ଚେନ୍ନାଇ: ତାମିଲନାଡୁର ଗ୍ୟାସ୍ ଲିକ୍ ଦୁର୍ଘଟଣାରୁ ପୁଣି ଥରେ ଆସିଛି ଦୁଃଖଦ ଖବର। ଚିକିତ୍ସାଧୀନ ଅବସ୍ଥାରେ କେନ୍ଦୁଝର ଜିଲ୍ଲାର ଜାମୁନି ଜୁଆଙ୍ଗଙ୍କ ମୃତ୍ୟୁ ହୋଇଛି। ଏହା ସହ ଏହି ଭୟାବହ ଦୁର୍ଘଟଣାରେ ପ୍ରାଣ ହରାଇଥିବା ଓଡ଼ିଆ ଶ୍ରମିକଙ୍କ ସଂଖ୍ୟା ୬ରେ ପହଞ୍ଚିଛି।
ଏହାପୂର୍ବରୁ କେନ୍ଦୁଝରର ୫ ଜଣ ଶ୍ରମିକଙ୍କ ମୃତ୍ୟୁ ଘଟିଥିଲା। ଗୁରୁତର ଅବସ୍ଥାରେ ହସ୍ପିଟାଲରେ ଜୀବନ ସହ ସଂଘର୍ଷ କରୁଥିବା ଜାମୁନି ଜୁଆଙ୍ଗ ଶେଷରେ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଛନ୍ତି।
ନୂଆ ମୃତ୍ୟୁ ଖବର ପହଞ୍ଚିବା ପରେ କେନ୍ଦୁଝରରେ ଶୋକର ଛାୟା ଖେଳିଯାଇଛି। ମୃତକଙ୍କ ପରିବାରରେ କାନ୍ଦବୋବାଳି ପଡ଼ିଥିବା ବେଳେ ଗାଁର ପରିବେଶ ଭାରାକ୍ରାନ୍ତ ହୋଇପଡ଼ିଛି। ପରିବାର ଲୋକେ ସରକାରଙ୍କ ସହାୟତା ଓ ନ୍ୟାୟ ଦାବି କରିଛନ୍ତି।
ଅନ୍ୟପଟେ ଦୁର୍ଘଟଣାରେ ଆହତ ହୋଇଥିବା ଆଉ ୪ ଜଣ ଓଡ଼ିଆ ଶ୍ରମିକ ବିଭିନ୍ନ ହସ୍ପିଟାଲରେ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି। ସେମାନଙ୍କ ସ୍ୱାସ୍ଥ୍ୟାବସ୍ଥାକୁ ନେଇ ପରିବାର ସଦସ୍ୟଙ୍କ ମଧ୍ୟରେ ଚିନ୍ତା ବଢ଼ିଚାଲିଛି। ସମସ୍ତଙ୍କ ପ୍ରାର୍ଥନା ଏବେ ସେମାନଙ୍କ ଶୀଘ୍ର ଆରୋଗ୍ୟ ଉପରେ କେନ୍ଦ୍ରିତ।
ଏହି ମର୍ମନ୍ତୁଦ ଘଟଣା ପରେ ଶିଳ୍ପାଞ୍ଚଳରେ ଶ୍ରମିକ ସୁରକ୍ଷା ଏବଂ କାରଖାନାଗୁଡ଼ିକର ସୁରକ୍ଷା ମାନଦଣ୍ଡକୁ ନେଇ ପୁଣିଥରେ ପ୍ରଶ୍ନ ଉଠିଛି। ଗ୍ୟାସ୍ ଲିକ୍ ଭଳି ଘଟଣା ବାରମ୍ବାର ଘଟୁଥିବାବେଳେ ସୁରକ୍ଷା ବ୍ୟବସ୍ଥାର ତ୍ରୁଟି ଓ ଅବହେଳାକୁ ନେଇ ବିଭିନ୍ନ ମହଲରେ ଚର୍ଚ୍ଚା ଜୋର ଧରିଛି।
ଦୁର୍ଘଟଣାର କାରଣ ଏବଂ ଦାୟୀ ବ୍ୟକ୍ତିଙ୍କ ବିରୋଧରେ କି ପଦକ୍ଷେପ ନିଆଯିବ, ତାହା ଉପରେ ଏବେ ସମସ୍ତଙ୍କ ନଜର ରହିଛି।