ମୁମ୍ବାଇ: ଜିଓବ୍ଲାକରକ ଆସେଟ୍ ମ୍ୟାନେଜମେଣ୍ଟ ପ୍ରାଇଭେଟ୍ ଲିମିଟେଡ୍ (ଜିଓବ୍ଲାକରକ ଆସେଟ୍ ମ୍ୟାନେଜମେଣ୍ଟ) ଏହାର ପ୍ରଥମ ନୂତନ ପାଣ୍ଠି ଅଫର (ଏନଏଫଓ) ଜରିଆରେ ମୋଟ ୧୭,୮୦୦ କୋଟି ଟଙ୍କା (ପ୍ରାୟ ୨.୧ ବିଲିୟନ ଡଲାର) ରୁ ଅଧିକ ନିବେଶ ହାସଲ କରିଛି। କମ୍ପାନୀ ପକ୍ଷରୁ ତିନୋଟି ନଗଦ/ଋଣ ମ୍ୟୁଚୁଆଲ୍ ଫଣ୍ଡ ଶୁଭାରମ୍ଭ କରାଯାଇଥିଲା। ଏଥିରେ ଅନ୍ତର୍ଭୁକ୍ତ ରହିଥିଲା ଜିଓବ୍ଲାକରକ ଓଭରନାଇଟ୍ ଫଣ୍ଡ, ଜିଓବ୍ଲାକରକ ଲିକ୍ୱିଡ୍ ଫଣ୍ଡ ଏବଂ ଜିଓବ୍ଲାକରକ ମନି ମାର୍କେଟ୍ ଫଣ୍ଡ। ଅଫର ଅବଧି ମଧ୍ୟରେ ୯୦ ରୁ ଅଧିକ ସଂସ୍ଥାଗତ ନିବେଶକ ଏବଂ ୬୭,୦୦୦ ରୁ ଅଧିକ ବ୍ୟକ୍ତିବିଶେଷ ଏହି ପାଣ୍ଠିରେ ନିବେଶ କରିଛନ୍ତି।
ଜିଓବ୍ଲାକରକ୍ ଆସେଟ୍ ମ୍ୟାନେଜମେଣ୍ଟ କମ୍ପାନୀ ହେଉଛି ଜିଓ ଫାଇନାନ୍ସିଆଲ୍ ସର୍ଭିସେସ୍ ଲିମିଟେଡ୍ (ଜେଏଫଏସଏଲ) ଏବଂ ବ୍ଲାକରକ୍ ଇଙ୍କର ଏକ ମିଳିତ ଉଦ୍ୟୋଗ। ଏହି ନୂତନ ପାଣ୍ଠି ଅଫର୍, ଜୁନ୍ ୩୦ ରେ ଆରମ୍ଭ ହୋଇଥିଲା, ୦୨ ଜୁଲାଇ, ୨୦୨୫ ରେ ବନ୍ଦ ହୋଇଥିଲା। ନୂତନ ପାଣ୍ଠି ଅଫର୍ ଭାରତର ନଗଦ/ଋଣ ପାଣ୍ଠି କ୍ଷେତ୍ରରେ ସର୍ବବୃହତ ଥିଲା, ଯାହା ଦେଶର ୪୭ ଟି ଫଣ୍ଡ ହାଉସ ମଧ୍ୟରେ ଜିଓବ୍ଲାକରକ ଆସେଟ୍ ମ୍ୟାନେଜମେଣ୍ଟକୁ ଶ୍ରେଷ୍ଠ ୧୫ ଟି ସମ୍ପତ୍ତି ପରିଚାଳନା କମ୍ପାନୀ ମଧ୍ୟରେ ସ୍ଥାନିତ କରିଛି।
ଜିଓବ୍ଲାକରକ୍ ଆସେଟ୍ ମ୍ୟାନେଜମେଣ୍ଟର ପରିଚାଳନା ନିର୍ଦ୍ଦେଶକ ଏବଂ ସିଇଓ ସିଡ୍ ସ୍ୱାମୀନାଥନ୍ କହିଛନ୍ତି: “ଆମର ପ୍ରଥମ ଏନଏଫଓକୁ ସଂସ୍ଥାଗତ ଏବଂ ଖୁଚୁରା ନିବେଶକଙ୍କଠାରୁ ଉତ୍ସାହଜନକ ପ୍ରତିକ୍ରିୟା ମିଳିଛି। ଏହା ଜିଓବ୍ଲାକରକ ଆସେଟ୍ ମ୍ୟାନେଜମେଣ୍ଟର ନିବେଶ ଦର୍ଶନ, ରିସ୍କ ପରିଚାଳନା କ୍ଷମତା ଏବଂ ଡିଜିଟାଲ୍-ପ୍ରଥମ ଦୃଷ୍ଟିକୋଣକୁ ପ୍ରଦର୍ଶିତ କରୁଛି। ଏହା ଭାରତର ବିକଶିତ ହେଉଥିବା ନିବେଶ ପରିଦୃଶ୍ୟରେ ଏକ ଶକ୍ତି ଭାବରେ ଉଭା ହେବା ଦିଗରେ ଏକ ଦୃଢ଼ ପଦକ୍ଷେପ।”
ଜିଓବ୍ଲାକରକ୍ ଆସେଟ୍ ମ୍ୟାନେଜମେଣ୍ଟ କମ୍ପାନୀ ଖୁଚୁରା ନିବେଶକଙ୍କୁ ଆକର୍ଷିତ କରିବା ପାଇଁ ଏକ ‘ଆକାଉଣ୍ଟ ଖୋଲିବା ପଦକ୍ଷେପ’ ମଧ୍ୟ ଆରମ୍ଭ କରିଛି। ଏହି ପଦକ୍ଷେପ ଅନବୋର୍ଡିଂକୁ ସରଳ କରିବା ପାଇଁ ଡିଜାଇନ୍ କରାଯାଇଛି। ଏହି ଉପାୟରେ, ଜଣେ ଗ୍ରାହକ ଜିଓ ଫାଇନାନ୍ସ ଆପ୍ ମାଧ୍ୟମରେ କିଛି ମିନିଟ୍ ମଧ୍ୟରେ ନିବେଶ ପାଇଁ ନିଜର ଆକାଉଣ୍ଟ ସୃଷ୍ଟି କରିପାରିବେ।