ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି, ନୂଆଦିଲ୍ଲୀ ଯଶୋଭୂମିଠାରେ ଏସିଆର ସର୍ବବୃହତ ଟେଲିକମ୍, ଗଣମାଧ୍ୟମ ଏବଂ ପ୍ରଯୁକ୍ତିବିଦ୍ୟା କାର୍ଯ୍ୟକ୍ରମ ‘ଇଣ୍ଡିଆ ମୋବାଇଲ୍ କଂଗ୍ରେସ’ (ଆଇଏମସି) ୨୦୨୫ର ୯ମ ସଂସ୍କରଣକୁ ଉଦଘାଟନ କରିଛନ୍ତି। ଇଣ୍ଡିଆ ମୋବାଇଲ୍ କଂଗ୍ରେସର ସ୍ୱତନ୍ତ୍ର ସଂସ୍କରଣରେ ଉପସ୍ଥିତ ସମସ୍ତ ବିଶିଷ୍ଟ ବ୍ୟକ୍ତିଙ୍କୁ ସ୍ୱାଗତ କରି ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ, ଅନେକ ଷ୍ଟାର୍ଟଅପ୍ ଆର୍ଥିକ ଠକେଇ ନିବାରଣ, କ୍ୱାଣ୍ଟମ୍ ଯୋଗାଯୋଗ, ୬ଜି, ଅପ୍ଟିକାଲ୍ ଯୋଗାଯୋଗ ଏବଂ ସେମିକଣ୍ଡକ୍ଟର ସମେତ ଗୁରୁତ୍ୱପୂର୍ଣ୍ଣ ବିଷୟବସ୍ତୁ ଉପରେ ଉପସ୍ଥାପନା କରିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ, ଏପରି ଗୁରୁତ୍ୱପୂର୍ଣ୍ଣ ବିଷୟଗୁଡ଼ିକ ଉପରେ ଉପସ୍ଥାପନା ଦେଖିବା ଦ୍ୱାରା, ଭାରତର ପ୍ରଯୁକ୍ତିବିଦ୍ୟା ଭବିଷ୍ୟତ ସକ୍ଷମ ହାତରେ ଥିବା ତାଙ୍କ ବିଶ୍ୱାସ ଆହୁରି ଦୃଢ଼ ହୁଏ। ସେ ଏହି କାର୍ଯ୍ୟକ୍ରମ ଏବଂ ସମସ୍ତ ନୂତନ ପଦକ୍ଷେପ ପାଇଁ ଶୁଭକାମନା ଜଣାଇଥିଲେ।
ପ୍ରଧାନମନ୍ତ୍ରୀ କହିଛନ୍ତି, ଇଣ୍ଡିଆ ମୋବାଇଲ୍ କଂଗ୍ରେସ କେବଳ ଯେ, ମୋବାଇଲ୍ ଏବଂ ଟେଲିକମ୍ ଠାରୁ ବିକଶିତ ହୋଇଛି ଏହା ନୁହେଁ, ବରଂ କିଛି ବର୍ଷ ମଧ୍ୟରେ ଏସିଆର ସର୍ବବୃହତ ଡିଜିଟାଲ୍ ପ୍ରଯୁକ୍ତିବିଦ୍ୟା ପ୍ଲାଟଫର୍ମ ଭାବରେ ଉଭା ହୋଇଛି । ସେ ପଚାରିଥିଲେ ଯେ, ଏହି ସଫଳତା କାହାଣୀ କିପରି ଲେଖାଗଲା ଏବଂ ଏହାକୁ କିଏ ଆଗେଇ ନେଲା? ସେ ଦୃଢ ଭାବରେ କହିଛନ୍ତି ଯେ, ଏହା ଭାରତର ପ୍ରଯୁକ୍ତି-ଜ୍ଞାନୀ ମନୋଭାବ, ଯୁବଶକ୍ତିର ନେତୃତ୍ୱ ଓ ଦେଶର ପ୍ରତିଭାର ଶକ୍ତିରେ ଗଢ଼ିଉଠିଛି।
ପ୍ରଧାନମନ୍ତ୍ରୀ କହିଛନ୍ତି ଯେ ଦେଶର ସମ୍ଭାବନା ପ୍ରତି ସରକାରଙ୍କ ଦୃଢ଼ ସମର୍ଥନ ଯୋଗୁଁ ଏହି ଅଭିବୃଦ୍ଧି ସମ୍ଭବ ହୋଇଛି, ଏହା ନବସୃଜନକାରୀ ଏବଂ ଷ୍ଟାର୍ଟଅପ୍ସ ଦ୍ୱାରା ପରିଚାଳିତ ହୋଇଛି। ସେ ଟେଲିକମ୍ ପ୍ରଯୁକ୍ତି ବିକାଶ ପାଣ୍ଠି ଏବଂ ଡିଜିଟାଲ୍ କମ୍ୟୁନିକେସନ୍ସ ଇନୋଭେସନ୍ସ ସ୍କୋୟାର ଭଳି ପଦକ୍ଷେପଗୁଡ଼ିକର ଉଲ୍ଲେଖ କରିଛନ୍ତି, ଯାହା ମାଧ୍ୟମରେ ଷ୍ଟାର୍ଟଅପ୍ସକୁ ପାଣ୍ଠି ଯୋଗାଇ ଦିଆଯାଉଛି। ପ୍ରଧାନମନ୍ତ୍ରୀ କହିଛନ୍ତି ଯେ, ସରକାର ଉତ୍ପାଦ ବିକାଶକୁ ସକ୍ଷମ କରିବା ପାଇଁ ୫ଜି, ୬ଜି, ଉନ୍ନତ ଅପ୍ଟିକାଲ୍ ଯୋଗାଯୋଗ ଏବଂ ଟେରା-ହର୍ଟଜ୍ ଭଳି ପ୍ରଯୁକ୍ତିବିଦ୍ୟା ନିମନ୍ତେ ପରୀକ୍ଷଣ ପ୍ରଣାଳୀ ପାଇଁ ଆର୍ଥିକ ସହାୟତା ପ୍ରଦାନ କରୁଛନ୍ତି। ସେ ଗୁରୁତ୍ୱାରୋପ କରିଛନ୍ତି ଯେ, ଷ୍ଟାର୍ଟଅପ୍ସ ଓ ପ୍ରମୁଖ ଗବେଷଣା ପ୍ରତିଷ୍ଠାନ ମଧ୍ୟରେ ସହଭାଗୀତାକୁ ସହଜ କରାଯାଉଛି ଏବଂ ସରକାରୀ ସହଯୋଗରେ, ଭାରତୀୟ ଶିଳ୍ପ, ଷ୍ଟାର୍ଟଅପ୍ସ ଏବଂ ଶିକ୍ଷାନୁଷ୍ଠାନଗୁଡ଼ିକ ବିଭିନ୍ନ କ୍ଷେତ୍ରରେ ସହାୟତା କରୁଛନ୍ତି। ସେ ଉଲ୍ଲେଖ କରିଛନ୍ତି ଯେ, ଭାରତ ପ୍ରତ୍ୟେକ ଦିଗରେ ଅଗ୍ରଗତି କରୁଛି – ସ୍ୱଦେଶୀ ପ୍ରଯୁକ୍ତିବିଦ୍ୟା ବିକାଶ ଓ ସ୍କେଲିଂ, ଗବେଷଣା ଏବଂ ବିକାଶ ମାଧ୍ୟମରେ ବୌଦ୍ଧିକ ସମ୍ପଦ ସୃଷ୍ଟି କରିବା ତଥା ବିଶ୍ୱ ମାନଦଣ୍ଡରେ ଯୋଗଦାନ ଦେବା। ସେ ଆହୁରି ମଧ୍ୟ କହିଛନ୍ତି ଯେ, ଏହି ପ୍ରୟାସଗୁଡ଼ିକ ଭାରତକୁ ବିଶ୍ୱ ସ୍ତରରେ ଏକ ପ୍ରଭାବଶାଳୀ ପ୍ଲାଟଫର୍ମ ଭାବରେ ସ୍ଥାନିତ କରିଛି।
ପ୍ରଧାନମନ୍ତ୍ରୀ କହିଛନ୍ତି ଯେ, ଇଣ୍ଡିଆ ମୋବାଇଲ୍ କଂଗ୍ରେସ ଏବଂ ଟେଲିକମ୍ କ୍ଷେତ୍ରରେ ଭାରତର ସଫଳତା ଏକ ଆତ୍ମନିର୍ଭରଶୀଳ ଭାରତର ଦୃଷ୍ଟିକୋଣର ଶକ୍ତିକୁ ପ୍ରଦର୍ଶନ କରେ। ସେ ମନେ ପକାଇଛନ୍ତି ଯେ, କିପରି ‘ମେକ୍ ଇନ୍ ଇଣ୍ଡିଆ’ ଦୃଷ୍ଟିକୋଣକୁ ସନ୍ଦେହ ଚକ୍ଷୁରେ ଦେଖୁଥିବା କେତେଜଣ ଥରେ ଉପହାସ କରିଥିଲେ, ଯେଉଁମାନେ ଭାରତର ପ୍ରଯୁକ୍ତିବିଦ୍ୟା ଦ୍ୱାରା ଉନ୍ନତ ଉତ୍ପାଦ ଉତ୍ପାଦନ କରିବାର କ୍ଷମତା ଉପରେ ସନ୍ଦେହ କରୁଥିଲେ। ପୂର୍ବ ଶାସନ ସମୟରେ ନୂତନ ପ୍ରଯୁକ୍ତିବିଦ୍ୟା ଗ୍ରହଣ କରିବାରେ ଦଶନ୍ଧି ଧରି ବିଳମ୍ବ ହୋଇଥିବା କଥା ଉଲ୍ଲେଖ କରି ଶ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ, ଦେଶ ନିର୍ଣ୍ଣାୟକ ଭାବରେ ପ୍ରତିକ୍ରିୟା ଦେଇଛି। ସେ ଉଲ୍ଲେଖ କରିଛନ୍ତି ଯେ, ୨ଜି ସହିତ ସଂଘର୍ଷ କରୁଥିବା ଦେଶ ଏବେ ପ୍ରାୟ ପ୍ରତ୍ୟେକ ଜିଲ୍ଲାରେ ୫ଜି କଭରେଜ୍ ପାଇଛି ଏବଂ ଏହା ସହିତ ସେ ଆହୁରି କହିଛନ୍ତି ଯେ, ୨୦୧୪ ପରଠାରୁ ଇଲେକ୍ଟ୍ରୋନିକ୍ସ ଉତ୍ପାଦନ ଛଅ ଗୁଣ ବୃଦ୍ଧି ପାଇଛି, ମୋବାଇଲ୍ ଫୋନ୍ ଉତ୍ପାଦନ ଅଠାଇଶ ଗୁଣ ବୃଦ୍ଧି ପାଇ, ଏହାର ରପ୍ତାନୀ ୧୨୭ ଗୁଣ ବୃଦ୍ଧି