ଭୁବନେଶ୍ବର: ଆଜି ଅପରାହ୍ନରେ ଭୁବନେଶ୍ବରରେ ତାଣ୍ଡବ ସୃଷ୍ଟି କରିଛି କାଳବୈଶାଖୀ। ତୁହାକୁ ତୁହା ପବନ ସାଙ୍ଗକୁ ବିଜୁଳି ଘଡଘଡି ପୁରା ରାଜଧାନୀର ଛାତି ଥରାଇଦେଲା। ଚାରିଆଡି ପ୍ରବଳ ଗୁଳୁଗୁଳି ଚାଲିଥିବା ବେଳେ ହଠାତ ଭୁବନେଶ୍ବର ଆକାଶରେ ଘୋଟିଗଲା ଅନ୍ଧାର। ଚାହୁଚାହୁଁ ପବନ ସହିତ ମାଡିଆସିଲା ବର୍ଷା। ମାତ୍ର ଅଳ୍ପ ସମୟ ମଧ୍ୟରେ ଭୁବନେଶ୍ବରର ବିଭିନ୍ନ ଅଞ୍ଚଳରେ ବଡବଡ ଗଛ ଉପୁଡି ପଡିଛି। ଏପରିକି କେତେକ ସ୍ଥାନରେ ବିଦ୍ୟୁତ ଖୁଣ୍ଟ ମଧ୍ୟ ଉପୁଡି ପଡିଛି।
ବିଶେଷ କରି ଜୟଦେବ ବିହାର ଛକ, ଶାସ୍ତ୍ରୀ ନଗର, ସହୀଦନଗର, ଖାରବେଳ ନଗର, ଏୟାରପୋର୍ଟ ଅଞ୍ଚଳ ପ୍ରମୁଖ ସ୍ଥାନରେ ଗଛ ଉପୁଡି ପଡିଛି। କେତେକ ସ୍ଥାନରେ କାର ଏବଂ ଅଟୋ ଉପରେ ଗଛ ଉପୁଡି ପଡିଥିବାର ଦେଖାଯାଇଛି। ଖବର ପାଇ ଅଗ୍ନଶମ ବାହିନୀ ତୁରନ୍ତ ଘଟଣାସ୍ଥଳକୁ ଯାଇ ଗଛ କାଟି ରାସ୍ତା ସଫା କରୁଛନ୍ତି। ଶାସ୍ତ୍ରୀ ନଗରରେ ଦୁଇଟି ବିଦ୍ୟୁତ ଖୁଣ୍ଟ ଉପୁଡି ପଡିଥିବାର ଜଣାପଡିଛି।
ଦୀର୍ଘଦିନ ଧରି ପ୍ରବଳ ଗୁଳୁଗୁଳି ସହିତ ଖର ଅସହ୍ୟ ହୋଇପଡିଥିବା ବେଳେ ଆଜି ସେଥିରୁ ନିସ୍ତାର ମିଳିଥିବା ବେଳେ କାଳବୈଶାଖୀ କାଳ ସାଜିଥିଲା।