ଭୋପାଳ: ମଧ୍ୟପ୍ରଦେଶରେ ସରକାରୀ ଚାକିରି ଆଶାୟୀ ଯୁବକ ଏବଂ ରାଜ୍ୟ କର୍ମଚାରୀଙ୍କ ପାଇଁ ବଡ଼ ଖବର। ମୁଖ୍ୟମନ୍ତ୍ରୀ ମୋହନ ଯାଦବଙ୍କ ନେତୃତ୍ୱାଧୀନ ସରକାର ୨୩ ବର୍ଷ ଧରି ଚାଲିଆସୁଥିବା ‘ଦୁଇ ସନ୍ତାନ’ ନିୟମକୁ ହଟାଇବାକୁ ନିଷ୍ପତ୍ତି ନେଇଛି। ଏହି ନିଷ୍ପତ୍ତି ସହିତ ଏବେ ଦୁଇରୁ ଅଧିକ ସନ୍ତାନ ଥିବା ବ୍ୟକ୍ତିମାନେ ମଧ୍ୟ ସରକାରୀ ଚାକିରି ପାଇଁ ଆବେଦନ କରିପାରିବେ।
ରାଜ୍ୟ ସରକାର ସାଧାରଣ ପ୍ରଶାସନ ବିଭାଗକୁ ମଧ୍ୟପ୍ରଦେଶ ସିଭିଲ୍ ସେବା ନିୟମରୁ ସେହି ବ୍ୟବସ୍ଥା ହଟାଇବାକୁ ନିର୍ଦ୍ଦେଶ ଦେଇଛନ୍ତି, ଯାହା ଦୁଇରୁ ଅଧିକ ସନ୍ତାନ ଥିବା ପ୍ରାର୍ଥୀଙ୍କୁ ସିଧାସଳଖ ନିଯୁକ୍ତି ଓ ବିଭାଗୀୟ ନିଯୁକ୍ତିରୁ ଅଯୋଗ୍ୟ ଘୋଷଣା କରୁଥିଲା। ସରକାର ସ୍ପଷ୍ଟ କରିଛନ୍ତି ଯେ ସମ୍ବନ୍ଧିତ ଡ୍ରାଫ୍ଟକୁ ସରକାରୀ ପୋର୍ଟାଲରୁ ମଧ୍ୟ ହଟାଇ ଦିଆଯାଇଛି।
ଉଲ୍ଲେଖନୀୟ ଯେ, 2001 ମସିହାରେ ଜନସଂଖ୍ୟା ନିୟନ୍ତ୍ରଣ ଉଦ୍ଦେଶ୍ୟରେ ଏହି ନିୟମ ଲାଗୁ କରାଯାଇଥିଲା। ଏହା ଅନୁଯାୟୀ, 26 ଜାନୁଆରୀ 2001 ପରେ ଯାହାଙ୍କର ଦୁଇରୁ ଅଧିକ ଜୀବିତ ସନ୍ତାନ ଥିଲା, ସେମାନଙ୍କୁ ସରକାରୀ ଚାକିରି ପାଇଁ ଅଯୋଗ୍ୟ ବୋଲି ବିବେଚନା କରାଯାଉଥିଲା। ଏହି ସର୍ତ୍ତ ସିଧାସଳଖ ନିଯୁକ୍ତି ସହିତ ପଦୋନ୍ନତି କ୍ଷେତ୍ରରେ ମଧ୍ୟ ଲାଗୁ ହୁଏଥିଲା।
ଏହି ନିୟମ କେବଳ ଚାକିରି ପ୍ରାର୍ଥୀଙ୍କ ପାଇଁ ସୀମିତ ନଥିଲା। ମଧ୍ୟପ୍ରଦେଶ ସିଭିଲ୍ ସର୍ଭିସେସ୍ (ଆଚରଣ) ନିୟମ, 1965 ଅନୁଯାୟୀ, ସରକାରୀ କର୍ମଚାରୀଙ୍କ ଦୁଇରୁ ଅଧିକ ସନ୍ତାନ ଥିଲେ ତାହାକୁ ଅନୁଶାସନହୀନତା ବୋଲି ଧରାଯାଉଥିଲା। କଟ୍-ଅଫ୍ ତାରିଖ ପରେ ତୃତୀୟ ସନ୍ତାନ ହେଲେ ବିଭାଗୀୟ କାର୍ଯ୍ୟାନୁଷ୍ଠାନର ସମ୍ଭାବନା ମଧ୍ୟ ରହୁଥିଲା।
ସରକାରଙ୍କ ମତାନୁସାରେ, ସମୟ ସହିତ ଏହି ନିୟମ ଅପ୍ରାସଙ୍ଗିକ ହୋଇପଡ଼ିଥିଲା। କର୍ମଚାରୀ ସଂଗଠନ ଓ ବିଭିନ୍ନ ମହଳ ଦୀର୍ଘଦିନ ଧରି ଏହାର ସମୀକ୍ଷା ଦାବି କରୁଥିଲେ। ସେମାନଙ୍କ ଯୁକ୍ତି ଥିଲା ଯେ ଏହି ବ୍ୟବସ୍ଥା ଅନେକ ପରିବାର ପାଇଁ ଅନାବଶ୍ୟକ ଅସୁବିଧା ସୃଷ୍ଟି କରୁଥିଲା ଏବଂ ଚାକିରି ସୁଯୋଗକୁ ସୀମିତ କରୁଥିଲା।
ରାଜ୍ୟ ସରକାର ନୂତନ ଡ୍ରାଫ୍ଟ ପ୍ରସ୍ତୁତ କରି ଜନମତ ପାଇଁ ଜାରି କରିବ। ଚୂଡ଼ାନ୍ତ ବିଜ୍ଞପ୍ତି ପ୍ରକାଶ ପର୍ଯ୍ୟନ୍ତ ‘ଦୁଇ ସନ୍ତାନ’ ସର୍ତ୍ତକୁ କାର୍ଯ୍ୟକାରୀ ରଖାଯିବ ନାହିଁ।
ଏହି ନିଷ୍ପତ୍ତି ହଜାର ହଜାର ସରକାରୀ ଚାକିରି ଆଶାୟୀଙ୍କ ପାଇଁ ନୂଆ ସୁଯୋଗର ଦ୍ୱାର ଖୋଲିଛି। ସେଥିସହିତ, ମଧ୍ୟପ୍ରଦେଶର ନିଯୁକ୍ତି ନୀତିରେ ଏହାକୁ ଏକ ବଡ଼ ଓ ଐତିହାସିକ ପରିବର୍ତ୍ତନ ବୋଲି ଦେଖାଯାଉଛି।