ପାଇଛି। ଗତ ଦଶନ୍ଧି ମଧ୍ୟରେ, ମୋବାଇଲ୍ ଫୋନ୍ ଉତ୍ପାଦନ କ୍ଷେତ୍ର ଲକ୍ଷ ଲକ୍ଷ ପ୍ରତ୍ୟକ୍ଷ ନିଯୁକ୍ତି ସୁଯୋଗ ସୃଷ୍ଟି କରିଛି। ସେ ଏକ ପ୍ରମୁଖ ସ୍ମାର୍ଟଫୋନ୍ କମ୍ପାନୀର ସାମ୍ପ୍ରତିକ ତଥ୍ୟ ଉଦ୍ଧୃତ କରିଛନ୍ତି ଯାହା ଦର୍ଶାଉଛି ଯେ, ୪୫ ଭାରତୀୟ କମ୍ପାନୀ ବର୍ତ୍ତମାନ ଏହାର ଯୋଗାଣ ଶୃଙ୍ଖଳର ଅଂଶ ହୋଇପାରିଛି, କେବଳ ଗୋଟିଏ କମ୍ପାନୀରୁ ପ୍ରାୟ ୩.୫ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରୁଛନ୍ତି। ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଯେ, ଦେଶବ୍ୟାପୀ ଅନେକ କମ୍ପାନୀ ବ୍ୟାପକ ପରିମାଣରେ ଉତ୍ପାଦନ କରୁଛନ୍ତି ଏବଂ ଯେତେବେଳେ ପରୋକ୍ଷ ସୁଯୋଗ ଉପଲବ୍ଧ ହୁଏ, ନିଯୁକ୍ତି ସଂଖ୍ୟା ଆହୁରି ଗୁରୁତ୍ୱପୂର୍ଣ୍ଣ ହୋଇଯାଏ।
“ଭାରତ ସମ୍ପ୍ରତି ଏହାର ମେଡ୍-ଇନ୍-ଇଣ୍ଡିଆ ୪ଜି ଷ୍ଟାକ୍ ଆରମ୍ଭ କରିଛି, ଯାହା ଏକ ପ୍ରମୁଖ ସ୍ୱଦେଶୀ ସଫଳତା। ଏହା ସହିତ ଭାରତ ବର୍ତ୍ତମାନ ବିଶ୍ୱସ୍ତରରେ ଏହି କ୍ଷମତା ଥିବା ପାଞ୍ଚଟି ଦେଶର ତାଲିକାରେ ସାମିଲ ହୋଇଛି”। ଶ୍ରୀ ମୋଦୀ ଏହାକୁ ଡିଜିଟାଲ୍ ଆତ୍ମନିର୍ଭରଶୀଳତା ଏବଂ ପ୍ରଯୁକ୍ତିବିଦ୍ୟା ସ୍ୱାଧୀନତା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଯେ, ସ୍ୱଦେଶୀ ୪ଜି ଏବଂ ୫ଜି ଷ୍ଟାକ୍ ମାଧ୍ୟମରେ, ଭାରତ କେବଳ ନିର୍ବିଘ୍ନ ସଂଯୋଗ ସୁନିଶ୍ଚିତ କରିବ ନାହିଁ ବରଂ ଏହାର ନାଗରିକମାନଙ୍କୁ ଉଚ୍ଚ-ଗତି ଇଣ୍ଟରନେଟ୍ ଏବଂ ନିର୍ଭରଯୋଗ୍ୟ ସେବା ମଧ୍ୟ ପ୍ରଦାନ କରିବ।
ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ଯେ, ୪ଜି ଷ୍ଟାକ୍ ଆରମ୍ଭ ହେବା ଦିନ, ସାରା ଦେଶରେ ପ୍ରାୟ ଏକ ଲକ୍ଷ ୪ଜି ଟାୱାର ଏକକାଳୀନ ସକ୍ରିୟ ହୋଇଥିଲା, ଯାହା ଦୁଇ କୋଟିରୁ ଅଧିକ ଲୋକଙ୍କୁ ଭାରତର ଡିଜିଟାଲ୍ ଆନ୍ଦୋଳନର ଅଂଶ ହେବାକୁ ସକ୍ଷମ କରିଥିଲା। ସେ ଗୁରୁତ୍ୱାରୋପ କରିଛନ୍ତି ଯେ, ଏହି କ୍ଷେତ୍ରଗୁଡ଼ିକ ମଧ୍ୟରୁ ଅନେକ ଦୂରବର୍ତ୍ତୀ ଏବଂ ପୂର୍ବରୁ ଡିଜିଟାଲ୍ ସଂଯୋଗୀକରଣରେ ପଛରେ ପଡିଥିଲେ, ଏବଂ ବର୍ତ୍ତମାନ ଇଣ୍ଟରନେଟ୍ ସୁବିଧା ଏହିପରି ସମସ୍ତ ଅଞ୍ଚଳରେ ପହଞ୍ଚିପାରିଛି।
