୁଃଖଦ ପରିସ୍ଥିତିରେ ଓଡ଼ିଶାର ସ୍ଵଭିମାନ ପ୍ରତି ଆନ୍ତର୍ଜାତୀୟ ସ୍ତରରେ କୁଠାରାଘାତ ହୋଇଛି।
ଏଭଳି ଏକ ସଙ୍ଗୀନ ଘଟଣାକ୍ରମରୁ ନିଜ ଦୋଷ ଲୁଚାଇବାକୁ ଯାଇ କ୍ରୀଡାମନ୍ତ୍ରୀଙ୍କର ଇଙ୍ଗିତରେ ଓସିଏ ସମ୍ପାଦକ ବ୍ୟାକଅପ୍ ଜେନେରେଟର ଗାଡ଼ି ସାମନାରେ ଖେଳାଳିଙ୍କ ବସ୍ ରହିଥିବାର ସଫେଇ ଆଦୌ ବିଶ୍ୱାସଯୋଗ୍ୟ ଓ ଗ୍ରହଣୀୟ ନୁହେଁ ବୋଲି ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
ଏଠି ସ୍ଵତଃସ୍ପୂର୍ତ୍ତ ଭାବେ ପ୍ରଶ୍ନ ଉଠୁଛି ଯେ ଫ୍ଲଡ୍ ଲାଇଟ୍ ନିକଟରେ ସାଧାରଣତଃ ବ୍ୟାକଅପ୍ ଜେନେରେଟର ରହିବାର ଆବଶ୍ୟକତା ଥିବାରୁ କେଉଁ କାରଣରୁ ଫ୍ଲଡ୍ ଲାଇଟ୍ ପୋଷ୍ଟ ଠାରୁ ବହୁ ଦୂରରେ ବ୍ୟାକଅପ୍ ଜେନେରେଟର ରହିଥିଲା ? ଯଦି ଏବେକାର ଭାଜପା ସରକାର ଅମଳରେ ଖୋଦ୍ କ୍ରୀଡ଼ାମନ୍ତ୍ରୀ ତାଙ୍କର ଗାଡ଼ିକୁ କଳିଙ୍ଗ ଷ୍ଟାଡିୟମରେ ଥିବା ଖେଳାଳୀଙ୍କ ଟ୍ରାକ ଉପରେ ଚଲେଇ ଆଣିବାର ବ୍ୟବସ୍ଥାକୁ ବୈଧ ବୋଲି ସ୍ବୀକୃତି ଦେଉଛନ୍ତି ତେବେ ଏତେ ବଡ ଆନ୍ତର୍ଜାତୀୟ ମ୍ୟାଚରେ କାହା ଇସାରାରେ ବ୍ୟାକଅପ୍ ଜେନେରେଟର ଗାଡ଼ିକୁ ଫ୍ଲଡ୍ ଲାଇଟ୍ ପୋଷ୍ଟ ନିକଟରେ ରଖିବାର ଅନୁମତି ଦିଆଗଲା ନାହିଁ ।