କଟକ: ଦୁର୍ନୀତି ବିରୋଧୀ ଅଭିଯାନରେ ବଡ଼ ସଫଳତା ପାଇଛି ଭିଜିଲାନ୍ସ। ସିଏଡ଼ିଏ (CDA) ବିଭାଗର କାର୍ଯ୍ୟନିର୍ବାହୀ ଯନ୍ତ୍ରୀ ପଦ୍ମଲୋଚନ ନାୟକଙ୍କ ବିରୋଧରେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ ଆସିବା ପରେ ଭିଜିଲାନ୍ସ ପକ୍ଷରୁ ବ୍ୟାପକ ଚଢ଼ାଉ ଆରମ୍ଭ ହୋଇଛି।
ସୂଚନା ଅନୁଯାୟୀ, କଟକ, ସମ୍ବଲପୁର, ମାଲକାନଗିରି ଓ ବାଲେଶ୍ୱର ସମେତ ମୋଟ ୭ଟି ସ୍ଥାନରେ ଏକକାଳୀନ ରେଡ୍ ଚାଲିଛି। ଭିଜିଲାନ୍ସ ଟିମ୍ ପଦ୍ମଲୋଚନ ନାୟକଙ୍କ ବାସଭବନ, କାର୍ଯ୍ୟାଳୟ ଓ ଅନ୍ୟାନ୍ୟ ସମ୍ପୃକ୍ତ ସ୍ଥାନରେ ତଲାସି ଚଳାଇଥିବା ଜଣାପଡ଼ିଛି।
ଏହି ହାଇ-ପ୍ରୋଫାଇଲ୍ ଚଢ଼ାଉରେ ୪ ଜଣ ଡିଏସପି, ୧୩ ଜଣ ଇନ୍ସପେକ୍ଟର ଓ ୭ ଜଣ ଏଏସଆଇ ସମେତ ଏକ ବଡ଼ ଭିଜିଲାନ୍ସ ଟିମ୍ ସାମିଲ ହୋଇଛନ୍ତି। ଜବତ ଦଲିଲ, ବ୍ୟାଙ୍କ ଖାତା, ସମ୍ପତ୍ତି ସମ୍ବନ୍ଧୀୟ କାଗଜପତ୍ର ଓ ଅନ୍ୟାନ୍ୟ ଆର୍ଥିକ ତଥ୍ୟର ଯାଞ୍ଚ କରାଯାଉଛି।
ଅନ୍ୟପଟେ, ପଦ୍ମଲୋଚନ ନାୟକଙ୍କୁ ଭିଜିଲାନ୍ସ ଅଧିକାରୀମାନେ ଜେରା କରୁଥିବା ସୂଚନା ମିଳିଛି। ତାଙ୍କ ଆୟ ଓ ସମ୍ପତ୍ତିର ଉତ୍ସ ନେଇ ପଚରାଉଚରା ଚାଲିଛି।
ଚଢ଼ାଉ ସମୟରେ କେତେ ପରିମାଣର ସମ୍ପତ୍ତି, ନଗଦ ଟଙ୍କା, ସୁନା ଅଳଙ୍କାର କିମ୍ବା ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ଠାବ କରାଯାଇଛି, ସେନେଇ ଭିଜିଲାନ୍ସ ପକ୍ଷରୁ ଏପର୍ଯ୍ୟନ୍ତ କୌଣସି ସରକାରୀ ସୂଚନା ଜାରି କରାଯାଇନାହିଁ।
ତେବେ ଏହି ଚଢ଼ାଉ ପରେ ପ୍ରଶାସନିକ ମହଲରେ ଚର୍ଚ୍ଚା ଜୋର ଧରିଥିବାବେଳେ, ଭିଜିଲାନ୍ସର ତଦନ୍ତରୁ ଆଗାମୀ ଦିନରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିପାରେ ବୋଲି ଅନୁମାନ କରାଯାଉଛି।