ଶ୍ରୀ ମୋଦୀ ଭାରତର ମେଡ୍-ଇନ୍-ଇଣ୍ଡିଆ ୪ଜି ଷ୍ଟାକର ଆଉ ଏକ ପ୍ରମୁଖ ବୈଶିଷ୍ଟ୍ୟ ଏହାର ରପ୍ତାନୀ ପ୍ରସ୍ତୁତି ଉପରେ ଆଲୋକପାତ କରିଛନ୍ତି। ସେ ମନ୍ତବ୍ୟ ଦେଇଛନ୍ତି ଯେ, ଏହି ସ୍ୱଦେଶୀ ଷ୍ଟାକ୍ ଭାରତର ବ୍ୟବସାୟିକ ପ୍ରସାର ପାଇଁ ଏକ ମାଧ୍ୟମ ଭାବରେ କାର୍ଯ୍ୟ କରିବ ଏବଂ ‘ଭାରତ ୬ଜି ଭିଜନ ୨୦୩୦’ ହାସଲ କରିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେବ।
ଗତ ଦଶନ୍ଧି ମଧ୍ୟରେ ଭାରତର ପ୍ରଯୁକ୍ତିବିଦ୍ୟା ବିପ୍ଳବ ଦ୍ରୁତ ଗତିରେ ଆଗକୁ ବଢ଼ିଛି ଏବଂ ଏହି ଗତି ଓ ପରିମାଣ ସହିତ ସମନ୍ୱୟ ରଖିବା ପାଇଁ ଏକ ଦୃଢ଼ ଆଇନଗତ ଓ ଆଧୁନିକ ନୀତିଗତ ଭିତ୍ତିଭୂମିର ବହୁ ଦିନରୁ ଆବଶ୍ୟକତା ରହିଥିଲା ବୋଲି ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ଦୂରସଂଚାର ଆଇନ ପ୍ରଣୟନ ଉପରେ ଆଲୋକପାତ କରିଥିଲେ। ଯାହା ପୁରୁଣା ଭାରତୀୟ ଟେଲିଗ୍ରାଫ୍ ଆଇନ ଏବଂ ଭାରତୀୟ ୱାୟାରଲେସ୍ ଟେଲିଗ୍ରାଫ୍ ଆଇନକୁ ବଦଳାଇଥିଲା। ଏହି ଆଇନଗୁଡ଼ିକ ବର୍ତ୍ତମାନର ଅନେକ ନାଗରିକଙ୍କ ଜନ୍ମ ପୂର୍ବରୁ ପ୍ରଚଳିତ ହୋଇଥିଲା। ଶ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି ଯେ, ୨୧ଶତାବ୍ଦୀର ଦୃଷ୍ଟିଭଙ୍ଗୀ ସହ ସମନ୍ୱିତ ଏକ ନୂତନ ଫ୍ରେମ୍ୱର୍କ ଗଠନ ଅତ୍ୟାବଶ୍ୟକ ଥିଲା, ଯାହାକୁ ସରକାର ସଫଳତାର ସହିତ କାର୍ଯ୍ୟକାରୀ କରିଛନ୍ତି। ନୂତନ ଆଇନ ଏକ ନିୟାମକ ଭାବରେ ନୁହେଁ ବରଂ ଏକ ସହାୟକ ଭାବରେ କାର୍ଯ୍ୟ କରୁଛି। ଏହା ଫଳରେ ଅନୁମୋଦନ ପ୍ରକ୍ରିୟା ସହଜ ହୋଇଛି ଏବଂ “ରାଇଟ୍-ଅଫ୍-ୱେ” ଅନୁମତି ଏବେ ଅଧିକ ଦ୍ରୁତ ଗତିରେ ପ୍ରଦାନ କରାଯାଉଛି। ଏହାର ପରିଣାମ ସ୍ୱରୂପ, ଶ୍ରୀ ମୋଦୀ କହିଛନ୍ତି ଯେ, ଫାଇବର ଏବଂ ଟାୱାର ନେଟୱାର୍କ ସମ୍ପ୍ରସାରଣ ତ୍ୱରାନ୍ୱିତ ହେଉଛି, ବ୍ୟବସାୟ କରିବାର ସହଜତା ବୃଦ୍ଧି କରୁଛି, ନିବେଶକୁ ଉତ୍ସାହିତ କରୁଛି ଏବଂ ଶିଳ୍ପକୁ ଦୀର୍ଘମିଆଦୀ ଯୋଜନା କରିବାର ସକ୍ଷମତା ଯୋଗାଇଦେଉଛି।
ବିଶ୍ୱ ଭାରତର ସମ୍ଭାବନାକୁ କ୍ରମଶଃ ସ୍ୱୀକାର କରୁଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଆଲୋକପାତ କରିଛନ୍ତି ଯେ, ଭାରତ ବିଶ୍ୱସ୍ତରରେ ଦ୍ୱିତୀୟ ବୃହତ୍ତମ ଟେଲିକମ୍ ବଜାର ଏବଂ ଦ୍ୱିତୀୟ ବୃହତ୍ତମ 5G ବଜାରର ସ୍ଥାନ ଅଧିକାର କରିଛି। ଭାରତରେ, ବଜାର ଶକ୍ତି ସହିତ, ମାନବଶକ୍ତି, ଗତିଶୀଳତା