ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣରେ ଜଡିତ ତିନି ଜଣ ଆତଙ୍କବାଦୀଙ୍କୁ ସୁରକ୍ଷା ବାହିନୀ ନିପାତ କରିଛନ୍ତି। ଆଜି ସଂସଦରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏହା ନିଶ୍ଚିତ କରିଛନ୍ତି। ଜମ୍ମୁ ଓ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା ଏହି ସଫଳତା ଉପରେ ଖୁସି ବ୍ୟକ୍ତ କରିଛନ୍ତି। ସେ କହିଛନ୍ତି ଯେ, ଯଦି ସେମାନଙ୍କୁ ନିପାତ କରାଯାଇଛି, ତେବେ ଏହା ଏକ ଭଲ କଥା। ସେମାନେ ଏକ ଶିକ୍ଷା ପାଇଛନ୍ତି ଯେ, ଆତଙ୍କବାଦ କେବେ ସଫଳ ହୋଇପାରିବ ନାହିଁ।
ନ୍ୟାସନାଲ କନଫରେନ୍ସ ମୁଖ୍ୟ ଫାରୁକ ଅବଦୁଲ୍ଲା କହିଛନ୍ତି ଯେ, “ମୁଁ ସେମାନଙ୍କୁ ଦେଖିନାହିଁ ଏବଂ ମୁଁ ଜାଣିନାହିଁ ଯେ ସେମାନେ କିଏ? କେବଳ ସେହି ଲୋକମାନେ ସେମାନଙ୍କୁ ଚିହ୍ନିପାରିବେ ଯେଉଁମାନେ ସେମାନଙ୍କୁ ଦେଖିଛନ୍ତି।”
ଅମିତ ଶାହ ଆତଙ୍କବାଦୀଙ୍କ ନାମ ପ୍ରକାଶ କରିଛନ୍ତି
କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଲୋକସଭାରେ କହିଛନ୍ତି ଯେ, ‘ଅପରେସନ୍ ମହାଦେବ’ରେ ସେନା, ସିଆରପିଏଫ୍ ଏବଂ ଜମ୍ମୁ ଓ କାଶ୍ମୀର ପୋଲିସର ମିଳିତ ଅପରେସନରେ ପହଲଗାମ ଆକ୍ରମଣ କରିଥିବା ତିନି ଜଣ ଆତଙ୍କବାଦୀଙ୍କୁ ଶ୍ରୀନଗର ନିକଟରେ ନିହତ କରାଯାଇଛି।
ନିହତ ଆତଙ୍କବାଦୀଙ୍କୁ ସୁଲେମାନ ଓରଫ ଫୈଜଲ, ଅଫଗାନୀ ଏବଂ ଜିବ୍ରାନ ଭାବରେ ଚିହ୍ନଟ କରାଯାଇଛି। ସୁଲେମାନ ଲସ୍କର-ଏ-ତୈୟବାର ଜଣେ ଏ-ବର୍ଗର କମାଣ୍ଡର ଥିଲା, ଅଫଗାନି ମଧ୍ୟ ଲସ୍କରର ଜଣେ ଏ-ବର୍ଗର ଆତଙ୍କବାଦୀ ଥିଲା ଏବଂ ଜିବ୍ରାନ ମଧ୍ୟ ଜଣେ କୁଖ୍ୟାତ ଆତଙ୍କବାଦୀ ଥିଲା।
ଅମିତ ଶାହ କହିଛନ୍ତି, “ପହଲଗାମର ବେସେରନ୍ ଉପତ୍ୟକାରେ ଆମ ନାଗରିକଙ୍କ ହତ୍ୟାରେ ସମ୍ପୃକ୍ତ ଏହି ତିନି ଜଣ ଆତଙ୍କବାଦୀ ନିହତ ହୋଇଛନ୍ତି। ମୁଁ ଗୃହ ଏବଂ ସମଗ୍ର ଦେଶ ପକ୍ଷରୁ ସେନାର ପାରା ୪, CRPF ଏବଂ ଜମ୍ମୁ-କାଶ୍ମୀର ପୋଲିସର ସମସ୍ତ ସୈନିକଙ୍କୁ ଧନ୍ୟବାଦ ଜଣାଉଛି। ଆତଙ୍କବାଦୀ ଆକ୍ରମଣ ପରେ ଏହି ଆତଙ୍କବାଦୀମାନେ ସୀମା ପାର ନକରନ୍ତି ତାହା ନିଶ୍ଚିତ କରିବା ପାଇଁ ପ୍ରୟାସ କରାଯାଇଥିଲା।”