ଏବଂ ଏକ ପ୍ରଗତିଶୀଳ ମାନସିକତା ରହିଛି। ଶ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି ଯେ, ଯେତେବେଳେ ମାନବଶକ୍ତିର କଥା ଉଠେ, ଭାରତ ମାନଦଣ୍ଡ ଏବଂ ଦକ୍ଷତା ଉଭୟ ପ୍ରଦର୍ଶନ କରେ। ସେ ଉଲ୍ଲେଖ କରିଛନ୍ତି ଯେ, ଭାରତ ବିଶ୍ୱର ସର୍ବାଧିକ ଯୁବ ଜନସଂଖ୍ୟାର ଭୂମି, ଏବଂ ଏହି ପିଢ଼ିକୁ ଏକ ବିଶାଳ ସ୍ତରରେ ପ୍ରଶିକ୍ଷଣ ଦିଆଯାଉଛି। ସେ ମନ୍ତବ୍ୟ ଦେଇଛନ୍ତି ଯେ, ଆଜି ଭାରତରେ ବିଶ୍ୱର ସବୁଠାରୁ ଦ୍ରୁତ ଗତିରେ ବଢ଼ୁଥିବା ବିକାଶଶୀଳ ଜନସଂଖ୍ୟା ରହିଛି।
ଭାରତରେ ଏକ ଜିବି ୱାୟାରଲେସ୍ ଡାଟାର ମୂଲ୍ୟ ବର୍ତ୍ତମାନ ଏକ କପ୍ ଚା’ର ମୂଲ୍ୟ ଅପେକ୍ଷା କମ୍ ବୋଲି ଉଲ୍ଲେଖ କରି, ଶ୍ରୀ ମୋଦୀ ଆଲୋକପାତ କରିଛନ୍ତି ଯେ, ଭାରତର ପ୍ରତି ଉପଭୋକ୍ତା ଡାଟା ବ୍ୟବହାରରେ ଅଗ୍ରଣୀ ରାଷ୍ଟ୍ରମାନଙ୍କ ମଧ୍ୟରେ ସ୍ଥାନ ପାଇଛି, ଯାହା ସୂଚିତ କରେ ଯେ, ଡିଜିଟାଲ୍ ସଂଯୋଗୀକରଣ କେବଳ ଏକ ସୁବିଧା କିମ୍ବା ବିଳାସ ନୁହେଁ ବରଂ ଦୈନ୍ୟନ୍ଦିନ ଜୀବନର ଏକ ଅବିଚ୍ଛେଦ୍ୟ ଅଂଶ।
ଶ୍ରୀ ମୋଦୀ କହିଛନ୍ତି, “ଭାରତ ଶିଳ୍ପ ଏବଂ ନିବେଶ ବିସ୍ତାର ଉପରେ କେନ୍ଦ୍ରିତ ମାନସିକତା ସହିତ ନେତୃତ୍ୱ ନେଉଛି”। ଦେଶର ଗଣତାନ୍ତ୍ରିକ ବ୍ୟବସ୍ଥା, ସରକାରଙ୍କ ସ୍ୱାଗତଯୋଗ୍ୟ ଆଭିମୁଖ୍ୟ ଏବଂ ବ୍ୟବସାୟ କରିବାର ସହଜ ନୀତି ଭାରତକୁ ଏକ ନିବେଶକ-ଅନୁକୂଳ ଗନ୍ତବ୍ୟସ୍ଥଳ ଭାବରେ ପ୍ରତିଷ୍ଠା କରିଛି। ସେ ଭାରତର ଡିଜିଟାଲ ସାର୍ବଜନୀନ ଭିତ୍ତିଭୂମିର ସଫଳତାକୁ ସରକାରଙ୍କ ଡିଜିଟାଲ-ପ୍ରଥମ ମାନସିକତାର ପ୍ରମାଣ ଭାବରେ ଉଲ୍ଲେଖ କରିଛନ୍ତି। ପୂର୍ଣ୍ଣ ଆତ୍ମବିଶ୍ୱାସର ସହିତ, ପ୍ରଧାନମନ୍ତ୍ରୀ ଘୋଷଣା କରିଛନ୍ତି, “ଏହା ନିବେଶ, ନବସୃଜନ ଏବଂ ଭାରତରେ ନିର୍ମାଣ କରିବାର ସର୍ବୋତ୍ତମ ସମୟ!” ସେ ନିଶ୍ଚିତ କରିଛନ୍ତି ଯେ, ଉତ୍ପାଦନ ଠାରୁ ସେମିକଣ୍ଡକ୍ଟର, ମୋବାଇଲରୁ ଇଲେକ୍ଟ୍ରୋନିକ୍ସ ଏବଂ ବିଭିନ୍ନ କ୍ଷେତ୍ରରେ ଷ୍ଟାର୍ଟଅପ୍ ପର୍ଯ୍ୟନ୍ତ, ଭାରତ ସମ୍ଭାବନା ଏବଂ ଶକ୍ତିରେ ପରିପୂର୍ଣ୍ଣ।
ଲାଲକିଲ୍ଲାରୁ ତାଙ୍କର ସାମ୍ପ୍ରତିକ ସ୍ୱାଧୀନତା ଦିବସ ଅଭିଭାଷଣକୁ ମନେ ପକାଇ, ଯେଉଁଠାରେ ସେ ଚଳିତ ବର୍ଷକୁ ପ୍ରମୁଖ ସଂସ୍କାର ଏବଂ ପରିବର୍ତ୍ତନକାରୀ ପରିବର୍ତ୍ତନର ଏକ ଭାବରେ ଘୋଷଣା କରିଥିଲେ, ପ୍ରଧାନମନ୍ତ୍ରୀ କହିଛନ୍ତି ଯେ, ସଂସ୍କାରର ଗତି ତ୍ୱରାନ୍ୱିତ ହେଉଛି। ଏହାଦ୍ୱାରା ଶିଳ୍ପ ଏବଂ ନବସୃଜନକାରୀଙ୍କ ଦାୟିତ୍ୱ ମଧ୍ୟ ବୃଦ୍ଧି ପାଉଛି। ସେ ଷ୍ଟାର୍ଟଅପ୍ ଏବଂ ଯୁବ ନବସୃଜନକାରୀଙ୍କ ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରିଛନ୍ତି। ଯେଉଁମାନେ ସେମାନଙ୍କର ଗତି ଓ ବିପଦକୁ ସାମ୍ନା କରିବାର କ୍ଷମତା ମାଧ୍ୟମରେ ନୂତନ ପଥ ଏବଂ ସୁଯୋଗ ସୃଷ୍ଟି କରୁଛନ୍ତି। ଶ୍ରୀ ମୋଦୀ ସନ୍ତୋଷ ପ୍ରକଟ କରିଛନ୍ତି ଯେ, ଚଳିତ ବର୍ଷ, ଇଣ୍ଡିଆ ମୋବାଇଲ୍ କଂଗ୍ରେସ ୫୦୦ ରୁ ଅଧିକ ଷ୍ଟାର୍ଟଅପ୍କୁ ନିମନ୍ତ୍ରଣ କରିଛି। ଯାହା ସେମାନଙ୍କୁ ନିବେଶକ ଏବଂ ବିଶ୍ୱସ୍ତରୀୟ ପରାମର୍ଶଦାତାଙ୍କ ସହ ସଂଯୋଗ ସ୍ଥାପନ ପାଇଁ ମୂଲ୍ୟବାନ ସୁଯୋଗ ପ୍ରଦାନ କରିଛି।
ଏହି କ୍ଷେତ୍ରର ପ୍ରସାରରେ ପ୍ରତିଷ୍ଠିତ ବ୍ୟକ୍ତିତ୍ୱମାନେ ପ୍ରମୁଖ ଭୂମିକା ଗ୍ରହଣ କରିଆସୁଛନ୍ତି ବୋଲି ପୁନରାବୃତ୍ତି କରି ଶ୍ରୀ ମୋଦୀ କହିଛନ୍ତି ଯେ, ଏହି ବ୍ୟକ୍ତିତ୍ୱମାନେ ଦୃଢ଼ ଗବେଷଣା ଓ ବିକାଶ କ୍ଷମତା ଦ୍ୱାରା ସମର୍ଥିତ ହୋଇ ଦେଶର ଅର୍ଥନୀତିକୁ ଆଗକୁ ବଢ଼ାଇବା ପାଇଁ ସ୍ଥିରତା, ପରିମାଣ ଏବଂ ଦିଗ ପ୍ରଦାନ କରୁଛନ୍ତି। “ଷ୍ଟାର୍ଟଅପ୍ଗୁଡ଼ିକର ଗତି ଏବଂ ପ୍ରତିଷ୍ଠିତ ବ୍ୟକ୍ତିତ୍ୱମାନଙ୍କ ଏକତ୍ର କାମ କରିବା ଦ୍ୱାରା ଭାରତ ସଶକ୍ତ ହୋଇପାରିବ” ବୋଲି ପ୍ରଧାନମନ୍ତ୍ରୀ ଦୃଢୋକ୍ତି ପ୍ରକାଶ କରିଛନ୍ତି।
ଶିଳ୍ପର ବିଭିନ୍ନ ପ୍ରମୁଖ କ୍ଷେତ୍ରର ଯୁବ ଷ୍ଟାର୍ଟଅପ୍ ଉଦ୍ଭାବକ, ଶିକ୍ଷାବିତ୍, ଗବେଷଣା ସମ୍ପ୍ରଦାୟ ଏବଂ ନୀତି ନିର୍ଦ୍ଧାରକମାନଙ୍କ ମଧ୍ୟରେ ସହଯୋଗମୂଳକ ପ୍ରୟାସର ଆବଶ୍ୟକତା ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଆଶା ପ୍ରକାଶ କରିଥିଲେ ଯେ, ଇଣ୍ଡିଆ ମୋବାଇଲ୍ କଂଗ୍ରେସ ଭଳି ପ୍ଲାଟଫର୍ମ ଏପରି ଆଲୋଚନା ପାଇଁ ପ୍ରଭାବଶାଳୀ ଉତ୍ପ୍ରେରକ ଭାବରେ କାର୍ଯ୍ୟ କରିବ। ସେ ମୋବାଇଲ୍, ଟେଲିଯୋଗାଯୋଗ, ଇଲେକ୍ଟ୍ରୋନିକ୍ସ ଏବଂ ବ୍ୟାପକ ପ୍ରଯୁକ୍ତିବିଦ୍ୟା ଇକୋସିଷ୍ଟମରେ ବିଶ୍ୱ ଯୋଗାଣ ଶୃଙ୍ଖଳ ବାଧା ପ୍ରତି ଧ୍ୟାନ ଦେବାକୁ ଆହ୍ୱାନ କରିଥିଲେ, କହିଥିଲେ ଯେ ଯେଉଁଠାରେ ବିଶ୍ୱ ବ୍ୟାଘାତ ଅଛି, ସେଠାରେ ଭାରତ ସମାଧାନ ପ୍ରଦାନ କରିବାର ସୁଯୋଗ ପାଇଛି। ଶ୍ରୀ ମୋଦୀ ସେମିକଣ୍ଡକ୍ଟର ଉତ୍ପାଦନର ଉଦାହରଣ ଦେଇଥିଲେ, ଯେଉଁଠାରେ କ୍ଷମତା ପୂର୍ବରୁ କିଛି ଦେଶ ମଧ୍ୟରେ ସୀମିତ ଥିଲା, ଏବଂ ବିଶ୍ୱ ଏବେ ବିବିଧତା ଖୋଜୁଛି। ସେ କହିଥିଲେ ଯେ ଭାରତ ଏହି ଦିଗରେ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି, ସାରା ଦେଶରେ ଦଶଟି ସେମିକଣ୍ଡକ୍ଟର ଉତ୍ପାଦନ ୟୁନିଟ୍ କାର୍ଯ୍ୟ କରୁଛି।
ପ୍ରଧାନମନ୍ତ୍ରୀ କହିଥିଲେ ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ରରେ, ବିଶ୍ୱସ୍ତରୀୟ କମ୍ପାନୀଗୁଡ଼ିକ ଏପରି ନିର୍ଭରଯୋଗ୍ୟ ସହଯୋଗୀ ଖୋଜୁଛନ୍ତି ଯେଉଁମାନେ ସ୍କେଲ୍ ଏବଂ ନିର୍ଭରଯୋଗ୍ୟତା ଉଭୟ ପ୍ରଦାନ କରିପାରିବେ। ସେ ଆହୁରି ମଧ୍ୟ କହିଥିଲେ ଯେ ବିଶ୍ୱକୁ ଦୂରସଂଚାର ନେଟୱାର୍କ ଉପକରଣର ଡିଜାଇନ୍ ଏବଂ ନିର୍ମାଣ ପାଇଁ ମଧ୍ୟ ନିର୍ଭରଯୋଗ୍ୟ ସହଯୋଗୀ ଆବଶ୍ୟକ। ପ୍ରଧାନମନ୍ତ୍ରୀ ପଚାରିଥିଲେ ଯେ ଭାରତୀୟ କମ୍ପାନୀଗୁଡ଼ିକ କାହିଁକି ବିଶ୍ୱସ୍ତରୀୟ ଯୋଗାଣକାରୀ ଏବଂ ଡିଜାଇନ୍ ସହଯୋଗୀ ହୋଇପାରିବେ ନାହିଁ?
ପ୍ରଧାନମନ୍ତ୍ରୀ ମନ୍ତବ୍ୟ ଦେଇଛନ୍ତି ଯେ, ମୋବାଇଲ୍ ଚିପସେଟ୍, ବ୍ୟାଟେରୀ, ଡିସପ୍ଲେ ଏବଂ ସେନ୍ସର ଭଳି ଉପାଦାନର ଦେଶ ଭିତରେ ଉତ୍ପାଦନ ବୃଦ୍ଧି ପାଇବା ଆବଶ୍ୟକ। ସେ କହିଛନ୍ତି ଯେ, ବିଶ୍ୱ ପୂର୍ବ ଅପେକ୍ଷା ଅଧିକ ତଥ୍ୟ ନିରୂପଣ କରୁଛି, ଯାହା ସଂରକ୍ଷଣ, ସୁରକ୍ଷା ଏବଂ ସାର୍ବଭୌମତ୍ୱର ପ୍ରସଙ୍ଗକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କରୁଛି। ଡାଟା ସେଣ୍ଟର ଏବଂ କ୍ଲାଉଡ୍ ଭିତ୍ତିଭୂମି ଉପରେ କାର୍ଯ୍ୟକୁ ଆଗକୁ ବଢ଼ାଇ ଭାରତ ଏକ ବିଶ୍ୱସ୍ତରୀୟ ତଥ୍ୟ ପେଣ୍ଠସ୍ଥଳ ଭାବରେ ଉଭା ହେବାର ସମ୍ଭାବନା ରଖିଛି। ପ୍ରଧାନମନ୍ତ୍ରୀ ଆଶା ପ୍ରକାଶ କରିଛନ୍ତି ଯେ, ଆଗାମୀ ଅଧିବେଶନଗୁଡ଼ିକ ସମାନ ଆଭିମୁଖ୍ୟ ଏବଂ ଧ୍ୟାନକୈନ୍ଦିକ ଅଧିବେଶନ ହେବ। ସେ ସମଗ୍ର ଇଣ୍ଡିଆ ମୋବାଇଲ୍ କଂଗ୍ରେସ କାର୍ଯ୍ୟକ୍ରମ ପାଇଁ ସମସ୍ତ ଅଂଶଗ୍ରହଣକାରୀଙ୍କୁ ପୁଣି ଥରେ ଶୁଭକାମନା ଜଣାଇଛନ୍ତି। ଏହି କାର୍ଯ୍ୟକ୍ରମରେ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତିଙ୍କ ମଧ୍ୟରେ କେନ୍ଦ୍ରମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ, ଡକ୍ଟର ଚନ୍ଦ୍ରଶେଖର ପେମାସାନି ଉପସ୍ଥିତ ଥିଲେ।
ପୃଷ୍ଠଭୂମି
ଡିଜିଟାଲ ପରିବର୍ତ୍ତନ ଏବଂ ସାମାଜିକ ପ୍ରଗତି ପାଇଁ ନବସୃଜନକୁ ଉପଯୋଗ କରିବା ପ୍ରତି ଭାରତର ପ୍ରତିବଦ୍ଧତାକୁ ଉଜାଗର କରି, ଟେଲିକମ୍ୟୁନିକେସନ୍ ବିଭାଗ (DoT) ଏବଂ ସେଲ୍ୟୁଲାର ଅପରେଟର୍ସ ଆସୋସିଏସନ୍ ଅଫ୍ ଇଣ୍ଡିଆ (COAI) ଦ୍ୱାରା ମିଳିତ ଭାବରେ ଆୟୋଜିତ ଇଣ୍ଡିଆ ମୋବାଇଲ୍ କଂଗ୍ରେସ (IMC) ୨୦୨୫ ଅକ୍ଟୋବର ୮ରୁ ୧୧ପର୍ଯ୍ୟନ୍ତ “ଇନୋଭେଟ୍ ଟୁ ଟ୍ରାନ୍ସଫର୍ମ” ବିଷୟବସ୍ତୁ ଉପରେ ଅନୁଷ୍ଠିତ ହେବ।
ଇଣ୍ଡିଆ ମୋବାଇଲ୍ କଂଗ୍ରେସ୍ ୨୦୨୫ ଟେଲିକମ୍ୟୁନିକେସନ୍ ଏବଂ ଉଦୀୟମାନ ପ୍ରଯୁକ୍ତିବିଦ୍ୟା କ୍ଷେତ୍ରରେ ସମ୍ପ୍ରତି ଅଗ୍ରଗତିକୁ ପ୍ରଦର୍ଶନ କରିବ, ଯାହା ବିଶ୍ୱସ୍ତରୀୟ ନେତା, ନୀତି ନିର୍ଦ୍ଧାରକ, ଶିଳ୍ପ ବିଶେଷଜ୍ଞ ଏବଂ ନବସୃଜନକାରୀଙ୍କୁ ଏକତ୍ର କରିବ। ଏହି କାର୍ଯ୍ୟକ୍ରମରେ ଅପ୍ଟିକାଲ୍ କମ୍ୟୁନିକେସନ୍ସ, ଟେଲିକମ୍ରେ ସେମିକଣ୍ଡକ୍ଟର, କ୍ୱାଣ୍ଟମ୍ କମ୍ୟୁନିକେସନ୍ସ, 6G ଏବଂ ଠକେଇ ବିପଦ ସୂଚକ ସମେତ ପ୍ରମୁଖ ବିଷୟବସ୍ତୁ ଉପରେ ଚର୍ଚ୍ଚା କରାଯିବ, ଯାହା ପରବର୍ତ୍ତୀ ପିଢ଼ିର ସଂଯୋଗୀକରଣ, ଡିଜିଟାଲ୍ ସାର୍ବଭୌମତ୍ୱ, ସାଇବର ଠକେଇ ନିବାରଣ ଏବଂ ବିଶ୍ୱସ୍ତରୀୟ ପ୍ରଯୁକ୍ତିବିଦ୍ୟା ନେତୃତ୍ୱ କ୍ଷେତ୍ରରେ ଭାରତର ରଣନୈତିକ ପ୍ରାଥମିକତାକୁ ପ୍ରତିଫଳିତ କରିବ।
ଏହି କାର୍ଯ୍ୟକ୍ରମରେ ୧୫୦ ରୁ ଅଧିକ ଦେଶର ୧.୫ ଲକ୍ଷରୁ ଅଧିକ ଦର୍ଶକ, ୭ ହଜାରରୁ ଅଧିକ ଅନ୍ତର୍ଜାତୀୟ ପ୍ରତିନିଧି, ଏବଂ ୪ ଶହରୁ ଅଧିକ କମ୍ପାନୀମାନେ ଅଂଶଗ୍ରହଣ କରିବା ଆଶା କରାଯାଉଛି। ୫ଜି/୬ଜି, କୃତ୍ରିମ ବୁଦ୍ଧିମତା, ସ୍ମାର୍ଟ ମୋବିଲିଟି, ସାଇବର ସୁରକ୍ଷା, କ୍ୱାଣ୍ଟମ୍ କମ୍ପ୍ୟୁଟିଂ, ଏବଂ ସବୁଜ ପ୍ରଯୁକ୍ତିବିଦ୍ୟା ଭଳି କ୍ଷେତ୍ରରେ ୧୬ ଶହରୁ ଅଧିକ ନୂତନ ବ୍ୟବହାର–କେସ୍ ପ୍ରଦର୍ଶିତ କରାଯିବ, ଯାହା ଶହେରୁ ଅଧିକ ସେସନ୍ ଏବଂ ୮ ଶହରୁ ଅଧିକ ବକ୍ତାଙ୍କ ମାଧ୍ୟମରେ ପ୍ରଦର୍ଶିତ ହେବ।
ଇଣ୍ଡିଆ ମୋବାଇଲ୍ କଂଗ୍ରେସ୍ ୨୦୨୫ ମଧ୍ୟ ଅନ୍ତର୍ଜାତୀୟ ସହଯୋଗ ଉପରେ ଗୁରୁତ୍ୱ ଦିଏ, ଯେଉଁଥିରେ ଜାପାନ, କାନାଡା, ଯୁକ୍ତରାଜ୍ୟ, ରୁଷିଆ, ଆୟରଲ୍ୟାଣ୍ଡ ଏବଂ ଅଷ୍ଟ୍ରିଆର ପ୍ରତିନିଧିମାନେ ଅଂଶଗ୍ରହଣ କରିବେ।